YEHEZKIEL 34 - Allah Wene Fano Wene Hupla Inane

Gembala-gembala Israel mene faget yagaisasikhe wene

¹ Tuhan nen an noba yaganeti logolik yi'nogo ikhe:

² Afuni wa'lagaikharek mene yi re, haren ap raja Israel faget werek mene wenagisaluk he An Tuhan Lego Mondok welagirek mene nen it inoba ikhi lagi mene yi yagaisan o, ”Hit gembala Israel mene inobaget welagep mene andoma re alomat lakhikhi logoni o. Hiren he domba inobaget wenggelhi'legengge we hit hinonggwarek mene faget enek wenggelhi lagep.

³ Domba ebe eilak amusu re hiren nunggu welagik, nen esi re hiren hinasu kwakhugu welagik, nen domba asei werek mene re hiren warogo ninggik, ikhi logoligenat he, hiren he hinanggo domba andoma fanorogo halinafi lagep lek andi.

⁴ Nen domba omame lek mene re hiren halogo fisikhi lagep lek, nen ou mene re higirinafi lagep lek, inoumo werek mene re hiren yel fisikhi lagep lek, nen inafe mongol mene inom, longgo ugu mene inom he hiren inambotkwe woginarek wesuogeluk heraginafi lagep legat. A'nogo hilingiti logoligenat he hiren hinanggo domba andoma hinobabut weak logolik hinaniniba weaget fisikhi lagep andi.

⁵ Domba andoma inanggembala lek andi nen he hesangge nalek falek agaresik mene olomene nen senggelhungge mene agarek andi.

⁶ Andiba re An nen mene domba omanogore punu uan meneba inom, tom ebene inom andoma yugunat nikherek. It he o kweangma mondogat sagare'ma re ap misigen ogo futfisigik, heraginafik ili'lagwi lek.

⁷ Andi nen he hit gembala-gembala yoma sani, An Tuhan Lego Mondok welagi mene a'nogo nen hit hinoba ikhi lagi mene yi holini o:

⁸ An Allah neluk mondok welagirek mene a'nogo nenuba hilingi'mo re futfeni! An nanggo domba andoma re afuni nen halinabi'lagwi le'ma re mene olomene enda'ma mene nen senggelogo nili'lagwi. Hit An nanggembala nen he An nanggo domba omanogo halfisikhi lagep lek. Hiren he domba andoma inobaget wenggelhi lagep legat, we hit hinonggwarek faget enek wenggelikhi lagep.

⁹ Enggere hit ap gembala-gembala yoma hinesanggo fanorogo holini.

¹⁰ An Tuhan Lego Mondok welagirek mene nen hit hinoba ikhi logolik: An yire hit hinaselei mene o. An nandomba andoma nekhengge hit hinoba nen helamo re, hiren halinafi logoni iluk hit hinoba lombot fagain lek, nen hit he hinonggwarek mene faget enek wenggelikhi logouwageluk An nen yagahisagain lego. An nandomba andoma hit hinoba nen hinagap teliginmo re hiren nunggu mene asugun legaro,” ikhe iluk yagaisan, isikhe.

Gembala fano mene faget isikhe wene

¹¹ Tuhan Lego Mondok welagarek mene nen ikhi logolik, ”An nonggwaregenat domba andoma heraginabimbik halinafi logogin,

¹² An nen he ap gembala nen at anggo domba heraginabi laluk, hesangge pesangge werek mene omanogo misi'mo kaboget fisa we'luk halinafarek hakhogo, It nagainafuri andi re inebe linggene mum mene weagerinaferek mene andiba nen nalek falek werek mene andoma woginarek fisa wesigin.

¹³ It inebe re afuni inunggulenu lombok welagaikharek mene inanggelekwe andoma nen inom ap pok mene inawilokwe andoma nen inom wulaginabi wesimbik andogorogo woginarek inaiba inonggwarek inanggweang oba fisa wesigin. A'nogo fisa wesimbik An nen it inebe afuni Israel mene inandom kwe inom, fanggong kwe inom, inafe morogo ninggi logouwageluk engga mondok muli fanoma andoma fisa laga logogin.

¹⁴ Ibi eberogo nen An nen it inoba engga mondok muli fano mene afuni Israel inanggweang oba nen tom ebene inom fanggong kwe inom andoma fouget fikhi logogin. A'nogo fouget fugunem it andoma nen he iren set waligik, inailo legengge engga inafe morogo ninggik, ikhi logogun.

¹⁵ An nonggwaregen nanggo domba andoma halinafu mene asimbik, it inobaget set waruguba fouget fagain o,” iluk An Tuhan Lego Mondok welagirek mene a'nogo nen nane mondogat igi.

¹⁶ Longgo aga mene re An nen heraginafik, nonghong agasik werek mene re An nen heragaisogo woginarek wagik, inoumo werek mene re An nen fanorinafik, inoba ou mene re An nen higirinafik igin, oba nen he asei hokho mene inom, omame werek mene inom he An nebe gembala fano mene logolik halinafu mene welagimo re ariginik mene andoma re leget fisagain o.

¹⁷ Yago, hit An nandomba mene re hinesanggo fanorogo holini o! An Tuhan Lego Mondok welagirek mene nen hit hinoba nane ikhi logolik he, An nen hit hinawene hinebe lombok ayo wurogo piling hinabimbik fano mene weak mene oba nen lenogo ale'ma figik domba mene andoma kambing mene oba nen minggilogo ale'ma figik igin o.

¹⁸ Hit ekhe hinanggele'ma nen he engga fano mene nek nunggu mene andi faget he hinoba homot lasu lek hak welagep, oba nen he engga hiren ninggi lagep lek mene omanogo hineisogen sebelisikhi lagep! Hit hinagai re eil wurik mene ninggi logolik he, i hiren nunggu lek agai omanogo re ineisogen kulet fisikhi lagebat!

¹⁹ A'nogo hilingitunem An nandomba fena amu mene nen he engga hineisogen sebelisikhi lagep mene omanogo ninggik, i eil kulet fikhi lagep mene omanogo ninggik, ili'lagwi.

²⁰ Andiba re, An Tuhan Lego Mondok welagirek mene a'nogo nen hit domba hinasei hokho mene andoma hinoba ikhi lagi yi, An he domba omame werek mene inom omame lek mene inom inawene ayo wurogo minggilinabigiluk wesigin o.

²¹ Hiren he domba ou mene omanogo tamakhogo lakfisigik, hinandimugen taung isigik, ikhi lagepma re it omanogo domba esa logalek oba andoma nen wulibi lili'lagwi.

²² Oba nen he it domba andoma inaniniba hilingfisikhi logoinogoluk he An nen nandomba andoma nonggwaregen telinabigin. An nen nandomba andoma inebe misik-misik ayo wurinabimbik he fano mene re weak meneba nen minggilogo fisagain.

²³ An nen ap raja misik ekhe, An namingmingengge Daud higit mene menfoumo re, we at ami amu nen it inobaget inanggembala logolik halinafi logogin.

²⁴ An Tuhan he it ineisena Allah asumo re raja An namingmingengge Daud higit mene andi re it ferinarek werek mene asigin. Iluk An Tuhan nen nane mondogat igi.

²⁵ An nen it ninom wene wati logolik, it inebe inendawinggen hambukhogo logouwageluk abok wene warisagain. An nen he mene olomene nen senggeli'logo mene andoma mondogat he o kweangma mondogat mugusogo wulak fisagainmo re An mene nanggo domba andoma re inendawinggen hambukhogo leikwe welagik, o engga ogoikwe nogogik, ikhi logogun.

²⁶ An nen he it inebe fanot fisambik an nandom horek mene a'nogo era'lukwe andoma logouwageluk yagaisagain. Nen iren meiso inamolo halok An nen wogisikhi logogin.

²⁷ E wilibik mene enggen itik, yi mene ti mene yabukwe yago mene enggen itik, ugunem afuni mondogat he it inanggweang inonggwaregen meneba inendawinggen yamukhogo logogun. Posiemanggen An nagainafuri homaginarek mene andi re An nen lebek isigik, nen ap inamingmingengge hilingfisaluk welagaikharek oba andoma nen fikhalogo wulaginabi wagik umo re, An nebe Tuhan welagirek mene a'nogo inelu asugun.

²⁸ It he ap inunggulenu An inonggot mene nen hele warogo woginarek lagik, athe mene olomene nen senggelinafik, igin lek. It he inendawinggen serogo were'ma re ap misigen iluk ogo ekhe inailot fisikhi logogun mondok lek.

²⁹ An nen he it ineabukwe mondogat heiselogo hilingfoumo re o kweang andiba sumburu ouwak ekhe logogin mondok lek. At he ap inunggulenu amu mene nen li'norinafi logogun legat.

³⁰ Andiba re afuni mondogaren inelu aga logolik, afuni Israel mene andi re An nagainafuri hilingi'mo re An nawe a'ma ferinarek welagirek mene a'nogo inelu asugun. Iluk An hineisena Tuhan Lego Mondok welagirek mene a'nogo nen nane mondogat igi.

³¹ Eberogo, hit he An nandomba were'ma An nen hit nunggu mene wokhisigirek. Hit he An nagainafuri welagep, An he hit hineisena Allah welagi. An Tuhan Lego Mondok welagirek mene a'nogo nen nane mondogat igi, ikhe.