YEREMIA 11 - Allah Wene Fano Wene Hupla Inane

Tuhan nen Yeremia wene waretikhe mene higithogo hilingitikhe wene

¹ Tuhan ane an noba ikhi logolik,

² ”An nen nagainafuri inoba wene wathisigi mene andi hilingisuogeluk he yigit-yigit hilingiti logoino iluk yagaisasigi mene andi fut feino. Haren afuni Yehuda mene inom Yerusalem mene inom inoba yagaisikhi logolik,

³ An Tuhan afuni Israel mene ineisena a'nogo nen wene warisikhi logolik yigit-yigit hilingitunogo iluk isigi mene andi hologo hilingitu lek mene halok he homan fisikhi lagi o.

⁴ Wene andi re An nen it inombawi o Mesir faget iren endu amulok oba hak anggikhi lagaukwaba andi nen woginarek wulibi waga logolik warisasigi. An nen it inoba yagaisikhi logolik an nane hologo hilingitik, An nen yi'nogo ti'nogo hilingi'no iluk yagahisigi mene hilingitik, hilingiti logoino isigi. Yogondak An nen nekhengge afuni Yehuda mene inom Yerusalem werek mene inom inoba ikhi logolik hiren An nane hologo hilingiti logogun halok, hit he An nagainafuri asumo An he hit hineisena Allah asigin o, isigi.

⁵ Iren wene andem higithogo hilingitu halok he An nen wene it inombawi inoba warisikhi logolik kweang yogondak it werek oba mondogat heisele'ma yi mene ti mene sik-pikhogo welagarek oba andoma it wogisagain o iluk isigi higithogoat wogisagain aro,” iluk ikhe. Andi isikhemo an nen onggo ikhi logolik, ”Tuhan neisena, andi re fano egen o,’ iluk yagati.

⁶ A'nogo igimo nen Tuhan nen an noba ikhi logolik, ”O kota Yehuda nen mene inom, Yerusalem ebekhe kwe inom andoma laluk he An nen wene igin mene yi afuni andoma yagaisa lan o. Iren he An nen ikhi lagi mene andi futfuluk an ninom wene wati logolik yi'nogo hilingisugun iluk wene ebe yigit-yigit werek mene andem hologo nek hilingisuageluk yagaisano o.

⁷ An nen it hinombawi o Mesir en woginarek wulibi wagagi sambul andem he, An nen nane omamerogo iren An nane hologo hilingiti logouwageluk yagaisasigi. Nen, wene andi faget yogondak huli nen inom An nen nagainafuri inelurogo yagaisikhi logolik,

⁸ iren An ninom wene watugu mene andi hologo hilingiti logouwageluk yagaisikhi lagi. Oba nen he, holhi'lek logolik nane hologo hilingiri'lagwi lek, iren he inendawinggen peterek logolik attak hilingiti lagaukwa hakhogo inobaharo werek. Andiba re wene warek werek mene andiba unggum inoba asigin mene iluk palek werek mene a'nogo re An nen it inoba figi andi o,” iluk ikhe isikhe.

⁹ Andi nen Tuhan ane an noba ekhe inom ikhi logolik, ”Afuni Yehuda mene inom o Yerusalem werek mene inomen he An nane sagal fuluk hilingiti logogun iluk wene inane misik seberogo mata.

¹⁰ Iren he weak it inombawi nen An nane hologo hilingiti'legengge hilingiti lagaukwa mene omanogo hilingiti logolik, iren mene tugwi kembu amu mene omanogo apne wili'lagwi, An nen yi'nogo ti'nogo hilingiti logoino iluk yagaisasigi mene a'nogo higithogo hilingiri'lagwi lek. It Israel mene inom Yehuda mene inom he An nen it inombawi inom wene wat-wat agagu mene a'nogo taganhogo nek hilingiri'lagwi.

¹¹ Andiba re, An Tuhan nen it ineluet fikhi logolik, enggin mene An nen it inoba lakfei wesumo re it he hina'lasugun lek. Iren ambi An noba lebetninabuageluk kino yaganesugun halok mene ogore An nen it inane holigin mondok lek.

¹² Inane holigin le'ma re it Yehuda mene inom Yerusalem mene inom omanogore tugwi kembu iren mene yi mene ti mene warogo wogotarek mene andomaba lebetninabin iluk kinosi laga logogun. A'nogo hilingitunemen enggin hokho mene inoba asi wesigin sambul he ilah andoma nen higithogo inagap telinabu lek hak logogin.

¹³ Afuni Yehuda mene nen tugwi kembu ilah re hokhorogo hilingi'mo it inawi kota hokhorogo werek andoma hak inandugwi kembu ogo a'nogoat werek. Afuni o Yerusalem werek mene nen mezbah re ebekhe o Yerusalem kwe werek andoma hakhogo hokhorogo wut fuluk iren Dewa Baal oba wam warogo wogeri'lagwi.

¹⁴ Andiba re, Yeremia ahwi. It inobaget samban igik, An noba leberisan iluk kino yaganetik, u fugo! It anggolorek logolik An noba lebetninabin iluk kino yaganetu halok, An nen inane holhi logogin lego.

¹⁵ Tuhan nen ikhi logolik, An nagainafuri An nen nendawi hundik hilinginafi lagi mene andoma nen mondogat weak hilingita. Ma re it he An nawi wuri'mo andi logoumo re elo'lego. Iren anggikhi logolik he wene-wenengge watik, wam warogo figik, hilingiri'lagwi mene andem faget he enggin inoba asi wesigin mene andi re elok kwe palfogoin iluk anggikhi logolik hilingiri'lagwi a? Andiba it inagaiyek asu hak nogo?

¹⁶ An nen it faget ikhi logolik, it he e zaitun engga mulirek logolik, enggen mondok fano mene nek si'nogo kwani ugu mene iluk isigi aro. Oba nen yogondak he An nane sup polang eti logolik he e andi engga inom enggi segelet inom mondok felelenghogo endu noligin.

¹⁷ An nenat Yehuda inom Israel inom hokho asubagaigeluk hilingisogo menhinobagasigi o. An Tuhan Nomame Mondok Hokho Mene a'nogo nen hilingitigi. Oba nen yogondak he An nen it inoba enggin mene lakfei wesigin mene wenggelogo figirik welagi o. Andi re it inonggwarek inobabut oba o, iren he ina'mage lagaikherek mene a'nogo nek hilingiti logolik, wam warogo Baal oba wogeri'lagwi andiba re An nanini inoba fikhi lagarik hilingisigin andi o,” iluk ikhe isikhe.

Yeremia wasugun iluk abok palhukwa wene

¹⁸ Tuhan nen he ap an noasugun iluk nabok palha mene a'nogo an yaganete.

¹⁹ An he domba ebe watarek oba nen wasuogeluk waluk lagunem endawi menenei agi'lek lagarek a'nogo higit welagi. Iren hilingisugun mene iluk wene palogo fagarek mene andi re an nobaget ugu kwelek meneat he an nobakhe palegat welagi. Iren ikhi logolik, ”Niren e ari enggen oan itu kwelek aremat musuogen he we'ni o. Niren leget fogoin halok he afuni nen at enu ekhe ebethikhi logogun lego,” iluk ikhi lagaikha.

²⁰ A'nogo ikhi lagaikhama An nen Tuhan oba samban ikhi logolik, ”Tuhan neisena, Hat Homame Hokho mene, Hat he wene fano ayo wurogo tegetendek mene welagen. Afuni nen anggagarek mene inom wenggelharek mene inom obabut palhendek mene re neisena Harat welagen. An nawene noba mene yi re Hat henggiba fikhi lagi o, neisena. We Haren erenat afuni andoma inoba ambisangma hilingfisugunem heagain o neisena,” iluk samban isigi.

²¹ Afuni o Anatot mene nen he an wa'lasuageluk inendawimo anggikhi logolik iren yi'nogo ikhi lagaikha, ”Haren Tuhan nen ugu mene andoma yaganisugu logogin halok niren hebe pinggi hoasugun o,” iluk yaganeti lagaikha.

²² Andiba re nineisena Tuhan yi'nogo ti'nogo hilingisu higit enek mene a'nogo nen ikhi logolik, ”An nen it inoba unggum wogisagain o! Ap souge it mene re weim elema nen wa'lasugun, nen it inagainafuri yenggerugwi mene re sumburu nele nen wa'lasugun.

²³ An nen he afuni Anatot mene inoba enggin hokho mene lakfei wesigin mene mondogat enogo figi'mo re, it unggum inoba fagain sambul andi higit asi wesigin oba re, ap misik iluk ogo ekhe linet lasugun mondok lego,” iluk yaganete.