YEHEZKIEL 33 - Allah Wene Fano Wene Hupla Inane

Yehezkiel ap kagalinarek mene faget Allah nen menfesikhe wene

¹ Tuhan nen an ekhe inom yaganeti logolik yi'nogo ikhe,

² ”Afuni wa'lagaikharek mene yi, haren it ap inunggulenu mene andoma inoba yagaisano, An nen o kweang misik ekheba weim lakfei wesigin sambul andi re yi mene hilinglaga logogin. Afuni andoma werek mene nen ap misik ekhe kagalinarek logogin mene heragaisogo menfogoin.

³ Ap kagalinarek mene andi nen selei mene wagunem eilenggen isikhi logolik, afuni hebelogo logouwageluk, ap a'nogo nen youk werek iluk enegengge ekhe abologet hikhi logogin.

^4-5 Ma re ap ekhe nen youk werek iluk enegengge hilingisigin mene andi holhikhi logoligen oba nen afe morogo werek halok selei mene kwi waga logolik wasumo re at wa'lasigin andi re onggwarek weak elekwe. Nen aren ambi ane enegengge ugu mene andi hol feilepsik ogal feilepma nen he agap telogo fakhelep.

⁶ Oba nen he ap kagalek mene andi nen selei mene wagunem isilik laga logoligen ane enegengge igin mene a'nogo futhagain lek halok, wonghogo were'ma nen selei inap kwi we'luk afuni andoma inoasugun halok andi ap kagalek mene andi weak elekwe inoasugun. Ma re at oba enggin asigin andi. Nen An nen ogore ap andi oba onggo kino igin aro.

⁷ Afuni wa'lagaikharek mene yi, hat he hunggulenu Israel mene faget kagalinarek mene faget iluk An nen menhobagagi. Enggere, ebeti logouwageluk mene yi yagaisan:

⁸ An nen yagaisikhi logolik ap kwanirogo hilingiri'lagwi mene andoma hobuk wa'lasugun ili'lagwi oba nen, haren at obabut agaum esi laga logolik agap teluageluk yagati'le'ma at wa'lasigin halok, at aweak elekwe wa'lasigin. Oba nen he at wa'lasigin mene andi faget he An nen hat hoba onggo kino igin.

⁹ Haren ambi ap kwanirogo hilingiterek mene andi yagasumo nen, aren kwanirogo hilingiterek mene andi herakfuluk hilingite lek halok he, at he ap weak hilingitarek meneat wa'lasigin, oba nen hat enek he hagap telagaino,” ikhe.

Inonggwarek inebe lombogen hilingiti logogun wene

¹⁰ Tuhan ane an noba yaganeti logolik, ”Afuni wa'lagaikarek mene yi, it ap Israel mene inoba wene iren agarek mene yi agap sagalogo yagaisan, ’Nit ninonggwarek weak elekwe weak mene inom kwanirek mene inom, hilingiti lagoba ninoasiginmo re, nit ninggi'nogo ninelu logogun anggegep?’ iluk agarek.

¹¹ An Tuhan Mondok Lego logolik, Allah neluk mondok welagi mene nenuba it yagaisano, An he ap kwanirogo hilingitarek mene wa'lasugun andi re nabit anggikhi lagi, at he hebekhogo re at ebe eluk logouwageluk aweak hilingiri'lago mene andoma herakfagain halok fano. Yago hit hinunggulenu Israel mene yi sani, kwanirogo hilingiti lagep mene andoma mondogat hebisani o! Ninggi'nogo iluk hit he hinebe wa'lasugun nogo?

¹² Afuni wa'lagaikharek mene yi re, haren afuni Israel mene yagaisan, ap fano mene ekhe nen weak hilingitu halok he, aren attak fano hilingiti laga mene andi nen lebetha lek hak. Nen, ap kwanirogo hilingitarek mene nen aweak herakfisugu halok, at unggum wogosugun lek. Nen, ap fano hilingitarek mene nen weak hilingitu halok agap teligin legat.

¹³ Ekhe re yi'nogo asigin a'naga, An nen ap fano hilingitarek mene andoma inagap teligin iluk wene warogo isigi, oba nen at weak hilingitu mene eroratesik, attak at fano hilingiti laga mene a'nogoba nagap teligin iluk wenggelhagain mene andi re nonghong igin. An nen he, aren attak fano hilingiti laga mene andoma ebesigin lek, nen at aweak hilingiti laga mene andomaba onggo re ebe wa'lasigin.

^14-15 Ekhe re, An nen ap weak hilingitarek mene re wa'lasugun iluk ineluet fesigi aro. Oba nen ap a'nogo weak hilingitarek mene herakfuluk agaumhogo fano mene hilingitik, higithogo hilingitik, hilingitu mene eroratu halok, ekhe walhigik he, ap inangge wanigin mene omanogo oak waganogo wogisigik, athe hinate mene omanogo inonggwarek wogisigik, andi nen wene melalek elu logogin wene higithogo hilingitik, hilingitu halok he, at andi ebe hobuk wa'lasigin lek.

¹⁶ An nen at aweak attak hilingiti laga mene omanogo ebesigin legat, nen aren fano mene inom, eberogo mene inom, hilingiti logogin andiba eluk fano logogin.

¹⁷ Oba nen he it inunggulenu andi nen ikhi logolik he, An nen hilingiti mene andoma re, higithogo hilingiri'lago iluk agarek lek! Oba nen it inonggwarek enek he, higithogo hilingiti legengge nen ili'lagwi.

¹⁸ Ekhe inom An nen omamerogo ikhi lagi, ap ekhe fano hilingiterek mene nen, hobuk weak hilingitu mene erora'luk hilingitarek mene re, andiba wa'lasigin.

¹⁹ Ap weak hilingitarek mene nen, weak hilingitarek mene palfuluk agaumhogo fano mene hilingitik, eberogo mene hilingitik, hilingitu halok he, at a'nogo hilingiterek mene andiba ebe eluk logogin.

²⁰ A'nogo hilingik kwelek oba nen, it inunggulenu Israel mene nen An nen hilingiti lagi mene faget he higithogo hilingiri'lago lek, iluk agarek. A'nogo agarek oba nen ibi-eberogo nen he An nen it wene inoba figik kotik iren hilingiri'lagwi higithogo hilinginabigin o,” ikhe.

O Yerusalem pigin mene faget isikhe wene

²¹ Tanggal lima bulan sepuluh tahun dua belas meneba nit hele warogo la'ninobagasukwama were'ma andem, ap misik ekhe o Yerusalem en eluk heise wilife mene, An nambit wagasik kota a'nogo re mondogat pikhe o, iluk yaganesi waga.

²² Hubanggo aren oan yaganesi wagi'lek werek kwelek, Tuhan Areagun an noba asi wagunem higi. A'nogo higimo nen, ap andi wagasik an noba yaganeti logolik, an nane lek welagi mene a'nogo nane hurogo hilinglagama, nane u higit aga.

Afuni inunggulenu andi nen weak hilingiti lagaukwa wene

²³ Tuhan ane an noba ikhi logolik,

²⁴ ”Afuni wa'lagaikharek mene yi re, it ap o kota Israel oba meisalhigik pikhe kwe welagaikharek inap andoma nen inane yi'nogo ili'lagwi: Abraham amu logolik oba re kweang yi eiserogo welaga, oba nen yogondak nit he ninebe ninunggulenu lombok hokhorogo welagoma re, kweang yi re nit mene o, ili'lagwi,” ikhe.

²⁵ Andi faget he Tuhan Lego Mondok welagarek mene a'nogo nen wene yi'nogo ti'nogo iluk an mimingnafi logolik, ”Hit he eino mep weregengge ninggik, tugwi kembu fogeratik, afuni inoatik, ikhi lagep. A'nogo hilingiti logoligen hinambong sisengge kweang yi nit ninanggweang ikhi lagep andi ambi.

²⁶ Hit he, hinenggarok fanghogo laga lagep meneba hinendawinggen himbirik welagep, nen hiren hilingiti lagep aple andoma re, mondok hebak inafe asu hak mene hilingiti lagep. Hit hinebe mondogaren babi hilingiti lagep. A'nogo hilingiti logoligen meneat he hinambong sisengge kweang yi nit ninanggweang iluk ikhi lagep andi ambi.

²⁷ An Tuhan Lego Mondok logolik Allah neluk welagi mene a'nogo nenuba hilingi'mo re, afuni o kota meisalogo pikhe kwe werek mene andoma re, aben inoasumo wa'lasugun. Nen, it o leikwe werek mene re mene olomene aik anini mene nen senggelina bimbik nagain. Nen it tomkwe inom oumo kwe inom hinago logogun mene re ou amben weak mene hilik-hilik wa'lasugun.

²⁸ O kweang andi re An nen hobuk leimo afuni mondogat pirimhogo inareng mondogat le'ma hilingfagain, nen, iren inomameba leget fakhagarek mene a'nogo wurep kobokhogo asigin. Israel oba nen tom-tom andoma mondogat pirimhogo hilingfoumo, ap misik iluk ogo ekhe ailo legengge lagik-wagik ikhi logogin lek.

²⁹ An nen inunggulenu andi mene inaweak en hilingik enggeba o kweang andi lei pirimhogo hilingitu mene andi faget unggum wogisugunem he, iren An Tuhan welagirek mene a'nogo inelu asugun o,” ikhe.

Nabi nen yi wene ti wene yagaisasikhe mene omanogoba ambisangma agaikhe wene

³⁰ Tuhan ane ekhe ikhi logolik, ”Afuni wa'lagaikharek mene yi re, hat he it hat hunggulenu mene o leget pa'leget waganekwe horok horokwe inom athe o kwe ambe palekwe inom kaboge'luk, it ekhe nen ekhe inoba ikhi logolik, ”Yago. Nit yogondak yi, Tuhan nen he, Allah wene ninggi'nogo mene ekhe igin he,” iluk agarek mene omanogo nen habok tindel-tandel hafarek mene welagen o.

³¹ It inebe felelenghogo andogosi we'luk, it An nagainafuri mene hakhogo haren hane yagaisugu mene omanogo holi'lagwi. Oba nen he, haren yi'nogo ti'nogo hilingi'ni iluk miminginafendek mene omanogo re, iren hologo hilingiri'lagwi lek. It inambeba nen he inendawinggen hundik hilingitarek mene agarek oba nen he, it inendawinggenma nen he, inonggwarek ambisangma helogoin mene faget enek ebeti logoligen hilingiri'lagwi.

³² Hat faget he, iren at yi re wuni sileng felalni igik, nen, ane mondok pugun-pagansek mene igik, nen no kecapi kongetu aple hebelek mene igik agarek. Andi re eberogo iren hat hane inesanggo holi'lagwi, oba nen he hologo hilingiri'lagwi lek.

³³ Andoma mondogat he haren yagaisikhi logogin mene mondogat higit asigin, nen ebe asigin mene andi wesumo re iren futfikhi logolik ap nabi ekhe ninanggale'ma logolik ikhi lagaikhe mene a'nogo ebe ari'lago yi aro, iluk futfogoin o,” ikhe.