YEHEZKIEL 4 - Allah Wene Fano Wene Hupla Inane

Kota Yerusalem haningisogo kwelabi wesugun mene faget Yehezkiel en ilirengge waletikhe wene

¹ Allah ane ikhi logolik, ”Afuni wa'lagaikharek mene yi re, helep kweang tangge meneba unggut hilingisogo hilingik mene misik ekhe wanimbik helokhoma fuluk he, helep andi oba asiok lakfuluk o kota Yerusalem ebe werek higithogo ilirenggerogo fein o.

² A'nogo hilingfuluk he kota andi aben haningisogo kwelabi wesugun mene inom, i kalok esanggokwe habulugun mene inom, kweang kabogerik lagagun mene inom, it inawi tenda wusugun mene inom, o pa'leget waganek mene andi maserogo andoma hou salfembik kuogeluk fik-fouk esugun mene inom, mondogat ilirenggerogo feino.

³ A'nogo ilirengget fembik he panci besi mene ekhe wanimbik, yi re o kota andi hobat he besi meneba wurik anggano, nen besi andi re hat were'ma nen hilingi'luk o kota Yerusalem en hilingi'luk honggole'ma andem feino. A'nogo fembik he o kota andi fikhit helokhe hilingik logolik haren o andiba bin kwigiluk hakhogo hilingfeino. A'nogo hilingisigin mene andi re unggulenu Israel mene faget enegengge hilinglasigin.

^4-5 Andi hilingfuluk, hat hebe re habel hare fikhit wengik logoino, a'nogo were'ma An nen Israel mene inaweak andi re hat hoba kweisal fei wesigin. A'nogo hilinghobagaumo re, henggi 390 hari andem oba it inaweak andi faget hat he wengik logolik heinet wati logogin. Haren henggi misik a'nogo wengik logogin andi re Israel mene tahun misik oba unggum wogisagain higithogo.

⁶ Andi mondogat elugun warogo hilingfuluk he hafe hebekhogo pikhitkwe fikhit wengik logogin. A'nogo logogin andi re, it Yehuda mene inaweak andi faget onggo unggum he henggi 40 hari nen wengik logogin andi, nen linggene misik hat a'nogo wengik logogin andi re, it inoba tahun misik unggum wogisagain mene higithogo.

⁷ O Yerusalem kuogeluk maserogo labesi wesugun sambul andi re helokhe hebekhogo it wogisigik, henggi holum o kota andiba watfigik. An nen unggum it inoba fagain iluk hilingik welagi mene omanogo it inoba yagaisigik, ino.

⁸ An nen hat hele wathabumo hat hebe endenogo hafe pikhit-fikhiren hare fikhit enden lagik, nen hare fikhiren pikhit-fikhit enden lagik, igi'lek werek kwelek enek o labesi wesugun mene andi wurep oba arat kobok i lagain.

⁹ Yogondak he, gandum ebe mene inom, jelai inom, weinalinggen mep mene inom, weinali ekhe polong, sekoi enggen inom, gandum enggen al mene inom wanimbik he, andoma mondogat misi'mo mulel fuluk roti hilingi'no. Andi re, hat hebe henggi 390 hari andem oba hafe hare fikhit wengik logolik ninggi logogin mene.

¹⁰ Roti andoma re, hendawinggen wenggelogo wendeberogo fuluk henggi ebe lombok he we 230 gram en enek ninggi logogin. Nen, andem taganhogo ekhe ninggi logogin lek.

¹¹ Hagai nunggu mene ogore huli warek logogin, andi nen he linggene misik oba re i nunggu mene oak pire nek ninggi logogin.

¹² Endu re afuni inal wurik puk agu mene andomaba nonggal fuluk roti hat nunggu mene it afuni ineilhanem endu andiba werak fuluk ninggi logoino,” iluk yaganete.

¹³ A'nogo yaganetesik Tuhan ane ekhe inom ikhi logolik, ”Ap Israel mene o kweang it inonggotma andoma huginabi lamo, it nunggu mene re Musa nen wene melalek oba wesa werek mene omanogo iren a'nogo ninggi logogun,” iluk ikhe.

¹⁴ A'nogo ikheba nen he an nen onggo yagati logolik, ”Eige, Tuhan Mondok Lego welagen mene neisena! An nebe yenggere'ma nen pikhit yogondak welagi huli nen he nunggu mene saliok weregengge wam warek mene a, mene olomene aigando a, andomaba nen an nebeba weaget fakhigirek mene ekhe werek lego, nen nunggungge saliogengge anggagarek mene andoma an nen ekhe nunggu aplere legaro,” iluk igi.

¹⁵ A'nogo igimo re Allah nen an noba ikhi logolik, ”Fano, roti werakhageluk halok he afuni inal wurik andi obali'mo re, sapi al oba werakhikhi logoino o,” iluk yaganete.

¹⁶ A'nogo ikhesik, At ane ekhe inom ikhi logolik, ”Afuni wa'lagaikharek mene yi re, An nen he hobuk ninggi logogun mene iluk o Yerusalem oba foukhogo figimo werek mene andoma leget foumo re, afuni nunggu mene nele nen inoba sisarogo logolik inendawinggen firogo re, iren inagai inom, inamburu inom, nunggu mene inendawinggen maben agunem he inendawi-inendawi ninggi logogun o.

¹⁷ It inagai inom, inamburu roti inom, legasumo re, inendawi fit lasimbik, inaweak ambisangma re, inebe alomat lakhambik wa'lasugun o,” iluk yaganete.