YEHEZKIEL 44 - Allah Wene Fano Wene Hupla Inane

Kwe ambe timur fikhit meneba kwi laga lagaukwa wene

¹ Andi hilingfuluk ap a'nogo nen an wo'narek o Tuhan awi era'lu kwe ambe fena timur fikhit folelek mene a'nogoba laga. Kwe sou andi yagare'ma re,

² Tuhan ane an noba yaganeti logolik, ”Kwe yi re huti'lek mondok-mondok yagarek logouwak. Ap misik iluk ogo ekhe kwi wesinogo, An Tuhan Allah Israel mene ineisena a'nogo re kwe yi nen An mondogat naiba kwi wagarik welagi o. Ma re, kwe andi re mondok-mondok yagarek logogin.

³ Oba nen he hobuk ap misik ekhe omamerogo logolik melalinafi logogin mene andi nek he kwe andiba laluk nunggungge fano horek mene omanogo An nelokhoma werek mene andoma ninggi logogin. Andi nen at he kwe o senggelek hokho mene a'nogo kwe nen kwi laluk, kwe andi nenat wulibi laga logogin,” iluk ikhe.

Tuhan awi wuri'mo ap sani kwikhi logogun iluk, isikhe wene

⁴ Andi nen ap a'nogo nen an wo'narek lagasik kwe abel utara fikhit Tuhan awi wuri'mo obalik hore'ma elokhe fikhit andoma nobagai laga. Lagama re an nen futfikhi logolik, Tuhan awi wuri'mo omanogo kwelakhugunemen he, Tuhan ebe werek iluk enekhogo re selek ombak-bak a'nogo yararet hikhi laga. Ma re, an nelokhe sogoum fogerati,

⁵ andi nen Tuhan nen yaganeti logolik, ”Afuni wa'laikharek mene yi, haren holhi lagen mene inom, hikhi lagen mene andoma inom fani'fanorogo fut feino. An nawi wuri'mo yi hilingiti logogun mene faget wene melalek inom yi'nogo ti'nogo hilingitu mene faget inom hat yagaheti lagi. An nawi wuri'mo sani-sani kwikhi logogun, nen sani-sani kwikhi logogun lek iluk he, lisu furogo palogo fein o.

⁶ Afuni Israel mene it inane sagali'lagwi andoma inoba yagaisano, An he Tuhan Lego Mondok welagi mene hilingik welagimo re it inebe emetlakhoageluk herakfugu aple andi re mondok nabit welagi.

⁷ Iren An nawi wuri'mo emerogo faga, andi re it ap enda'ma mene inagap inenggalimo palek lek mene andoma nen An nawene melalek higithogo hilingiri'lagwi lek mene andoma kuageluk yagaisugunem, amusu inom An nobaget warogo nolhu mene amep inom, waluk kugu mene andiba emerogo faga. Iren ina'meilo mene hilingiri'lagwi andiba re An ninom wene warek welago mene a'nogo taganet fili'lagwi andi.

⁸ It he inonggwarek inamu nen An nawi wuri'mo hore'ma andoma wene kabogeti logolik hilingiti logou mene re iren yabu omanogo ap pok mene nen hilingisuageluk yagaisili'lagwi.

⁹ An Tuhan Lego Mondok welagi mene a'nogo nen wene yi menfikhi lagi hilingi'mo re, it ap pok mene inom, inagap pale'lek mene inom, An nane hologo hilingiri'lagwi lek mene inom he An nawi wuri'mo andoma ibi-eberogo nenat kwikhi logogun lego. Wene andi re, it ap pok mene ap Israel mene inanggele'ma femhogo werek mene faget ogo ikhi lagiat andi,” iluk ikhe.

Ap Lewi mene ineabu imam meneba nen wulak fisasukwa wene

¹⁰ Tuhan ane an noba ikhi logolik, ”An nen ap Lewi mene unggum wogisagain andi re it ap Israel mene ekhe An heraknobagaluk tugwi kembu fogerari'lagwi mene andoma inomat mangorogo unggum wogisagain.

¹¹ An nawi wuri'mo andoma iren yabu hilingiti logogun mene re we yabu hilingitunem leberisugu mene inom, kwe ambe pale'ma kagalek werek mene inom enek An nobaget hilingiti logogun. It he, An nobaget warogo nolhu mene iluk inom wo'netu mene inom omanogo senggelhik, palhik, ikhi logolik, iren An nagainafuri inobaget he femhogo hilingiti logogun.

¹² Oba nen he, iren afuni Israel mene inobaget mondogat tugwi kembu fogeratu mene hilingiti lagaukwaba, afuni Israel mene yebet fakhagama re, weak meneba ke'nokhogo weak mene elema lisogo woginarek kwikhe andi, arigini'mo re An Tuhan Lego Mondok welagirek mene nen nane hombuk palhi logolik, it andi mondogat unggum wogisagain o, iluk igi andi.

¹³ It he An nobaget ekhe inebe imam mene a'luk yabu hilingitik, nen An nangge horek mene omanogoba fakhigik, athe obalik mondok amu horek oba a'nogo kwigik, andoma mondogat he hilingiti logogun lek. Andi re, iren ina'meilo mene hilingiti lagaukwa mene omanogo faget unggum inoba asigin andi.

¹⁴ Ariginik meneat he yogondak An nen it yabu sebelek mene An nawi wuri'mo andoma hilingiti logogun mene faget menfisikhi lagi andi,” iluk ikhe.

Imam inobaget isikhe wene

¹⁵ Tuhan Lego Mondok welagarek mene a'nogo nen ikhi logolik, ”Unggulenu Israel mene nen An heraknobabagun oba re hun Zadok againafuri mene imam Lewi inap andoma nen An nobaget nawi wuri'mo andoma yabu higithogo hilingiti logogun. Andi faget we yogondak ogo irenat wam warogo asei inom amep inom waluk An nobaget fuluk wo'neti logouwak.

¹⁶ We it inamu nek An nawi wuri'mo kwi we'luk mezbah oba andoma An nobaget warogo fugu mene hilingiti logolik, An nawi wuri'mo andoma nen wene kabogetuba andoma ogo irenat melalinafi logogun.

¹⁷ It ambi kwe ambe palek meneba kwikhi logolik ambe elonggoma meneba kwi louwogeluk halok he, iren inasu linen su mene nek labeti logogun. It yabu senggelek elonggoma meneba inom An nawi elonggoma inom yabu hilingiti logolik halok he su wol su mene labeti logogun lek.

¹⁸ It inoba aganhan inapluk likhak wesinogoluk he, su celana linen meneba nen ban inobakhe puksek legengge labeti logogun. Nen inunggulmo re linen meneba pugeti logogun.

¹⁹ It ambi o enda'ma afuni kabogetarek oba omanogo wulibi laluk halok he, it imam en he su yabu hilingiti logolik labetu mene omanogo o An nawi wuri'mo nen senggelek mondok hore'ma omanogo nonggologo fuluk inasu amu mene laberikhi logogun, andi re su amu tegelek mene andoma nen inagainafuri alomarogo fisanogo iluk a'nogo hilingiti logogun andi.

²⁰ It imam mene halok he, inesi inungguloak hogologo palhi logogun lek, athe inesi palhi'legengge ogo herak fisikhi logogun legat, oba nen he yi huli palugun iluk inane ayo palogo werek mene higithogo horokhogo palhi logogun.

²¹ It o senggelek horek mene a'nogo elonggoma meneba kuogeluk halok he anggur agai ninggi logogun lek.

²² It imam he inagagwi tugum mene ap inagap inonggot mene Israel mene halok enek he woginafik, nen it imam mene inagagwi sogwe fisugu mene woginafik, ikhi logogun oba nen, ap ekhe nen herakfisugu mene re woginafi logogun lek.

²³ Ap imam mene nen he afuni An nagainafuri yagaisikhi logolik halok he ki mene An nobaget tegelek werek, nen ki mene lek iluk fanorogo penetik, nen ebe weneba re ki mene horek mene werek, nen ki mene emerek mene werek iluk peneti logouwageluk yagaisikhi logogun.

²⁴ Wene minggirik awene weinam agu halok legabesuogeluk halok he, An nawene melalek yi'nogo ti'nogo hilingiti logoino iluk wokhisasigi mene andomaba higithogo nek hilingiti logoino. Iren seni inenggi esin meneba isati logolik, wene melalek werek mene inom yi'nogo ti'nogo hilingitu awene inom higithogo nek hilingiti logolik, inenggi sabat mene andiba An nobaget enogo fuluk legeisogo nobagakhi logouwak.

²⁵ Ap imam mene re ap warek senesigin oba ebe emerogo fakhikhe hanogo. Meneba nen at eisena agaisa ebe tasigin mene inom, athe at onggwarek omalik inom, at erei hele mene ogo ap mene ogo oan lombolinafi'lek mene halok enek he aren senisagain halok fano.

²⁶ At ebe mondogat pugunet fakhikhe halok, aren enggi linggene tujuh nen nenangot hikhi logolik logogin,

²⁷ andi nen at ebe laluk An nawi wuri'mo andoma elonggoma senggele'ma andoma nen nobaget warogo nol nobagagunem ebe horogo fakhaluk enek he An nawi wuri'mo andoma yabu hilingiti logogin fano. Iluk An Tuhan Lego Mondok welagirek mene a'nogo nen nane mondogat igi.

²⁸ It imam en yabu imam mene akhogoin andi re An nen afuni Israel mene inoba nen ta'larik logoin mene andoma nen hilingiti logogun mene iluk wogisasigi andi. An he it inangge welagimo re it imam andoma inangge amu mene ekhe logogin lek.

²⁹ It andi re An nobaget gandum inom wam inaweak horogo leget fisoageluk warogo fugu mene inom, afuni inangge obali'mo fugu mene inom andomaba ineluk logogun, nen yi mene ti mene An nobaget iluk enogo nobagakhi logogun engge andoma re it enek wogisikhi logogun.

³⁰ It imam mene re yi mene ti mene enggen attak-attak taganhi logolik mondok fano mene enogo An nobaget fikhi logogun engge andoma re it wogisikhi logogun. It afuni Israel mene nen he hundik-handik roti werati logolik, roti attak mene re it imam inobaget fisikhi logogun. A'nogo hilingiti logogun andiba re it Israel mene inebe lombok inailokwe andoma re An nen fanot fisikhi logogin.

³¹ Sue, paik, amu mene ogo, amu wa'lagu halok inom, mene olomene nen senggelhu halok inom andoma re it imam en he ninggi logogun lek,” iluk ikhe.