YEREMIA 1 - Allah Wene Fano Wene Hupla Inane

¹ Buku yi re hun Hilkia ebe imam o kota Anatot wilayah Benyamin meneba andoma welagaikhe agun andi amlogo Yeremia nen ane ikhi lagaikhe mene palek werek.

² Hun Amon amlogo Yosia o Yehuda ba andoma raja were'ma 13 tahun oba werek kwelek Tuhan ane Yeremia ba yagatikhe.

³ Ane a'nogo yagatikhe a'nogo oba nen he Tuhan nen ane ekhe inom ekhe inom yagaisugu werek kwelek enek he at Yosia amlogo Yoyakim inoe raja logolik ferinarek welagaikheba nen pikhit he Zedekia hun Yosia amlogo menlagaikhesik 11 tahun ferinarek welagikhe mene andem huliba asi lagaikhe. Tahun andiba ogore tugi fuap meneba werek kwelek he afuni Yerusalem mene hele warogo hugisa lagaukwaba omanogo woginarek lagaukwaat.

Tuhan nen Yerimia ayonggo fesikhe wene

⁴ Tuhan ane an noba ikhi logolik,

⁵ ”An nen hat hagaisa alabutmo oan a'ma asuageluk hilingiti'lek werek kwelek, nen hat hebe oan ta'lagi'lek werek kwelek, An nen hat hebe nabi yi afuni ti afuni inunggulenu lombok welagaikharek mene inobaget logouwageluk wenagaisogo hobagagirik menhobagagi o,” iluk yaganete.

⁶ A'nogo yaganetemo an nen onggo ikhi logolik, ”Tuhan Lego Mondok welagen mene neisena, an nebe souge oan welagimo re nane ugu aple ogore mondogat nonghongsek welagi o,” iluk yagati.

⁷ A'nogo igimo nen he, At Tuhan nen onggo yaganeti logolik, ”Haren an nebe oan souge welagi iluk ugun o. An nen ap ti ambit lan iluk lakhobagagu halok he haren lagain fano nek, nen An nen yi'nogo ino iluk yagahesigin halok he, haren it inoba mondogat yagaisano aro.

⁸ An he hat ninom welagik, hebe fetharek welagik, hilinghafi logogin enggere haren it inoba hailosu fugo, iluk An Tuhan nane mondogat igi o!” yaganete.

⁹ A'nogo yaganetesik aremnogo re Tuhan enggi waganogo an nambeba fikhi logolik he yi'nogo ikhe, ”An nane ikhi lagi mene yi holimbik he hambeba nen yagaisano o.

¹⁰ Yagaisamo re, yogondak yiba An nen yi afuni ti afuni inunggulenu lombok inom, o kerajaan ari inom hat henggiba logoinogen iluk homamet hobagakhi lagi. Homamet hobagagi mene andi re unggul warisigik, lilibuk lalabak isigik, enden fanden isigik, legabet fisigik, wokfigik, yakfigik, hilingiti logogin mene wokheti o,” iluk yaganete.

Wene ero pire mene abikanggoba hasikhe wene

¹¹ Tuhan nen an heinok wo'niikhi logolik, ”Yeremia ahwi, nena mene heilenggen hegen?” iluk heinok wo'niikhemo, An nen he, ”Tuhan neisena, E badam enggi neilenggen higi o,” iluk yagati.

¹² A'nogo yagatimo Tuhan nen ikhi logolik, ”Eberogo egen o, An nane igirek mene andoma mondogat tiphogo hilinglaga logouwageluk he An nenat halogo fikhi lagi o,” iluk ikhe.

¹³ A'nogo ikhesik Tuhan nen nekhengge heinok wo'niikhi logolik, ”Nena mene ekhe heilenggen hegen?” iluk ikhemo re, an nen onggo ikhi logolik, ”Abel utara fikhit po'lima nen he waruk kweang meneba hilingik engge elema hulugeri'lagongge a'nogo afe hebekhogo yoma fikhit kweisali wesigiluk hilingitunem higi o,” iluk yagati.

¹⁴ A'nogo igimo Tuhan nen ikhi logolik he, ”Abet utara fikhiren enggin-fenggin hokhorogo lege'luk waga logolik he afuni o kweang yiba werek mene mondogat inoasi wesigin o.

¹⁵ An nen he it inunggulenu utara fikhit werek mene inebe mondogaren o Yerusalem sebeli kwi wesuageluk yagaisagain. A'nogo yagaisamo re o kota yiba leget pa'leget maserogo waganek mene inom, kwe sou ambe hokho mene palek mene inom, nen o Yehudaba kota andoma mondogat inom he, iren telogoin.

¹⁶ An nagainafuri nenat ilah amu mene faget yi mene ti mene wogetik, nen kembu alik-alik waganogo apne wanhi logolik, An noba inambot wo'ne'luk weak hilingiri'lagwi andi nen he, An nen it inoba unggum wogisagain o.

¹⁷ Yeremia ahwi, hat he fik-foukhogo hilingisin! Hat hebe laluk he An nen yagaisa lan. iluk yagaheti mene andoma mondogat it inoba fakhogo yagaisa lano o. Hat it hinom ambi a'luk hailo ekhe inom asuageluk An nen hilinghobagagi hanogo re hailosu fugo.

^18-19 Holin! Hat he it afuni o kweang yiba werek mene nen hane oak sagalugun werego. Andi re it ap raja Yehuda mene inom, pemerintah inobaget yabu hilingiri'lagwi inap inom, imam inom, afuni we mene inomen hilingisugun. Oba nen he o yogondak yaba re hat it hinom walhobagaigen iluk homame wokhesigin o. Hat hebe re o kota helep leget ninghogo waganek mene hangge hilinghobagagik, posiemanggen mendek mene hangge legeisogo hobagagik, leget tembaga meneba ninghogo waganek mene hangge hilingisogo hobagagik igin o. An he hat ninom hundik logolik fetharek mondok welagimo re iren hat mabenet hobagagun mondok lego. Iluk An heisena Tuhan nen nane mondogat igi o,” iluk yaganete.