YEHEZKIEL 36 - Allah Wene Fano Wene Hupla Inane

Allah nen Israel mene fanorinabigin mene faget isikhe wene

¹ Tuhan nen an noba yaganeti logolik, ”Afuni wa'lagaikharek mene yi re, o Israel oba andoma afuni tom tomkwe werek mene inoba re Tuhan Lego Mondok werek mene awene menfouwageluk yaganete mene yi holuakhogo yagaisan o,

² It Israel mene inom weim palek mene omanogo nen li'norinafi logolik he yi'nogo ili'lagwi: Tom-tom o attak mene omanogo yogondak he nit mene aga o, ili'lagwi.

³ Oba nen he An Tuhan Lego Mondok welagirek mene nen hat hoba wene fikhi lagi mene yi menfeino: It yi afuni ti afuni inunggulenu inap haningisogo werek mene andoma nen inomame lek hilingisogo fisaluk tomkwe omanogo teligik, Israel mene puliarinafik, hilingiti lagaikha.

⁴ Andiba re yago, hit Israel mene tom-tomkwe welagep mene oma inom punu-punu welagep mene oma inom yoma sani, i endep-endep agai andoma inom, o tonggokwe andoma inom, o olun agakwe andoma inom, nen kota afuni nen herakfisaluk wilifama yugunat hilingitik agarek oba yoma sani, An nane ikhi lagi mene yi holini!

⁵ An nanini noba louksek logolik An nen it inunggulenu hit haningisogo werek mene andoma inoasigin iluk nane arat igimo o, nen ebe tukhumhogo re it Edom mene andi faget igi. Andi erore iren inagaiyekhogo inalitnorati logolik An nanggweang a'nogo heligik, nen o lei engga werek mene teligik, aga andi nen hilingisigin.

⁶ Andi faget he Israel anggweangma andoma yagaisikhi logolik, An nen nanini tomkwe inom, punukwe inom, i endep-endebengge mene inom tonggokwe inom oba fikhi logolik, ikhi lagi mene andi yagaisan o. Andi re, it inunggulenu amu mene nen li'norinafik sebelfisigik, agama o.

⁷ An Tuhan Lego Mondok welagi mene a'nogo nen nane hombuk palhi lagi andi re, it inunggulenu andi mene nen hit hinabel fena-fena maserogo werek mene andoma ogo li'norinafi logogunat.

⁸ Oba nen he, An nen hit Israel tom-tom andoma hinoba nane ikhi lagi, hit he hinagayo omanogo nekhengge asimit hokhorogo wilibimbik he An nagainafuri Israel mene inaiba weak-weak sugulogo wesugun mene inobaget enggen isigin o.

⁹ Hit Israel mene yi sani, An he, hit hinebikhit a'luk welagi, An nen he, hit eberogo hinanggweang omanogo yabu wokfuluk awi nekhengge yasigin.

¹⁰ An nen he, nagainafuri Israel mene inebe ekhe inom manggorogo hokhot fisain. It inawi kota kwe omanogo logolik, olun aga kwe omanogo obali'mo wuti logogun.

¹¹ Afuni inom, hinanggo inom, An nen ekhe inom oba loukhogo wokhisugunem, attak he maben hak welaga oba nen he, mondok hokho-pokhorogo sik pik ugun, nen iren he, inagainafuri inom, inombawi inom, hokhorogo taginabugun. It inebe re o andoma attak welagaukwa hakhogo were'ma An nen sik pikhogo ekhe hikhi lagaukwa lek mene hilingfisagain. Andiba re, iren An Tuhan welagirek mene a'nogo inelu asugun.

¹² An nagainafuri Israel menere, An nen nekhengge sugulogo woginarek it inonggwarek inanggweang meneba logouwageluk fisa wesigin. Kweang andi re, it inonggwarek inanggweang asimbik enggen sik-pikhogo wogisugunem inagainafuri sumburu ouwagen iluk ekhe wa'lasugun lek.

¹³ An Tuhan Lego Mondok welagirek mene a'nogo nane ikhi lagi: Ibi-eberogo nen he kweang yi faget afuni nen it inunggulenu andoma werek mene inoba ikhi logolik, yoma re ap ninggik, afuni inagainafuri teligik, agarek awi o, iluk agarek.

¹⁴ Oba nen yogondak he, kweang yi nen afuni nagain lego, nen it inagainafuri ogo telogoin legaro. Iluk, An Tuhan Lego Mondok welagirek mene a'nogo nen nane mondogat igi.

¹⁵ Ekhe inom, kweang ariba nen, it inunggulenu mene omanogo nen puliarinafik, li'norinafik ugunem holhi logogun mondok lego. Kweang yiba nen, afuni kweang ariba werek mene inoasugun legaro. Iluk An Tuhan Lego Mondok welagi mene a'nogo nen nane mondogat igi o,” iluk ikhe yagaisano, yaganete.

Israel ket mene hilinginabigin isikhe wene

¹⁶ Tuhan nen an noba ikhi logolik,

¹⁷ ”Afuni wa'lagaikharek mene yi re, afuni Israel mene it inanggweang oba werek mene nen iren weak mene hilingiri'lagwiba emerogo fakhugunem, An nen ebeti logolik, iren hilingiri'lagwi mene andoma re saliogengge hilingiri'lagwi anggikhi lagi, andi re hemi inamep lagarek mene hak hilingik.

¹⁸ An nanini it inoba kweisal figi andire iren ap hokhorogo inoatik, kweang andiba nen tugwi kembu fogeratik hilingitunem emetfikhi lagaukwa andiba hilingiti.

¹⁹ An nen it unggum wogisasigi mene andi re, it inebe werek mene inom, inobabut hilingiri'lagwi mene faget inom mugusogo wogisigirik it inebe kweang andiba nen kweang ekhema-ekhema andoma telfol isasigi.

²⁰ Ekhekwe-ekhekwe laga logolik, iren hundik-handik An nenu horek welagi mene a'nogo weaget filik mondok laga lagaikha. Andiba afuni nen he, yi'nogo ikhi lagaikha, ’It inunggulenu yi re, Allah againafuri werek ili'lagwiba nen he, it inanggweang Allah nen wogisasikheba a'nogo herakfisagasik hilingiri'lagwi,’ iluk ikhi lagaikha.

²¹ An nendawi ou hikhi lagi andi re, An nenu mondok horek mene a'nogo afuni Israel mene yikwe-tikwe laga logolik weageri'lagwi mene andi fagero.

²² Andi nen he, An Tuhan Lego Mondok welagi mene a'nogo nen hobuk Israel oba hilingfagain iluk ikhi lagi mene andoma yagaisan. Yago, hit Israel hinap yi, An nen hobuk hilingisigin mene andoma re, ero hiren hilingiti lagep oba re fuk, athe An nenu mondok horek mene a'nogo hiren yikwe-tikwe laga logolik, mondogat weagerik nikhi lagep andiba o.

²³ An nenu mondok horek mene logolik omame hokho werek meneba nen hiren yi afuni ti afuni inunggulenu lombok inanggelekwe andoma nen weaget fikhi lagep mene a'nogore An nen fano horek mene hilingfagain, andi nen he, iren An Tuhan welagirek mene a'nogo inelu asugun. Iluk An Tuhan Lego Mondok welagirek mene a'nogo nen nane mondogat igi, An namu horek mene welagi, nen An Tuhan Mondok Horek mene welagi mene a'nogo yi afuni ti afuni inunggulenu mene mondogat inoba weinamet feigeluk he, hit hinebene nen hilingisigin,

²⁴ It yi afuni ti afuni inunggulenu hokhorogo werekwe andoma nen inom, o kweang ekhema-ekhema hokhorogo andoma bene nen inom, nen hit An nen kaboget hinobagaluk hinambotkwe sugulogo hinonggwarek hinanggweang oba lakhinobagai wesigin.

²⁵ Andi mondogat hilingfuluk hit hinebe hinanggembu oba nen inom nen yi weak ti weak hilingutunem hinebe emethinobagaikhe mene andiba nen inom An nen i eil wurik meneba sobalhinabigin.

²⁶ A'nogo sobalhinabimbik An nen hinendawinggen ket mene wokhisigik, wenggelhu mene ket mene woghisigik, igin. Nen hinendwinggen helep hak omamerek welagep mene andoma re An nen agamhogo hinendawinggen fano sakhorek mene wokhisagain.

²⁷ An nareagun he hit hinendawinggenma hambuget hinafu mene logouwageluk wokhisagain, nen hiren An Nawene melalek higithogo hilingiti logolik, An Nawene yi'nogo ti'nogo hilngiti logoino iluk yagahisasigi mene omanogo hologo higithogo hilingiti logouwageluk An nen hit halogo hinobagagin.

²⁸ A'nogo hilinghinobagambik, hinanggweang he An nen hit hinombawi wogisasigiba a'nogo logogun. Hit he An nagainafuri asugun, nen An he hit hineisena Allah asigin.

²⁹ Hit he yi weak ti weak hilingitunem emerogo hinobagali'lago mene andomaba nen An nen fikhalogo hinobagagin. An nenat gandum hokho-pokhorogo wilibuageluk hilingfoumo sik-pikhogo hilinglasigin, An nen hobuk hit hinamburu ouwak asuageluk hilinghinobagagin mondok lek

³⁰ An nenat hinagayo enggen awi yago mene inom, hineabumo enggen iri'lago mene andoma inom mulirogo wilibuageluk hilingfoumo, sik-pik igin. A'nogo hilingisigin andi re hit sumburu ouwak lagagunem it yi afuni ti afuni inunggulenu mene inanggelekwe andoma nen hinenu weak ugu mene ekhe hikhi logogun lek.

³¹ A'nogo hilinghinobagaumo hiren o attak hinobabut mondok weak logolik kwanirogo hilingiti lagagip mene omanogo faget ebethaluk he, eige nit he ninobabut mondok weak hebak inafe mene andoma hilingiti lagoma higi, iluk ebet hikhi logogun.

³² Hit Israel mene yi sani, ebethikhi logoni o, andoma mondogat An nen hilingisigin andi re hit faget hilingisigin fuk. Hit he hinonggwarek hinobabut oba hilingi'mo re hinenggali agik, afuni nen li'norogo pelakhinabik, ikhi logogun o. Iluk An Tuhan Lego Mondok welagirek mene a'nogo nen nane mondogat igi o, iluk yagaisan, ikhe.

³³ Tuhan Lego Mondok welagarek mene a'nogo nen ikhi logolik, ”Hit hinaweak andomaba nen An nen mondogat horogo legethinobagambik, An nen hit hinawi kota andoma afuni kwimbik logouwageluk hilingfigik, nen o meisalek kabok lagali'lago mene andoma halogo figik, uageluk yagahisagain o.

³⁴ Attak afuni hit hineabukwe laga logolik, hinanggweang lei pirimhogo hilinglaga mene omanogo hikhi lagaukwa, oba nen he An nen hit hinanggweang andiba yabu higit wanhi logouwageluk hilinghinobagagin.

³⁵ A'nogo hilingfoumo afuni mondogaren fogerati logogun. Andi re, kweang andi attak lei pirimhogo hilingik welagaba nen hobuk fanot foumo o Eden yabumo hakhogo hilingik logogin, nen o kota andi attak he ap inareng lek awi hakhogo tiring-terenghogo wolelenggenhogo hilingik welaga, oba nen yogondak he kota omame mene wuri'mo afuni ogo re hokho-pokhorogo werek awi hilinglasigin.

³⁶ A'nogo hilingisumo it afuni inunggulenu amu mene hinera'lukwe logogun mene omanogo nen he, An Tuhan nenat o kota meisalhigik pikhe mene omanogo nekhengge wutik, nen ineabu kweang lei pirim ikhekwe omanogo nekhengge fanot foumo yabu elok wanhik umore inelu asugun o. An Tuhan nenat nane mondogat igimo re, ibi eberogo nen he hilingisigin enego,” ikhe.

³⁷ Tuhan Lego Mondok welagarek mene a'nogo nen ikhi logolik, ”Hinunggulenu Israel mene yi sani, hit he An nen lebethinabuageluk kino yaganeti logoni, iluk yagahisagain aro, An nen hit hinebe hokho-pokhorogo domba esa welagarek andi hak hilinghinobagagin o.

³⁸ Yogondak o kota ulun enek hilinglagama afuni inareng lek awi ari hobuk he o Yerusalem attak linggene esin mene faget ebeti logolik kaboge'luk domba warogo nolhu mene warogo fugunem hopo ikhi lagaikhe a'nogo hak hilinglasigin. A'nogo hilinglagunem hiren An Tuhan welagirek mene a'nogo furogo hinelu asugun o, iluk ikhe.