YEREMIA 2 - Allah Wene Fano Wene Hupla Inane

Tuhan nen afuni Israel mene inobaget endawi hundik hilinginafikhe wene

¹ Tuhan nen mel yaganete:

² ”Hat hebe afuni o Yerusalem welagaikharek mene inoba lambik he, wene mel yagaisano: Hit afuni Israel mene yi sani. Aben hemi ket iginapluk, inendawinggen hundik welagaikharek andi hak, hit hinebe oan oba nenat An noba lomborogo logolik hinendawinggen An noba hundik were'ma, o leikwe yi mene ti mene awi yago lekwe andoma nombo'ne mondok nikhi lagagip a'nogo hinoba ebeti o.

³ Israel, hat hebe re An nonggwarek nangge mene welagen, Nendawi hundik mene hilingi'mo nendawirogo hilinghafi lagi mene, Afuni nen hat hoba yi ou ti ou hobagali'lagwi mene re, An nen unggum weakhogo it inoba wogisigirek, iluk An hineisena Tuhan nen nane arat igi o,” ikhe.

Afuni Israel mene inombawi nen weak hilingitukwa mene faget yagaisasikhe wene

⁴ Hit Yakub ambisangmangge mene hinunggulenu Israel mene yi nen he, hineisena Tuhan nen hit holuageluk ikhe mene yi holini o!

⁵ At Tuhan ane re yi'nogo ikhe: ”It hinombawi lagen he weak ningginik mene An noba were'ma neagasik, iren An li'norogo hilingnobagakhi lagaukwa nogo? Iren tugwi kembu yi'nogo ti'nogo hilingisu elo'lek mene a'nogo murok laga lagaukwba, ambisangma it inonggwaregat nonghong ikhi lagaukwa.

⁶ A'nogo hilingirilik laga logolik iren he, Nineisena Tuhan o Mesir en wo'ninarek wulibi waga logolik, kwe o leikwe yi mene ti mene fulelek legat, mondok weakwe, kiling ele hokhorogo werekwe, puk halongorekwe, afuni lagaikharek lekwe, wo'ninarek wagaikhe mene a'nogo ebe koma werek iluk mel heinok wo'nafi lagaukwa legat andi.

⁷ An nen o mondok fano kweang muli fanoma yi mene ti mene yagaisogo ebe fano ninggik, yi mene ti mene fano mene ekhe heligik, ikhi logouwageluk woginarek wagagi meneat he, iren An nanggweang andomaba emetfigik, nanggweang oba weaget figik, ikhi lagaukwa andi.

⁸ Nen, it ap An faget imam welagaikharek mene nen he, Nineisena Tuhan ebe koma werek iluk mel heinok wo'niikhi lagaukwa legat. Nen, it ap An nen, Yi'nogo hilingiti logoino, ti'nogo hilingiti logoino, iluk komothinafigi wene andi sagalasinogo iluk inenggiba logolik halharek inap andi nen, nane yagaisikhi lagaukwa mene nen he Baal enu hombuk palogo wene hilinglasigin mene yagaisikhi logolik, tugwi kembu, we, tulemat mene fogerati lagaukwa andi,” iluk ikhe.

Tuhan nen he, hit weak hilingitep iluk againafuri inoba hikhibet isasikhe wene

⁹ Tuhan nen a'nogo ikhesik, wene ekhe againafuri faget mel ikhe: ”Yogondak he An nen wene hit hinoba ekhe fikhi lagi o. Nen hiren tagomangge mene hinombalak andoma inom wene inoba mene ayo wurinabigin aro.

¹⁰ O Siprus i aikwe abel barat fikhit andoma kwe nen lani o, nen ap o kweang Kedar anggweang oba timur fikhit andoma lakfisani, andoma lakfisamo re, iren wene ariginik mene andi ekhe hilinglaga mene werega, lega? iluk fanorogo kogoluak.

¹¹ Ap inunggulenu misik mene ekhe nen iren apne wanharek mene andi ebe eberogo Allah re lek oba nen, iren ilah amu mene a'nogo inom agaum eta mene ekhe werek fuk, oba nen he An nagainafuri nen An noba inendawirogo werek mene a'nogo re, yi'nogo ti'nogo hilingisu mondok elo'lek mene a'nogo inom agaum eta andi.

¹² It a'nogo hilingita andi nen he, hat pogot po'li re, hasifatfat lagambik he, habolok in o! Hoba fokhogo re hoak leigesin!

¹³ An nagainafuri nen he weak ebe pire mene yi'nogo hilingita: An nebe inelugerinafirek mene it inagai elesi a'nogo re inambotma heraknobagagasik, i mogo habulik mene forogo lagunem i yenggelu elo'lek welagarek andi higit hilingfakhaga o,” iluk ikhe.

Afuni Israel mene inebe Allah oba lombokhogo welagi'lek hilingiti lagaukwa andiba weagerinafikhe wene

¹⁴ It afuni Israel mene andi re inamingmingengge mene re lego, nen inamingmingengge mene nen tagomangge mene re legat. Oba nen he, it inebe inaselei mene nen waraluk senggelugu mene hilinglagaikha andi re nenahalok nogo?

¹⁵ It inaselei mene re olomene singa nen afuni heraginabik ane kwe agan wagarek higit, it inebe heraginabik waga logolik, kweang o it werek oba andoma unggul watik, yi mene ti mene mondok leget figik, inawi kota mondogat endu fatik, afuni inebe lek hilingisogo fisigik, agama inareng mondok lek werek andi.

¹⁶ Hat Israel yi re, hat hesi re afuni o Memfis mene nen inom Tahpanhes mene nen inom palheaga.

¹⁷ An heisena Tuhan Allah nen wokharek nugu kwelegat he, haren An nebe hambotma fanhen andi nen honggwaregenat wene andi hoba fakhegenma a'nogo hilinglaga andi o.

¹⁸ Hat o Mesir lagalagen andi re, nena mene saburageluk lagalagen nogo? i Nil nageluk lagalagen nogo a? O Asyur lagalagen andi re, nena mene saburageluk lagalagen nogo? I Efrat nageluk lagalagen nogo a?

¹⁹ Hat hobabut mondok weak hilingiti lagen andi nenat, wene hoba fakhegen o. An heisena Tuhan Allah hambotma nobagegen andi nen, yi enggin ti enggin hoba fakhegen o. An nebe hambotma fanhendik An hailorogo hilingnafi lagen lek andiba re mondok wiik-weakhogo fakhegen andi hegen. An heisena Tuhan Allah nen nane arat igi o. An he Tuhan Allah Lego Mondok logolik Nomame Mondok Hokho mene a'nogo aro,” iluk ikhe.

Afuni Israel mene nen Tuhan fogeratu aple inabiret fesukwa wene

²⁰ Tuhan nen ikhi logolik: ”Hit An namingmingengge logolik, noba lomborogo logou hinabiren, nane hologo fogetnafi'lek endamaren wulifigip andi. A'nogo wulifigipsik he, tom hokhondek mene unggul uan meneba lagagik, e engga hikweak mene erokwe fanokwe andoma lagik ikhi logolik, tugwi kembu nen muliraterek mene iluk fogerati lagep andi.

²¹ Hat hebe re An nen anggur awi yatarek higit, enggen ebe mene fologo fakhigirik yakhigi mene welagen. Oba nen he yogondak hat he enggen awi amu tang mene wuliferek andi hangge agameten andi.

²² Haren hebe kume fanorogo warikhi logolik, hebene sabun hokhorogo wati lagen, oba nen haren kwanirogo hilingiten mene hebene tagikhe mene andi re An nelokhoma re terogo lagi'lek were'ma hikhi lagi o.

²³ Hat he hailo mondok legengge mel ikhi lagen andi ri: An he emerek welagi lego. Tugwi kembu Baal ombo'ne laga-lagi legat, iluk ikhi lagen. A'nogo meneat he, hat o tonggokwe andoma laluk hilingiti lagen mene andoma hendawimo ebetik, weak hilingiti lagen mene andoma ebetik, in o. Hat hebe wam unta holou mene obabut hilingiterek andi hak hilingiti lagen. At wam andi eisok handogal weak ya lagik, ta lagik,

²⁴ lagaresik, o leimo afuni inareng le'ma andoma lagarek. Lagaresik, alele fi'luk ai waluk herarik lagunem ai nageluk a'mage het-het hilingitunem he fak fou elo'lek agarek. Alele fiterek sambul a'nogo re ekhema-ekhema at elokhe hangge nek welagarek, ariginik nugunem ai mene nen he segetlekhogo ai ninggerek. A'nogo hilingiterek andi hak, hat he a'nogoat hilingiti lagen o.

²⁵ Israel ahwi. hat he tugwi kembu andoma muginarek heisok a'ne weak la fuk, nen it inenu hurogo wolinabu fugat, a'nogo hilingisigin halok he hat heisok hoatik, halonggop agasabu fulung haluk i nele agik ikhi logoinogo re iluk ugunem, haren he Lego, an he hobuk nambotkwe sugulogo wesu lek hak, an he kembu dewa oba nendawinggen mondok hundi'mo re, nambotkwe Hat hoba sugulogo wesigin lego. Andi meneat murok laga logogin, iluk ikhi lagen andi,” ikhe.

Israel he wene oba fou higit obaat fagain o, isikhe wene

²⁶ Tuhan nen a'nogo ikhesik wene ekhe Israel mene faget mel ikhe: ”Ap ekhe yogot wanhu halok inebe fakfisugunem inenggali agarek hak, hit Israel mene inom, hinogogwi raja-raja inom, hit pemerintah mene inogogwi kaindek inom, hit ap An eisewerek mene inom, hit ap An nane yagaisikhi lagep mene inom, a'nogoat hinenggali hogoin o.

²⁷ Hiren he e palek misik faget nineisena igik, nen helep misik faget ninagaisa igik, ikhi logolik fogerati lagep enggere hinenggali asugun. Hit he An noba waga lagep he lek, athe An ninom eil napluk laga lagep, oba nen he enggin-fenggin hinoba asi wagunem enek he, An nen telhinabuagaluk nayonggo fikhi lagep andi.

²⁸ Hiren hinandugwi kembu pugunhogo hilingisogo fikhi lagep mene andoma ebe koma weregen nogo? Iren hinebe elok telhinabu hak halok he, weak hinoba agunem, iren telhinabuageluk inayonggo feinore. Hit afuni Yehuda mene hinawi kota mondok hokhorogo werek andi hak, hinandugwi kembu a'nogoat hokhorogo werego.

²⁹ Hiren An nebe hinabirat logolik ninom weim palek hanggeat hilingnafi lagep andi nenahalok nogo?

³⁰ An nen komothinafu mene omanogo wanhi'lek werek kwelek we alomarogo hangge unggum hinoba fou hak andi. Mene singa aik anini mene a'nogo nen yi mene ti mene halmakhigik ninggerek hak, hiren ap An nane yagahisagarek mene inebe inoati lagep andi.

³¹ Hit afuni Israel mene yi. An nane igin mene yi hinesanggo fanorogo holini o. An nebe o leimo hangge legat, o mum hikhaksek hangge legat. Meneat he, hiren he, Nit ninebe arat ninale'ma agosi'mo re, hobuk Allah oba ninambotkwe logoin ninabiro, iluk ikhi lagep andi nenahalok?

³² Helime yenggerugwi inalilingge wanhi'lek halok inonggoragarek nogo? Athe, su hemi iginafi logolik labet fisagarek mene labet fisigi'lek halok, inonggorasu hak nogo? A'nogo hilingitare'lek meneat he, hit o attagen An noba hinonggoret nobagagipsik welagep andi hinenggi wenasumo re elo'legat andi.

³³ Hiren it ekhe weak hilingitu mene hinom wene arat te'mekhogo uogolu'mo hinobabut mondok hebelek andi nailo e. Hemi inobabut mondok weak yanani nilik nikharek mene ogore, inobabut weak a'nogo hilingisuogoluk inelu mondok meneat he, endebat inonggot hangge. Hit mondok hokhorogo hinelumo re, hit hinobabut mene it yanggulugunat higi o.

³⁴ Hit hinasuba mep yugulik andoma re ap hinatunem fakfisugunemen he fuk, athe ap enggi lek mene inom, weak hilingiri'lagwi lek mene inom inameben yugulik werek. A'nogo hilingiti lagep meneat he,

³⁵ hiren ikhi logolik, Nit weak ekhe hilingiti'le'ma re, Allah a'mage ninoba fikhi laga mene a'nogo hobuk a'mage lek aga, iluk ikhi lagep. A'nogo ikhi lagep meneat he, hiren he, Nit weak ekhe hilingiti'lek, iluk fakhogo figi'lek labelhi lagep andi nen, An nen wene hinoba fagain o.

³⁶ Hit he, afuni inunggulenu ekhe mene inandugwi kembu omanogo nen lebethisoageluk weak-weak laga lagep. Ma re, eberogo nen hit he afuni Asyur mene nen hinenggali warogo hinobagasukwa hak, it Mesir mene nen ogo hinenggali wasugunat andi o.

³⁷ Hiren hinendawinggen afuni Mesir mene inoba himbiret fuluk welagep meneat he, An hineisena Tuhan nen, it inebe nabit iluk herakfisasigi andi nen he, hit it inangge yi mene ti mene ekhe saburogo heligi'lek weat hinenggali a'luk andoma nen wulibi wesugun o,” iluk ikhe.