YEREMIA 10 - Allah Wene Fano Wene Hupla Inane

Tugwi kembu wutfuluk fogeratarek mene faget isikhe wene

¹ Afuni Israel mene yi sani, Tuhan nen hit faget wene ikhe mene yi hinesanggo fanorogo holini o.

² Aren ikhi logolik, ”Hit he ap inunggulenu amu mene nen inetokhogo hilingiri'lagwi mene andoma mugusogo hilingitik, pogoroba enegengge hilinglagunem it inunggulenu andi mene nen inailori'lagwi mene andoma faget hineilenggen haluk hinoak leigetik, hilingiti logou fuk.

³ It inunggulenu andi mene nen inetokhogo wene melalek were'ma hilingitu hobalhu werek mene andoma ambisangma tip ikherek mene ekhe werek lego. Iren e engga ogoimo nen musi laluk, ap e meneba alik wanhu aple elu meneba re kembu alik waganogo hilingisuageluk ayonggo fagarek.

⁴ Ap a'nogo nen alik-alik hilingfugunem ebene alilingge emas, perak meneba waganogo fuluk, talosinogo iluk he posiemanggen oba warogo fikherek.

⁵ Tugwi kembu fogeratarek mene andoma re kulu yabumo ap-ap hilingisogo fugunem werek mene hak hilingik welagarek. It andi re inane igik, kwe lagik agarek lek, we afuni inenggi nen hambogetarek. Iren hit hinoba ina'mage fuluk wene hinoba fogoin lek enggere hinailo su fugo. Inobabut fano hilingitarek mene andi ogore iren hilingisu re mondogat elo'legat,” iluk isikhe.

Tuhan obaget hilingitu mene faget isikhe wene.

⁶ Tuhan Hat he esin mondok welagen, Hat hinom higit mene ekhe werek lek, Hat henu re mondok lego were'ma homame hokho mene welagen.

⁷ Hat hebe re yi afuni ti afuni inunggulenu hokhorogo inobaget Raja welagen. Ap sa hagen Hat hoba eberogo anggigi'legengge logou hak nogo? Yi afuni ti afuni inanggele'ma andoma inobabut hebelek mene werek oba nen ogo, athe inogogwi raja-raja inungguloak kagalek mene welagaikharek oba nen ogore, Tuhan nineisena Hat hinom he ap iliresu mene ekhe werek lek, we nineisena Hat enek he eberogo esinet hobagaluk legeisogo hobagakhi logou hago.

⁸ It inanggembu dewa andoma re e mene hilingi'mo re fano meneba yanggulinabu lek hak, it andoma mondogat he kemburek logoligen hilingik.

⁹ Kembu andi ebere no emas, perak o Spanyol inom kota Ufas inomen waluk wagaukwa meneba laberogo hilingik, andoma mondogat he ap hesesengge wanhu inelu inaben inom emas oba pugunetu inelu inaben inomen hilingita mene. Asu re eil wurik weak meneba inom nen eil yanggorek meneba inom oba, ap su kwaterek elu mene nen halhaluk kwata meneba laberek.

¹⁰ Oba nen Hat enek he nineisena Tuhan Allah eberogo mene o, Raja hetok mondok logolik nineluk wo'nisegendek mene welagen. Nen Hat ha'mage lagagunem he kweang leik eterek, nen Hane pararak etunem he yi afuni ti afuni hambuget hare elo'lek.

¹¹ (Yago hit Tuhan againafuri mene yi sani, hiren it yagaisikhi logolik kembu dewa pogot kweang walhasukwa lek mene andoma re mondogat legasugun o. It he o kweangma yoma nen mondok-mondok legasugun, iluk yagaisano.)

Wuniba Allah fagerati logogun wene.

¹² Tuhan Omameba kweang elalogo fesikhe, ungguloak kagalek obare kweang mondogat hilingisogo fesikhe, nen awenggelek obare pogot tiaganet fesikhe.

¹³ We aneba nek hilinglame ugunem, i huli-huli warek mene a'nogoba nen i eindep ane mimi isikhe. Kweangma unggut-unggut andoma Aren ohena lakfei wagarek, nen Arenat meiso anggelek elekwe eilabut kulunghogo lakfikherek, nen sogoi re Aren obalik warogo fisogoba andoma nen lakfei wagarek.

¹⁴ A'nogo hilingiterek mene andoma haluk he afuni nen wenggelhikhi logolik, an he kemburek welagi nen wenggelhu mene ogo werek lek iluk futfou hago. Ap emas elalhu inelu mene re, iren alik waganogo elalharek mene andi re eluk mene re fuk, andi re we ineranhogo hilingitarek hilingi'more, it inelokhe mondogat legasugun.

¹⁵ Tugwi kembu andoma re furegengge fuk, pilip palaphogo enggali watfisikhi logogun halok fano. Huli ekhe higirasi wesigin oba re andoma mondogat legasugun mene werek.

¹⁶ Yakub eisena Allah andi re tugwi kembu andoma inom higit he lego, At andi re yi mene ti mene mondogat elalhikhe mene. Nen Enu re Tuhan Omame Mondok Hokho mene andi. Aren he Israel mene At againafuri mene asuageluk wenagaisogo fisasikhe.

O Kweang elonggo fikhit omanogo youk lagaukwa wene

¹⁷ Afuni Yerusalem mene yi sani, hit he ap selei mene nen haningisogo kwelakhinafanggere, fik-fouge'ni o!

¹⁸ Yogondak yiba re Tuhan nen hit afuni hinunggulenu Yehuda mene mondogat hele warogo hukhinabi lagain o, hit hinebe mondogat he welelenggenhogo hinobagagun. Iluk At Tuhan nen ikhe mene re andi.

¹⁹ Afuni Yerusalem mene nen inane humeti logolik, ”Nit he ninoumo mondok hokhorogo hilingik welagoma re fano asu lek hago. Attak niren anggikhi logolik ou ari re nit ninoba asigin halok fano iluk anggasuguba nen, elo'lek kwelegat isugumo o.

²⁰ Nit ninawi sabu tenda wurik mene re mondogat weak aga, nen hele re mondogat tekhigik pikhe. Ma re afuni tenda andi wutik, hele homatik, u mene ekhe werek lek, nit ninagainafuri re mondogat lagaikhama o,” ili'lagwi.

²¹ A'nogo ugunem an nen onggo ikhi logolik, ”Ap nit ninogogwi fetninarek welagaikharek mene andoma re mondogat kembu higi. Iren hilingisugun mene faget Tuhan nen yaganisoageluk kinori'lagwi lek andiba re ambisangma nonghong ili'lagwi. Nen nit he yi kwe ti kwe nalek-falek welagoat andi.

²² Holini! Unggulenu misik ekhe utara fikhiren inane a'mit suphogo weri'lagwi. Agoromi tentara sikhe fisogo inap andoma nen he o Yehuda kota oma mondogat afuni inane mondok tingi-tongorogo hilingisogo fisamo mondogat inobalik enek tereng igin. A'nogo hilinglasumo re o andoma re mene olomene hinago werek oba asigin.

²³ Tuhan neisena, ap misigen ekhe an nebe yi'nogo hilinglasigin iluk halogo fakhigik, athe an neluk yi'nogo logogin iluk halfakhigik, u lek hak andi re an nelu o.

²⁴ Eberogo nen nit ninebe mondogat he legasugun mene welago hilingi'mo re, Hat ha'mage lagagu halok he yei henggi omameba ninoba ou asu hak mene inom, athe unggum weakhogo inom wo'nisa fugo, Oba nen he Tuhan nineisena, ninelu asuageluk ninoasigin andi re fano o.

²⁵ It andi nen he Hat hagainafuri mene omanogo mondogat leget fisagasik nit ninawi omanogo wolelenggenhogo lakfisaga hilingi'mo re, Hat ha'mage lagali'lago mene andi re it afuni Hat hobaget fageri'lagwi lek mene andi inoba inom, nen iren Hat hobaget hilingiri'lagwi lek mene andi inoba inom, kweisal fein o.