YEREMIA 12 - Allah Wene Fano Wene Hupla Inane

Yeremia nen limamit falogo Tuhan yagatikhe wene

¹ Tuhan neisena, an nen nawene helaluk hat hoba wesumo nen he Hat hamu nek he eberogo mene welagen iluk weinam asu hagaro. Oba nen he an nen hat hoba wene heirogo hilingitarek mene andi faget heinok wokhikhi lagiat: ”Nenahalok ap ina'mage weak hilingitarek mene andi inenggi werek logolik fano werek nogo? Ninggi'nogo nen ap higithogo hilingitarek lek mene nen hilingitunem ambisangma higit enek agarek nogo?

² Haren it he helokhomat fisaluk engga wiliferek mene hakhogo hilingfisugunem, omanggen pelafik, hokho agik, ikheresik enggen iterek. Iren he hat hobaget inaneba mondok fano mene nek ili'lagwi, oba nen inendawimo nen he Hat fanorogo futhobagagi'legengge nen hilingiri'lagwi o.

³ Oba nen he, Tuhan neisena, Haren an fut nobagakhi lagen. An nen hilingiti lagi mene re Hat heilenggen niikhi lagen, nen nendawimo nen Hat hobaget anggikhi lagi mene re Haren ogo heluregat. Ap ina'mageba hilingiri'lagwi mene andoma re lirinarek wulibi lan o, it inebe re domba wasuogeluk waluk lagaikharek hak woginarek lan. Lambik he kagalinarek werek kwelek enek he it inebe inoasugun oba asi wesigin.

⁴ O kweang yiba iringik mondok werek kwelek nek he ki huli logogin nogo, nen yabukwe omanogo engga puk mondok logogin nogo? Sue inom eluk-elugengge amu mene inom omanogo re nit ninunggulenu mene inanini mondogat weak andiba re wa'lagaikha andi. Iren ikhi logolik, it inoba ari'logo mene andoma An nen hagain lego, iluk aga andi faget heinok wokhiikhi lagi o,” iluk yagati.

⁵ A'nogo isigimo Tuhan nen ikhi logolik, ”Yeremia, hat he ap hinom walhamo mene ogore hebe korogo taik u hago, ma re haren no kuda inom he elok walhogoin iluk a? Kweang hambukse'ma logolik meneat he hailoti lagen, meneba nen haren i Yordan esanggoma engga hi'mo andoma logolik he ninggi'nogo hilingiti logoilen?

⁶ Hat he it herugwi hagaila'lak hat werekwe meneba nen ogore inal ngesukum watheaga, iren he hat hebe hoasugun iluk hilingiri'lagwiat. Enggere iren inane amusu tephogo ugun oba nen ogore it inane ugun mene faget eberogo angga fugo,” iluk yaganete.

Tuhan nen againafuri faget endawimo heiselhikhe wene

⁷ Tuhan nen ikhi logolik, ”O kweang An nanggweang aga mene a'nogo re herakfisigi, nen An nagainafuri nendawi hundik hilinginafi lagi mene omanogo ogore it inaselei mene inenggimo figiat, nen An nebe welagirek oba re obogerisagainat andi.

⁸ An nagainafuri wenagaisogo fakhasigi meneba nen ogore nane oak sagalhi logolik mene singa engga obakheba nen ane kouwaterek hak iren An noba a'nogo hilingiri'lagwi. Arigini'lagwi andiba re An nen it inoba nabit anggikhi lagi o.

⁹ It he sue kuri nen sue ekhe abel fena-fena hukhogo mukhikherek hak hilinginabi'lagwi. Enggama eluk welagarek mene andoma nen senggelinabuak hogore wolisani o.

¹⁰ Ap pok mene yi aple ti aple hilingitu inelu mene nen An neabukwe unggul warisigik, nen An neabu anggur yabu waganek kwe re it ineisogen pusel-pasel isigik ili'lagwi. Nawi elokhe mondok fano mene omanogo re iren hebekhogo o leimo inareng tereng se'ma higit hilingisogo fili'lagwi.

¹¹ Io, iren he An naiba nanggweang lei pirimhogo nendawimo mondok weakhogo hilingisogo fili'lagwi. Andoma mondogat he we hesangge hilingfugunem afuni nen ekhe fut fili' lagwi lek.

¹² O leik fena fikhit tom oba andoma nen, afuni yogot hinasuogeluk weri'lagwi. An nen he weim ambisangma nen o kweang andoma mondogat weagasuagaluk lakfei wesumo re ap misik iluk ogo ekhe ineluk fanorogo logogun lek.

¹³ An nagainafuri nen he gandum enggen feik foli'lagwi ba nen he enggen he alok-alok agayo enggen pali'lagwi. Iren mondok elo'lekhogo hilingiri'lagwiba nen, iren hilingiri'lagwi mene andoma ambisangma fano ari'lago mene ekhe werek lek. An nen mondogat na'mage inoba fikhi lagimo re iren enggen ugu fanorogo pali'lagwi lek andi o,” iluk ikhe.

Tuhan nen o it Israel mene inom horokhogo werek mene omanogo inobaget wene warisasikhe wene

¹⁴ Tuhan nen ikhi logolik, ”It o negara Israel inom horokhogo werek mene o kweang An nen nagainafuri Israel mene wogisigimo nen weaget faga mene a'nogo faget he wene re yi'nogo yi o: Kweang oba nen wilibik engge sanogetarek hak, ap inanini mene andoma re it inanggweang oba nen An nen wulak fisagain o, nen Yehuda re it inenggiba yinggilogo fisogoma nen An nen lologo fisagain.

¹⁵ Oba nen mondogat lologo fisambik enek he An nen nekhengge it inoba inendawirinabigin, it inunggulenu lombok he An nen woginarek inonggwarek inanggweang oba fisa wesigin.

¹⁶ Iren ambi inendawinggenma nen eberogoat iluk wene An nagainafuri nen An fogetnafi logolik hilingiri'lagwi mene a'nogo waniluk, iren An Tuhan neluk mondok welagi mene a'nogo nenuba hombuk palogo, attak iren An nagainafuri inoba yanggulinafi logolik Baal oba hombuk palini iluk yagaisikhi lagaukwa hak, An noba a'nogo hilingitu halok he, it andi ogo An nagainafuri mene inom sebere'ma it ogo inenggi werekhogo logogun.

¹⁷ Oba nen he it inunggulenu An nane higithogo hilingitarek lek mene halok, An nen kweangma yago mene sanokhogo lakfisagarek hak inebe leget fisagain. Iluk An Tuhan nen nane mondogat igi o,” iluk ikhe.