YEHEZKIEL 32 - Allah Wene Fano Wene Hupla Inane

Raja Mesir mene faget buaya ba oba lirogo isikhe wene

¹ Tanggal satu bulan dua belas tahun dua belas meneba nit hele warogo lakninobagasukwama welagagu mene andiba,

² Tuhan ane an noba yi'nogo ikhe: Afuni wa'lagaikharek mene yi re, haren ap raja Mesir mene andiba hane omamerogo wenggeluageluk yagaom. An nen wene at obaget ikhi lagi mene yi yaga'no, ”Hat he mene singa ket souge mene hangge it inunggulenu amu mene inanggelekwe andoma nikhi lagen, oba nen hat he buaya i elema nen fesi sogophogo i eil kulabeterek higit hilingiti lagen nen, heisogen he i mondogat weagerogo fikhi lagen.

³ Yi afuni ti afuni inunggulenu lombok andoma kabogesugun sambul andi re An nen hat su ikan kwalharek asu meneba kwalhobagambik it ap inunggulenu andi nen litharek esanggoma hobagai wulibi wesuageluk herakfisagain.

⁴ An nen hat hebe kweangma woukmirogo lakhobagaumo sue, paik, eluk elugengge o kweangma yoma hokhorogo weregengge omanogo nen senggelhabi we'luk ninggi logogun.

⁵ Andi nen tom-tom inom, fanggonggwe inom andoma mondogat hat hebe warek fili nen hopo igin.

⁶ Hat hamep he, An nen kweisalisa pi wesumo re tom ebene inom i lagarek mene andoma mondogat ebene inom mep eil enek hilingik logogin.

⁷ Hat hebe An nen leget hobagagin sambul andi re pogot An nen huli'libet figik, hesagal enggen mumet figik, mo ambotkwe sugulogo anggulok a'ma kwelakfigik, tugi omba'bak eti'legengge welagik, igin.

⁸ Eberogo, selek pogoroba werek mene An nen naguligin, nen kweang he An nen kiruak tenghogo hilingisogo fagain. Iluk An Tuhan Lego Mondok welagirek mene nen nane mondogat igi.

⁹ Wene hat legethobagagin mene andi faget he An nen o kweang haren honggotkwe sagat foumo re, afuni inunggulenu hokhorogo nen inoak leigesugun.

¹⁰ Eberogo, An nenggarok hat hebikhit mumet hiilik waga logolik hat sebelogo hobagaumo re it raja inom, afuni inunggulenu hokhorogo omanogo inomen, An nen hat hoba hilingisigin mene ineilenggen heogoin o. Andi sambul it inailo nen inoak leigetik, wa'lagu aple inailo nen lei'leigenggetik ugun, ikhe iluk yaga'no,” ikhe.

¹¹ Tuhan Lego Mondok welagarek mene a'nogo nen raja Mesir mene yagati logolik, ”Ap raja Babel mene enggarok hat hoba lakfei wesigin.

¹² Ap sikhe fisogo inap inunggulenu amu-amu mene inanini inap omanogo inoba An nen hinenggarok lisogo fange'ni o, iluk yagaisamo re, hat hagainafuri inebe mondogat inoasugun. Andi re afuni haren mene inom yi mene ti mene haren hamolo anggikhi lagen mene inom mondogat wolelenggenhogo fagain.

¹³ Hanggo yinik-hunik mene mondogat omanogo An nen i nenggarek mene esanggoma andoma nen legetfisagain. Ma re afuni nen ogo wam en ogo i andi ima ineisogen ekhe eil kulet fei logoin lek.

¹⁴ A'nogo hilingisugun halok he, o kweang haren meneba andoma nen, i lagarek mene andoma An nen eil wureget figik, abolok legengge laga logouwageluk hilingfigik, igin. Iluk An Tuhan Lego Mondok welagirek mene nen nane mondogat igi.

¹⁵ An nen Mesir lei pirimhogo inareng le'ma hilingfagain sambul andi re mondogat andoma werek mene felelenghogo leget foumo re, iren An Tuhan iluk inelu asugun.

¹⁶ Ebeti logouwageluk, mondok omamerogo igi mene yi re, wuni sinurek awuni wulafi logogun. Hemi inunggulenu ekhe mene-ekhe mene amu mene nen wuni andi Mesir inom afuni andoma werek mene inom inobaget fong warogo sinurek awuni ikhi logogun. Iluk An Tuhan Lego Mondok welagirek mene nen nane mondogat igi,” ikhe.

Kweangma ap wa'la'luk lagaikharek oba faget isikhe wene

¹⁷ Tanggal dua belas bulan satu tahun dua belas meneba were'ma, nit hele warogo la'ninobagasukwama logolik oba andem he, Tuhan ane ekhe an noba yaganeti logolik,

¹⁸ ”Afuni wa'lagaikharek mene yi re, afuni Mesir mene inobaget fong wasin o. It andi re kweangma afuni wa'la'luk lagaikharek oba andoma afuni inunggulenu amukwe mene inomame mondok hokho mene andoma inom seberogo lakfisano.

¹⁹ Haren it yagaisikhi logolik, ”Hiren anggikhi logolik, nit mondok fano pigin-pugunsek anggikhi lagep? Hit he, kweangma afuni wa'la'luk lagaikharek oba andoma pugun o, nen hit hinebe re afuni Allah inonggot mene wengik oba ma'lima inanggele'ma wengik logogun,” iluk yagaisano.

²⁰ Unggulenu Mesir mene re afuni weim oba inoasugun mene inom seberogo wa'lasugun. Karok misik ekhe it mondogat inoasigin mene webet fikhesik werek.

²¹ Ap inogogwi kabelek mene pahlawan omanogo inom, ap sikhe inenggi pagat weak mene it Mesir fikhit yafarek mene omanogo inom he, it Mesir mene afuni wa'la'luk lagaikhare'ma omanogo wagunem he inagaiyekhogo woginafi logogun. Iren inanggiluk eti logolik yi'nogo ikhi logogun, ”Afuni Allah inonggot mene re weim oba nen mondogat wa'lagaikha o. Yogondak he, it yoma wengik logouwogeluk weri'lagwi yoma!” ikhi logogun.

^22-23 Asyur tulem andoma wengik were'ma, agoromi sikhe fisogo inap omanogo nen walingisogo kwelakfuluk logogun. It inebe mondogat he weim oba nen inoata mene omanogo. It inebe salek oba andoma re, afuni wa'la'luk lagaikharek oba fem a'ma ma'lima salek werek. It ineluk logolik oba re afuni nen inailorinafi lagaukwa inaben hilingik.

^24-25 Elam ogore, andoma salek were'ma agoromi sikhe fisogo inap aren mene nen, haningisogo kwelabek logolik werek. It inebe mondogat he inagap inenggalimo mene palek le'ma nen weim oba nen inoatama re, kweangma afuni wa'la'luk lagaikharek oba omanogo paga. It ineluk logolik afuni nen inailorinafi lagaukwa oba nen yogondak it mondogat wa'lagaikhasik, ap weim yafunem en wa'lagaikha mene omanogo inom it hilingiti lagaikha mene faget inenggali hogoin.

²⁶ Mesekh inom, Tubal inom ogore andoma werek, ma re it inebe ap sikhe fisogo inap iren mene nen maserogo kwelaginabek werek. It inagap inenggalimo mene pale'lek andi nen weim yafi logolik inoatama wa'lagaikha. It ineluk logolik, afuni inailot fisikhi lagaukwa inaben hilingik.

²⁷ It salinafa re ap pahlawan inogogwi kabelek mene inasikhe fing-fang afuni wa'la'luk lagaikharek oba pugu sambul legeisogo fisikhi logolik salinafukwa higit legeisogo fisikhi logolik salinafa lek. Ap inogogwi kabelek mene pahlawan andoma re inenggarok inunggul a'ma legeisogo, nen, inandok peigengge re inami'mo felikhogo salinafa. It inebe ineluk logolik oba re ap inogogwi kabelek mene pahlawan inambong sise inap were'ma afuni mondogaren inailorinafi lagaukwa inap.

²⁸ Andi hakhogo afuni Mesir mene ogore afuni Allah inonggot mene weim oba nen wa'lagaikha mene omanogo inanggele'ma weing fisamo logogun.

²⁹ Edom mene andoma re iren mene raja mondogat inom, inalong werek inap inom andoma werek. Attak he, it ap sikhe fisogo inap mondok inomame inap welagaukwa, oba nen yogondak he, it ap fenakwe wa'lagaukwa mene Allah inonggot mene omanogo inom, afuni wa'la'luk lagaikharek oba omanogo wengik logolik werek.

³⁰ Andoma melalinafu mene utara fikhit mene ogo andoma were'ma, afuni Sidon mene ogo andoma weregat. Attak it inomameba afuni inailo mene hilingfisikhi lagaukwa, oba nen yogondak he it inenggali agaikhasik inagap inenggalimo mene palek legengge afuni wa'la'luk pagarek oba omanogo ap weim oba nen wa'lagaikha mene inom werek. Andoma it wa'lagaukwasik kweang a'ma pisukwa mene inom seberogo wengik logolik inaweak onggo inom andoma logogun.

³¹ At raja Mesir mene inom, agoromi tentara aren mene inom kweangma ap wa'la'luk lagaikharek oba omanogo pi lambik, ineil isugunem en he, ap weim oba inoata mene omanogo were'ma isambik inagaiyek hogoin. Iluk An Tuhan Lego Mondok welagirek mene nen nane mondogat igi.

³² An nen hilingisigin oba raja Mesir mene nen he afuni ineluk werek mene inailo asuageluk hilinginafi logogin, oba nen at inom tentara aren mene inom inoasumo re it inebe afuni mondogat Allah inonggot mene inom it fenakwe weim oba nen wa'lasugun mene inom seberogo wengik logogun. Iluk An Tuhan Lego Mondok welagirek mene a'nogo nen nane mondogat igi,” ikhe.