YEREMIA 22 - Allah Wene Fano Wene Hupla Inane

Yeremia nen raja Yehuda eisok erokwe mene inoba komorinafikhe wene

^1-2 Tuhan nen he an nebe ap raja Yehuda hun Daud ambisangma mene were'ma laluk wene yi at raja inom agoromi pegawai inom afuni Yerusalem werek mene inom yagaisoageluk miminginafi logolik, Tuhan nen it faget ane ikhe mene re yi'nogo ikhe,

³ ”Hiren hinobabut higithogo hilingiti logolik katokhogo hilingiti logoni o. Afuni enggin-fenggin inoba fisugunem werek mene andoma it enggin inoba fugu mene inenggimo nen lologo wulakfisikhi logoni. Hiren ap pok mene inoba inom, yenggerugwi suarek mene inoba inom, hemi sogwe mene inoba inom sebelogo fisigik, hinaniniba hilingfisigik, u fuk. Afuni o yi nen weak hilingiti'lek kwelek inebe pinggi inoasu fugat.

⁴ Hiren ambi An nawene melalek wokhisigi mene andi hinomamerogo hilingiti logogun halok he, hit hinogogwi raja-raja re hun Daud en ferinarek logolik melalinafi lagaikhe hakhogo fethinarek logogun mene re o istana yiba kwe ambe palekwe oma nen kwi waga logogun. It inebe inom, inagoromi pegawai inom, afuni holhu mene inom he no kuda ba inom, kereta ba inom lagaluk kwi waga logogun.

⁵ Oba nen hiren An nawene melalek yagahisasigi mene andi hologo hilingiti legengge logogun halok he, ap raja were'ma o sili andi re wolelenggenhogo fagain o. Iluk An Tuhan nen nane mondogat igi.

⁶ O istana raja Yehuda ebe werek oba andi re An nen hugunem he elokhe mondok fanore'ma re kweang o Gilead inom nen tom o Libanon oba inom elokhe mondok pugun pagansek omanogo hak hilingi'mo hikhi lagi, oba nen obalik andem he An nen lei pirimhogo afuni welagaikharek le'ma hakhogo hilingisogo fagain.

⁷ An nen he afuni nen wolelenggen isoageluk lakfisa wesumo re, iren posie harogo waga logolik o Libanon e laik fano meneba mininghigik o tik warogo liabek mene andoma mondogat sinukhogo potfisamo re iren endu oba nol fogoin.

⁸ A'nogo hilingfoumo re ap pok mene kwe andi laga logolik, ekhe nen ekheba heinok wok-wok aga logolik he, nenahalok Tuhan nen o kota yiba a'nogo hilingite nogo?

⁹ Iluk ugunem afuni nen yagaisikhi logolik, ”It Israel mene nen ineisena Tuhan Allah a'nogo inom wene wata mene re taganet fuluk, iren ilah amu mene obaget hilingitik, apne wanhik, hilingiti lagaikhama hilingite o,” iluk ikhi logogun ikhe iluk yagaisano.

Yeremia nen Yoahas faget isikhe wene

¹⁰ Afuni Yehuda mene yoma re, hit he raja Yosia wa'laga mene andi faget fong watu lego. Meneat he at amlogo Yoahas a'nogo nek he aben waluk lagaikhama ambotkwe wesigin lek, nen kweang at ebe ta'lagaba re eilenggen ekhe hagain legat andi nen he, at obaget enek he le aga logoni o.

¹¹ Nen at Yoahas hun Yosia amlogo, eisena obali'mo afuni Yehuda mene inobaget inoe raja menlaga mene a'nogo faget he Tuhan nen yi'nogo ikhe, ”At he o yoma nen mondogat laga hilingi'mo re nekhengge wesigin lego.

¹² At ebere hele warogo hugesi logoin oba andoma nen wa'lasumo re o kweang yi eilenggen nen ekhe hagain mondok lego,” iluk ikhe.

Yeremia nen Yoyakim faget isikhe wene

¹³ Ap ekhe awi wurikhi logolik higithogo hilingiti'lek wurikherek mene inom wogolhageluk pikhithogo hilingiterek lek mene inom andi re alomat lakhikhi loguwak. Ap yabu hilingisuageluk yagaisalugen onggo wogisagarek lek mene andi re alomat lakhikhi loguwak.

¹⁴ Nen, ap ekhe nen ikhi logolik, ”An nen o istana hokho mene ekhe wutfembik o henambo ambolkwe po'lima meneba re elonggo wogologo senggelhigik wusigin, iluk aren o istana a'nogo e laik o Libanon meneba fanorogo kiathigik jendela folelogo wutfuluk amusu mep mene watfeni o, iluk agarek mene andoma re alomat lakhikhi loguwak.

^15-16 Raja Yoyakim yi, hesanggo fanorogo holin o! Hat hawi sili andi re e laik fano mene o Libanon agayo andomaba nek wuti lagen andiba re, ap raja-raja amukwe menere maben hangge hilingik kwelek hat enek he kain mene welagen iluk enegenggere andi a? Hat heisena welaga aple wenggelhan: At ebe eluk obare mondok fanorogo logolik aren yi'nogo ti'nogo hilingiti lagaikhe mene omanogo re higithogo nek hilingitik, weinam selekhogo nek hilingitik, nen ap inenggi lek mene inawene katokhogo palisigik, hilingiti lagaikheba re ambisangma fano mene nek hikhi laga o. Ap Tuhan inelu inaben he a'nogo hilingitarego.

¹⁷ Oba nen, hat Yoyakim he amurek welagen. Hat he honggwarek henggi werek asigin mene nek herati lagen. Haren he ap weak hilingiti'lek kwelek inebe pinggi inoatik, afuni ha'mageba sebelogo fisigik, hilingiti lagen.

¹⁸ Andiba re raja Yehuda mene Yoyakim, hun Yosia amlogo andi faget Tuhan nen yi'nogo ikhe, ”At ebe wa'lasumo re aben iluk ogo obaget le asugun lego,” ikhe. Nen ap ekhe nen ikhi logolik, ”Eige an nare a'nogo agwi, igik,” athe it ekhe nen, ”Hun hokho agun a'nogo nendawi e!” igik, ugun mondok lego.

¹⁹ Yoyakim ebe warek he aben no keledai warek fili salharek hak, at ebe warek he o Yerusalem kwe ambe palek hokho kwe andi nen lisogo hugisa wulibugun o,” iluk ikhe.

O Yerusalem oba asigin mene faget isikhe wene

²⁰ Tuhan nen ikhi logolik, ”Hit afuni Yerusalem welagep mene re ap hit hinom sebe'luk weim yafi lagep mene omanogo mondogat inomame lek agaikha andi nen he, o Libanon oba inom Basan oba inom andoma laluk he hinane kwetik, nen o Moab tomkwe andoma nen ngai-wai liafik ini o.

²¹ Hit hinebe fanorogo welagagip aremnogoba re An nane hit hinoba mondogat yagahisasigi, oba nen he hiren ikhi logolik, nit he holugun ninabiro iluk ikhi lagagip. Hinobabut ariginik mene andi re o attagen pikhit yogondak huli nen engge An nane hologo hilingiti'lek hilingitunem hisikhi lagi o.

²² Andiba re hit hinogogwi fethinarek mene andoma re sogoien futhugunem hangge funhogo legasugun o. Nen, ap hit hinom sebeti lagep mene andoma re hele warogo woginarek logoin, hit hinawi kota re hiren hinanini mene hilingiti lagep andiba re inalitnorogo enggali warogo fogoin.

²³ Hit he e laik o Libanon mene oagen laberogo kwelakhinarek were'ma re hinendawinggen yamukhogo welagep, oba nen hobuk hit hinoba ou mene asi wesigin oba re hemi nen inomalik takhouwogeluk inambot heinet watarek hak, hilingisugun o,” iluk ikhe isikhe.

Tuhan nen Yoyakhin wene oba fesikhe wene

²⁴ Tuhan nen raja Yoyakhin hun Yoyakim afuni Yehuda mene inobaget inoe raja welagaikhe mene a'nogo amlogoba ikhi logolik, ”An Allah nonggwarek neluk welagi mene nenurogo re, hat hebe faget An nen he helep senggan henggi segelet pikhit kwe meneba enegengge kel fugunem hangge hilingik welagen o, oba nen An nen hat hebe henogo re,

²⁵ ap haren hailorinafi lagen mene iren hat hoasugun iluk hilingiri'lagwi mene andoma inenggiba wogisagain. Hat hebere An nen hun Nebukadnezar raja Babel faget werek agun andi inom, at agoromi mene inenggiba wogisagain o.

²⁶ Hat hebe inom hagaisa inom he An nen mugusogo wulak hinobagambik o kweang ale'ma hit ta'lagagip lek oba andoma hukhinabilamo re, andoma nen hinebe wa'lasugun.

²⁷ Hiren he o kweang yoma faget hinendawinggen warikhi logogun oba nen he hiren ekhe hinambotkwe sugulogo wesugun mondok lego,” ikhe.

²⁸ A'nogo ikhemo an Yeremia nen ikhi logolik, ”Yago, hun Yoyakin andi re iwak halok ugunem hugisagarek andi hak agama re inendawirasugun lek nogo a? Ero andiba at inom againafuri inom o kweang inonggotma andoma hugisa logoin nogo a?”

²⁹ Eige, an nawi yoma nendawi e, Tuhan nen ili'lago mene andi holin o!

³⁰ Tuhan nen he yi'nogo ikhe, ”Ap andi againafuri re mondogat longgo igik, nen aren hilingitu mene re ambisangma fano mene ekhe agi'lek logogin iluk anggomo palek werek hilingi'mo re, aren tagomangge ambisangma mene andoma re o Yehudaba yoma raja Daud ambisangma mene iluk ferinarek logolik logogun mondok legaro. Iluk An Tuhan nen nane mondogat igi,” iluk ikhe o igi.