YEHEZKIEL 38 - Allah Wene Fano Wene Hupla Inane

Gog oba nen Tuhan nen unggum wogisagain mene faget isikhe wene

¹ Tuhan ane an noba ikhi logolik,

² ”Afuni wa'lagaikharek mene yi re, Gog raja lego mene o Mesekh inom Tubal inom o Magog kweang oba werek mene andi homan fein o.

³ At oba yagati logolik, An Tuhan Lego Mondok welagirek mene andi re at aselei mene welagi o.

⁴ An nen at elokhe kwe palogo fagain, at ambe unggutmo mata kail kelogo agoromi esa logalek engge inom lirinapluk wulibigin. Ap esa aren mene logalek kuda waluk lagaikharek mene re inasu eil misik mene nek laberek mene. Nen it ap sikhe fisogo inap andoma re inebe lombok tok ma'mungge inom karok inom waluk lili'lagwi.

⁵ Raja a'nogo re it Persia mene inom Sudan mene inom Libia mene inomen sikhe fisogo mene omanogo inom uluk-uluk laga logolik, it inebe lombogen he karok inom, topi helep baja mene inom waluk lili'lagwi.

⁶ Ap weim faget inomamerogo hilingitarek inap o Gomer mene inom, Bet-Togarma utara fikhit mene inom he at inom seberogo wagunem, inunggulenu amu mene esa hokhorogo andoma ogore at murok weri'lagwiat.

⁷ At fik-foukhogo logouwageluk yagaom, at agoromi tentara inom sebe'luk lagaikharek mene omanogo re enegengge hilingitu mene hol fuluk hilingisugun nen he foukhogo logouwageluk miming inabino.

⁸ Tahun miren mene hakhogo An nen at oba melalfikhi logolik, o kweang ekhe yi afuni ti afuni inanggelekwe nen nekhengge kaboget fisambik o kweang andiba inabolok legengge were'ma nen pin talogo inoasi kwin iluk yagasigin. Gog he it Israel mene inandom o attak a'lima nenat ap mondogat inareng tereng isukwama o meisalek enek kabok lagali'lago menere yogondak he, afuni inailo legengge inendawinggen serogo were'ma andoma sebelimbik logogin.

⁹ It inom tentara aren mene inom, it inunggulenu hokhorogo at inendawi mene inom he sielu funha wagarek hak waga logolik inoasi wagik, nen sogoien hakhogo kweang andiba mondogat sebeli wagik ugun o,” iluk yaganete.

¹⁰ Tuhan Lego Mondok welagarek mene a'nogo nen Gog oba yagati logolik, ”Linggene andi sambul haren wene weak mene melalogo fagain o.

¹¹ Haren o kweang leget pa'leget waganek lek mene, nen afuni ogo inailo legengge inendawi seramhogo werek awi andi nen ekhe kota leget pa'leget waganek lek aiba, inendawi hambugengge iluk ogo werek lek aiba andi inom wolelenggenhogo fagain iluk wene tekhogo isigin.

¹² Haren he afuni o kota endam o meisalek enek hilingik welagaikhe aiba andi werek mene inasunggwan henggi abisak telambik helagain iluk welagen. Afuni re o yi awi ti awi inunggulenu mene nen andogorogo fisasukwama, yogondak he inanggo takhagarek mene inom, inangge yi mene ti mene andogetarek mene inom, hokhorogo fetaluk welagaikharek, nen it inebe re o kweangma mondogaren he fem enggen tulem andoma welagaikharek.

¹³ It afuni Syeba mene inom Dedan mene inom ap inangge onggo wanhik hunitik agarek mene o Spanyol mene andoma inom hat hoba heinok wok hiikhi logolik yi'nogo ikhi logogun, ”Hat he nenahalok we no emas, perak inom, wam tatarek mene inom yi mene ti mene amungge inom hugul wanhik, henggi abisak teligik ikhi logolik, andoma mondogat hogoukhogo helaluk lageluk haren hagoromi tentara lirinafi lagen nogo? Iluk heinok wokhafi logogun o” ikhe.

¹⁴ Andi faget he Tuhan Lego Mondok welagarek mene a'nogo nen wene yi at Gog yagasuageluk laknobagai waga, ”An nagainafuri Israel mene inailo legengge fano liokhogo were'ma andem, hat wesimbik pin talogo kwi wesigin.

¹⁵ Hat haiba utara fikhit mondok yatma andoma nen wulibi wesimbik wagunem, ap tentara esa logalek hokhorogo mondok inomame hokho mene hombo'ne mukharek lagunem, it inebe re inunggulenu amu-amu mene nen inanggo kuda ba lagaluk wesugun.

¹⁶ A'nogo we'luk haren An nagainafuri Israel mene re sogoi sielu nen funhogo leik-kweik isikherek hak inoasi wesigin. Linggene higit asigin sambul he An nen hat hebe An nanggweang oba andoma sebeli lambik logoinogen iluk lakhobagagin. An nen hat Gog hebene nen hilingitunem he, yi afuni ti afuni inunggulenu lombogen he An andi re sa nogo iluk hera'nabimbik, An Allah Tegelek Mondok welagirek mene a'nogo nebe inelu asugun.

¹⁷ Hat hobaget An nen namingmingengge nabi Israel mene inebene nen nane isigi lek nogo? Iren wene hobuk hilinglasigin mene faget ikhi logolik, An nen he ap misik ekheba Israel mene huginabi loageluk mimingisigin o, iluk iren yagahisikhi lagaukwaat anggigi. Iluk An Tuhan Lego Mondok welagirek mene a'nogo nen nane mondogat igi,” ikhe.

Allah nen Gog oba unggum wogosigin isikhe wene

¹⁸ Tuhan Lego Mondok welagarek mene a'nogo ane ikhi logolik, ”A'nogo hilingisigin oba nen he Gog en Israel mene inoasi kwimbik hilingitu kwelek andem he weak-weak An na'mage mondok het-perigin.

¹⁹ Na'mage hokho meneba lagakhi logombik, linggene andi sambul o Israel kweang oba andoma lugul hokho mene langfang isagain.

²⁰ Yi ikan ti ikan inom, yi rue ti rue inom yi mene ti mene mondok mage mene inom hokho mene inom, afuni kweangma welagaikharek mene inom mondogat he, An niikhi logolik inailo nen inoak leigesugun. Tom unggul uan mene nagul higik pigik, nen pule eil alilukwe andoma mesak hogouk higik pigik, leget pa'leget waganek mene mondogat langgukhigik pigik, igin.

²¹ Andi nen at Gog he An nen yi wene ti wene elalin inailo asu hak mene hilingisigin andiba ailot fagain. An Tuhan Lego Mondok welagirek mene a'nogo nen nane mondogat igi. At agoromi re inonggwarek inenggarok oba wat-wat logoin.

²² Athe An nen unggum wogeti logolik, ou amben weak meneba inom, amep wulagaisogo inom, wene oba fagain. Nen meiso sogenggen hokho mene inom, meiso es mene inom, endu belerang mene inom oba re, at oba inom ap agoromi tentara andoma inoba inom it inunggulenu hokhorogo at inom seberek mene andoma inom inoba kweisal fisagain.

²³ Obaburigi ariginik mene andi re An nen hilingisumo yi afuni ti afuni inunggulenu lombok inoba, An nebe nomame hokho logolik, horek mondok welagirek mene a'nogo inugisagain. Andiba re iren An Tuhan welagirek mene a'nogo inelu asugun,” ikhe.