YEHEZKIEL 31 - Allah Wene Fano Wene Hupla Inane

Mesir faget e laik o Libanon meneba oba lirogo isikhe wene

¹ Tanggal satu bulan tiga tahun sebelas meneba, nit hele warogo lakninobagasukwama were'ma. Tuhan ane an noba yaganeti logolik,

² ”Afuni wa'lagaikharek mene yi re, An nen wene yi'nogo ti'nogo iluk ikhi lagi mene yi raja Mesir mene oba inom afuni mondogat inoba inom yagaisan: Ibi eberogo nen hat he henu werek welagen! Hat hinom walha mene ekhe werek lek!

³ Hat he e laik o Libanon agayo tolum lagaikheresik enggi hokhorogo talogo fano welagarek andi hangge welagen. E ebere mondok mitmorengge lagaikheresik pogot halianggen oba poli'ma hilingik welagarek.

⁴ At agai hokhorogo hilingi'mo re ebe fanorogo wiliferek, i kweang a'ma nen nunggu mene wogeterek, Omanggen ebene mondogat higithogo lagik nen e amu mene wilibikwe andoma ogore minet filik lagik ikherek.

⁵ Agaire firok igi'lek were'ma ebe mulirogo wiliferesik, enggire hokho mene tualogo wiliferek. E hokhorogo enggakwe wilibik agayo omanogo nen he at andi nek he uan awan agayo wolonghogo wilibik werek.

⁶ Andi nen he yi rue ti rue e andi enggi logourekwe inawi wutarek, nen mene olomene aik anini mene re e andi ambil elema eak tasi kwikherek. Yi afuni ti afuni inunggulenu hokho mene o kweangma mondogat he at a'ma kunmo andoma hu'la'luk welagaikharek.

⁷ E andi ineilenggen hugunem he mondok fano agayo logolik obakhe higit hagat se'ma re, enggi uanhogo hilingik. Nen omanggen he walek ma'lima fuk-fukhogo pelabe'ma re i kweang a'ma werek meneba yagaisogo pelabek.

⁸ E laik o Eden Allah eabu yagoma andoma mene nen at inom higirabesu mene ekhe werek lek. Nen e laik at inom higiret ha mene ekhe werek lek, e enggi uanhogo lagarek mene andi higit ekhe werek legat, ibi-eberogo nen he Allah eabumo andi e fano mondok andi higit mene ekhe werek lek.

⁹ An nenat e andi agauwak halogo pugunhogo enggi uanhogo hilingfigik, engga hikhogo hilingfigik, isigi. Nen e o Eden Allah eabumo yago mene omanogo mondogaren he nirogo at higit logou mene, iluk inendawimo waragarek.

¹⁰ Andi faget he An Tuhan Lego Mondok welagirek mene a'nogo nen, e erembul pogot halianggen oba tipsek agayo andiba asigin mene yagaheti lagi. E andi ekhe inom uan aga logolik ekhe inom wonoget fakhili'lago.

¹¹ Andiba re An nen at nabit iluk tamakhogo lakfisambik ap pok ekhe omame werek mene enggiba foumo re, ap andi at aniniba hilingiri'lago mene andem higithogo hilingisuageluk wogosigin.

¹² A'nogo wogosumo tentara yatma mene inendawirinafi'lek weagerinafarek mene nen at a'nogo muk fembik herakfisogoin. Enggi liakhigik pigin mene re kweang andiba tom ebene mondogat inom, tonggokwe mondogat inom pigin. Yi afuni ti afuni at a'ma logogun mene omanogo re at a'nogo herakfuluk heise wulibugun.

¹³ Yi rue ti rue we'luk e mugusogo wengik mene a'nogo bene lambuli waga logogun, nen mene olomene enda'ma mene re e enggi sombol higik pigin mene omanogo anggelek elekwe kuluk logogun.

¹⁴ Mondogat andi hiling lasigin he yogondak erorate yi huli nen e andi higit uanhogo lagagu mene ekhe logogin lek. At hakhogo e omanggen elema nen i hokhorogo ninggi logogin oba nen e erembul pogot halianggen oba tip ilagagin mene ekhe werek lek. Andoma mondogat he afuni wa'lagaikharek mene hakhogo wa'laga logogun, nen it mondogat he kweangma ap wa'lagaikharek oba paga mene omanogo inom andogosi pugun.

¹⁵ Tuhan Lego Mondok welagarek mene a'nogo ane yi'nogo ikhe, ”E andi kweangma ap wa'lagaikharek mene were'ma pigin sambul fong warogo iluk enegenggerogo re, An nen i kweang a'ma werek mene omanogo yenggel fagain. An nen i elesi wiliferek mene inom tereng uageluk hilingfigik, i endep-endep agai lagarek mene omanogo yagat figik, igin. E andi mondogat wa'lagama iluk he An nen tom Libanon ebene andoma o mum mene lakfei wagik, yi agayo ti agayo engga ogoikwe werek agayo omanogo puget fisigik, igin.

¹⁶ E andi An nen kweangma ap wa'la'luk lagaikhare'ma andoma mugusogo pelabumo abolok tunge'luk pugunem andi re yi afuni ti afuni inunggulenu lombok omanogo inoak leigesugun. E o Eden werek mene mondogaren inom e o Libanon oba penek agayo i hokhorogo fulogoum etunem fano mulithikherek mene omanogo nen inom nen inebe mondogat kweang a'ma paga mene nen inom he e andi pigin mene faget inendawimo agaiyeget fagain.

¹⁷ Iren he at hondo'luk he kweangma ap wa'la'luk lagaikhare'ma andoma lambik, it attak pisukwa mene omanogo inom kabogesugun. Nen attak e andi andimiba hurek welagaukwa mene omanogo yi awi ti awi inunggulenu inap inanggelekwe andoma saga ilogoin.

¹⁸ E andi ebere raja Mesir mene inom it inunggulenu Mesir mene inom faget walhigik ikhe. E o Eden oba andoma e mondok fano uan awan mene ekhe werek lek. Oba nen he yogondak e o Eden oba andoma hilingik higit he, e andi ogore afuni wa'la'luk lagaikharek oba kweang a'ma ma'lima pimbik, it fena Allah inonggot mene weim oba nen wa'lagaukwa mene inom seberogo kabogesugun. Iluk An Tuhan Lego Mondok welagirek mene nen nane mondogat igi,” ikhe.