YEHEZKIEL 40 - Allah Wene Fano Wene Hupla Inane

O TUHAN AWI HOBUK LOGOGIN MENE FAGET YEHEZKIEL ABIKANGGOBA HASIKHE WENE 40–48 Yehezkiel waluk o Yerusalem lagaikhe wene

¹ Andi sambul tanggal sepuluh ba tugi misik, tahun dua puluh lima ba nit la'ninobagasukwama logolik oba andem, nen Yerusalem sebelaga huli nen he tahun empat beles meneba werek kwelek, At Tuhan nen an nomame kwelaknobagaikhesik an nebe wo'narek laga.

² An nabikanggo ekhe wokhugunemen he Allah nen an wo'narek kweang Israel meneba lagasik punu uan meneba nobagai laga. Ma re an nelokhe fikhiren kwelakhugunemen he o wurik ekhe kabokhogo wuri'mo obabut he kota higit halogo were'ma higi.

³ An wo'narek andoma lagama neilenggen hugunemen he ap mene ekhe amulit no perunggu amulit yararet hikherek andi hakhogo kwe hokho mene fikhit andem mendek welaga. Mendek logolik enggimore hele ilirengge linen mene fisogo logolik e ilirenggetu mene inom senek welaga.

⁴ Ap andi nen an noba yaganeti logolik, ”Afuni wa'lagaikharek mene yi re, fanorogo holin o, nen ekhe mene ekhe mene an nen hat hoba inuk heagain mene andomare furogo fut feino o. Andi faget an nen hat hebe hondok harek yoma wagi o. Ma re haren mondogat hagain mene andoma re it inunggulenu Israel mene inoba yagaisano o,” iluk yaganete.

Kwe timur fikhit folelek welagaikhe wene

⁵ Andi nen an neilenggen yethugunemen he Tuhan awi re leget haningisogo wagane'ma higi. Higiri'mo nen he ap andi nen ilirengge e mene uan hogore tiga meter en hilingik meneba ilirenggeti laga. Oba nen he leget pak mene andi esia'leba wurogo liabek mene re tiga meter en hilingi'mo, leget andi ayogouk sap palek mene ogore tiga meter enat hilingik welaga.

⁶ Andi nen at a'nogo kwe abel timur fikhit hilingik meneba laga. Lagasik he at ebe e pelarekwe nen amboloba lagaikhesik he kwe sou ambe palek a'nogo ilirengge walhogo sabia kwe re tiga meter en hilingik welaga.

^7-10 Kwe sou andi ambol fikhit he hugele ekhe abel amu-amu re ambe henagan ap kagalek welagaikharek oba folelek welaga. Ambe palek mene andem ebe lombok elonggo hilingik menere mondok higit enek hilingik welaga. Obabut he unggut enggaminogo hilingik menere abel ebe lombok uanhogore tiga meter en hilingik welaga. O andi hulithigik senggelek menere ayogouk higithogo nek 2 setengah meter en hilingik welaga. Hugele andoma uan kwere tiga meter en ekhe inom hilingi'mo, pisarogo re ambe hokho mene o Tuhan Awi wurik fikhit elokhe hilingik mene a'nogoba hilingik welaga. A'nogo hilingi'mo ap a'nogo nen he ambe palek hokho mene a'nogo ilirenggetesik hilingitunemen he wurilik kwe re empat meter en, ebere kwe ambe hokho mene a'nogo ambisangma andoma welaga, elonggo fikhit mene re o Tuhan Awi wurik a'nogo inom hirik-horokhogo welaga. Hobat o Tuhan Awi wurik mene a'nogo fikhit hilingik mene andi re mondogat wulimse'ma re satu meter en hilingik welaga.

¹¹ Andi nen ap a'nogo nen folelek ambeba a'nogo sabiarogo hilingik menere ilirengge walhikhemo nen he enam setengah meter en hilingik welaga, nen esanggo wogolek fikhit wulimhogo re lima meter en hilingik welaga.

¹² Ap kagalek were'ma elokhe fikhit senggelek mene andoma ilirengge re tiga kali tiga meter en, leget ekhe we horok somarogo waganek mene uanhogo re setengah meter en wagane'ma, nen ayogouk he setengah meter enat hilingik welaga.

¹³ Andi nen ap a'nogo nen o a'nogo abel ambol fikhit ap kagalek werek oba a'nogo nen he ambe ekhe kagalek werek oba fena fikhit a'nogo faget ilirenggeti laga. Menere walhogore 12,5 meter hilingik welaga.

¹⁴ Aren he nekherogo ambe hokho mene andi ogore ilirengge waleteat: Uanhogo re sepuluh meter en. Ambe andi faget ebekhe andi re Tuhan awi wuri'mo nen he ambe elokhe fikhit mene a'nogo abel takwe fikhit welaga.

¹⁵ Kwe sou endakwe meneba nen o leget elonggo hokho mene a'nogo o Tuhan Awi wurik mene inom elokhe hilingik mene a'nogoba hilingik mene re 25 meter en.

¹⁶ O hobat elokhe kwe mene inom o hobat hekhogo hulirek mene omanogo inom oba re jendela endep-endep engge mene folelek welaga. Leget elonggo fikhit mene elokhe hukhogo hilingik werek fikhit andoma re, e palem ilirenggerogo hilingik welaga.

Tuhan awi solombon endakwe fikhit mene a'nogo

¹⁷ Andi nen ap a'nogo nen Tuhan awi wuri'mo elonggoma nen solombon endakwe fikhit mene a'nogoba wo'narek wulife. O Tuhan awi wurik mene andi hobat era'lukwe maserogo omanogo re o senggelek 30 nen hulithigik wurik welaga. O solombonma andoma elokhe kwe re o hulu helep meneba talogo

¹⁸ solombon andoma haningisogo kwelabek welaga. Nen solombon endakwe mene andi re sebele'ma solombon elonggoma mene nek he legeisogo hilingik welaga.

¹⁹ Andoma kwe ambe palek amu mene ekhe were'ma folelek menere kwe ambe elonggoma meneba kwi lagu mene a'nogo re sebelek kwelek andi nek he mondok legeisogo wurik welaga. Ap a'nogo nen he kwe sou pirenet engge ekheba nen he ekheba agundip se'ma tulem aremnogo faget ilirengge walhikhemo nen he 50 meter en hilingik welaga.

Kwe ambe utara fikhit mene a'nogo

²⁰ Andi hilingfuluk ap a'nogo nen kwe ambe utara fikhit mene a'nogo endakwe fikhiren elonggokwe fikhit kwi lagaikharek mene a'nogo ilirenggetikhe.

²¹ Kwe andiba nen ambe senggelek henagan oba ap kagalek werek mene abel amu-amuba inom, o senggelek hulirek mene inom, ambe hokho mene a'nogo inom, andoma ilirenggerek mene re kwe ambe timur fikhit meneba hilingik welaga aremnogo inom higithogoat hilingik welaga. Hugelekwe andem ebene hilingik welaga mene andoma mondogat he uanhogo re 25 meter en, esanggo wurilogo re 12,5 meter en hilingik welaga.

²² Andi nen ekhe ambe hokhoma a'nogo inom, jendela omanogo inom, e palem hesesengge waganek mene inom he ambe timur fikhit meneba hilingik aremnogo inom higithogo nek hilingik welaga. Arigini'mo re ineisok pelare 7 nen mene re kwe ambe a'nogoba nek tibethigik hilingik welaga. Nen ambisang he o ambe hokho mene Tuhan aiba wurik a'nogo ba nen ambe endakwe fikhit wurik mene a'nogoba hilingik welaga.

²³ Kwe utara fikhit hilingik mene a'nogo inom elokhe hilingik welaga mene re, kwe ekhe amu mene ambe elonggoma mene a'nogoba kwi lagaikharekwe were'ma re, kwe andi abel timur fikhit hilingik aremnogo inom higithogo nek hilingik welaga. Ap a'nogo nen kwe ambe pire aremnogo ekhe nen ekheba hilingik mene faget he 50 meter en ilirengget fikhe.

Kwe ambe selatan fikhit mene a'nogo

²⁴ Andi nen ap a'nogo nen an wo'narek he pikhit kwe ambe selatan fikhit meneba lagasik ilirengge walete. Oba nen he kwe sou andi ekhe alek mene omanogo hakhogoat hilingik welaga.

²⁵ Jendela ambe andomaba folelek mene re ambe amukwe meneba folelek welaga omanogo inom higitsek welaga. Kwe andi ambe hukhogo folelek welaga mene re 25 meter en, nen esanggo wirilogore 12,5 meter en hilingik welaga.

²⁶ Kwe andi nen lagagu mene faget he kwepela magendek mene ebe 7 nen pelarogo liabek welaga. Nen ambe palek hokho mene andi ogore ambe elokhoma Tuhan awi wurik mene a'nogo fikhit elokhe halogo hilingik welaga. Nen o pakhot elonggo fikhit hilingik mene re hugele fikhit a'nogo hilingi'mo re e palem ilirenggerogo alilingge hesesengge waganek welaga.

²⁷ Andoma nen kwe ekhe endakwe fikhiren elonggo fikhit kwi lagu mene folelogo kwelabek welagaat. Ap andi nen kwe sou pire andem ekheba nen ekheba walhikhemo re, 50 meter hilingik welaga.

Kwe ambe selatan fikhit mene endakwe fikhiren ambe elonggo fikhit meneba folelek welagaikhe wene

²⁸ Andi nen ap a'nogo nen an wo'narek kwe ambe selatan fikhit a'nogo nen he ambe elonggoma meneba kwi laga. Kwilagasik he kwe ambe selatan fikhit mene a'nogo ilirenggetikhemo nen he, kwe endakwe mene walet hikhemo hilingik welaga aremnogo higithogo nek hilingik welaga.

^29-30 Ambe ap kagalek werek mene inom, ambe hokho mene a'nogo inom, nen elonggoma senggelek mene inom he kwe amu meneba werek aremnogo hakhogo nek hilingik welaga. Kwe andi hukhogo folelek mene uanhogo re 25 meter en nen esanggo wurilik kwere 12,5 meter en.

³¹ Oba nen ambe hokho mene a'nogo endakwe hurogo lagu mene fikhit elokhe hilingik welaga. Senggelek elonggokwe mene nen huksek fikhit elokhe hilingik mene andoma ogore e palam ilirenggerogo alilingge wagane'ma kwepela magendek mene 8 nen pelarogo re kwe ambe andiba kwi lagukwe hilingik welaga.

Kwe ambe timur fikhiren ambe elonggoma mene fikhit elokhe hilingik welaga wene

³² Andi nen ap andi nen an hondok narek he kwe ambe timur fikhit a'nogo bene nen kwi lagasik, o sili elonggoma meneba kwi laga. Aren kwe a'nogo ilirenggetikhemo re kwe ambe amukwe hilingik omanogo inom higitsek welaga.

³³ Ambe ap kagalek logolik werekwe inom senggelek elonggokwe mene inom, ambe hokho mene inom andoma ilirenggerogo re kwe ambe amu mene ebene hilingik welaga aremnogo inom higithogo nek hilingik welaga. Ambe andiba inom nen ambe hokho meneba inom he jendela hilingik welaga. Ele huksekwe andi uanhogo re 25 meter en hilingi'mo, esanggo sabiakwe re 12,5 meter en hilingik welaga.

³⁴ Senggelek hokho mene a'nogo elokhe re ambe endakwe fikhit andoma hilingik welaga. Leget elonggokwe fikhit to'morek mene andoma re e palem ilirenggerogo hesesengge waganek welaga. Nen kwepela re magendek mene 8 nen pelarogo re kwe ambe andiba kwi lagukwe hilingik welaga.

Kwe ambe utara fikhit mene re ambe elonggo fikhit meneba halogo hilingik welagaikhe wene

³⁵ Wure'ma elugun warogo re ap andi nen an wo'narek kwe ambe utara fikhit meneba lagasik ilirengge waletunemen he kwe amu mene omanogo inom higitsek welaga.

³⁶ Andi nen ekhe ambe ap kagalek werekwe inom, senggelek elonggokwe werek mene inom, ambe hokho mene inom, andoma re kwe amu mene omanogo inom higirat hilingik welaga. Ambe andoma bene inom nen ambe hokho meneba inom he jendela hilingik welaga. Nen hugelekwe andi uanhogo re 25 meter en nen esanggo sabiarogo re 12,5 meter en hilingik welaga.

³⁷ Ambe elokhoma mene re abel endakwe fikhit halek welaga. O senggelek elonggoma mene huksek mene a'nogo fikhit elokhe halek mene andoma re, alilingge waganek welaga. Kwepela magendek mene ebe 8 nen pelarogo liabek welaga.

Kwe ambe utara fikhit mene era'lukwe o wurik welaga mene re yi'nogo

³⁸ Abel endakwe fikhit he o senggelek misik ekhe elonggokwe senggelek omanogo inom seberogoluk abel utara fikhit wurik welaga. O senggelek andi mene misik ekhe re kwe ambe palek misik ekhe o senggelek hokhoma a'nogo kugukwe folelek welaga. Nen o senggelek andi re wam yi mene ti mene Allah faget fuluk noletu mene omanogo horogo fuguba iluk welaga.

³⁹ O senggelek hokhoma andi re e meja enggaminogo mene talek welaga. Nen pire re esanggo hilingik mugusogo hilingik welaga. Nen meja talek amboloba andoma nen enek wam domba, kambing inom, Tuhan endawimo agaiyek hoageluk warogo nolhu mene inom, Tuhan nen inaweak onggorabethogo fouwageluk kinoti logolik nolhu mene inom, ap inangge obali'mo fugu mene nolhu mene inom, senggelhigik welaga.

⁴⁰ Nen o senggelek hokhoma andi abel enda'ma re e meja enggaminogo nenat talek welaga. Were'ma re e talek pire re abel utara fikhit andoma welaga.

⁴¹ Andi nen he e meja wam warogo senggelhuba faget talek welaga mene andem mondogat lambulogo re 8 nen were'ma 4 en he o elonggoma faget, nen 4 en ekhe re o senggelek endakwe mene faget welaga.

⁴² E talek enggaminogo ekhe ambe to'morogo wurik mene elonggoma were'ma, wam Tuhan endawimo agaiyek hoageluk warogo fikhi logolik fouget fikhi lagaukwa mene andi re helep oba anggwe folelogo wurik welaga. Meja andi eisok legeisogo re setengah meter en, e meja ebe unggut enggaminogo hilingi'mo re, uankwe inom horokwe inom ebe lombok he tiga per-empat oba hilingik welaga. A'nogo hilingi'mo re e talek andem ambolebene re wam warogo nolhungge omanogo welaga.

⁴³ E talek andoma enggakap fikhit sabiarekwe re, 75 meter en hilingik welaga. Wam eino mondok senggelogo endu nolhu mene omanogo re, e andi amboloba fugungge were'ma higi.

⁴⁴ Nen ap andi nen an wo'narek ambe elonggo fikhit meneba omanogo lagasik, andoma re ambe pire were'ma ekhere kwe sou abel utara fikhit mene a'nogo era'lu were'ma elokhe re selatan fikhit hilingik welaga. Nen ekhe re kwe sou selatan fikhit mene a'nogo era'lu were'ma elokhe re utara fikhit hilingik welaga.

⁴⁵ A'nogo hilingi'mo ap a'nogo nen an yaganeti logolik, ambe selatan fikhit elokhe hilingik mene andi re imam Tuhan awi wuri'mo yabu hilingitu mene inobaget fouksek werek iluk yaganete,

⁴⁶ nen ambe ekhe utara fikhit elokhe hilingik mene andi re it imam mezbah wam warogo nolhuba a'nogo halhuba omanogo faget. Imam andoma mondogat he hun Zadok ambisangma mene werek. Andi re it inunggulenu Lewi mene nen he we hun Zadok ambisangmangge mene nek Tuhan elokhoma andoma At obaget hilingitarego, iluk ikhe.

O sili elonggoma mene inom Tuhan Awi wurik inom faget isikhe wene

⁴⁷ Ap andi nen o ambe elonggoma mene a'nogo ilirenggetesik, wurik menere unggut enggaminogo hilingik welaga: Uankwe inom horokwe inom ebe lombok he 50 meter en hilingik welaga. O Tuhan Awi andi re barat fikhit andoma were'ma warogo endu nolhungge obalik halegengge andi re elokhe fikhit andoma welaga.

^48-49 Andi nen aren an wo'narek lagasik, Tuhan awi wuri'mo nen ambe elokhe fikhit a'nogo lagasik, kwepela fena omanogo bene lagakhi logolik, aren ambe kuguba a'nogo ilirenggete. Ilirenggetikhemo nen he elonggo re tujuh kali dua setengah meter en hilingik welaga, esanggo fena-fena ayongouk he satu setengah meter en hilingik welaga. Nen esanggo fena-fena ebekwe inom harekwe inom he timuk ekhe liabek welaga. Ambe elokhoma mene andi nek he uanhogo re sepuluh meter en nen horokwe re enam meter en hilingik welaga.