YEREMIA 16 - Allah Wene Fano Wene Hupla Inane

Tuhan nen Yeremia faget wenggelhikhe wene

¹ Tuhan nen an noba ekhe inom ikhi logolik, yi'nogo ikhe,

² ”Hat he o yoma nen hagwe helambik hagainafuri taginabigin lego.

³ O yoma nen yenggerugwi taginabugun mene inom, ineisugwi inagaisawi inom, inoba hilinglasigin mene faget yagahesigo.

⁴ It he, ou afuni wa'lagaikharek mene inoba asi wesumo re inebe mondogat wa'lasugun o. Ap misik iluk ogo inobaget le agik, inebe warek salinafik, ikhi logogun mondok lek. It inebe warek he kweang muli faget yabukwe tamukhogo lakfagarek hak hilingi'mo re sue inom olomene enda'ma mene inomen ninggi logogun o.

⁵ Yeremia ahwi, hat he o afuni fong watu mene inawilokwe re la fuk. Nen haren ap sa faget iluk ogo fong warogo logou fuk aro. An nen nagainafuri ekhe inebe fanorogo logouwageluk hilinginafik, nen it inoba inelagaik isambik inendawi hundik hilinginabin mondok lego.

⁶ Ap inenggi werek mene inom, inenggi lek mene inom he o kweang yiba nen wa'lasumo re, warek ekhe salinabugun mondok lego. Afuni nen ekhe fong warogo iluk inagap paligik, inunggul hogolhik, it faget a'nogo ekhe hilingisugun legaro.

⁷ Nen, aben ekhe it faget fong warogo logolik iluk seni ekhe isasugun mondok legat. Nen afuni inom inendawinggen sebe iluk werek mene ogo, athe ineisugwi inagaisalak wa'lagunem fong warogo inom werek mene ogo logogun legat.

⁸ Ap seni isa'luk hilingitu mene inoba kwi la fuk. Nen, it hinom sumburu ninggik, i ninggik u fugat.

⁹ Hat he An Tuhan Nomame Mondok Hokho mene afuni Israel mene ineisena Allah a'nogo nen hat hoba yagaheti lagi mene andoma holin o. Hemi lambulinafarek oba nen inane inagaiyek oba nek ikhi logolik anggilukhogo hilingitarek mene andoma re, An nen mondogat palfagain. A'nogo hilingisigin mene andi re ap hat logogin huli logogun mene yi nen ineilenggen hogoin o.

¹⁰ Haren a'nogo ikhe iluk yagaisugunem, iren hat heinok wok hiikhi logolik, nenahalok Aren unggum omame mene ari ninoba fikhe nogo iluk ikhi logogun. Nen, iren heinok wokhiikhi logolik, An ineisena Tuhan Allah a'nogo nelokhoma weak hilingitik, kwanirogo hilingitik, hilingiti lagagu mene andi re ebe ninggi'nogo mene nogo? iluk ikhi logogun.

¹¹ A'nogo ugu halok, haren he Tuhan nen yi'nogo ikhe iluk yagaisugu nogo, ”Hit hinombawi nen he An herak nobagaluk tugwi kembu amu mene obaget hilingitik, fogeratik, hilingiti lagaukwa. Iren he An nen ugu mene omanogo herakfuluk he, An nen yi'nogo ti'nogo hilingiti logouwageluk yagaisasigi mene omanogo hologo hilingiti lagaukwa mondok lek.

¹² Oba nen hiren he ekhe inom hinanini mondok weak hilingiti lagep. Hit he hinendawinggen mondok peterek logolik, kwanirek mene omanogo hinendawimo nen anggaluk enek hilingitu welagep. Hiren An nane hologo hilingiti lagep lek.

¹³ Andiba re An nen he hit o kweang yiba nen mugusogo wulak hinobagambik he, o kweang it hinombawi nen ogo, nen hiren ogo mondogat hinonggotma, ni'mo andoma hukhinabi lagain o. A'nogo hukhinabi lamo re andoma nen hiren linggene inom hubanggo inom tugwi kembu amu meneba obaget hilingiti logogun, nen An nen he hit hinoba nendawit hinabigin mondok lego, ikhe ino,” iluk yaganete.

Tuhan againafuri mene huginabi lamo nen sugulogo inambotkwe wesugun isikhe wene

¹⁴ Tuhan nen ikhi logolik, ”Inenggi ekhe wesigin meneba re, afuni nen hombuk palhi logolik, An Allah Neluk mondok welagirek mene afuni Israel mene o Mesir en woginarek wulibi wagagi mene a'nogo nenu uluk hombuk palhi logogun lego,

¹⁵ athe An Allah neluk mondok welagirek mene, nagainafuri Israel mene o kweang misik ekhe utara fikhit andoma werek meneba nen woginarek wulibi wagu meneba inom, nen kweang fena amukwe it andi telfol isasigi kwe omanogo inomen woginarek wulibi wesigin mene andi nenuba hombuk palhi logogun o. An nen he it hondoginarek kweang it inonggwaregen mene, inombawi wogisasigiba omanogo fisa wesigin,” iluk ikhe.

Unggum inoba fagain mene faget isikhe wene

¹⁶ Tuhan nen ikhi logolik, ”An nen he afuni hokhorogo ikan wanharek inaben afuni yoma hele warinabi wesuageluk inayonggo fisagain o. Andi nen he An nen ap sue, paik, watarek mene nen he it oma tomkwe inom, punukwe inom helep oumokwe inom andoma nen inoasi wesuageluk wolinabigin.

¹⁷ Iren yi'nogo ti'nogo hilingiri'lagwi mene andoma An neilenggen mondogat isikhi lagi. An nelokhoma re hinago mene ekhe werek lek. Nen, it inaweak hilingiri'lagwi mene ogore An nen neilenggen mondogat isikhi lagi nego.

¹⁸ It inaweak inom kwanirogo hilingiri'lagwi mene inom andoma nen he An nanggweang a'nogo kembu areagun legenggeba nen emetfagama re An nen altap pireba unggum inoba fagain o,” ikhe.

Yeremia endawinggen Tuhan oba himbiret fagain mene faget fakhogo isikhe wene

¹⁹ Tuhan neisena, ”Harenat an hawe a'ma fe'narek logolik an nomame wo'neti lagen, An nelokhoma lek were'ma Harenat lebetniikhi lagen. Yi afuni ti afuni o kweang unggut-unggut welagaikharek mene andoma nen Hat hambit we'luk iren ikhi logolik, ”Nit ninombawi re tugwi kembu we eberogo lek mene fetaluk welagaukwa.

²⁰ Afuni nen inonggwarek faget tugwi kembu amu mene ekhe walesumo re higira? A'nogo hilingisumo re elo'lego! Aren hilingisigin mene andi re eberogo Allah re fuk,” iluk ikhi logogun.

²¹ Andiba re Tuhan nen ikhi logolik, ”An nen afuni inunggulenu ekhe mene ekhe mene omanogo nen An nalong logolik nomame welagirek mene a'nogo ineilenggen nealuk, iren inenggi mondok-mondok andomaba An Tuhan nebe welagirek mene a'nogo inelu asuageluk hilinginabigin o,” iluk ikhe isikhe.