YEHEZKIEL 9 - Allah Wene Fano Wene Hupla Inane

Yerusalem unggum wogisagain isikhe wene

¹ Andi hilingfuluk an nen holhugunemen he Allah ane humeti logolik, ”Hit ap unggum An nen mene waluk o kota yiba wesugun mene oma re yoma we'ni o. Waga logolik he, hinasikhe ogo helaluk we'noat,” iluk ikhi laga.

² A'nogo ugunem ambine nek ap inebe falfaligen mene inasikhe harogo kwe Tuhan Awi wuri'mo nen abel utara fikhit andoma endakwe fikhiren kwi waga lagaikha. A'nogo kwi wagunem it inom he, ap ekhe asu linen su eil sakhorek meneba laberek mene inom waga logolik, lisu palhu mene ekhe enggimo senegeisogo waga lagaikha. It omanogo kwi wagaikhasik he no mezbah perunggu meneba wuri'mo omanogo mendek welagaikha.

³ Andi nen Allah Israel ebe ninom welago iluk a'nogo ombak-bak no kerub omanogoba nen yabelanget hasikhemo nen he selek a'nogo obalik werek oba aremnogo nen higilogo re o Tuhan awi wuri'mo ebekhe kwi laguba aremnogo laga-laga. A'nogo lagunem he Tuhan nen ap asu linen su laberek mene a'nogo woletesik yagati logolik,

⁴ ”Lambik he, o kota andiba nen inobabut hebak inafe mene hilingiti lagaikhaba afuni inendawinggen heiselhunem weakhogo werek mene andoma inambit o kota unggut-unggut andoma laluk he inebe mondogat inelha bene enek enggerogo hilingfisa lan o,” iluk yagati laga.

⁵ A'nogo ugunem holhirik were'ma nen, Allah ane ap inamu mene ekhe inoba ikhi logolik, ”Hit at ombo'ne lambik he, o kota andi unggut higithogo andoma afuni inebe lombok inendawit inafi'legat inebe mondogat inoa'no.

⁶ Hiren he, ap inom, hemi inom, inaluendek inom, yenggerugwi inom, souge mene inom, yaman mene inom mondogat inoa'no. Oba nen he, it afuni inelhaba enek engge hilingik mene andoma misik iluk ogo ekhe inagap senisa fuk. Ero An Nawi wuri'mo yoma nen tak erora'ni,” iluk yagaisikhemo, it ineabu a'nogo eroratasik he ap Israel mene inogogwi melalinafarek mene o Tuhan Awi wuri'mo welagaikha mene aremnogo tak inoatunem isigi.

⁷ Allah ane it inoba ikhi logolik, ”An Nawi wurik yire emetfisani o! Olulukwe re ap waregen hopo uakhogo re, erora'ni!” ikhi laga. A'nogo ikhemo re it omanogo nen afuni o kota andi bene werek mene omanogo inoasugun mene erorati lagaikha.

⁸ Afuni a'nogo senfisaluk inoati lagaikha sambul andem he an namunek andoma welagi. A'nogo logolik an neindep awi yagaisogo kweangma sagaumsek logolik mel igi, ”Tuhan Lego Mondok welagen mene neisena, Haren ha'mage lagagunem afuni Israel mene fena ineluk o Yerusalem werek mene omare a'nogo inoati logogin andi a?” iluk yagati.

⁹ A'nogo igimo nen Allah nen onggo yaganeti logolik, ”Afuni Israel mene inom, Yehuda mene inom he, weak mondok hokho mene hilingiti lagaikha. Iren o ekhema-ekhekma afuni inoati logolik o Yerusalem yi mondogat weaget faga. Iren ikhi logolik An Tuhan nen o kweang yi re mondogat herakfisigimo re, niren hilingiti lago mene omanogo re eilenggen nisili'lago lego, ili'lagwi.

¹⁰ Ma re, An nen it inoba ekhe nendawirinabigin mondok lek. An nen it inoba hilingfisagain mene andem he, iren ogo ap amu mene inoba hilingfisikhi lagaukwa aremnogo higithogoat hilingfisagain o,” ikhe.

¹¹ Andi nen he, ap asu linen su meneba laberek mene a'nogo ambotkwe wagasik Tuhan yagati logolik yi'nogo yagati laga, ”Tuhan nen yi'nogo ti'nogo hilingi'no iluk yaganeten mene a'nogo an nen mondogat hilingiti o,” iluk ikhi laga.