YEREMIA 25 - Allah Wene Fano Wene Hupla Inane

Selei mene utara fikhiren wesugun isikhe wene

¹ Yoyakim hun Yosia amlogo a'nogo raja menlagaikhesik ferinarek werek kwelek enek he tahun enggaminogonek mene were'ma, Tuhan nen inunggulenu Yehuda mene mondogat faget wene yagaisoageluk an noba yaganete. A'nogo agaikhe sambul andem he at Nebukadnezar o Babel oba inoe raja menlagaikhesik welagaikheba agaikhe.

² An nen he ap inunggulenu Yehuda mene inom afuni Yerusalem mene inom inebe mondogat inoba yagaisikhi logolik,

³ ”Hun Amon amlogo Yosia a'nogo nen o Yehuda ba oma melalinafu werek kwelek 13 tahun agaikheba nen pikhit yogondak huli 23 tahun welago mene arem oba re, Tuhan nen an noba wene yaganetunem he an nen ekhe herakfigi'lek yagahisugu mondok welagi o, oba nen he hiren futfikhi lagep lek andi.

⁴ Tuhan nen ogore hundik-handik At amingmingengge nabi omanogo inayonggo fuluk hit hinambit lakfisa waga laga, oba nen he hiren it inane hologo hilingitik, fut figik, hilingiti lagep legat.

⁵ Iren yagahisikhi logolik, hit hinanggweang Tuhan nen hit inom, hit hinombawi inom hinonggwarek hinanggweang mene asubagaigeluk wokhisasikheba oma logobagaigen he, hit hinobabut haferogo welagik, weak hilingitik hilingiti lagep mene andi herak fisani o, iluk yagahisikhi lagaukwa.

⁶ It nabi-nabi andoma nen he hiren tugwi kembu amu meneba apne wanhik, obaget hilingitik, hilingiti logou fuk, hiren a'nogo hilingisugun oba re Tuhan a'mage kwelafi lagep, iluk yagahisikhi lagaukwa. Nen, hiren Tuhan ane ikherek mene higithogo hilingisugun halok he, Aren unggum hinoba fagain lego,” iluk yagaisikhi lagaukwa.

⁷ Oba nen Tuhan onggwaregen ikhi logolik he, hiren At ane furogo holhi lagep lek ikhe. Hiren he kembu andoma apne wanhi lagep oba re, At anini kwelafunem, hit hinonggwaregenat unggum hinoba fakhikhi lagebo.

⁸ Hiren Tuhan ane holu hinabit welagep oba re At Tuhan Omame Mondok Hokho mene a'nogo nen ikhi logolik,

⁹ ”An nen he it inunggulenu mene o utara fikhit werek mene inebe mondogat inom, nen An namingmingengge Nebukadnezar raja Babel mene a'nogo inom wolinabigin o. A'nogo wolinabimbik he An nen it andi lirinarek he afuni o Yehuda ba werek mene andoma inom, inunggulenu it inera'lukwe werek mene andoma mondogat inom An nen legaphogo fisambik, mondok-mondogat wolelenggenhogo lakfisagain. Afuni ineilenggen isogoin mene nen he inailo nen inamelmel hikhi logogun. iluk An Tuhan nen nane mondogat igi o,” ikhe.

¹⁰ Iren helime inaguni inom lombolisugunem seni isati logolik inane anggilukhogo agarek mene andoma inom, inagaiyegen hilingiti logolik ili'lagwi mene andoma inom he, An nen palfagain. It inaminyak lampu faget ekhe logogin lek, nen it inangge gandum ogore mondogat legasigin.

¹¹ O kweang yi abirengge re An nen wolelenggenhogo weaget fisamo re inane tiring-tereng ugun. It inunggulenu lombok esanggo-esanggo werek mene andoma re raja Babel mene amingmingengge 70 tahun logolik obaget hilingiti logogun.

¹² A'nogo hilingitu logombigen he An nen raja Babel mene inom afuni inunggulenu o andoma mene inomen inaweak hilingiti logogun mene andoma faget unggum wogisagain. O Babel kweang andiba re An nen meisak lambukhogo potfisamo re mondok-mondok faget wolelenggen tagalogo hilingik logouwageluk herakfisamo logogin.

¹³ Babel he An nen enggin mene yi afuni ti afuni inunggulenu lombok inoba fagain iluk wenggelogo figirik, An nen Yeremia bene nen enggin mene inoba asi wesigin mene faget yagaisigi mene mondogat buku yiba palek werek mene andomaba unggum wogosigin.

¹⁴ Afuni Babel mene nen hilingiri'lagwi mene andoma ambisangma re An nen onggo fagain, it he raja-raja inomame werek mene nen inom, inunggulenu hokhondek mene nen inom inamingmingengge hilinginapluk logogun o,” iluk ikhe isikhe.

Allah nen yi afuni ti afuni inunggulenu lombok inoba wene fagain isikhe wene

¹⁵ Tuhan afuni Israel mene ineisena Allah a'nogo nen an noba ikhi logolik, ”Haren iwak anggur amusu An na'mage hinagongge figimo werek mene ari wanin o. Wanimbik he hat hebe An nen yi afuni ti afuni inunggulenu lombok welagaikharekwe andoma lakhobagaumo laluk he, anggur agai ari noageluk yagaisano.

¹⁶ Iren mondogat nunggu halok he An nen weim it inoba lakfei wesigin mene andiba re it talo-talonggeti logolik inendawimo wenggelhu mene mondogat elo'lek asigin,” iluk yaganete.

¹⁷ A'nogo ikhemo re an nen iwak anggur agai hinago a'nogo Tuhan enggiba nen wo'netemo wanhirik he, an nebe Tuhan nen yi afuni ti afuni inunggulenu lombok welagaikharekwe omanogo laluk, an nen it andoma anggur agai a'nogo noageluk hilingiti lagi.

¹⁸ Yerusalem inom, o Yehuda ba nen kota abirengge andoma inom, ap raja-raja inom, kaindek yabu legoma hilingitarek inap inom he an nen anggur agai a'nogo noageluk wogisugunem nunggunem he it inebe re lei mondok pirimhogo esi lek andi higit aga lagaikha. Nen, yogondak huli nen he it inenu igisogo aben homan fisagarek.

^19-26 Nen it afuni fenakwe iwak anggur agai Tuhan nen mene andiba hinagongge nogoin iluk mene a'nogo inenu re yi: raja Mesir mene inom agoromi pegawai inom ap yabu legoma hilingitarek inap andoma inom, afuni Mesir mene mondogat inom, ap pok mene o Mesir oba werek mene andoma inom, ap raja o Us kweang oba werek mene mondogat andoma inom o kota Filistin oba raja-raja werek mene andoma inom, o Askelon, Gaza, Ekron, inap andoma inom, afuni o Asdod oba ineluk werek mene andoma mondogat inom, afuni o Edom, Moab, Amon oba andoma mondogat inom, ap raja-raja o Sidon, Tirus, oba andoma mondogat inom, ap raja i Laut Tengah esanggokwe werek inap andoma mondogat inom, o kota Dedan inom, Tema inom Bus inom andoma, ap inesi horokhogo palharek mene andoma mondogat inom, o Arab oba raja werek mene mondogat inom, ap raja inunggulenu handogalhogo agaum fagaum o leikwe werek mene mondogat inom, o Zimri ba raja werek mene mondogat inom, Elam, Madai ba werek mene inom mondogat andoma, ap raja abel utara fikhit werek inap, horokhogo mene inom, yatkwe mene inom inebe lombok andoma. Nen, yi afuni ti afuni inunggulenu lombok o kweangma welagaikharek mene re anggur agai andi nogoin enek. Nen, ap fem hobuk anggur agai andi wurep kobokhogo nagain mene re raja Babel mene andi.

²⁷ Andi nen Tuhan nen an noba ikhi logolik, ”Haren afuni andoma yagaisikhi logolik, An Tuhan Nomame Mondok Hokho welagirek mene, afuni Israel mene ineisena Allah a'nogo nen he, hit hinebe mondogaren anggur agai hinago andi naluk lugu-lugwi palogo hebak wusuak ikhe o. An nen weim it inoba lakfei wesigin mene andiba nen it inebe warogo hulambethigik taik umo re inambotkwe inelugasugun mondok lego,” ikhe.

²⁸ Nen, hat henggimo nen iwak anggur agai hinago mene andi waluk nunggu aple inabiren hilingitu halok he, Tuhan Omame Mondok Hokho mene a'nogo nen ariginuageluk miming nafemo wokhisikhi lagi o iluk ino.

²⁹ An nen wolelenggen esigin mene andi re An nawi kota ba nen tak erorasigin. Ma re iren anggikhi logolik nit he unggum ninoba asigin lek iluk anggikhi logoinogo. An nen he weim o kweangma yi afuni ti afuni welagaikharekwe andoma mondogat lakfei wesumo re, it he ibi-eberogo nen unggum helogoin o. Iluk An Tuhan Nomame Hokho mene a'nogo nen nane mondogat igi.

³⁰ Yeremia ahwi, An nen hat hoba nane igi mene andem he haren mondogat yagaisano. It inoba yagaisikhi logolik, ”Tuhan ane re pogoroba nen pararak eri'lago o. At ebe werek oba obalik mondok fano hore'ma omanogo nen he againafuri inom weim yabigiluk hum liabi'logo. Ap anggur enggen perelharek oba nen abologet hugunem hilingiterek hak, Aren abologet hamo re yi afuni ti afuni o kweangma welagaikharek mene mondogaren holugun.

³¹ At ane ugu mene re o kweang wurep-wurep andoma mil esi lili'logo. Tuhan nen he yi afuni ti afuni inunggulenu lombok inoba wene paligiluk hilingiri'logo, Afuni mondogat wene inoba figik, kotik imbik he, ap inanini mondogat weak mene re unggum wogisagain,” iluk ugunem higi.

³² Tuhan Omame Mondok Hokho mene a'nogo nen ikhi logolik, ”O kweangma unggut-unggut andoma re sogoi sielu nen abologet hili'lago, enggin-fenggin ekhe inom ekhe inom afuni inunggulenu lombok inoba asi wesigin o,” iluk ugunem higi.

³³ Linggene andi sambul he, afuni Tuhan nen inoasigin mene re o kweangma mondogat wathigik taik ikhi logogun. It andoma faget ekhe le asugun lek, nen waganogo salinabi logoin legat, meneba nen he afuni nen al alengge kweangma kabokhogo herakfisagarek higit asugun.

³⁴ Yago, hit ap kaindek ferinarek welagep mene inom, hit ap gembala lak Tuhan againafuri halinafi lagep mene inom yoma sani! Hit hinebe hinoasigin huli a'nogo arat horogasi wagik, nen longgo uageluk nalek-falek hilinghinobagagin oba a'nogo horogasi wagik, ikhe andi nen he, hinane kwi kwerogo le aga logoni o! Wul ebene limbik lambagengge laga logoni. Hit he iwak kweang meneba fanorogo pugunsek meneba nen kobokhogo pikhi logolik halok ikherek andi hangge asugun.

³⁵ Hit he eberogo nen polokhogo ekhe wulibugun lego.

^36-37 Tuhan aniniba re hit hinunggulenu mene a'nogo mondogat leget hinobagagik, hit hinanggweang mondok fanore'ma a'nogo mondogat weaget fisigik iginmo re, hit he hinendawinggen heiselhik, le weakhogo agik, ikhi logoni o.

³⁸ Mene singa kweang elema nen wulibi wagarek hak, Tuhan nen ogo againafuri unggum wogisageluk andi hakhogo wulibi wagarek. Tuhan a'mage lagaikherek mene inom, weim yaferek mene inom, aniniba weagerinaferek mene inom omanogo o kweang yiba nen hebekhogo re lei esi le'ma hilinglaga.