YEHEZKIEL 43 - Allah Wene Fano Wene Hupla Inane

Tuhan ebe Awi wuri'mo ambotkwe wagaikhe wene

¹ A'nogo mondogat hilingfuluk, ap andi nen an wo'narek lagasik kwe ambe timur fikhit folelek meneba lagama,

² andem en an neilenggen kwelakhasigi re, Allah Israel mene werek iluk enegenggerogo timur fikhiren selek hokho mene ombak-bak yararet hilik wagunem yethigi. Allah ane re i hokho mene eindep ane hak inom nen Allah aselegen kweangma mondogat ombak-bak etunem lia fiarogo selegeraterek a'nogo hak inom hilingitunem higi.

³ Nabikanggo higi mene andi re, o attak i Kebar ima nen Allah wagaikhesik Yerusalem wolelenggenhogo fugunem hasigi mene a'nogo higithogo hilingitunem higi. A'nogo higirik an nelokhe sogoum logolik fogerati.

⁴ Selek mondok ombak-bageti laga mene andi re kwe abel timur fikhit folelek welaga mene a'nogo kwe nen o Tuhan awi wurik mene a'nogo elonggoma a'lima kwikhi laga.

⁵ Tuhan Areagun an nebe hambogoisogo wo'narek senggelek elonggoma meneba a'lima nogo kwikhe, wo'narek kwikhemo kugunem en he Tuhan Awi a'nogo re Tuhan ebe werek iluk aselegen huli'liphogo kwelabe'ma higi.

⁶ Andi nen he ap andi an nera'lu mendek werek kwelek he, Tuhan Awi wurik elonggoma andoma nen ane an noba yi'nogo yaganeti laga,

⁷ ”Afuni wa'lagaikharek mene yi re, An nebe nagainafuri Israel mene inanggele'ma logolik it inebe nagainafuri nenggi mondok-mondok melalinafu logogin mene a'nogo re Nebe yi o. It inom ap raja inomen ogore, inandugwi kembu wurigik, nen it inogogwi raja inebe warek kweang yiba salinafik, ikhi logolik An nenu mondok horek mene a'nogo emerogo nobagakhi logogun lego.

⁸ Attak he, it inogogwi raja lagen an nawi kwe kugukwe inom An nawi langoak inom werek kwelek iren kwe sou inom it inawi inebe werek oba langoak inom wutama re o iren mene hilingi'luk An nen mene hilingi'luk tulem andem he oak we misik enek welaga. Iren he mondok weak mene omanogo hilingiti logolik An nenu mondok horek welagi mene a'nogo emerogo fikhi lagaikha. Andiba re, An nanini nen it inebe lek hilingisogo fisasigi andi.

⁹ Oba nen yogondak huli nen hiren kembu wutik, raja iren mene warek salek mene omanogo waganogo ale'ma fei lagik hilingiri'lagwi mene andoma palfogoin fano, A'nogo hilingisugun halok enek he An nebe it inanggele'ma mondok-mondok logogin o,” ikhe.

¹⁰ A'nogo ikhesik Tuhan ane ekhe inom ikhi logolik, ”Afuni wa'lagaikharek mene yi re, An nawi ari faget afuni Israel mene yagaisan o, nen iren o ari wu'lasigin mene faget fi furogo kumut hoageluk miminginabin o. It inaweak hilingiti lagaukwa mene andoma faget inenggali hoageluk hilingi'no o.

¹¹ Nen, it inobabut hilingiti lagaukwa mene andoma ambisangma inenggali mondogat hili'lagunem enek he, An naiba ari wusugun mene faget yi'nogo wusugun iluk it inoba fakhogo yagaisano. Andi re, o ebe obabut hilingik mene inom, ebekhe ambe palekwe wilifik kwigik ugukwe inom, o ebe sap palogo wusugun mene inom, awene melalek inom yi'nogo ti'nogo iluk werek aple inom andoma faget yagaisano. Andoma mondogat palfoumo re iren ineilenggen higik, yi'nogo ti'nogo halhu mene faget fut figik, wene melalek werek mene andoma hologo hilingitik, ugun.

¹² O Tuhan Awi andi obabut amu lenogo hilingik mene re yi'nogo, o sili era'lukwe punu legokwe ebene andoma mondogat he hihorek mene werek,” ikhe.

Mezbah wam warogo endu nolhuba faget obalik a'nogo

¹³ O Tuhan awi wuri'mo mezbah wam warogo nolhuba faget ilirenggerogo wusugun iluk mene a'nogo re yi: Mezbah andi eisok higithogo maserogo andoma re i kalok misik ekhe elonggore setengah meter en nen healogo re setengah meter enat, andi nen esanggokwe liabek hilingik mene re seperempat meter enat hilingik welaga.

¹⁴ I kalok elema andoma nen he mezbah a'ma ma'lima huli kwalek mene andi liabek uanhogo re satu meter en. Tulem andem liabek uanhogo re dua meter en, andi re mezbah eroma maserogo andoma re healek logogin oba nen he tulem andoma nek he we endep ekhe kelokhogo setengah meteren hakhogo hilingik logogin. Ero henaganek mene andi re mezbah amboloba andi ogore horok setengah meter endep eil horoksek kwelek tulem andoma haningisogo re healek welaga.

¹⁵ Fena henaganek mene yi re obalik Allah faget fugu mene nolhuba re, liabek uanhogo re dua meter en. Unggut enggaminogo aremnogo fena-fena andoma re andimuk hangge nganokhogo liabek welaga.

¹⁶ Mezbah andi amboloba andoma re unggut enggaminogo wurik welaga, esanggo andoma ilirenggerogo re enam meter en hilingik welaga.

¹⁷ Nen tulem andoma ogore unggut enggaminogo hilingik welaga, andi nen esanggo fena-fena andoma ilirenggerogo tujuh meter en, andi inom abel misik fena ekhe uanhogo liabek mene re seper empat meter en hilingik welaga. (I kalok ebe ele langhogore setengah meter en hilingik welaga). Esanggo timur fikhit andoma re kwe pelarogo mezbah werek fikhit ambolkwe andoma liabek welaga.

Mezbah a'nogo horogo pugunetu mene faget isikhe wene

¹⁸ Tuhan Lego Mondok welagarek mene a'nogo nen an noba yaganeti logolik, ”Afuni wa'lagaikharek mene yi re, An nen hat hoba yagaheti lagi mene andoma re hesanggo fanorogo holin o. Mezbah andi mondogat wut fuluk he, haren wam warogo amboloba fei laluk wam amep ebene kweisal fuluk endu nolino o.

¹⁹ An nobaget weneba kabogesuogeluk he we it ap imam Zadok unggulenu Lewi mene againafuri nek he elok waga logogun. Iluk An Tuhan Lego Mondok welagirek mene a'nogo nen wene yi melalhobagagi. It inoba wam sapi ai mene ebe oan kotorek mene misik ekhe it inaweak horogo leget fisoageluk warogo noluakhogo wogisano.

²⁰ Amep endebat halok ekhe waganogo waluk mezbah a'nogo unggut enggaminogo hilingi'mo andimuk liabek mene aremnogo ebene inom, nen mezbah unggut-unggut andoma nen tulem fikhit andoma inom, esanggo fena-fena nen tulem andoma inom higithogo nek kweisalik lano. Nen mezbah andi haningisogo andoma re a'nogo nek hilingi'no. A'nogo hilingisigin andiba nek he haren mezbah andiba hosimbik An nobaget tegelogo fagain o.

²¹ Andi hilingfuluk sapi ai mene inaweak horinafu mene andi waluk obalik mondogat tukhogo hilingi'mo o Tuhan awi wurik andi era'lu obalik mondok hore'ma andoma nen endakwe fikhit andoma endu nolino.

²² Ohealek he haren kambing ai mene agambut palek lek mene ekhe inaweak horogo leget fugu mene faget warogo nolhi logolik, mezbah andi amep oba hora'no. Sapi ai mene kotorek mene a'nogoba hilingisigin mene aremnogo higithogo nek hilingi'no.

²³ Haren mondogat a'nogo hilingfuluk halok he, sapi misik ai mene ket kotorek mene ekhe inom kambing ai mene kotorek mene ekhe inom ebe pirenet he inagambut palek lek mene nek,

²⁴ wanimbik he An wo'nesi we'no. It imam en he mayu wam pire warengengge andem ambolebene fol fuluk, endu nolumo re An nobaget fuluk nolhu mene asigin.

²⁵ Linggene hundik-hundik hinenggi sabiren andi re, kambing misik warogo nolhik, sapi ai mene kotorek mene misik warogo nolhik, kambing ai mene inaweak horogo leget fisoageluk mene faget nolhik, ikhi logogun. Wam andoma re agambut palek lek mene nek nolhi logogun.

²⁶ Linggene sabiren oba aninurogo andoma it imam en mezbah andi mep kweisalhu mene hilingiti logolik logogun. Andi nen iren noli wesugun mene faget fik-foukhogo fikhi logogun.

²⁷ Linggene sabiren a'nogo mondogat hilingfuluk, inenggi wurep kobokhogo re it imam en obaget fugungge omanogo mezbah amboloba wam Tuhan agaiyek hoageluk mene inom, lambulogo fisoageluk mene inom, nolhi logogun. Andiba An nen he hit mondogat hinobaget nagaiyek hinoba fikhi logogin. Iluk An Tuhan Lego Mondok welagirek mene a'nogo nane mondogat yagaheti o,” ikhe.