YEHEZKIEL 7 - Allah Wene Fano Wene Hupla Inane

Israel mene weagerinabugun oba horogasi waga isikhe wene

¹ Tuhan ane an noba yaganeti logolik,

² ”Afuni wa'lagaikharek mene yi re, An Tuhan Lego Mondok welagirek mene a'nogo nen, o kweang Israel mene yiba hilingfagain mene re yi'nogo yi o. O yiba mondogat elugun warogo yi'nogo hilinglasigin,” ikhe.

³ Tuhan ane ikhi logolik, ”Israel hinap yi, yogondak he hit hinebe legasugun oba arat hilinglagep. Hit he, An nanini a'nogo hogoin. Hiren hinobabut ina'meilo mene hilingiti lagep andoma faget he An nen ayo wurogo unggum higithogo hinoba fagain o.

⁴ An nen hinelagaik hisigik, nendawit hinafik igin lek. Hiren ina'meilo mene hilingiti lagep andomaba re, An nen unggum higithogo wokhisagain. A'nogo hilingisigin andiba re hiren An Tuhan welagi mene a'nogo hinelu asugun o,” ikhe.

⁵ Wene yi re Tuhan Lego Mondok welagarek mene a'nogo nen unggulenu Israel mene inoba ikhe mene re yi, ”Enggin fenggin ekhe wagik-ekhe wagik inoba asi wesigin o.

⁶ Yogondak mondogat he wurep kobok ikhe, hit hinebe legasugun oba a'nogo re yi aro, hit hineluk logogun mene ekhe werek lek.

⁷ Yago, hit afuni hinunggulenu kweang yiba welagep mene yoma, hit faget yi wene ti wene mondogat wurep oba asi waga. Yogondak he hiren o tomkwe nen mezbah oba warogo nolhi logolik hinagaiyegeti lagep mene omanogo ekhe werek lek, meneat he we inane nek sagal pagalhikhi logolik welagaikharek mene omanogo nek werek.

⁸ We horok yogondak yaba nek An nanini mondok hokho mene a'nogo hit hinoba fugunem hogoin. Hit hinobabut hilingiti lagep higithogo An nen ayo wurogo pilinghinabigin. Hiren weak mondok elo'lekhogo hilingiti lagep mene andoma onggore An nen hit hinoba ambisangma hilinghinobagagin weregat.

⁹ An nen hit faget hinelagaik anggigik, nendawi nen hinobagagik igin lek. An nen unggum wokhisagain andi re, hiren weak mondok inabit mene hilingiti lagep andoma faget onggo hilinghinobagagin. Andiba re An nebe Tuhan welagi mene inom, An nen hit unggum wokhisagain mene inom hinelu asugun o,” iluk ikhe.

¹⁰ Unggulenu Israel mene andiba enggin mene oba fagain sambul a'nogo horogasi waga. Inaniniba hilingfisugu aplere ekhema-ekhema mondogat sagarek. Nen, afuni nen winik-wonok agarek mene andi re kabok hokho asi lagaikhe.

¹¹ Inanini meneba nek hilingituba re kwanirek awene hokhorogo werek agarek. It inenggi werek welagaikharek mene inom, inenu lego welagaikharek mene inom, inenu hokho welagaikharek mene inom a'nogo mondogat legasumo re, obalik ogo logogin mondok lek.

¹² O weak-weagat weri'lago, linggene re horogat asi waga! Ma re afuni mondogat he Allah nen unggum inoba fagainmo re, it onggo wanhu mene inom, hunitu mene inom he, inebe seberogoat ambisangma ekhe saburogoin lek.

¹³ Allah a'mage lagaikherek mene andi re ap sa hak mene ogo inoba asi wesigin enek hilingi'mo re, it onggo saburilik nikharek inaben yi mene ti mene attak iren onggo wanhi lagaukwa mene omanogo ambotkwe ekhe oak wanugun mondok lek. Ap ina'mage hokho mene andi re inagap telasugun legat.

¹⁴ Trompet ane ugunem he afuni mondogat enggi warogo fougesugun oba nen he Allah a'mage a'nogo afuni mondogat inoba asi wesumo re, ap misik iluk ogo weim yafukwe ekhe lagain mondok lek.

Israel mene inaweak elekwe unggum wogisagain wene

¹⁵ O kota ebekhe kwe andoma weim enek yafi logogun, olokwe andoma ou amben weak mene inom, sumburu ouwak inomen sagarek logogin. Ap o kota endakwe logogun mene re sikhe ambisangma nen wa'lasugun. Nen kota elonggoma logogun mene re ou amben weak mene inom, sumburu nele nen inom wa'lasugun.

¹⁶ Fena fikhit he ineluk asimbik heise tomkwe andoma lambik logogun, andoma it inebe re sue pel o tonggokwe andoma nen mukhigik wulaginafunem welagarek higit asimbik logogun. Andoma mondogat he it inonggwarek inaweak hilingiti logogun andiba ambisangma heinet wati logogun.

¹⁷ Afuni inebe lombok he inenggi omame legasimbik, ineindep leigeti logogun.

¹⁸ Iren inasu karung mene pelagi su pugesimbik, it inebe mondogat leik-leigengge hilingiti logogun. It inesi re inunggulagap enek hogol fuluk logolik inenggali hikhi logogun.

¹⁹ Emas inom perak inom he alalengge ebekhe kwe hugisagarek andi hak hugisamo logogin. Andi re linggene Tuhan nen mene anini inoba fisagain sambul andi re, it inangge emas, perak andoma nen inagap telinabigin lek, agaumhogo re it inonggwarek inaweak oba monogoisogo kwelakfisogoin. Iren he ina'mage lagaikherek mene omanogoba inoba homot fakhogoin iluk inom, nen inalabut ninghogo nogoin iluk inom, helogoin lek.

²⁰ Attak he it inangge permata elokhe fano mene were'ma inagaiyek aga lagaukwa, oba nen he iren inanggembu ina'meilo mene omanogo wurouwogeluk no andomaba wurikhi lagaukwa andi nen he, Tuhan nen it inangge andoma re mondok inali'lip mene hangge hilingfisagain.

²¹ Tuhan nen unggulenu Israel meneba yagaisikhi logolik, ”An nen hit hinebe ap pok mene nen telogo wokhinarek loageluk neilenggen fagain. Ap kwanirogo hilingitarek mene andoma nen hit hinangge andoma telambik emerogo hilingfogoin.

²² An nawi wurik a'nogo ap hugul helagarek mene nen weagerogo figik, emetfigik, ugunem An nen endephogo yi'nogo ti'nogo ekhe hilingisigin lek.

²³ O kweangma mondogat oba weak peak igin, yi kwe ti kwe ap inoatik, inaniniba hilingfisigik, hilingitarek men nek sagarek logogin.

²⁴ Ap inunggulenu inanini mondogat weak mene re hit hinawi wuri'mo andoma kwi wesimbik logouwageluk An nen lakfisa wesigin. It ap inunggulenu andoma nen hiren wene kabogeti lagep oba omanogo mondok wolelenggenhogo fouwageluk An nen herakfisamo re ap hit mene inanini logolik hinebe hokhondek logogun meneba nen ogore inoak leigesugun.

²⁵ It he inoba lebelek agik, inendawimo weak agik umo re, inendawinggen se mene asuageluk herakhogoin oba nen he herasugun mondok lek.

²⁶ Yi enggin ti enggin inom wene weak mene inom hundik-hundik wagunem, iren ap nabi hobuk yi'nogo asigin iluk agarek mene omanogo inoba heinok woginabugun oba nen he, irogo hilingiesu elo'legat hilingik logogun. Nen, it imam en afuni inoba yagaisa mene ogore elo'legat agik, ap melalinafu mene ogore it inawene komo wene lek agik, ugun.

²⁷ Raja mene ogore le asiginat, nen at amlogo re endawinggen sebe igin, nen afuni ogore inailo nen inoak leigesugun. Hiren hinobabut hilingiti lagep higithogo An nen unggum hinoba figik, nen afuni inawene pilingisogo ayo wurisikhi lagep hak he An nen ogo hit hinoba ogo ayo wut hinabiginat. Andiba re hiren An Tuhan welagi mene a'nogo hinelu asugun o,” ikhe.