YEREMIA 17 - Allah Wene Fano Wene Hupla Inane

Yehuda mene inaweak onggo wene inoba fesikhe wene a'nogo

¹ Tuhan nen ikhi logolik, ”Hinunggulenu Yehuda mene yi sani, hit hinaweak he hinonggwarek hinendawinggenma lisu palek werek, nen mezbah unggutmo ambisang morokse'ma andoma re lisu enggat wurikweak mene helebenggen pilibuk hangge enu intan mondok werelek meneba palek werek.

² Afuni hit mene re mezbah inom, kembu inagaisa dewi Asyera a'nogo inom faget wurogo menfagakwe, e engga hikweak mene erokwe inom, punu unggul-unggul andoma inom,

³ o kota abel endakwe tom oba omanogo inom obaget hilingisi lili'lagwi. Hiren o kweang yi bene mondogat kembu wurogo figik, yi weak ti weak mondok hokhorogo hilingitik ikhi lagep andiba re An nen it hinaselei mene nen hinangge yi mene ti mene inom, hinenggi werekhogo welagep mene andoma inom, felelenghogo helaluk loageluk it inenggiba fagain o.

⁴ Hit he mondogat nonghong imbik ningginu-ningginu hinanggweang An nen wokhisasigiba omanogo it wogisikhi logogun, nen hit hinebe re it hinaselei mene omanogo inenggiba asimbik o hit hinonggotma andoma nen it inobaget hilingiti logouwageluk hinobagagun. An nanini hit hinoba figi mene andi re endu amulok kulung hikherek andi hak hilingitunem sebeligin he mondok elo'lego,” iluk ikhe.

Yi wene ti wene yagaisasikhe wene

⁵ Tuhan nen yagaisikhi logolik, ”Ap ekhe An eisena Tuhan a'nogo oboget nealuk, endawinggen afuni mene inoba himbirik welagik, onggwarek omameba tipsek welagik, hilingitu werek halok he ap andi re homan ugu logouwak.

⁶ At andi re o leimo andoma inom nen kweang esi lekwe andoma inom lei pirim-pirim ugunem eluge nek hilingik kwe andoma nen engga wulibi'mo fano mene ekhe higi'lengge welagarek andi higit logouwak.

⁷ Oba nen he ap An noba endawinggen himbirik logolik noba ebetfuluk werek mene re An nen fanotfugu mondok logogin!

⁸ At andi re e i lagarek mene esanggoma wilibik were'ma, omanggen yagaisogo ima kwelabek welagarek mene hak werek. O hibi lagagunem aren ailoterek mondok lek, enggare muli-mulithugu mondok werek. Nen, o kweang andomaba yi mene ti mene mondogat pugarik wagarek oba nen, athe enggen itu mondok were'ma endawinggen fiterek lek.

⁹ Afuni inendawinggenma re yi'nogo hilingik iluk futfisa lek hak, yi mene ti mene andoma we endep harek hak, oba nen he afuni inendawinggen andi re awulagam mondok weak, nen obabut ogore mondok weagat.

¹⁰ An Tuhan nen he afuni inendawinggenma peneti lagi, nen inendawinggenma wenggelharek mene obabut palhi lagi. Afuni inebe lombok he inobabut hilingitu lombok An nen ambisangma hilingfisikhi lagi, nen it hilingitu higithogo An nen ogo a'nogo hilingfisikhi lagi aro,” iluk ikhe.

¹¹ Sue ekhe nen sue amu mene enggen tagoma sagaum eterek hak, afuni higithogo hilingitarek lek mene nen yogot wanharek mene re andi higit werek. At ebe eluk werek mene a'nogo wurep oba asi lagunem he, ap andi morue mene iluk enek agarek.

¹² Nit nineisena Tuhan ebe welagarek obare takhta fano horek andi hangge werek, nen o eroma nenat At ebe tom uan meneba welagarek.

¹³ Tuhan nineisena, Hat he afuni Israel mene nen inendawinggen hoba eberek mene welagen o. Nen i inelugerinaferek mene re Hat hebeat welagen. Oba nen he it Hat herakhobagaluk lagaikharek mene inebe mondogat he inenggali asugun o. It he kweang welago mene yiba nen longgo imbik he afuni wa'la'luk lagaikharek oba andoma hela pugun.

Yeremia nen Tuhan oba lebetnabuageluk kino yagatikhe wene

¹⁴ Tuhan neisena, Hat he an nen legeisogo hobagakhi lagi mene welagen ma re Haren an nebe higitnabigin halok he, an noba fano asigin o. Nen, Haren nagap telnabigin halok he an nagap telegat logogin.

¹⁵ Afuni nen an noba ikhi logolik, ”Tuhan nen nit ninailo kwelabek aple ikhe mene andoma re koma werek nogo? Yogondak hilingisigin halok fano!” iluk agarek.

¹⁶ Oba nen he Tuhan neisena, an nen Hat hoba afuni andoma weak-weak alomat fisanogen iluk nane ninghogo yagaheti mene ekhe werek legat anggigi. It inoba enggin hokho mene asi weri'lago mene andoma faget an mondogat nabit welagi. Neisena Hat he helurego, an nane ikhi lagi mene andem faget Tuhan Hat he mondok helu welagen.

¹⁷ Hat hebere an enggin mene noba agunem hawe a'ma nobagaguba welagen, Hat he an nendawimo nailothafu mene asu fuk.

¹⁸ It ap an mu'niugu mene inom, an sebel nobagagu mene inom, andoma Haren inenggali watfisaluk it inoba inailo mene kwelakfisagain logouwak. Oba nen he Tuhan neisena, Haren an noba a'nogo ekhe hilingnobagau fuk. Haren enggin mene andi it inoba fisa wesumo re it inebe mondogat legasugun logouwak.

Linggene sabit mene a'nogo esinet fuluk ebeti logogun isikhe wene

¹⁹ Tuhan nen an noba ikhi logolik, ”Yeremia ahwi, hat he kwe ambe palek mene enu Pintu Gerbang Rakyat andi it ap raja-raja Yehuda mene nen o kota ba wilibu ku hilingiri'lagwiba andoma lan o. Andi nen kwe ambe o Yerusalem oba amukwe andoma ogo lano aro.

²⁰ Laluk he ap raja-raja inom afuni Yehuda mene mondogat inom, afuni o Yerusalem oba werek mene kwe ambe palekwe andoma kugu mene inoba yagaisikhi lagolik Tuhan nen mel ikhe iluk yagaisano.

²¹ Haren ikhi logolik, ”Hit wa'lasugun hinabit welagep halok he hiren hinasungge hinenggi sabit meneba salma'luk kwi waga logou fuk, athe o Yerusalem kwe ambe palekwe andoma nen kwi waga logogun legat.

²² Linggene sabit mene andiba re hiren yabu hilingitik, hinailoba nen hinasungge waluk wulibi lagik u fuk. An nen hit hinombawi inoba melalfisasigi hak, linggene andi An nobaget enogo fuluk logoino.

²³ A'nogo isigi oba nen hit hinombawi nen An nane holfigik, futnobagagik, ikhi lagaukwa lek. It inebere inendawinggen peterek logolik nane hologo hilingiti'lek welagik, inane fa'niugu aple ogo inabirat welagik, hilingiti lagaukwa.

²⁴ An nen hilingi'no iluk yagahisikhi lagi mene andoma hologo hilingiti logoni. Hiren linggene sabit mene andiba re hinasungge salmakhaluk o kota ari kwe ampe palekwe andoma nen wulibi la fuk. Hiren linggene sabat sambul andi re An nobaget enogo fuluk logoni. Nen hiren linggene andi sambul hinenggingge iluk ogo ekhe wanu fuk.

²⁵ An nen wene melalogo hinobagagi mene andi fifurogo hilingiti logogun halok he, ap yabu legoma hilingitarek mene inom, raja hun Daud en melalinafi lagaikhe higit melalinafarek mene inom he kwe andi nen o Yerusalem kwi waga logogun. It he afuni Yehuda mene inom, afuni o Yerusalem werek mene inom he no kuda inom kereta inom oba lagaluk kwi wesimbik were'ma re, o kota Yerusalem yiba mondok-mondok faget inanggilukhogo nek logogun.

²⁶ Afuni re o kota Yehuda ba andoma nen inom, it desa-desa o Yerusalem horok-horokwe andoma mene inom waga logogun, nen it fena re wilayah Benyamin mene oba nen he punu helang alemkwe inom, o tom-tomkwe omanogo nen inom, o Yehuda abel selatan fikhit omanogo nen inom waga logogun. It waga logolik he, wam warogo nolhu mene inom, nolhu lek mene inom, gandum fogoin mene inom, amben fano mene kemenyan inom, An hai watnafi logolik fogoin engge inom, An nawi wuri'mo waluk waga logogun.

²⁷ Oba nen he hiren An nane hologo hilingiti'lek, linggene Sabat mene andi An nobaget enogo figi'lek, nen linggene sabat mene andiba kwe ambe palekwe andi nen hinasungge salmakhaluk wulibi lagik hilingiti logogun halok he, o Yerusalem kwe ambe palekwe andoma inom ap raja ebe were'ma andoma inom An nen endu oba mondogat foumo re endu andi re nagulu elo'lek logogin o, iluk ikhe yagaisano,” isikhe.