YEHEZKIEL 45 - Allah Wene Fano Wene Hupla Inane

O kweang Tuhan obaget enogo fogoin mene iluk isikhe wene

¹ Kweang it eise asimbik logogun mene andi oan sumburogo it inunggulenu lombok wogisigi'lek logolik he misik ekhe Tuhan obaget mene tak amu enogo fogoin. Kweang andi uanhogo re 12,5 kilometer en mene fogoin. Nen esanggo sabiarogo re 10 kilometer fogoin. Ma re o andoma mondogat oba re mondok fano horek oba ikhi logogun.

² O Tuhan awi wutu mene faget he kweang andi mene unggut enggaminogo hilingfoumo re, esanggo amu-amu re 25 meter en higik fembik obalik andem oba re At Tuhan awi wusugun.

³ Kweang andiba nen uanhogo re 12,5 kilomete en inom, esanggo nunggulik mene re 5 kilometer en inom andem minggilogo re kweang mondok horek oba andem he Tuhan awi wusugun mene faget fogoin.

⁴ Kweang andi re mondok horek mene hilingi'mo re it ap imam Tuhan awiba andogetunem yabu hilingitu mene faget fouget fogoin. Kweang andi mene nen fena re it inawi inebe werek oba wurugu mene faget fogoin, nen fena re Tuhan awi wutu mene faget fogoin.

⁵ Kweang andiba nen fena ekhe 12,5 kilometer inom nunggulik mene lima meter inom he ap Lewi inap Tuhan aiba yabu hilingiti logogun mene faget fisogoin. Andoma ogore it inebe logogun oba faget inawi wusugunat.

⁶ Kweang amu enogo fogoin mene andi werek kwelek he kweang amu mene misik ekhe uanhogo re 12,5 kilometer en inom nen nunggulik he 2,5 kilometer en hilingik mene kota misik ekhe wutfuluk afuni Israel mene yugunat logogun oba faget ale'ma wendeberogo fogoin.

Kweang ap enu werek mene nen ferinarek logogin oba faget isikhe wene

⁷ Ap enu werek mene logolik ferinarek logogin oba faget ogore kweang ekhe wendeberogo fogoinat. Kweang at faget mene andi re, Tuhan obaget mene iluk enogo fogoin oba andem en hiling-hiling he Laut Tengah huli andoma nen, pikhit timur fikhit huli-huli re kweang amu enogo fogoin meneba andem en he o kweang andi nen ebel timur fikhit andoma huli hilingik logogin. Enggere kweang andi uanhogo hilingik logogin mene re, it inunggulenu Israel mene wogisamo helogoin mene andoma hakhogo hilingik logogin.

⁸ Kweang andi re it kaindek inogogwi raja-raja afuni Israel mene inanggweang eise asimbik logolik melalinafu mene faget foumo re, iren An nagainafuri inenggi omameba sebelinarek logogun hanogo, athe kweang hokhorogo andoma re afuni inunggulenu Israel mene inanggweang asuageluk wogisogoin nen hilingisugun.

Ap inenu werek mene nen ferinarek logolik hilingiti logogun mene faget, isikhe wene

⁹ Tuhan Lego Mondok welagerek mene a'nogo nen ikhi logolik, ”Yago, hit ap Israel hinap hinenu werek mene yoma sani, hiren weak mondok hilingiti lagep mene andoma re arat hilingitebo! Hit hinendawimo nen anggaluk afuni holhu mene sebelogo fisikhi lagep mene andi re herakfisani o. Hiren he eberogo wene inom katokhogo hilingitarek awene inom hilingiti logoni o. Hiren we ibi-eberogo misigam iluk ogo An nagainafuri inanggweang oba nen mugusogo wulaginabugun hanogo. Iluk An Tuhan Lego Mondok welagirek mene a'nogo nen wene andi hit hinoba yagahisigi.

¹⁰ Hiren he enggin ilirengge walhugu mene inom, kilo walhugu mene inom he, eberogo meneba nek walethikhi logoni o.

¹¹ Hiren kilo waleti logolik iringik mene satu efa ba ilirengge'luk halok he elonggoma kwalek mene andi re I hangge mene satu bat keralhunam hanggeba keralhi logogun. Kilo a'nogoba walhaluk hilingitarek mene andi re satu homer oba hilingiti logogun. Arigini'mo re hiren kilo waletu mene andoma re yi'nogo hilingiti logogun: 1 homer 10 efa 10 bat inom higitsek.

¹² Hiren enggin walet hikhi logogun mene re yi'nogo: 1 syikal he 20 gera inom higitsek, 1 mina re 60 syikal inom higitsek logogin.

^13-15 Gandum waluk fei waga logogun mene erasugun mene re yi'nogo: 1/60 nen andi re gandum enggen ugu mene fei waga logogun. 1/60 nen andi re Jawawut enggen ugu mene fei waga logogun. 1/100 nen andi re e minyak zaitun enggen ugu mene palek fikhi logogun. (Hiren waleti logolik he bat oba nek ilirenggetu nogo: 10 bat 1 homer inom higitsek, nen andi re 1 kor inom higitsek.) Domba re: ap ekhe nen anggo 200 nen werek halok he domba misik inom fikhi logogin. Hiren An faget gandum enggen fei wagik, wam warogo figik, lambulogo hinobagauwageluk figik, hilingiti lagep mene andoma wo'netunem he hit hinaweak andoma nonggorabethogo fikhi logogin. An Tuhan Lego Mondok welagirek mene a'nogo nen wene melalek yi higithogo hilingiti logobagaigen iluk figi.

¹⁶ Afuni o kweang andomaba logogun mene mondogaren he yi mene ti mene fugu mene omanogo waluk ap enu werek logolik Israel oba ferinarek logogin mene andi obaget fei waga logogun.

¹⁷ Arenat o linggene esin mene faget inom, tugi ket mene folelhunem inom, linggene sabat oba faget inom, linggene amu mene faget inom, ebeti logolik faget he ap enu werek andi nenat wam an nendawimo nagaiyek hoageluk warogo nolhu mene inom, gandum nolhu mene inom, nen afuni Israel mene mondogat inobaget anggur fuluk wogetu mene andoma re arenat onggo palhi logogin. Aren he afuni inunggulenu Israel mene inaweak sagalogo leget fouwageluk faget he: Inaweak legaphogo fouwageluk faget inom, lambulogo fisoageluk faget inom, gandum enggen At faget fugu mene inom, At obaget warogo nolhu mene inom, arenat fouget fikhi logogin,” iluk ikhe.

Linggene esin mene faget isikhe wene

¹⁸ Tuhan Lego Mondok welagarek mene a'nogo nen againafuri faget ikhi logolik, ”Tugi misik tanggal satu oba re hiren An naiba a'nogo horogo puguneti logolik, sapi ai mene ket kotorek mene misik agap oba agambut palek lek mene warogo wo'neti logogun.

¹⁹ Imam en he wam inaweak legabesuageluk watu mene a'nogo amep waluk he e oak An nailoba werek mene andem ebene horisikhi logogun, andi nen he mezbah wurik mene a'nogo unggut enggaminogo aremnogo ebene inom, kwe ambe hokho mene elonggo fikhit kwi lagu meneba andoma e tiang liagaisogo wurik mene andoma bene inom, horisikhi logogun.

²⁰ Nen andi hakhogo re hinenggi attak mene tanggal tujuh andiba re ap inebe lombogen weak hilingisugun inonggotse'ma nen ogo athe wenggelek le'ma nen ferekhogo hilingfuluk ogo a'nogo nek hilingiti logogun. Iren a'nogo hilingisugun oba re An Nawi Mondok Hore'ma a'nogo halogo fikhi logogun.

²¹ Nen tanggal empat belas tugi misik oba re hiren he seni Pesta Paskah isati logogun. A'nogo hilingiti logolik linggene sabit meneba re afuni nen roti fitungge meneba werago lek mene nek ninggi logogun.

²² Hinenggi attak meneba re ap ekhe enu werek logolik melalinafi logogin mene a'nogo nen he at onggwarek inom, afuni mondogat inom inaweak legetfisoageluk he sapi ai mene misik ekhe warogo fikhi logogin.

²³ Inenggi ebeti logolik logogun oba linggene sabiren andem logolik he inenggi ebe lombok oba re at andi nen Tuhan obaget sapi ai mene tujuh nen inom domba ai mene tujuh nen inom agambut palek lek mene nek warogo fuluk, ebe abirengge noleti logogin. Linggene hundik-hundik he aren kambing ai mene misik ekhe inaweak legaphogo fugu mene faget warogo fikhi logoginat.

²⁴ Andem a'nogo hilingiti logolik, ekhere gandum 17,5 liter he sapi ai mene ebe lombok faget, nen domba ai mene faget he zaitun amusu tiga liter inom fikhi logogin.

²⁵ Pesta O Sabu a'nogo faget isati logolik he tugi sabit meneba tanggal lima belas sambul andi erora'luk he ap enu werek logogin mene a'nogo nen he wam ekhe attak warogo fagain a'nogo hakhogo, inaweak legabesuageluk inom, Tuhan endawimo agaiyek hoageluk mene inom, gandum inom zaitun amusu inom fuluk wogeti logoginat,” iluk ikhe.