YEREMIA 26 - Allah Wene Fano Wene Hupla Inane

Yeremia hele warogo waluk wene pilingitarek oba kwisukwa wene

¹ Hun Yosia amlogo Yoyakim a'nogo o Yehuda ba raja menlagaikhesik werek kwelek aremnogo,

² Tuhan ane an noba ikhi logolik, ”Hat he An nawi solombonma andoma laluk he afuni Yehuda mene An nobaget hilingisuogeluk weri'lagwi mene andoma inoba hane ino. Haren igin mene iluk An nen yagahesigin mene andoma re mondogat yagaisano. Haren we endebat halok ogo ekhe pelabu fuk.

³ A'nogo yagaisagain andiba re it inunggulenu andi mene nen An nane inesanggo fanorogo holfembik, iren inaniniba mondok weak hokhorogo hilingiri'lagwi mene andoma palfugunem, An nen it inobabut hilingiri'lagwi andi higithogo it inoba hilingisigin mene iluk wenggelogo figirik welagi mene a'nogo sebelogo figi hanogo,” iluk yaganete.

⁴ Tuhan nen an yaganeti logolik he yi'nogo yagaisano ikhe, ”An Tuhan nen wene melalhinobagakhi logolik, hiren An nane hologo hilingitik, wene yi'nogo ti'nogo hilingiti logoino iluk yagaisasigi mene omanogo higithogo hilingitik, ugunogo iluk yagahisasigi.

⁵ Nen, ekhe re hiren ogo An namingmingengge nabi hundik-handik hinambit lakfisa waga lagi mene nen yagahisugu mene andoma holhi logogun fano. Oba nen he hiren it inane ugunem he hinesanggo holu hinabit mondok welagep.

⁶ Hiren we hinendawinggen omamerek aple omanogo nek hilingiti logogun halok he, o wene kabogeti logolik, An nobaget hilingiti lagep oba ari re An nen o Silo hilingfesigi hakhogo hilingfagain o. Ma re yi afuni ti afuni inunggulenu lombok kweangma welagaikharek inaben he o Yerusalem enu igisogo homan fisikhi logogun,” ikhe.

⁷ A'nogo ikhemo re an nen o Tuhan awi elonggoma nen wene isigi mene omanogo mondogat he ap imam inom, nabi inom, afuni mondogaren inom inesanggo holha.

⁸ An nen wene Tuhan nen mondogat yagaisano iluk ikhe mene omanogo nane kikobok he, iren an hele watnafasik inane amit-mit lagakhi logolik he, ”Hat he hoasugun o!

⁹ Haren hailo mondok legengge Tuhan enuba hane ikhi logolik, o Tuhan awi yi re o Silo hilinglaga hak asigin igik, nen o kota yi mondogat he leget foumo re afuni ekhe logogun lek igik, ikhi lagen omare nenahalok?” Iluk ikhi logolik he an nebe afuni hokhorogo nen haningisogo kwelaknobagaga.

¹⁰ A'nogo hilingitama re it ap Yehuda mene pemerintah inobaget yabu legoma hilingitarek inap omanogo nen holhasik he, it inebe hun raja awi silimo nen weak-weak wulibi wagaukwasik he o Tuhan awi wuri'mo omanogo nen kwe ambe palek enu Pintu Gerbang Baru ikhi lagaukwaba aremnogo hurek welagaikha.

¹¹ A'nogo hurek were'ma it imam inom, nabi inomen he ap yabu legoma hilingitarek mene inom, afuni we mene omanogo inoba yagaisikhi logolik he, ”Ap yi nen he o kota yi asigin mene faget eloukhogo ikhemo re at ebere unggum oba fembik ebe pinggi wasugun o. Hit hinebe mondogen he hinesanggo holhep enek anggigi,” iluk ikhi lagaukwa.

¹² A'nogo ugunem an nen yagaisikhi logolik, ”An he Tuhan nen mimingnafi logolik o Tuhan awi inom kota yi inom asigin mene faget yagaisa lan o, iluk la'nobagai wagama an nen yagahisugunem holhep anggigi.

¹³ Halok he hit hinebe welagep aple inom, hinobabut hilingiti lagep aple inom, fanorogo hebelimbik he, At Tuhan nen hilingisigin iluk wenggelhe mene andi sugwi asuakhogo re, hiren hineisena Tuhan Allah ane hologo nek hilingiti logoni o.

¹⁴ An nebe faget he hit hinenggiba logolik, hinendawimo anggegep higithogo nek hilingnobagagun fano.

¹⁵ Oba nen he hinendawinggen fanorogo wenggel hano, hiren an pinggi noasugun halok he, hit inom afuni o kota yi mene mondogat inom he ap weak hilingiti'lek kwelek wasugun mene andi faget ambisangma enek hogoin o. Wene yi re Tuhan nen an la'nobagai waga logolik he wene a'nogo ineluet fei lan o, iluk yaganetemo igiri'mo nen enggere,” iluk yagaisasigi.

¹⁶ A'nogo yagaisasigimo re it ap pemerintah ba yabu legoma hilingitarek inap omanogo nen he imam inom nabi inom omanogo inoba yagaisikhi logolik, ”Ap yi re nit nineisena Tuhan Allah enuba ugunem he, ebe pinggi wasugun he elo'lego,” iluk isukwa.

¹⁷ A'nogo isukwama nen he afuni inunggulenu andi mene melalinafi lagaukwa mene fena nen he it inelokhoma menlasi lagaukwasik afuni kaboksek mene omanogo inoba yagaisikhi logolik,

¹⁸ ”Hun Hizkia o Yehuda ba raja mendek were'ma aremnogore nabi Mikha o Moresyet mene a'nogo nen wene Tuhan Omame Mondok Hokho mene a'nogo nen isikhe mene afuni inoba yagaisikhi logolik, Sion he yabu kweang mogolherek andi hakhogo mogoligin, Yerusalem he o meisalek kabok lagaikharek hakhogo hilinglasigin, nen Tuhan andom Horek oba a'nogo re engga nek kurogo taik igin o, iluk yagaisikhi lagaikhe.

¹⁹ Oba nen he raja Hizkia inom afuni Yehuda mene inomen he Mikha ebe watukwa lek. Athe Hizkia ailo agasik he Tuhan nen endawit nabuageluk kinotikhe. Andiba re Tuhan nen inoasigin iluk wenggelogo welaga mene a'nogo lisogo wanhe. Nen, yogondak he niren ninonggwarek ninoba weak hokho mene fakhouwogeluk hilingiti lago andire higira?” iluk aga.

²⁰ Nen, ekhe re an nen hilingitigi hakhogo ap amu mene ekhe nen ogore o kota yi inom, it inunggulenu yi mene inom, Tuhan enuba asigin mene faget iluk yagaisasikheat. Ap andi enure Uria hun Semaya amlogo awi o Kiryat-Yearim mene a'nogo.

²¹ Raja Yoyakim inom ap sikhe fisogo inap inogogwi perwira inom, nen ap pemerintah inobaget yabu legoma hilingitarek mene inomen he Uria nen ane isikhe mene a'nogo holhukwasik he raja nen ebe wasigin iluk hilingiti laga. Oba nen a'nogo hilingiti laga mene a'nogo faget Uria ailo agaikhesik he heise o Mesir lagaikhe.

²² Oba nen he raja Yoyakim en he Elnatan hun Akbor amlogo a'nogo inom it ekhe fena inom Uria o Mesir were'ma hondosi loageluk lakfisasikhe.

²³ A'nogo mimingisogo lakfisasikhemo re lagaukwasik ebe hondo'luk raja Yoyakim were'ma wagaukwa. Wagaukwama at raja nen Uria ebe pinggi wasuageluk yagaisasikhemo, watukwama re at ebe warek he ap salinafi lagaukwaba omanogo hugisa lagaukwa.

²⁴ Oba nen yogondak an he At Ahikam hun Safan amlogo a'nogo nen lebetniikheba re, an Yeremia nebe afuni nen pinggi noasuageluk it inenggiba faga lek andi.