YEHEZKIEL 5 - Allah Wene Fano Wene Hupla Inane

Yehezkiel esi palasikhe wene

¹ Tuhan nen ikhi logolik, ”Afuni wa'lagaikharek mene yi re, weim enggat fanorogo mago mene wanimbik he, hesi inom homboro inom mondogat hogologo palin o. Palimbik he hesi palek andi enggin waletunggeba kilo walhogo re, henagan minggilogo feino.

² Arigin fembik minggilik mene andem kabok misik ekhe re o labesi wesugun oba andi arat agu halok haren o kota andi tulem andoma nolino. Kabok ekhe pirenek mene re weim enggat mago mene a'nogoba kota andi maset hikhi logolik tik tekhogo hugisilik lano. Nen henaganek mene re pogot fikhit poma hesangge hugisa lagaumo An nenggarok enggat merengsek mene a'nogoba libik-lebekhigik hugisagain.

³ Nen hesi andem mene ekhe endebengge logogin mene re hasu jubah sirekwe andoma yelogo kwelakfeino.

⁴ Andi nen hesi andoma mene endebat ekhe re waganogo endumo kwelakfisambik noageluk herakfisano. Andoma nen endu a'nogo wialogo afuni Israel mene inebe werekwe andoma mondogat saga igin,” ikhe.

⁵ Tuhan Omame Hokho mene a'nogo nen ikhi logolik, ”Kwelakhan, o kweangma mondogaren inom nen o kota ekhema-ekhema haningisogo werek mene andomaba nen inom he o Yerusalem yi re enggen tulem logouwageluk hilingisogo figi.

⁶ Oba nen Yerusalem en An nawene melalek a'nogo obokhogo herakfisikhemo re, it ap inunggulenu amu mene nen weak hilingiri'lagwi mene andoma re we endep hak hilingik kwelek, at enek he mondok hokhorogo wene oak sagalhu werek, andi nen negara ekhe it inera'lukwe maserogo werek mene andoma nen holi'lagwi lek mene andi re we endep hak hilingik kwelek, aren aniniba weak mondok hokhorogo hilingiti logolik An nawene melalek omanogo hologo hilingitu aple ogore abit mondok werego,” ikhe.

⁷ Tuhan Lego Mondok welagarek mene a'nogo nen ikhi logolik, ”Hat Yerusalem yi, hesanggo holin o! Hat he wene An nen melalhafi lagi mene omanogo inom, yi'nogo ti'nogo hilingiti logoino iluk ikhi lagi mene omanogo inom futfikhi lagen lek. Hat he ha'mage mondok weak logolik it inunggulenu hera'lukwe werek mene andoma nen he we endep hak hilingitu kwelek harenek he weak mondok hokhorogo hilingiti logolik, it inunggulenu andoma mene nen inetokhogo hilingiri'lagwi mene omanogo hakhogo nek hilingitu welagen.

⁸ Andiba re, An Tuhan Lego Mondok welagirek mene a'nogo nen ikhi logolik, An he hat haselei mene asimbik he, it inunggulenu amu-amu mene ineil oba nen hat unggum wokhesigin o.

⁹ Haren hilingiti lagen mene andoma mondogat he, An nen nabit anggikhi lagi mene hilingiti lagenma re, afuni hat mene andoma inoba re unggum mondok hunogo mene An nen ekhe hilingitirek lek mene, nen hobuk ogo a'nogo ekhe hilingisigin lek mene wogisagain.

¹⁰ Ineisugwi inagaisawi nen inonggwarek ineagwi ninggi logogun, nen ineagwi nen he inonggwarek ineisugwi inagaisawi ninggi logogun. A'nogo hilingiti logouwageluk An nen it inoba unggum wogisagain. Ineluk logogun mene re An nen mugusogo ekhema-ekhema telfolisagain.

¹¹ An Tuhan Allah pogot kweang elalhigi mene a'nogo nane ikhi logolik, haren handugwi kembu An nabit anggigirek mene omanogo obaget hilingitu logolik, mondok weak kwanirek mene hilingitik, ina'meilo mene hilingitik ugunem, An nawi wuri'mo hore'ma a'nogo emeti lagen andiba re, An nen nendawi anggigi'legat alperelogo hobagagin o. Iluk An Tuhan neluk mondok welagirek mene a'nogo nen nane mondogat igi.

¹² Afuni fenakwe ekhe minggilogo re ou amben weak meneba nen inom, sumburu ouwagen inom, o kota yiba asi wesigin mene andiba nen mondogat wa'lasugun. Fena ekhe minggilogo re karogen o kota endakwe fikhiren inobakhe tegethigik inoasigin. Nen fenakwe ekhe minggilogo re An nen o unggut-unggut higithogo telfolisigik, karok fanghogo sikmuk isigik, igin.

¹³ An na'mage mondok lagagunem nanini ari'lago mene andi hat hoba figik, weagethafik imbik halok enek he An noba lombuk igin o. A'nogo andoma mondogat hilinglasumo nek he, haren An noba tiphogo hilingiti lagen le'ma An nanini hat hoba fikhi lagi mene andi re An Tuhan nen nane yagaheti lagi mene andi faget eberogo anggagain o.

¹⁴ Hat he o meisalogo kabok lagaikherek mene hak asumo it inunggulenu hat welagen kwe maserogo welagaikharek mene nen li'not hafi logogun, nen afuni kwe andoma kwe laga logogun mene nen he ogal healuk laga logogun.

¹⁵ An nen hat hele wathafi logolik na'mage nen unggum wokhetunem, inunggulenu amu mene hera'lukwe haningisogo logogun mene omanogo nen ineilenggen healuk he hagaisethafi logogun. Iren he hat li'nothafi logolik ineilenggen kumut healuk inali'lip aga logogun.

¹⁶ An nen hat nunggungge fik-fougeti lagen mene omanogo mondogat leget fembik afuni inamburu ouwak inelokhomarogo nek logouwageluk hilingfisagain. A'nogo hilinghinobagaumo re ou hikhi logolik, ouwak he, loin aik morok-morogengge mene inelonggoma yagaukhogo kugunem ou hagarek andi hak hilingisogo hobagaumo re hebe heiloak legasigin.

¹⁷ We sumburu ouwak andi nek he lek oba nen, ekhe ou amben weak mene lakfei wagik, wene obabut weak mene nek asi wagik ikhi logolik, inaniniba weim yafarek mene inom, afuni hat werekwe mene leget fisigik, nen mene obabut weak mene nen it inagainafuri haum higik noageluk lakfei wagik, igin. Iluk An Tuhan nen nane mondogat igi o,” ikhe.