YEREMIA 23 - Allah Wene Fano Wene Hupla Inane

Tuhan nen abok wene hobuk hilinglasigin mene faget eberek logouwageluk yagaisasikhe wene

^1-2 Tuhan Allah Israel mene ineisena a'nogo nen ikhi logolik, ”Hit afuni ferinarek welagep hinaben An nagainafuri weagerinafik, nalek falek hilingfisigik ikhi lagep mene andoma re alomat lakhikhi logoni o! Hiren he An nagainafuri andoma fanorogo halinafi'lek, we yugunat linggi longgo uageluk herak fisikhi lagebo. A'nogo hilingiti lagep andiba re yogondak he hiren hinaniniba hilingiti lagep mene andi faget An nen unggum wokhisagain o.

³ Oba nen it An nagainafuri mene fena tindelek logogun mene re An nen it huginabi lagain oba andoma nen andogorogo fisa wesigin. It he An nen woginapluk it inanggweang inonggwaregen meneba wesumo re iren tagomangge mene re hokhorogo saga ugun.

⁴ An nen ap it ferinarek werek mene halinafi logouwageluk menfisagain. An nagainafuri re inailo agik, inoak leik etik, ugun lego, nen it inoba mene tem misik iluk ogo ekhe longgo ugun legat. Iluk An Tuhan nen nane mondogat igi,” ikhe.

⁵ Tuhan nen ikhi logolik, ”Inenggi ekhe asi wesigin meneba re An nen ap raja misik ekhe mondok katokhogo hilingiterek mene hun Daud ambisangmangge mene menfagain o. Menfoumo re raja andi nen endawinggen kagalek logolik melalinafik, o kweang mondogat andomaba katokhogo mene nek hilingitik, eberogo mene nek hilingitik ikhi logogin.

⁶ Nen, aren melalinafunem he afuni Yehuda mene re inagap telek logogun, nen afuni Israel mene re inailo lekhogo logogun. Raja andi faget he Tuhan nit ninagap telherek mene ikhi logogun.

⁷ Inenggi ekhe wesigin meneba re afuni An Allah neluk mondok welagirek mene o Mesir en afuni Israel mene woginarek wulibi wagagi mene a'nogo nenuba ekhe hombuk palhi logogun lego,

⁸ athe An Allah neluk mondok welagirek mene kweang misik ekhe abel utara fikhiren inom yi awi ti awi telfol isasigi kwe omanogo nen inom woginarek wulibi wesigin mene andi nenuba hombuk palhi logogun o. Ma re it inebe re inonggwarek inanggweang meneba logogun,” iluk ikhe.

Yeremia nen nabi higithogo hilingitarek lek mene faget isikhe wene

⁹ An nen it nabi faget wene ikhi lagi mene re yi: An nen noak leigeti logolik nendawimo warikhi lagi o. Tuhan ebe inom At ane mondok horek mene andoma inomen he, an nebe ap anggur agai hinago hokhorogo naluk lugu lugwi palharek mene hakhogo a'luk welagi o.

¹⁰ Nit ninanggweang oba oma re afuni Tuhan oba tiphogo hilingiri'lagwi lek mene nek hokhorogo werek. It he inobaharo mene omanogo nek hilingitu logolik inomame a'luk logouwageluk menfisugu mene omanogoba we kwanirogo yugunat hilingiri'lagwi. Tuhan nen homan ikfisugunem he engga o leimo omanogo mondogat pukliok ugunem he, o kweang yi nogo mondogat fong watu werek.

¹¹ Tuhan nen ikhi logolik, ”Nabi inom imam inom he An nane hologo hilingitu aplere mondogat inabiro. An naiba mene ogore iren weak mene hilingitunem isikhi lagi.

¹² Andiba re it inanggwe re elabin sek logolik mondogat mum hikhaksek hilingi'mo re, it ineisok tunghogo warili'lagwi andi. An nen unggum wogisagain oba arat horogasi wagu halok he it inebe alomat fisugu mene lakfei wesigin. Iluk An Tuhan nen nane mondogat igi o,” ikhe.

¹³ Ap nabi o Samaria werek inaben inaweak hilingiri'lagwi mene andoma re An neilenggen mondogat isigi. Iren he Baal enuba ikhi logolik An nagainafuri Israel mene wene inendawinggen nonghong u mene yagaisili'lagwi.

¹⁴ Oba nen he, o Yerusalem oba andoma re it nabi-nabi nen ina'mage mondok weak meneba hilingitunem isigi. Iren he ineranen wene igik, babi hilingitik, afuni weak mene hilingisuageluk onggo palinafik hilingitunem he, ap misik iluk ogo inendawinggen hebelu elo'lek hilingi'mo higi. Ma re An nen it inebe mondogat faget he afuni o Sodom inom Gomora inom inanini mondok hokho mene welagaukwa hakhogo werek yi ambi iluk anggigi.

¹⁵ Andi faget he Tuhan Omame Mondok Hokho mene a'nogo nen ane yi'nogo ikhe, ”Ap nabi o Yerusalem werek mene andoma inoba An nen it nunggu mene re arik weak mene inom, racun ap waterek mene inom, it noageluk wogisagain. Andi re iren hilingik oba afuni o kweangma abirengge omanogo nen An nalong anggaluk legeisogo nobagali'lagwi lek andiba hilingisigin o,” ikhe.

¹⁶ Afuni o Yerusalem werek mene inoba re Tuhan Omame Mondok Hokho mene a'nogo nen ane ikhi logolik, ”Hiren he it nabi nen yi'nogo ti'nogo iluk yagahisagarek mene andoma inane holu fugo. Iren ili'lagwi mene andoma re An nen ini iluk igirek mene re fuk, oba nen he, it he inonggwarek inendawimo nen wenggelogo ili'lagwi.

¹⁷ Afuni An nane holi'lagwi lek mene inoba iren ikhi logolik, ”Hat hagap telasigin,” igik, nen afuni inendawinggen omame mene inoba iren ikhi logolik he, ”Hat hebe re alomat lasigin lek,” igik agarego ikhe.

¹⁸ An nen ikhi logolik, ”Ap nabi andoma we misigen ogore Tuhan endawimo anggili'lago mene andoma inelu werek fuk. Iren ekhe Tuhan nen hilingiri'lago mene iluk wenggelhu mene holhik, nen At ane ili'lago mene futfuluk wanhik, ili'lagwi legaro.

¹⁹ Tuhan anini andi re sogoi sielu nen abologet hikhi logolik weaget fikherek andi hakhogo afuni inobaharo weak mene andi re a'nogoat hilinginabigin.

²⁰ Tuhan nen hilingisigin iluk wenggelogo werek mene omanogo mondogat hilinglagi'lek werek kwelek he At a'mage lagaikhe mene andi re sebeligin mondok lego. Hobugen enek he, it Tuhan againafuri nen wene andoma senggerogo fut fogoin o,” igi.

²¹ Tuhan nen ikhi logolik, ”Ap nabi andoma re An nen lakfisigimo hakhogo, inobabut higithogo hilingiri'lagwi. An nen it inoba yi'nogo ino iluk mel yagaisigi lek oba nen he iren An nenuba wene yagaisili'lagwi.

²² Iren ambi An nendawimo fisogo welagi mene andoma inelu logoumo nen he, iren An nagainafuri inoba wene An nen ikhi lagi mene andoma yagaisikhi logoilep. Nen An nagainafuri inobabut weak hilingitik, inobaharo welagik, agarek mene andoma inobabut hebelilep.

²³ An he Allah, yi kwe ti kwe sagarek mondok welagirek enek, misi'mo tukhogo welagirek lek.

²⁴ An he yi kwe ti kwe pogoroba inom, kweangma inom welagirek enek hilingi'mo re, ap misigen ekhe An nelokhoma nen hina'lasumo re elo'lek.

²⁵ It nabi andoma nen ili'lagwi mene andoma re An mondogat nelu o, iren he An nenuba ineranhogo wene ikhi logolik, wene Tuhan nen nabiba yaganete mene o, iluk helili'lagwi.

²⁶ It nabi andoma nen An nagainafuri ineranhogo wene inendawimo nen kagalogo lalinafi logolik were'ma nen enek he ki huli logogun nogo?

²⁷ Iren anggikhi logolik he inabi wokhugu mene tindeli'lagwi andem oba re An nagainafuri nen he it inombawi nen An noba inonggot a'luk Baal apne wanhi lagaukwa hak hilingisugun anggikhi logolik hilingiri'lagwi a.

²⁸ Ap nabi inabi wokhagarek mene andi nen he, ”Yi re nabi wokhigi o,” iluk ikhi logou mene. It he nabi An nen nane ugu mene holiluk halok he wene andi ibi-eberogo mene nek yagaisikhi logou mene o. Gandum he jerami inom higirap esumo re elo'lek.

²⁹ An nane andi re endu higit werek, nen helep martelu ba fouthugunem serelhigik lagarek andi hak werek.

³⁰ An he ap nabi wene inagaila'lagen ugunem holilugen wene yi Tuhan nen ikhe mene o, iluk agarek mene andoma re ninom eil asugun.

³¹ An nen ekhe re it nabi-nabi wene inane nen felalhigik ulugen wene andi Tuhan nen ikhemo o, agarek mene andoma inoba eil inabiginat.

³² An Tuhan nen he ap nabi-nabi inabi wokhaluk ineranhogo wene yagaisagarek mene andoma eil inabigin. Iren he ineranhogo wene inane nen weregabet higik An nagainafuri inendawinggen nonghonget fisili'lagwi o. It nabi-nabi nen ili'lagwi andoma re An nen yagaisugunem he lego. It andoma An nagainafuri ebe mene re legaro. Iluk An Tuhan nen nane mondogat igi,” ikhe.

Tuhan oba enggin kwelafarek mene faget isikhe wene

³³ Tuhan nen Yeremia ba ikhi logolik, ”An nagainafuri mene misik ekhe nen ogo, athe nabi nen a, imam en hea misigen ogo hat heinok wokhiikhi logolik, ”Wene Tuhan nen ninggi'nogo ikhe?” iluk ugu halok, ”Hat he Tuhan oba enggin kwelafi lagen mene welagen, andiba re hat hebe hukheagain o,” iluk yaga'no.

³⁴ Nen An nagainafuri mene misik ekhe nen ogo, at he nabi nen hea, imam en hea inane ikhi logolik, ”Tuhan oba enggin kwelabek awene andoma ugu werek halok he at andi eisok erokwe mene inom he An nen unggum wogisagain o.

³⁵ Oba nen agamhogo re it ap ekhe nen inagaila'lak inoba ogo, athe it ineisok erokwe mene inoba ogo heinok wogisikhi logolik, ”Tuhan nen wene onggo ekhe ikhe a? igik, athe Tuhan nen ninggi'nogo ikhe?” igik, ikhi logogun andi re fano.

³⁶ Iren he inaneba nen, ”Tuhan oba enggin ekhe werek,” iluk aga hanogo. Afuni ekhe nen ambi ane andi mene ekhe ugu halok he, An nen ibi-eberogo nen ikhi lagi mene andi enggin mene oba fagain o. Ap aneba nek ikhi logolik, ”Tuhan oba enggin werek,” agarek mene andi re An it ineisena Allah nane, An Allah neluk mondok welagirek mene Tuhan Mondok esin mene a'nogo nane oak sagali'lagwi o.

³⁷ Iren ap nabi-nabi andoma inoba ikhi logolik, ”Tuhan nen hat hoba wene onggo ninggi'nogo yagahete? Nen Tuhan nen wene ninggi'nogo mene ikhe? Iluk andem enek ikhi logogun.

³⁸ An noba afuni ekhe nen nane ikhi lagi mene hologo hilingiti'legengge nen iren ikhi logolik, ”Tuhan oba enggin werek,” agarek mene a'nogo nek ili'lagwi,

³⁹ andiba re An nen it andogerinabimbik he it inebe inom it inombawi inawi kota An nen wogisasigiba andoma inom o yatma andoma hugisagain o.

⁴⁰ An nen it inenggi mondok-mondok andomaba inenggalirogo welagik, li'norinafik hilingfisikhi logouwageluk hilinginabigin o. Nen it inoba a'nogo hilinglasigin mene andi re afuni nen inonggot asugun mondok lego,” iluk ikhe.