YEREMIA 15 - Allah Wene Fano Wene Hupla Inane

Afuni Yehuda mene inoba unggum fesikhe wene

¹ Tuhan nen an noba ikhi logolik, ”Musa inom Samuel inom ya mendek logolik afuni yi faget hendawirinabin iluk kino yaganesumo mene ogore it inunggulenu yi mene ari An nen nendawirinabu lek hago. An he it kwelagisa re mondok nabit nabi'lagonggere, unggulenu ari mene re hela loakhogo yagaisan o!

² Iren hat heinok wokhikhi logolik, nit koma logoin iluk ugu halok he haren yi'nogo yagaisano, ”Tuhan nen ikhi logolik, Ou oba nen wa'lasugun iluk enogo werek mene re ou oba nen wa'lasuak. Nen weim elema nen wa'lasugun iluk enogo werek mene re weim elema nenat wa'lasuak. Nen sumburu nele nen wa'lasugun iluk enogo werek mene re sumburu ouwagen wa'lasuak! Nen hele warogo woginarek loageluk enogo werek mene re hele warek mene iluk woginarek loago!” ikhe iluk yagaisano isikhe.

³ An Tuhan nen he unggum ero enggaminogo mene it inoba asigin iluk fouget figimo werego: It he weim elema nen wa'lasumo re it inebe warek omanogo re mene nen lithalagik ninggik, sue nen inom, maro mene nen inom legaberinafik, ugun o.

⁴ An nen he afuni o kweangma werek mene mondogaren inamel-melhogo kumurisikhi logouwageluk hilingfisagain. Andoma mondogat he hun Manasye at Hizkia amlogo a'nogo o Yerusalem oba andoma afuni Yehuda mene faget raja logolik hilingiti laga mene andi ambisangma hilingisigin o,” ikhe.

⁵ Tuhan ane ikhi logolik, ”Yago, hit afuni Yerusalem oba welagep mene re sa nen hit hinoba endawit hinabigin nogo? Hit hinobaget endawinggen heiselu hak mene re sa nogo? Hit hinoba hilingik welagep mene heinok wokhinabigiluk he sa hinambit wesigin nogo?

⁶ Hiren he An ninabit iluk heraknobagakhi lagep andiba re An na'mage lagali'logo mene a'nogo sebelhugu aplere elo'lek ari'logo hilingi'mo re, An nenggi legeluk waga ogolik hit wolelenggenhogo leget hinabigin o.

⁷ Kweang yiba o kota ebe lombok andoma bene re An nen hit he engga puk mene hak hukhisagain. Hit hinebe An nagainafuri hilingik welagep, oba nen he, hit hinebe hilingik welagep mene andi agameti lagep le'ma re, An nen hit hinebe inom, hit hinagainafuri inom leget hinobagagin.

⁸ Hit hinanggweang oba andoma re hemi sogwe mene nek hoporek logogun, ial i esanggokwe welagarek mene andoma endep hak oba nen it he mondok hokho-pokhorogo hilingik logogun. An nen he inebe sougeba nenat inoasumo re, it inagaisawi re neneik yabasugun. O linggene re An nen ap inoaterek mene ekhe lakfei wesumo re, iren inailo asimbik inendawi fisugun.

⁹ He ekhe eagwi inebe 7 nen longgo ugun mene re sethoporogo eilfuruk fagain, At ebe eluk werek oba a'nogo re mondogat mum hikhak se'ma hilingisogo foumo re, aren he wena'netasik nenggali warogo hilingnafa hea anggagain. Afuni hit hinanggelekwe andoma ineluk logogun mene re inoasuageluk An nen selei mene lakfisa wesigin. Iluk An Tuhan nen nane mondogat igi o,” ikhe.

Yeremia nen ebethike mene Tuhan nen onggo yagatikhe wene

¹⁰ Ibi-eberogo nen he an noba lele ari'lago agwi! Nenahalok an nagaisa nen ta'nafe ago? Afuni o kweang yiba werek mene inebe lombogen an ninom wene nek palhu welagik, hat yiginik an tiginik iluk ninom wene watik, ugu mondok welagi andi. An nen ekhe afuni inangge we elama faget wo'ne'ni iluk mel kinotik, nen iren an kino yaganetik, ikhi lagi lek oba nen, afuni inebe mondogaren homan iknobagali'lagwi o.

¹¹ Tuhan neisena, an nen ambi neabu hilingiti logouwageluk werek mene furogo hilingiti lagi lek halok, nen it selei mene hat helokhoma nen enggin hokho mene it inelokhoma were'ma inebikhit agi lek halok he afuni nen homan nobagali'lagwi mene andi re eberogo nen an noba asuago.

¹² (Ap misigen ekhe posiemanggen mene sombolumo re elo'lek, nen ebe esin he posiemanggen o abel utara fikhit no tembaga mene inom saplirogo hilingik mene andi sombolumo re mondogat elo'lego.)

¹³ Tuhan nen an noba yaganeti logolik, ”An nen ap selei mene lakfisa wesumo re, it An nagainafuri nen o kweang yiba mondogat weak hilingiti lagaukwa mene andoma onggo re, inangge hokho pokhorogo fetaluk logolik werek mene andoma telambik hogouk eraluk logoin o.

¹⁴ Nen o kweang it inonggotma andoma re An nen it inebe ap inaselei mene amingmingengge asuageluk hilingfisagain. A'nogo hilingisigin andi re An nanini inoba figi mene a'nogo re endu amulok wabunak lagagunem nagulu elo'lek andi hak lingitunem hilingisigin o,” iluk ikhe.

¹⁵ A'nogo ikhemo an nen ikhi logolik, ”Tuhan neisena, Haren futnobagain o, futnobagambik he noba ebetnean o. Nen it afuni an mu'niikhi logolik sebelogo nobagali'lagwi mene andoma re it inenggi ambisangma inebe inoasin o. Haren sebelhikhi logolik were'ma nen an noasugun andi re elo'lego. Hat henuba re an li'norogo hilingnobagali'lagwi mene andi wenggel hano.

¹⁶ Haren an noba hane ugunem he, hane ugu mene andoma ebe lombok hol fakhikhi lagi o. Tuhan Allah neisena Homame Mondok Hokho mene, An he Hat honggwarek mene welagi o. Andiba re Hat hane ikhi lagen mene andomaba re an nendawimo seleget nafik, nagaiyek mene hilingnobagagik ugunem welagi o.

¹⁷ An nebe Hat henggi ninghogo fetnarek logolik, homame a'ma fetnarek welagenma re an he ap inunggulenu yi mene nen andoget fuluk seni isagaisogo inagaiyegetik, fogerakhigik agarekwe andoma lagirek mondok lego. An ogo namuat tegelogo welagi o.

¹⁸ Nenahalok an he enggin-fenggin a'nogo nek hugu logogin nogo? Nenahalok an noumo nagambut wanhi'lek silibut hugu mondok logogin nogo? Haren he i lagu agai mene o hibi lagagunem firitok ikherek a'nogo hak, an nendawimo weaget nobagagin iluk hilingiti lagen a?” iluk yagati.

¹⁹ A'nogo yagatimo Tuhan nen onggo yaganeti logolik, ”Haren ambi, sugulogo hambotkwe wagen halok, An nen hat hebe wokhabumo re, hat hebe An namingmingengge mene asigin o. Afuni re hobuk iren hat hoba waga logogun, nen haren it were'ma ekhe laga logogin lego.

²⁰ An nen hat hebere no perunggu meneba aben inoasi kwi wesinogoluk wutarek a'nogo hakhogo hilinghobagagin o. Iren hat hebe hoasugun iluk hilingiti logogun oba nen he, ap misigen iluk ekhe hat hebe mabenet hobagakhi logogin lego. Nen An nebe re hat hagap telogo hobagagik, nawe a'ma fetharek welagik, ikhi logoigeluk he ninom logogun o.

²¹ An nen he ap inanini mondok weak mene andi inomameba sebelharek were'ma nen fikhalogo hobagagin o. Iluk An heisena Tuhan nen nane mondogat igi,” iluk yaganete.