YEHEZKIEL 46 - Allah Wene Fano Wene Hupla Inane

Ap enu werek mene logolik linggene esin meneba wene melalek were'ma hilingiti logogun mene faget isikhe wene

¹ Tuhan Lego Mondok welagarek mene a'nogo nen ane ikhi logolik he, ”Kwe ambe timur fikhit folelogo elonggoma kwelabek logogin mene andiba re ap yabu inenggi falfaligen hilingitu kwelek andem he ebekhe andi re yagarek mondok logogin. Ma re, kwe andiba re linggene sabat sambul inom, tugi ket folelhu meneba inom obaget hilingisuogeluk enek he huti logogun.

² Linggene andem sambul he ap enu werek logogin mene andi re o esanggo endakwe fikhit andoma nen ambe hokho mene a'nogoba kwi laluk, ebekhalem e menogo liabek mene a'nogo era'lu andem mendek logogin. A'nogo werek kwelek it imam en he ap enu werek mene a'nogo nen Tuhan endawimo agaiyek hoageluk fei wagu mene omanogo inom, Tuhan nen fanot ninobagauwageluk fei wagu mene omanogo inom warogo nolhi logogun. O solombonma andemen at ebe eindep awi yagaisogo Tuhan fogera'lugen laga logogin. Andi nen o hubagunem ogore kwe sou ambe palek mene andi re yagati logogun lek.

³ Kwe andi elokhe fikhit andemen ogore afuni mondogaren linggene tugi ket mene faget ebetu sambul inom, linggene sabat faget ebetu sambul inom, ineindep awi yagaisogo logolik Tuhan fogerati logogun.

⁴ Linggene sabat sambul he ap enu werek logogin mene andi nen Tuhan faget At agaiyek hoageluk warogo nolhi logogin mene re, domba eak falfaligen inom, domba ai mene misik ekhe inom abirengge andoma agambut palek lek mene nek wogeti logogin.

⁵ Domba ai mene andi inom seberogo re gandum 17,5 liter inom, domba eak andoma ebe lombok ogore gandum inendawimo anggugu higithogo fikhi logolik gandum fugu mene andoma inom zaitun amusu tiga liter inom nolhi logogun.

⁶ Tugi ket folelhu mene andi faget ebeti logolik fikhi logogun mene re, sapi ai mene misik inom, domba eak ai mene falfaligen inom, nen domba ai mene misik inom, abirengge re agambut palek lek mene nek fikhi logogun.

⁷ Sapi ai mene inom, kambing ai mene inom andem ebe lombok inom seberogo nolhu mene re gandum 17,5 liter en inom, nen domba eagwi inom seberogo re, it inendawimo inamolo anggugu higithogo nek fikhi logogun. Gandum fugungge nolhi logolik andoma re zaitun amusu tiga liter a'nogo inom enek nolhi logogun.

⁸ It inenu werek inap a'nogo nen An nawi wuri'mo wene kabogesi kugun anggikhi logolik halok he, at ebere kwe ambe palek hokho mene a'nogo kwe nen kwi laga logogin, nen wilifi logolik ogore kwe andi nenat wulibi laga logogin.

⁹ Agamhogo re, afuni linggene hokho meneba Tuhan fogerasuogeluk andogosi we'luk he kwe ambe palek utara fikhit andi bene nen kwikhi logogun, nen inawilokwe inambotkwe wilibuogeluk halok he kwe abel selatan fikhit andi nen wulibi laga logogun. Nen it kwe abel selatan fikhit andi nen kwi lagu mene re wilibuogeluk halok he utara fikhit andi nen wulibi laga logogun. Afuni re ebekhe kwikhi logogun kwe andi nen wilifi logoinogo, athe ebekhe obakhe tekhogo andi meneba wilifi logogun fano.

¹⁰ Ap enu werek mene ogore Tuhan awi wuri'mo kwi waga logolik, afuni inom seberogo kwi laluk, wilibuogeluk ogore ambine seberogoat wilifi logogun.

¹¹ Linggene seni isatu sambul inom, linggene hokho mene ebetu sambul inom oba re, sapi ebe lombok inom, domba omanogo inom he gandum 17,5 liter inom enek nolhi logogun, nen domba eagwi omanogo re ap weneba andogosi wagu mene omanogo nen inendawimo anggugu mene higithogo nek nolhi logogun. Ap wene kabogetu mene nen he gandum nolhi logolik zaitun amusu tiga liter a'nogo inom enek nolhi logogun.

¹² Nen ap enu werek mene a'nogo endawi fano nen Tuhan obaget fugu mene endu nolhi logolik halok he, we Tuhan endawimo agaiyek hoageluk mene inom, Tuhan nen fanoabet nabuageluk kino yagati logolik mene inom faget fagain iluk ugunem halok he, kwe ambe o sili elonggokwe fikhit hilingik mene andi re at faget kwi wesuageluk kwe sou hut fikhi logogun. Ma re aren wam omanogo warogo nolhi logolik he linggene sabat meneba nolhi logolik hilingitarek mene aremnogo higithogo nek hilingiti logogin, oba nen he at ebe mondogat aiba lagunem enek he kwe andi nekhengge yagati logogun,” iluk ikhe.

Linggene hundik-hundik obaget fikhi logogun mene faget isikhe wene

¹³ Tuhan ane ikhi logolik, ”Inenggi ebe lombok hundik-handik he domba eak misik umur satu tahun hilingik mene agapma agambut palek lek mene halok Tuhan endawimo agaiyek hoageluk mene warogo noleti logogun.

¹⁴ Andi inom mangorogo re o hubet hundik-handik he dua kilogram gandum inom, zaitun amusu re satu liter inom gandum andiba misi'mo mulel fuluk Tuhan wogeti logogun. Wene melalek andi re mondok-mondok were'ma hilingiti logogun.

¹⁵ O hubet hundik-handik he domba eak misik ekhe inom gandum inom zaitun amusu inom Tuhan obaget fuluk wogeti logogun,” ikhe.

Kweang raja anggweangma faget isikhe wene

¹⁶ Tuhan Lego Mondok werek mene a'nogo nen wene melalek yi ikhi logolik, ane yi'nogo ikhe, ”Ap enu werek logolik melalinaferek mene a'nogo nen kweang aren mene omanogo fena at amlogo wogetu halok, kweang andi re amlogo a'nogo mene eise asiginmo re it at eisok erokwe mene inanggweang hilingik logogin.

¹⁷ Oba nen he at enu werek logogin agun andi nen kweang fena amingmingengge mene wogosigin halok he, tahun kweang andi oak waganogo at enu werek logogin mene a'nogo ongwarek helagain oba asi wagunem helambik logogin. Kweang andi re we at inom at onggwarek againafuri mene inanggweang mene logogin, nen kweang andi re it inanggweang mondok-mondok logogin.

¹⁸ Enu werek agun andi nen he afuni inanggweang mene endebengge ogo ekhe helagain mondok lek. We at onggwarek anggweang mene nek a'logomi amlogomi wogisikhi logogin. Arigini'mo re ap amu mene nen iluk ekhe An nagainafuri mene inanggweang oba andoma nen. ’Wulibi lan,’ iluk inane nen ninghogo yagasikhi logogun mondok lego,” ikhe.

Tuhan Awi wuri'mo isatik weratik ugukwe omanogo faget isikhe wene

¹⁹ Andi hilingfuluk ap andi nen an hondo'narek laga-lagasik, kwe ambe palek mene esanggo fikhiren kwi lagosik senggelek mondok horek kwe a'nogo nen pikhit, abel utara fikhit mene a'nogoba nobagai laga. O senggelek andoma re it imam mene faget foukhogo faga meneba kwi lagi. Ap andi nen o senggelek barat fikhit mene a'nogoba enggi tum wat fikhi logolik,

²⁰ mel yaganete, ”O senggelek andoma re, imam en inaweak horinafu mene inom, onggo ambotkwe wogisugu mene inom, gandum mene inom, omanogo nolhuba logogin. Obaget fugu mene andoma endebengge tindelek iluk ogo ekhe waluk enda'ma hu'laguba andoma wilifi logogun mondok lek. A'nogo hilingisugun halok he afuni At againafuri weagerinabinogo,” ikhe.

^21-22 Andi nen an wo'narek abel endakwe fikhit hu'lagaikharek oba andoma lagasik, unggut enggaminogo omanogo hoageluk yaganete. Yaganetemo higi mene re ebe lombok andoma re o ambe we mondok fem endep mene ilirengge walhogo uankwe re 20 meter en, horok fikhit he 15 meter en senggelhigik wurik welaga.

²³ O andoma ebe lombok he helep leget oba nek haningisogo kwelabek welaga. Leget andoma bene re endu nolhukwe obalik hilinghigik welaga. A'nogo hilingi'mo re endu nonggwalhuba obalik hilinghigik welaga.

²⁴ A'nogo were'ma ap andi nen an noba ane ikhi logolik, ”Yoma re it ap Tuhan awi wuri'mo yabu hilingiri'lagwi inaben afuni nen obaget fugu mene omanogo isatu weratukwe re yoma o,” Iluk yaganete.