YEHEZKIEL 6 - Allah Wene Fano Wene Hupla Inane

Tuhan nen tugwi kembu fogeratarek mene homan fesikhe wene

¹ Tuhan nen an yaganeti logolik,

² ”Afuni wa'lagaikharek mene yi re, hat he helokhe hebekhogo o Israel tomkwe andoma yetlasimbik he unggum it inoba wogisagain mene hat hoba ikhi lagi mene yi, haren it inoba yagaisa lan o.

³ An Tuhan Lego Mondok welagirek mene a'nogo, nane holhik, fut nobagagik, ikhi logouwageluk haren it yagaisikhi logoino. Tom-tom andoma inom, punukwe andoma inom, pulekwe andoma inom, fanggong-fanggong werek mene andoma inom mondogat yagaisilik lan o. Ibi eberogo nen he An nen karok lakfei wesumo, kembu fogeratarekwe andoma wolelenggenhogo fouwageluk lakfei wesigin.

⁴ Warogo nolhukwe obalik mezbah omanogo meisalogo figik, nen amben-amben engge omanogo halik-halokhogo lakfisigik ugun. Nen afuni andoma logogun mene mondogat he inandugwi kembu elokhoma andoma nen inoasumo re inebe wa'lasugun.

⁵ An nen afuni Israel mene inebe warek he hesangge-pesangge andoma lin-lan isambik, inoak lolo re mezbah wurikwe andoma kololok higik potfisagain.

⁶ O kota Israel oba andoma mondogat he legetfisagain, nen mezbah inom, tugwi kembu inom, wolelenggen tagalogo telfol isigik, amben-amben engge nolhukwe andoma nalek falek isigik, igin. Nen iren yi'nogo ti'nogo hilingitarek mene andoma re mondogat legasigin.

⁷ Yi kwe ti kwe andoma nen ap mondogat inoasumo re, it ineluk tindelasugun mene nen he An ineisena Tuhan Allah a'nogo nebe inelu asugun.

⁸ It mene fena endebengge nek he inoasugun oba andoma nen inagap telinabigin, oba nen he it inebe ap inunggulenu lombok inanggelekwe andoma telfol isamo re,

⁹ it inebe huginabiginkwe andoma logogun. Andiba re iren An noba ebet niigik, it inendawinggen An noba tiphogo werek legen An nen unggum wogisigik, sebelogo fisigik, ikhi lagi mene omanogo fut nobagagik ugun. Iren he An mondogat oboget neagasik obali'mo tugwi kembu wenagaisogo fakhaga. Ariginhama re iren kwanirek mene hilingitik, hebak inafe asu hak mene hilingitik, ikhi lagaikha mene andoma faget it inonggwarek inebe hebak inaferogo kumut hikhi logogun.

¹⁰ Andiba re An Tuhan nen ebeti logouwageluk yagaisasigi mene a'nogo inelu asimbik he we eranhogo wene ikhe lego, iluk inelu asugun o,” ikhe.

¹¹ Tuhan Lego Mondok welagarek mene a'nogo nen ikhi logolik, ”Hinendawinggen warikhi logolik he hineil amusu pelakhikhi logoni o! Le hinane kwikwerogo yakhikhi logoni o! Andi re hit hinunggulenu Israel mene nen weak hokho-pokhorogo hilingitep mene andi faget. Hit hobuk weim oba nen inom, sumburu ouwagen inom, ou amben weak mene nen inom, wa'lasugun.

¹² It inebe mondogaren An nanini hambu-hamba hilingiti lagi mene andi inelu asugun. Afuni yatkwe huginabi logoin mene re ou inoba aga logolik inebe wa'larik logoin, nen horokhogo logogun mene re sikhe ambisangma nen wa'lasugun, nen fena tindel asimbik logogun mene re sumburu ouwagen wa'lasugun.

¹³ Inebe warek he tugwi kembu anggelekwe inom mezbah anggelekwe inom, hesangge-pesangge hugisigik, punu uan mene ebene andoma hugisa lagik, tom uan mene helang alemkwe andoma inom, e hokho mene erokwe andoma inom, we eil horokhogo re iren kembu obaget warogo noli'lagwi kwe andoma inom, hesangge pesangge telfol isamo andoma logogin. A'nogo hilinginabigin andiba re afuni inebe lombogen he An nebe it ineisena Tuhan welagi mene a'nogo inelu asugun.

¹⁴ Io, An nenggi pisarogo it inawi fikhit lakfoumo re it mene inawi eroma andoma mondogat weaget figik, o lei esi lekwe selatan fikhit andoma nen he utara fikhit o kota Ribla oba andoma huli re ap mondogat inareng tiring-tereng igin. O afuni Israel mene werekwe andoma nen misik iluk ogo ekhe linet fisogoin lek. Andiba re afuni mondogaren he An Tuhan welagirek mene a'nogo inelu asugun o,” ikhe.