YEHEZKIEL 39 - Allah Wene Fano Wene Hupla Inane

Gog omame legasigin mene faget isikhe wene

¹ Tuhan Lego Mondok welagarek mene a'nogo ane ikhi logolik, ”Afuni wa'lagaikharek mene yi re, Gog raja o Mesekh inom, Tubal inom oba andoma enu werek welagarek mene andiba, agut palin o. Nen at oba yagati logolik An yi re hat haselei mene o, iluk yagaom.

² An nen at hobuk elokhe hal-hal o yatma utara fikhit andoma nen waluk wulibi lambik Israel mene inandom oba andoma waluk wesigin.

³ Andoma nen An nen asikhe yei payuk oba fouthugunem enggi harekwe fisogo logogin engge a'nogo helelarogo pigin, nen An nenat andok herap palek omanogo re enggi pikhit fikhiren telogo pelabigin.

⁴ Israel mene inandom unggulmo andoma nen Gog inom, agoromi tentara mondogat inom it at inom seberek logogun mene mondogat inom wa'lasugun. Ma re it inebe warek he An nen yi rue ti rue inom, olomene aik anini mene inom oba noageluk wogisagain.

⁵ Ap sikhe fisogo inap andoma re yabukwe talorogo hulambethigik wa'lasugun. Iluk An Tuhan Mondok Lego welagirek mene a'nogo nane mondogat igi.

⁶ An nen o Magog kweang oba inom, i esanggokwe andoma inom afuni inendawi hambukhogo welagaikharekwe andoma endu fasigin. Andiba re iren An Tuhan nebe inelu asugun.

⁷ Oba nen he afuni Israel mene inanggele'ma andoma re, An nenu horek mondok welagirek mene a'nogo weinamet fagain. Nenu andi re ekhe inom weagerogo fogoin lek. Andiba re yi afuni ti afuni inunggulenu lombok omanogo nen An Tuhan Allah, Israel mene ineisena horek mondok welagi mene a'nogo inelu asugun,” ikhe.

⁸ Tuhan Lego Mondok welagarek mene ane ikhi logolik, ”Eberogo nen he, linggene An nen isigi mene a'nogo re tip i wesigin aro.

⁹ Afuni o kota-kota Israel meneba werek mene andoma re inasikhe pum herakfisaga mene andi re tok ma'mungge inom, karok inom, sikhe oak inom, togengge inom, e payuk erap inafungge mene inom andogorogo kabogesuogeluk uluk-uluk wilifi logogun. Andoma mondogat he e oloba nolhu mene faget iluk waganogo fuluk he hinenggi tahun sabiren oba elok nolhi logogun.

¹⁰ Andi nen iren e nolhu mene faget anggolo nen iluk yabukwe wusi lagik, e ogoikwe wusi lagik, ikhi logogun lek. Andi re senjata herakfisaga mene omanogo mondok hokhorogo hilingik logogin andiba re e nolhu mene higithogo elok logogin. Iren he afuni it inangge teligik, hugul heligik, aga mene omanogo iren ogo lagokhogore it mene omanogo teligik, hugul wanhik, ugunat. Iluk An Tuhan Lego Mondok welagirek mene a'nogo nen nane mondogat igi,” ikhe.

Gog ebe kweangma salugun mene faget isikhe wene

¹¹ Tuhan ane ikhi logolik, ”Andem mondogat hilinglasigin sambul he, An nen Gog ebe salugun oba kweang Israel oba andoma wogosigin. Kweang wogosigin oba re tonggo afuni soganisaluk lagaikharek oba Laut Mati abel fena mo lagai wagarek fikhit andoma. Andoma re Gog inom agoromi tentara inom inebe mondok salinabugun. Nen tonggo andi enu re, ’Tonggo Gog agoromi inom esa logalek oba,” iluk ikhi logogun.

¹² Tugi sabiren aninurogo andi re ap Israel mene kweang andi emetlasinogo iluk he asengsenghogo inebe warek omanogo andogorogo salinafi logogun.

¹³ Afuni o kweang andiba logogun mene re inebe mondogaren ap warek andi lebet-lebet salinabugun. A'nogo hilingisugun andiba re linggene An nalong asigin sambul andi re An nen it inenu legeisogo fisagain. Iluk An Tuhan Lego Mondok welagirek mene a'nogo nen nane mondogat igi.

¹⁴ Tugi sabiren andi mondogat hilingfuluk he, ap fena wenagaisogo fisaluk, ap warek kweang kwe pipou ikhi logogun mene andoma heraginabik laluk he, ap warek mene werek halok he o kweang andiba emerek mene omanogo horogo iluk iren kweangma salinafi logogun.

¹⁵ Ebekhe andoma laga logolik ap oak kololok se'ma ineilenggen haluk he, it ap warek salinafi logogun mene omanogo nen ineilenggen haluk hambokhogo woginarek tonggo Gog agoromi inom esa logalek oba omanogo salinabuageluk enegengge fei laga logogun.

¹⁶ Andi nen hobuk tonggo andiba kota ekhe enu Gog esa inom higit mene salek logogin. Iren a'nogo hilingiti logogun andiba re kweang andi emerek logogin mene a'nogo mondok horek mene hilinglasigin o,” ikhe.

¹⁷ Tuhan Lego Mondok welagarek mene a'nogo nen an noba ane ikhi logolik, ”Afuni wa'lagaikharek mene yi re, sue andoma mondogat inom, mene olomene anini mene inom, yi kwe ti kwe nen wesimbik it inobaget An nen warogo fouget figingge andoma ninggi logouwagen he wolinabin o. An nen seni it inobaget Israel inandom punukwe andoma fouget fisamo re, andoma iren eino mene ninggik, inagai re mep mene ninggik ikhi logogun.

¹⁸ Iren he ap inogogwi kabelek mene warek omanogo ninggik, it ap kaindek kweangma ferinarek welagaikharek mene inamep ninggik, ikhi logogun. Ap kabelek mene andoma inom, it kaindek kweangma ferinarek welagaikharek mene andoma inom he wam kambing ai mene inom, wam banteng asei hokho mene inom watarek hak inoasigin.

¹⁹ Ap andi wam warek hakhogo An nen mondogat inoasumo re, yi rue ti rue inom, yi wam ti wam amu-amu mene inom we'luk it inasei omanogo ninggi logogun engge nen he hebak inafe agik, mep omanogo nogoin engge nen he lugu-lugwi palhik, hilingiti logogun.

²⁰ An nangge meja talek oba re it inanggo kuda inamburu inom, it ap kuda amboloba lagaluk lagaikharek mene inamburu inom, it weim inamururu weak inap omanogo inamburu inom foukhogo were'ma inoba homorogo ninggi logogun. Iluk An Tuhan Lego Mondok welagirek mene a'nogo nen nane mondogat igi,” ikhe.

Israel mene inambotkwe fanorinabigin isikhe wene

²¹ Tuhan nen ikhi logolik, ”An nomame mondok hokho a'nogo fut nobagauwageluk afuni inunggulenu lombok inebene inugisumo, iren An nomameba wene katokhogo palhirek mene andoma neogoin.

²² Huli andiba nen An it afuni Israel mene ineisena Tuhan Allah welagirek mene a'nogo fut nobagagun.

²³ Yi afuni ti afuni inunggulenu mondogaren he afuni Israel mene yatma lakfisikhemo lagaikha andoma re iren An nelokhoma weak hilingiti lagaikha andiba o, iluk futfogoin. An nen it obokhogo lakfisasigimo re, it inaselei mene nen inomame leget fisigik, weim oba nen mondogat inoatik, aga.

²⁴ An nen hilingiti andi re iren weak emerek mene hilingiti logolik inaniniba hilingiti lagaikhama An nen oboget isasigi o,” iluk ikhe.

²⁵ Tuhan Lego Mondok welagarek mene a'nogo ane ikhi logolik, ”Oba nen he yogondak Yakub ambisangma ta'lagaikha mene afuni Israel mene andoma An nen nendawi hundik hilinginafik, nen it attak welagaukwa hak inangge hokhorogo logouwageluk hilingfisigik, igin o. A'nogo hilingfisagain andiba re An nenu a'nogo legeisogo fikhi logouwageluk hal fikhi logogin.

²⁶ It ambi, inanggweang oba inabolo'lek femhogo were'ma, ap misigen iluk ekhe minggilinafi logogin mondok lek. Ma re iren An noba li'norogo weagetnobagakhi logolik inendawinggen noba tibet fikhi lagaukwa mene a'nogo re inonggorasugun.

²⁷ An nen he it ap inaselei mene inanggweang ebene omanogo nen nekhengge sugulogo woginarek wesigin, nen An nebe mondok horek welagirek mene a'nogo re An nen a'nogo hilingisigin andiba yi afuni ti afuni inunggulenu mondogat andoma nen inelu asugun.

²⁸ Arigini'mo re it An nagainafuri nen An Tuhan Allah it ineisena welagirek mene a'nogo furogo inelu asugun. Andi re An nen it inebe hele warogo huginabi lagagisik An nenat hobuk inambotkwe sugulogo it inonggwarek inaiba woginarek waga logolik ekhe herakfisigi'lek mondogat woginarek wagagi.

²⁹ Nen An nareagun a'nogo kweisalogo it inunggulenu Israel mene inoba figi halok he An nelokhe it inelokhoma nen ekhe hina'lasigin mondok lego, iluk An Tuhan Lego Mondok welagirek mene a'nogo nen nane mondogat igi,” ikhe.