YEHEZKIEL 8 - Allah Wene Fano Wene Hupla Inane

YEHEZKIEL ABIKANGGOBA ALLAH EBE WELAGAREK MENE ENGGI PIRENEK MENEBA HASIKHE WENE 8:1–10:22 O Yerusalem Allah Awi wuri'mo a'nogo tugwi kembu wurogo fogerati lagaukwa wene

¹ Tahun falfalik oba tugi ogore falfaligen mene tanggal 5 ba were'ma, nit ninebe hu'ninabi wagaukwaba omanogo nen ap Yahudi mene hu'ninabi wagaukwa mene omanogo inogogwi melalinafarek mene re an naiba nambit wagaukwasik ninom hurek welagagu. A'nogo were'ma ferekhogo aremnogo Tuhan Lego Mondok welagarek mene a'nogo omame an noba louk iwaga.

² Noba a'nogo louk iwagama an neilenggen liagaisogo were'ma nen he, afuni inom higirengge ekhe were'ma liakhasigi. A'nogo were'ma liakhigimo nen he obakheba nen tekhogo a'ma fikhit he endu hangge hilingik welaga, nen obakheba nen tekhogo ambol fikhit he no perunggu mene fanorogo horogo fugunem amulit yabelang hikherek andi hangge hilingik welaga.

³ Aren enggi higirengge ekhe pisarogo lakfei wagasik, an nunggulmo nesi sen niikhi laga. Andi nen nabi hangge hasigi mene a'nogoba re an nebe Allah Areagun nen wo'narek we tulem sele'ma poma yathogoat nobagai lagaikhesik wo'narek he o Yerusalem Tuhan awi wuri'mo, senggelek elonggoma mene obalik mondok hore'ma a'nogoba kwi lagunem solombonma abel utara fikhit omanogo nobagai lagaikhe. Nen andem he kembu alik hilingik mene Allah anini kwelafarek mene a'nogo welaga.

⁴ Aremnogo logolik neil were'ma nen he selek Allah Israel mene ineisena andi nen attak i Kebar aik oba nen hasigi a'nogo hakhogo Allah ebe were'ma aselek ombak-bak eterek mene a'nogo enegengge weinam agunem higi.

⁵ A'nogo higimo nen Allah ane an noba ikhi logolik, ”Afuni wa'lagaikharek mene yi re, heil utara fikhit andoma helokhe hebekhogo yet lekhan o,” ikhemo, an a'nogo Aren yaganete higithogo yet hugunemen he, ebekhe kwi lagaikharek oba mezbah fena fikhit andem he kembu Allah a'mage kwelafarek mene a'nogo welaga.

⁶ Allah ane an noba yaganeti logolik, ”Afuni wa'lagaikharek mene yi re, hat heilenggenma re nenamene hilinglagunem hegen? Ap Israel mene nen ina'meilorogo hilingiri'lagwi andiba An nonggwarek nawi wuri'mo nen eil uanhogo hilingnobagali'lagwingge andi furogo kwelakhan o! Andi nen he hobuk An nen hat hoba wene mondok namel-mel asu hak mene ekhe inukhesigiluk welagi o,” iluk ikhe.

⁷ Andi ikhesik he an a'nogo wo'narek o kwe ambe palek abel endakwe wulibi lagaikharek meneba wo'narek lagaikhesik he pa'leget andiba folelek ekhe were'ma hoageluk inukniikhe.

⁸ A'nogo inukniikhi logolik mel yaganete, ”Afuni wa'lagaikharek mene yi sa, folelek yi hokhorogo hilingfein o,” ikhemo an nen a'nogo hilingitirik were'ma nen he, kwe sou misik ekhe were'ma higi.

⁹ A'nogo higimo nen aren an noba ikhi logolik, ”Kwe ambe andibene nen kwi lan o, kwi laluk he iren ina'meilorogo hilingiri'lagwi mene andoma kwelakhano o,” iluk yaganete.

¹⁰ A'nogo yaganetemo an a'nogo kwi lagarik hugunemen he, o hobat ebene haningisogo andoma re kisu alik waganek yinik-hunik inom, eluk-elugengge saliogengge inom, afuni Israel mene nen obaget fogerati lagaukwa mene omanogo hokhorogo ilirengget higik were'ma higi.

¹¹ A'nogo hilingi'mo nen afuni Israel mene inogogwi melalinafarek mene inebe tujuh puluh nen andoma welagaikha, it andem inanggele'ma re hun Safan amlogo Yaazanya a'nogo inomat welagaikha. Logolik inebe lombogen he amben fanongge nolhunem so'le liafarek mene fisogo welagaikha.

¹² Were'ma Allah nen an noba ikhi logolik, ”Afuni wa'lagaikharek mene yi re, afuni Israel mene melalinafarek mene nen hinak-hinak hilingiri'lagwi mene andoma hegen a? Iren he, An nebe o kweang yiba nen herakfuluk wilife, nen iren hilingiri'lagwi mene andoma An nen nisili'lago lek anggikhi logolik he iren o senggelek tugwi kembu nen enek hoporogo hilingik awi andiba obaget hilingiri'lagwi mene andoma heilenggen isegen a?” iluk ikhe.

¹³ Andi nen Tuhan ane ekhe inomat an noba yaganeti logolik he, ”Hat hobuk heilenggen it wene mondok hebak inafe mene ekhe hilingitunem isagain o,” ikhe.

¹⁴ A'nogo ikhesik he an wo'narek kwe ambe Tuhan Awi abel utara fikhit mene a'nogoba lagasik inuk niikhemo hugunemen he andoma hemi hokhorogo Dewa Tamus warek faget obaget le aga lagaikha.

¹⁵ Tuhan nen an noba ikhi logolik, ”Afuni wa'lagaikharek mene yi re, hat wene andi heilenggen hegen a? Hokhorogo ekhe inom ina'meilorogo hilingiri'lagwi mene andoma werego,” ikhe.

¹⁶ A'nogo ikhesik an wo'narek Tuhan Awi wuri'mo senggelek mondok hore'ma kwagarek mene kwe ambeba horokhogo mezbah wurik mene nen hilingi'luk folelek ekhe hilingi'luk honggole'ma andem ap inebe dua puluh lima nen mene were'ma lagaikhe. It inebe re Tuhan awi mondok hore'ma a'nogo inambot wogotasik inelokhe mo liabi wagarek fikhit andoma logolik ineindep awi yagaisogo fogerati lagaikha.

¹⁷ Tuhan nen an noba yaganeti logolik, ”Afuni wa'lagaikharek mene yi re, iren hilingiri'lagwi mene andi hikhi lagen a? Ap Yehuda mene yi it weak mondok ina'meilo mene hilingiti logolik afuni inoba inendawirinafarek lek mene andoma inoba re homot fisikherek lego. Iren andoma mondogat he An nawi wuri'mo yoma nen hilingiri'lagwi andiba re An na'mage kwelabi'lagwi. Iren mondok ina'meilo mene andoma hilingiti logolik An sebelogo nobagali'lagwingge andi fogesin!

¹⁸ Hit he An na'mage mondok elalinhogo hilingitunem hogoin! An nen hobuk nendawirinafik, inaweak sagalogo legetfisigik igin mene ekhe werek lek. Iren samban oba nenu hombuk palogo ugun oba nen he, hilingik kwelek An nesanggo holigin legaro!” iluk ikhe.