YEREMIA 19 - Allah Wene Fano Wene Hupla Inane

Iwak halogetikhe mene faget isikhe wene

¹ Tuhan nen an mimingnafi logolik iwak ekhe onggo pali laluk he ap it inunggulenu andi mene ferinarek werek inap inebe miren mene hakhogo inom, it imam inap inaluendek inebe miren mene hakhogo inom,

² seberogo louwogen iluk hondoginarek he o Hinom fanggongma kwe enu Pintu Gerbang Beling iluk agarekwe andi nen lan o. Lambik andoma nen he Tuhan ane an noba yi'nogo ino iluk wene fikhe mene andi menfeino,” ikhe.

³ An nen wene andi menfikhi logolik he yi'nogo ino ikhe, ”Yago, hit ap raja o Yehuda ba welagep mene inom, nen afuni Yerusalem oba welagep mene inom yoma sani! Hit he An hineisena Tuhan Nomame Mondok Hokho mene, Israel mene ineisena Allah a'nogo nen nane ikhi lagi mene andi holini o. An nen enggin-fenggin mondok elo'lek mene o kweang yiba lakfei wesumo afuni inesanggo holimbik he youk logoin o.

⁴ Andi re it inunggulenu ari nen An hera'nobagaluk hilingiri'lagwi andiba hilingisigin. Iren he obalik yiba dewa iren mondok inonggot mene omanogo faget wam warogo it inonggwarek faget inom, ap raja Yehudaba ferinarek werek mene faget inom fikhi logolik mondok emetfili'lagwi. Ekhe re iren kweang yiba ap weak hilingiri'lagwi lek mene omanogo inameben enek hopot faga.

⁵ Iren he Baal faget mezbah wutasik inagainafuri re Baal endawimo agaiyek hoageluk warogo wogetuba faget wuta. Andi re An nen ekhe a'nogo hilingiti logoino iluk ogo isigi lek, nen a'nogo hilingiri'lagwi mene andoma re an nendawimo endephogo ekhe werek lek oba nen hilingita.

⁶ Andiba re inenggi ekhe wesigin meneba obalik ya re o Tofet igik, athe o Hinom fanggongma igik ikhi logogun lego, athe Fanggong ap inungguloak leget fisagaregoba ikhi logogun.

⁷ Obalik yiba nen he An nen ap Yehuda mene nen inom, afuni Yerusalem werek mene nen inom hilingitu mene iluk wene lenggalek werek mene andoma sugit fagain o. It inebe re weim yafunemen inaselei mene nen mabenet fisambik inoasuageluk herakfisagain. It inebe warek he An nen herakfisamo sue nen inom mene olomene nen inom nogoin.

⁸ An nen kota yiba re enggin-fenggin mondok hokho mene lakfei wesumo re afuni kwe andoma kwe lagu mene nen inebe lombogen he youk laluk inamelmel enek aga logogun.

⁹ Ap selei mene nen he o kota ari labesi kwi we'luk he afuni o kota elonggoma werek mene inoasi kugun iluk hilingiti logogun. Ap hou sali kwi wesugun mene andi re mondok wesa polanhogo hilingitunem he, afuni o kota elonggoma andoma logogun mene omanogo nen he agailak ekhe nen agailak ekhe warogo ninggik, nen it inonggwarek inagainafuri warogo ninggik, hilingiti logogun o,” iluk yaganete.

¹⁰ A'nogo yaganetesik Tuhan nen an noba re iwak a'nogo ap an ninom lagagu mene omanogo ineilhanem halokhogo lakfisoageluk yaganete.

¹¹ Yaganetemo an nen ap omanogo inoba yagaisikhi logolik, Tuhan Omame Mondok Hokho mene a'nogo nen he yi'nogo ikhe, ”It inunggulenu yi mene inom o kota yi inom he iwak andi hak wolelenggen tagalogo lakfisamo re ambotkwe pugunesu re elo'lek logogin o. Nen it inebe warek salinafuba obalik legen he afuni nen it inebe warek he o Tofet oba andoma salinabi logoin.

¹² Kota yi inom afuni werek mene inom he An nen o Tofet higit hilingisogo fisagain.

¹³ Yerusalem oba o wurik mene andoma mondogat inom, nen ap raja-raja Yehuda ba ferinarek werek inap inawi andoma mondogat inom he, o Tofet hakhogo mondok emerek mene asigin, andi re afuni nen it inawi tomkwe andoma kembu dewa pogoroba werek mene faget iluk amben fano mene dupa noletik, dewa amu mene faget anggur wogetik, hilingiri'lagwi andiba asigin o,” ikhe iluk yagaisano, isikhe.

¹⁴ A'nogo isikhemo re an o Tofet Tuhan nen wene waluk yagaisalan iluk yaganeteba omanogo herakfisaluk lagagi. An nebe o Tuhan awi senggelek horek mene a'nogoba menlasi lagagisik, afuni mondogat omanogo inoba yagaisikhi logolik,

¹⁵ Tuhan afuni Israel mene ineisena Omame Mondok Hokho mene a'nogo nen yi'nogo ikhe, ”Hit he hinendawinggen mondogat peterek logolik holhu mene inom hinabit mondok welagep andi nen he o kota yiba inom, o desa-desa esanggo-esanggo haningisogo werek mene andomaba inom yi enggin ti enggin hinoba feigiluk foukhogo figi mene lakfei wesigin o,” ikhe iluk yagaisasigi.