YEHEZKIEL 37 - Allah Wene Fano Wene Hupla Inane

Afuni inoak kilelek iringik mene o tonggoma andoma were'ma hasikhe wene.

¹ An nebeba hugunemen he Tuhan nen nomamet nobagakhi logolik, At Areagun nen wo'narek he o tonggoma afuni inoak enek kilelek were'ma omanogo pi lagagi.

² Pi lagagimo nen Tuhan nen an nebe wo'narek tonggo andi haningirik laga logolik neilenggen hilik lagunemen he tonggokwe andoma re ap inoak siling iringik weak mene hokhorogo kilelek were'ma hasigi.

³ A'nogo hasigimo nen, Tuhan nen an heinok wo'niikhi logolik, ”Afuni wa'lagaikharek mene yi re, ap oak omare nekhengge elugasuhak anggikhi lagen a?” iluk yaganete. A'nogo yaganetemo an nen onggo yagati logolik, ”Tuhan Lego Mondok welagen mene neisena, we harenek he helu welagen o,” iluk yagatigi.

⁴ A'nogo yagatigimo, Tuhan nen he ap oak iringik weak mene omanogoba wene yagaisoageluk mimingnafi logolik mel ikhe,

⁵ ”An Tuhan Lego Mondok welagirek mene a'nogo nen hit nekhengge hineluk asubagaigen iluk neleage furogo hit hinoba kwelakhinobagagin o.

⁶ An nen hit hinoba hinomanggen inom, hineino inom labet fembik, hinagap to'mot hinobagagin. Hit hineluk lebesuageluk nele age wokhisagain. Ma re hiren An Tuhan a'nogo hinelu asugun,” ikhe iluk yagaisan, yaganete.

⁷ A'nogo yaganetemo, an Yehezkiel en it ap inoak omanogoba Tuhan nen yi'nogo yagaisan iluk miming nafe mene omanogo higithogo yagaisasigi. An nane a'nogo ugu kwelek aremnogo kwelakhugunemen he ap inoak omanogo ekheba nen he ekheba huniti logolik, ane kilit eti laga.

⁸ A'nogo hilingitunem an neilenggen kwelaginarek were'ma nen he, oak omanogo omanggen hunitik, eino to'motik, agap huli'libetik, ugunem higiba nen set enek he oan were'ma hasigi.

⁹ Allah ane an noba ikhi logolik, ”Afuni wa'lagaikharek mene yi re, sogoi oba hane in o. Hat hane ikhi logolik he An Tuhan Lego Mondok welagirek mene a'nogo nen at oba re o unggut fena-fena mondogaren sogoi funha waga logolik ap warek oma inambotkwe ineluk asuageluk set kwelakfisa wesuak ikhe,” iluk yagaisan yaganete.

¹⁰ A'nogo yaganetemo, an nen At Tuhan nen melalnobagaikhe mene aremnogo higithogo nek hilingitigimo re, sogoi a'nogo furogo ap warek omanogo inoba lakfei wagaikhemo re, inebe omanogo ineluk arik laga logolik menlarik lagaukwa. It inebe seberogo re hokhorogoat hilingi'mo ap tentara esa hokhorogo logalharek hakhogo hilingik welagaikha.

¹¹ Allah ane an noba ikhi logolik, ”Afuni wa'lagaikharek mene yi, ap oak andoma ebere it inunggulenu Israel mene faget ilirenggerogo hilingik. Iren ikhi logolik he nit he iringik welago, ninendawinggen wenggelek mene werek lek, nen hobuk ekhe logogun legat, iluk inane ikho wikho werek.

¹² A'nogo hilingik enggere ninagainafuri Israel mene faget hobuk hilinglasigin mene inelurogo yagaisan o, An Tuhan Lego Mondok welagirek mene nen kweangma it inebe salek oba omanogo nen ineluk asuageluk kwe hut fagain. A'nogo hilingfuluk it inebe andoma nen An nen feisalogo wulak fisambik kweang it Israel mene inanggweang oba logouwageluk inambotkwe fisa wesigin.

¹³ An nen a'nogo andoma mondogat hilingisumo re An nagainafuri nen An nebe Tuhan a'nogo inelu asugun.

¹⁴ It ineluk logouwageluk An nele age inambelekwe furogo lakfembik, it inebe inonggwarek inanggweang oba logouwagen iluk hilingisogo fisagain. Ma re iren he An Tuhan a'nogo inelu asugun. Iluk An Tuhan nen nane mondogat igi hilingi'mo re eberogo nenat hilingisigin o,” iluk ikhe.

Yehuda mene inom Israel mene inom kerajaan misik asugun wene

¹⁵ Tuhan ane ekhe inom an noba yaganeti logolik,

¹⁶ ”Afuni wa'lagaikharek mene yi re, tomuk misik ekhe wanimbik he, lisu amboloba yi'nogo palfein, ’Kerajaan Yehuda’ iluk palfuluk he, tomuk amu mene ekhe waluk ane amboloba re, ’Kerajaan Israel’ iluk palfeino.

¹⁷ A'nogo hilingfuluk tomuk pirenet fisogo logolik erembulkwe andoma pirenet misi'mo agundibet lagu mene hilingfeino, a'nogo hilingfoumo pire mene andi ebe misigat asigin.

¹⁸ A'nogo hilingfagain halok it hat hunggulenu mene andoma nen heinok wokhikhi logolik yi ebe ninggi'nogo faget,

¹⁹ iluk heinok wokhafu halok he, it inoba yagaisikhi logolik he, ’An Tuhan Lego Mondok welagirek mene a'nogo nen tomuk Israel mene faget ilirenggerek mene andi wanimbik, tomuk Yehuda mene faget ilirenggerek mene andi inom sebet fagain mene fagero. Nen tomuk andem he An nen misiget fuluk he nenggimo senek logolik logogin mene faget.’

²⁰ Tomuk pire andem senek logolik it inunggulenu andi mene inoba inuk isano.

²¹ Andi nen it inoba ikhi logolik, ’An Tuhan Lego Mondok welagirek mene nen he it An nunggulenu mene andoma mondogat o kweang ekhema-ekhema it lagaikhasik werekwe andoma nen woginabigin. An nen andogorogo woginarek he nekhengge sugulogo it inanggweang oba fisa wesigin.

²² It andi kweang oba it Israel mene inandom oba andoma nen it inunggulenu misik mene hilingfisagain. It he ap raja misik mene nen melalinafi logogin. It nekhengge minggilogo inunggulenu pire mene asugun lek.

²³ It weak hilingisugun meneba inonggwarek emetfakhogoin legat, nen kembu hebak inafe mene omanogo fogerasugun legat. It An nawe a'ma logou inabiren hilingitarek mene andiba nen hele warek hangge were'ma fikhalogo telinabigin. A'nogo telinafi logolik An nen it inebe horogo sobalinabigin. A'nogo sobalogo fisamo it inebe An nagainafuri mene asugun, nen An it ineisena Allah asigin.

^24-25 It he ap raja misik mene raja Daud hak mene a'ma sebetfisamo inenggi mondok-mondok andoma melalinafu logogin. Iren he tiphogo nek An nawene melalek omanogo hilingiti logogun. Nen inenggi mondok-mondok faget it inom iren tagomangge mene inom he kweang An nen Yakub wogotigiba it inambu inombalak welagaukwaba andoma logogun.

²⁶ An nen he it inebe inendawinggen serogo mondok-mondok logogun mene faget it inoba wene warisagain. An nen it inebe fanot fisigik, it inebe ekhe inom hokhoabet fisigik, igin. It inanggweang oba andoma re An nawi mondok-mondok logogin mene faget wusigin.

²⁷ An he hit ninom hundik mondok logolik it inebe An nagainafuri asugun nen An he it ineisena Allah asigin.

²⁸ An nawi andi ambi inenggi mondok-mondok faget it inanggele'ma andoma were'ma re, it yi afuni ti afuni inunggulenu amu-amu mene nen he, it Israel mene An Tuhan nonggwarek nagainafuri mene asuageluk wenagaisogo fisasigi mene a'nogo inelu asugun,” iluk ikhe yagaisano yaganete.