YEHEZKIEL 47 - Allah Wene Fano Wene Hupla Inane

I elesi Tuhan Awi wuri'mo nen wilifi lagaikhe wene

¹ Ap andi nen an nekhengge sugulogo hondo'narek o Tuhan Awi wuri'mo kuguba solombonma andoma lagama, neilenggen higi re i elesi kwe andi a'ma nen fulogoumhogo timur fikhit andoma lagunem higi, nen o Tuhan Awi andi ogore elokhe timur fikhirat hilingik welaga. i andi re o Tuhan Awi wuri'mo kwe ambe palek mene a'ma andoma nen wulipluk he mezbah esanggo higithogo abel selatan fikhit andoma laga-laga.

² Andi nen ap andi nen an wo'narek he kwe abel utara fikhit meneba wulibi lagasik, kwe timur fikhit meneba hondok narek laga. I endep mene andi re kwe sou a'nogo abel selatan fikhit andoma nen wilipluk laga-laga.

³ Lagunem he sige tomuk ilirenggetugu mene a'nogoba ilirengge wal hikhi logolik, ap andi nen an hondo'narek he abel timur fikhit i a'nogo wulibi lagarek higit 500 meter hakhogo uanhogoat andoma lagasik he, an noba yaganeti logolik i ari palogo wulibi lan o, iluk yaganete. Andi yaganetemo i a'nogo ima kugunemen he huli-huli re neisok nangguli bene hilingik welaga.

⁴ Andi nen aren 500 meter ekhe ilirengge walethikheat, nen andemen i re neindep huli hilingik welaga. Andi nen aren 500 meter ekhe ilirengge waletikhemo nen he i agum he nobakhe bene hilingik welaga.

⁵ Andi nen hobuk ekhe inomat 500 meter en hakhogoat ilirengget hikhemo nen he aren ilirengge walhikheba andem he, i mondogat elonggoma asi pikhi logolik ineisogen sebelu re mondok elo'lek hilinglaga. Ma re ap i palogo wulibi logoin anggikhi logolik halok he, i kume wulibi la nek he higit welaga.

⁶ A'nogo hilinglagama re ap andi nen an noba yaganeti logolik, ”Afuni wa'lagaikharek mene yi re, andoma mondogat he fanorogo futfikhi logoin o” ikhe. A'nogo yaganetesik an nebe wo'narek i a'nogo som lagama,

⁷ an neilenggen hilik lagunemen he, i aik fena-fena andoma re e hokhorogo wilibik welaga higi.

⁸ Wilibik were'ma at ane an noba ikhi logolik, ”I ari re o kweang yi kwe nen timur fikhit andoma wulibi lagaresik, i Yordan oba nen hiling-hiling he Laut Mati oba andoma kwelabi lagarego. Andi nen i ari Laut Mati ba kwelabi lagunem he i laut enduk eluge aik hangge mene andi agaumhogore i enduk fano mene hilinglagarego.

⁹ I andi we koma kwe ogo lagunem he i som andoma re, yi mene ti mene hokho-pokhorogo inom ikan yinik hunik mene inom werek. Nen i Laut Mati andi mene ogore i andi nen enduk fano mene hilingfikhi logogin aro, nen i andi wulibi lagukwe andoma re inelugerinafi logogin.

¹⁰ I elesi o En-Gedi andoma nen lagasik, i elesi-elesingge o En-Eglaim huliba andoma, i esanggo fena-fena ikan watarek inap enek hokhorogo logolik, su ikan su meneba pelafi logogun. Yi ikan ti ikan i andi agum oba andoma werek mene re i Laut Tengah ba werek mene hak hilingik logogin.

¹¹ Oba nen he i esanggokwe engga fesi sogopsek kwe werek mene andoma re, enduk munen agi'lek i eluge agai erore andomaat hilingik logogin.

¹² I aik fena-fena ligabek-pelabek andoma re e enggen iterek mene yi agayo-ti agayo hokhorogo wilibik welaga. Enggare puk agi'lek enggen omanogo lek agi'legat welaga. E andoma re i o Tuhan awi wuri'mo wuliferek mene a'nogoba nen he, tugi ebe lombok he enggen ket mene iti logogin. E andoma enggen he nunggu mene hilingfuluk engga re ou higirinafu mene faget logogin o,” iluk ikhe.

Kweang huli-huli faget isikhe wene

¹³ Tuhan Lego Mondok welagarek mene a'nogo nen ane yaganeti logolik, ”Kweang huli palhigik unggulenu Israel mene inebe nesanggo nen a'nogo inobaget sumburisagain mene re yi o. Unggulenu Yusup mene re huli pire mene helogoin.

¹⁴ An nen nane hombuk palhi logolik kweang ari re hit hinombawi wogisagain o, iluk hombuk palhigi. A'nogo hilingitigi hilingi'mo re kweang andi wanimbik he hinagaila'lak hinom higithogo sumburano.

¹⁵ Abel utara fikhit huli-huli re Laut Tengah ba andoma nen erora'luk timur fikhit he, o kota Hetlon nen kota Hamat fikhit andoma laga logombik o kota Zedad en he,

¹⁶ o Berota inom, Sibraim inom andomaba hilingik logogin, (kota andoma ebe re kota Damsyik en hilingi'luk, o Hamat en hilingi'luk tulem andem werek). Andi nen kota Hazar-Enan o kota Hauran inom huli-hulimo andomaba hilingik logogin.

¹⁷ Andi nen, utara fikhit huli-huli re i Laut Tengah ba andoma nen erora'luk mo wulibi wagarek fikhit, o kota Hazar-Enan oba andoma hilingi'mo re, kota Damsyk inom Hamat inom he huli-hulimo utara fikhit werek andi.

¹⁸ Timur fikhit huli-huli re selatan fikhit andoma nen laga logombik, o ekhe obalik o Damsyk en hilingi'luk Hauran nen hilingi'luk tulem andomaba hilingik logogin. Hilingi'mo re i Yordan he kweang it Israel mo ubuk ikherek fikhit welagaikharek mene nen inom it Gilead mo wulibi wagarek fikhit welagaikharek mene nen inom huli-hulimo tulem andoma nen hiling-hiling he o Tamar i Laut Mati esanggoma andomaba hilingik logogin.

¹⁹ Nen selatan fikhit huli-huli re barat honggolek selatan honggolek tulem andoma nen he, o Tamar en laga lagasik i Kades-Meriba elesi wiliferek oba hilingik logogin, andi nen barat honggolek utara honggolek tulem andoma nen he pikhit laga lagasik Mesir huli nen hiling-hiling i Laut Tengah huliba andoma hilingik logogin.

²⁰ Barat fikhit huli-huli re Laut Tengah tiagansek andiba nen lagasik, abel utara fikhit he o misik ekhe barat fikhit ebekhe o Hamat kwagarek oba andomaba hilingik logogin.

²¹ Kweang andi re hit Israel mene hinunggulenu lombok welagep higithogo sumburano,

²² nen, kweang andi re hit hinanggweang eiserogo logolik mondok-mondok logogin mene. Ap pok mene hit hinanggele'ma logogun mene inom, nen it inagainafuri andoma nen ta'lasugun mene ogore, kweang andoma meneat helikhi logogun. It andi nen anggikhi logogun he, nit he mondok-mondogat Israel mene agoma o anggikhi logogun, nen it Israel mene inunggulenu lombok kweang sumburogo helogoin sambul andem he iren oagengge walhalugen helogoin.

²³ It ap pok mene inebe lombok kweang wogisikhi logolik he, it unggulenu Israel mene inom seberogo werek mene higithogo sumburogo wogisamo helogoin, iluk An Tuhan Lego Mondok welagirek mene a'nogo nen nane mondogat igi o,” iluk ikhe.