YEREMIA 14 - Allah Wene Fano Wene Hupla Inane

O hibi hokho mene lagasikhe wene

¹ Tuhan nen o hibi hokho mene lagagin mene faget an noba yi'nogo yaganete,

² ”Yehuda re awi kota omanogo wa'lasu hak hilingitu nen endawinggen heiselhi logolik werek. Afuni o andi mene re kweangma wengik logolik limamit fali'lagwi, Yerusalem he lebetnabuageluk oak heinet wari'lago.

³ Afuni inenggi werek mene imamingmingengge omanogore i yi kwe ti kwe herasi loageluk miming inabi'lagwi, a'nogo miminginafunem lagaikharesik i mogo habulikwe omanogo heratarek mene re i mondogat firitokhogo le'ma nongasi lili'lagwi. Andiba re iren inagaiwak hinasugun iluk waluk lagaikharek mene omanogore oak waganogo ambotkwe waluk weri'lagwi. Iren inobakheindok palogore inendawinggen weak a'luk inenggali nen inelokhe salsal weri'lagwi.

⁴ Meiso pi wagi'lek mondok were'ma re kweang iring-paringhogo kelokhogo taik ikhe, ap ineabu helagarek inap omanogo re inendawimo weakhogo inelokhe heiselogo werek.

⁵ Engga ket mene ekhe werek lek andiba re no rusa isa omanogore ineagwi ket tagongge o leimo andoma herakfisaluk lili'lagwi.

⁶ Tom alonggopma andoma re keledai eil polok mene mendek werek, engga legen he eil elagaikhogo werek, at he no serigala nen hilingiterek hakhogo nobong-hobong enggeri'logo.

⁷ An nagainafuri nen nenu hombuk palhi logolik, ”Tuhan, nit ninonggwarek ninaweak oba weak mene ninoba ari'lago o, oba nen he Haren wene watnisasigin mene a'nogo higithogo lebetninabin o. Nit he eberogo nenat nineisena Hebe oboget healuk laga lago o. Ma re niren Hat hoba weak hilingito mene andoma re eberogo aro.

⁸ Nineisena Hat he Israel inaben ninendawinggen hoba himbirik menere we Hat hami hamuat welagen o, nit wa'lasu hak were'ma telninafendek menere we Hat amu welagen. Oba nen Hat he nenahalok nit ninanggweang oba yoma ap pok mene higit welagen nogo? Hat he ap o ekhema lagaikharek mene nen hup inenggi misik nogoluk lagaikharek hak hilingiti lagen andoma re nenahalok nogo?

⁹ Nenahalok Hat he afuni inendawinggen nonghong iluk hilingitarek hak hilingiti lagen, athe ap inomame hokho mene logoligen telinabu elo'lek agarek andi hak hilingik welagen nogo? Andi nen he Tuhan neisena, ibi-eberogo nen he Hat he nit ninanggele'ma welagen o! Nen nit Hat hagainafuri ninoba re oboget nisa fugo nineisena, iluk agarek andi,” isikhe.

¹⁰ It inunggulenu andi faget Tuhan nen ikhi logolik, ”An he ap An noba nen heise longgo agarek mene inom, inonggwaregen inebe halfakhagarek lek mene andoma inom inoba re nabit welagi o. An nen it inaweak nonggorasigin lek, nen iren weak hilingiri'lagwi andiba re An nen unggum wogisagain o,” ikhe.

¹¹ Tuhan ane an noba ikhi logolik, ”An nen ap andoma leberisoageluk An noba yaganetun o.

¹² Iren inambe heang logolik, An noba lebetninabin iluk kino yaganesumo mene ogore An nen inane nesanggo holhi logogin lek, nen iren An nobaget nendawimo nagaiyek hoageluk nolhik, gandum enggen nolhik hilingisugun meneba nen ogore An nen nagaiyek it inoba fagain legat. Agamhogo re An nen it inebe weim oba nen inom sumburu ouwagen inom, ouen oba nen inom mondogat leget fisagain o,’ iluk yaganete.

¹³ A'nogo ikhemo an nen ikhi logolik, ”Tuhan neisena, Hat hebe lego welagen mene, Haren wene wati logolik o kweang yiba re mondok fano liokhogo inendawi serogo nek logogun o, iluk isigin andiba, it ap nabi nen afuni yagaisikhi logolik ou inom weim abok inom logogin lego, iluk yagaisikhi lagaukwa mene andi re Hat he helu welagen o,” iluk yagatigi.

¹⁴ Oba nen Tuhan nen onggo ikhi logolik, ”Nabi andoma re An nenuba ineranhogo wene waluk waga lagaukwa. An nen it yonggo lakfisa waga lagagi lego, nen An nen it inoba miming inafik, weneane ninom igik ikhi lagagi legaro. Iren ninabikanggo yi'nogo hogo iluk tindelharek mene andoma re An noba nen he fuk, iren he hobuk hilinglasigin mene faget ikhi lago iluk it inonggwarek inendawimo nen kagalogo we tulemat mene omanogo faget ili'lagwi o.

¹⁵ Iren An nenuba ikhi logolik o kweang yiba re sumburu ouwak inom weim awene inom asi wesigin lego, iluk ikhi lagaukwaba nen iren a'nogo uageluk An nen yagaisikhi lagi lek. An Tuhan nen he hat Yeremia hoba yagaheti logolik, Ap nabi An nen lakfisa wagi lek mene andoma inoba hilinginabigin mene yagaheti lagi o. An nen he sumburu nele nen inom, weim oba nen inom inoasigin.

¹⁶ Afuni nabi andoma nen wene hilinglasigin mene iluk yagahisugunem wanha inap andoma ogore it inoasigin andi higirat inoasigin. It inebe warek he o Yerusalem ebekhe kwe andoma hugisamo aben salinafi'lek herak fisamo logogin. Andi re it inebe inom, it inagagwi inom inagainafuri inom inoba asigin mene re a'nogo hogoin andi. It inanini andiba re enduk mikhoageluk An nen hilingfisagain o,” iluk ikhe.

¹⁷ Tuhan nen he an nendawimo heiselhi lagi mene a'nogo At againafuri inoba yagaisikhi logolik an nen yi'nogo yagaisoageluk ikhe, ”An nunggulenu mene omanogo inebene inoumo agambut asu lek hak mene silibuthugu mondok were'ma, it inoba ou-pou ugunem he, An he palfigi'lek li le agu mondok logogin, lingge hundik hup hundik neil amusu pugu mondok logouwak.

¹⁸ An o leimo lagunemen he ap weim oba nen wa'lagaukwa mene were'ma isikhi lagi. O kota elonggoma re ou elo'lekhogo hikhi logolik afuni sumburu nele nen wa'lasu hak hilingiri'lagwi. Nabi inom imam inom he iren hilingiti logouwageluk werek mene omanogo hilingiti logoligen he ebe hilingitu mene omanogo fut figi legengge nen hilingiri'lagwi o,” iluk ino iluk yaganete.

Afuni Israel mene nen Tuhan oba endawit ninabuageluk kinotukwa wene

¹⁹ Tuhan nineisena, Haren he it Yehuda mene re eberogo nen obokhogo herakfisegen a? nen afuni o Sion werek menere eberogo nen Haren habiret fisegen a? Nenahalok Haren ou henggi omamerogo ninoba fugunem, nit he fano aga lago lek nogo? Niren hikhi lagoma re we ina'mageba hilingfisagarek mene omanogo nek werek kwelek, ou fano asugun iluk ninendawinggen eberek mondok welago mene andoma re we alomarogo nek hilingik welago.

²⁰ Tuhan nineisena, we Hat hobaat niren weak hilingito o. Niren he nit ninonggwarek ninaweak faget inom, it ninombawi inaweak faget inom fageti lago.

²¹ Haren nit wena'nisa fuk, Haren wene watnisasigin mene a'nogo ebethan o, Haren nit ninom wene wat-wat agagu mene a'nogo re leget fou fuk. Yerusalem takhta Hat hebe welagen oba haselek hombakbagen selegeratendek oba a'nogo re haren halitnorogo hilingfugun.

²² Ap inunggulenu mene inanggembu dewa nen he meiso kweangma pelabi wesu lek hak, Nen, pogoren ogore at onggwarek omameba meiso pelabi wesu lek hagat. We Hat hamu nek he nit ninendawinggen hoba eberek welago mene welagenma re, Haren hilingitunem enek he andoma mondogat hilinglagarego.