YEHEZKIEL 35 - Allah Wene Fano Wene Hupla Inane

Allah nen Edom mene inoba unggum fesikhe wene

¹ Tuhan ane an noba yaganeti logolik,

² ”Afuni wa'lagaikharek mene yi re, o Edom kweang oba andi homan ikfisan o.

^3-4 An Tuhan Lego Mondok welagirek mene nen it faget ikhi lagi mene andoma it afuni andoma werek mene inoba yagaisikhi logoin o. Afuni o Edom tomkwe welagep mene yoma re, An yi re, hit hinaselei mene welagi o! Olun hit welagepma andoma An nen mondok ulunhogo ap werek legoba hakhogo lei enek pirimse'ma hilingisogo fagain, nen hit hinawi kota andoma o meisalhigik pikhe kwe hilingfagain. Andiba re hiren An Tuhan iluk hinelu asugun.

⁵ O attagenat engge hiren Israel mene hinaseleirek logolik, inaweak onggo unggum enggin mene wurep kobokhogo wogisogoin sambul aremnogo re, hiren hineil fuluk welagagip.

⁶ Andi faget he, An Tuhan Lego Mondok logolik, Allah neluk welagi mene a'nogo nenuba hilingi'mo re, hit ekhe wa'lagu mene andiba nen longgo ugun mondok lego. Hit he ap wati lagagip andiba re, kwanirogo hilingiti lagagipmo hirogo hinoasuogeluk mukhisikhi logogun.

⁷ Hit hinawi kota o Edom tomkwe andoma An nen afuni inareng lek oba hilingisogo fembik, ap kwe andi kwe nen lagik wagik ugu mene re An nen mondogat inoasigin.

⁸ Tom-tom andoma hit hinebe warek enek sagarek logogin, punu-punukwe inom fanggong-fanggong andoma inom ap weim oba nen warek mene nek hoporek logogun.

⁹ Hit hinawi hinanggweang oba andoma re An nen mondok-mondok faget lei pirimsek logouwageluk hilingfagain, nen hit hinawi kota andoma bene ogo re afuni logogun lek. Andiba re, An Tuhan welagirek mene a'nogo hiren hinelu asigin.

¹⁰ Hiren ikhi logolik, Yehuda inom, Israel inom, nen it inanggweang lombok andoma eise re, nit welago ikhi lagep, nen An Tuhan Allah nebe re it ineisena welagiba nen he, hit hinangge asigin andi.

¹¹ Andi faget he, An Tuhan Lego Mondok logolik, Allah neluk welagi mene a'nogo nenuba hilingi'mo re, hiren An nagainafuri li'norinafik, hinabiret fisigik, wenagisigik, hilingiti lagepmare nendawimo het welagi mene a'nogo onggo hinoba fagain o. Hiren it inoba hilingfisikhi lagagip mene andem faget An nen onggo hit wokhisugunem hiren hinelu asugun.

¹² Andiba re, An Tuhan a'nogo nen hiren hinane weak mene ugunem andoma An mondogat holhi lagagi hilingi'mo re ambisangma hirogo hinelu asugun, hit hinane ikhi logolik, tom-tom Israel oba omanogo mondogat ap inareng lek agaikha o, nit ninenggiba nen mondogat inoato, iluk ikhi lagep.

¹³ Yago, hinunggulenu Edom mene yoma sani, hit he hinambele hokhorek logolik, An noba hinane wonoget fakhikhi logolik ikhi lagagip anggigi. A'nogo ikhi lagagip mene andoma hinane mondogat An nesanggo holhigi nego.

¹⁴ An Tuhan Lego Mondok welagi mene a'nogo nane ikhi logolik: An nen kweang hiren mene andoma mondogat lei pirimhogo hilingfagain sambul he afuni o kweangma mondogaren inagaiyek hogoin o,

¹⁵ andi re, hiren ogo Israel An nangge mene lei pirimse'ma agaikhe sambul hinagaiyek hasigip aremnogo hakhogo hogoin aro. Tom o Seir ebene andoma inom, nen Edom kweang ebene mondogat andoma inom, ap mondogat felelenghogo legasugun. Andiba re afuni mondogaren An Tuhan iluk inelu asuguno,” ikhe iluk yagaisan, isikhe.