YEHEZKIEL 30 - Allah Wene Fano Wene Hupla Inane

Tuhan nen Mesir unggum wogosigin isikhe wene

¹ Tuhan ane ekhe inom ikhi logolik yi'nogo ikhe,

^2-3 ”Afuni wa'lagaikharek mene yi re, haren hobuk asigin mene faget oan werek kwelek hobuk a'nogo asigin o iluk it ap inunggulenu Mesir mene inoba An Tuhan Lego Mondok welagi mene a'nogo nen ikhi lagi mene andi yagaisan o. Inane kwi kwerogo le aga logolik yi'nogo ikhi logouwak: Eige! Linggene Tuhan awi a'nogo mondogat horogasi waga o! Aren weak-weak hilingisigiluk werek. Linggene andi re mondok mum kiruang tengsek mene, yi afuni ti afuni inunggulenu lombok omanogo unggum wanugun oba re inenggi andiba asigin.

⁴ Enggin hokho mene Sudan oba fagain, Mesir oba weim yafi logogun. Ap wathigik pelafi logolik, o kweang andiba pin talogo kwigik, o mondogat meisak langgukhogo figik, ugun.

⁵ Weim andi yafi logolik ap sikhe fisogo inap leberinabuageluk woginabugun oba nen hokhorogo wa'lasugun mene re it afuni, o Sudan mene inom, Lidia mene inom, Libia mene inom, Arab mene inom, Kub mene inom, andi nen An nunggulenu mene ogo wa'lasugunat,” ikhe.

⁶ Tuhan Lego Mondok welagarek mene a'nogo nen ikhi logolik, ”Migdol abel utara fikhit mene andi inom Aswan abel selatan fikhit mene andi inomen Mesir mene inom sebe'luk hilingitarek mene andi re weim andiba nen wa'lasugun. Nen tentara Mesir mene winik wonok agarek mene andoma mondogat wolelenggen tagalogo hilinglasugun. Iluk An Tuhan Lego Mondok welagirek mene a'nogo nane arat igi andi.

⁷ Kweang andiba re it kweang amu-amu mene inanggele'ma nen he afuni mondok le'ma inareng tiring-terenghogo hilingik oba logogin, nen kota aren mene andoma re o meisalek enek kabok lagakhi logogin.

⁸ An nen ambi Mesir endu fati logolik at inom seberogo hilingiri'lagwi kwe andoma mondogat inoasumo re, iren An Tuhan a'nogo inelu asugun.

⁹ Linggene andi asi wesigin oba re, Mesir mondogat wolelenggenhogo hilinglasumo re An nen hobuk ap yonggongge lakfisa wesigin mene kapal oba laluk ap Sudan inap inendawi menenei figi'legengge werek mene andoma youk loageluk lakfisamo it inailo nen hilingiti logogun. Linggene andi re eberogo nenat asi wesigin!” ikhe.

¹⁰ Tuhan Lego Mondok werek mene a'nogo nen ikhi logolik, ”An nen raja Nebukadnezar Babel mene andi ayonggo foumo aren he Mesir mene inangge inenggi werek welagaikharek mene omanogo wolelenggenhogo fei wesigin.

¹¹ Nebukadnezar inom aren mene tentara andoma inom afuni inelagaik isigi'lek hilingitarek mene omanogo wesimbik, inenggarok oba kweang Mesir oba andoma wiik weakhogo hilingfisa wesumo re kweang andiba ap warek enek pi pou igin.

¹² An nen i Nil ogo firitoget fembik Mesir mondogat ap inanini weak mene inenggiba fagain, nen ap pok mene nen kweang andi mondogat weaget fouwageluk An nen inayonggo fagain. Iluk An Tuhan nane mondogat igi o,” ikhe.

¹³ Tuhan Lego Mondok welagarek mene a'nogo ane ikhi logolik, ”An nen o Memfis oba andoma dewa inom tugwi kembu fogeratarek mene andoma inom wolelenggen isagain. O Mesir oba andoma raja ekhe logogin lek. Afuni andoma mene re An nen inailo mene hilingfisagain.

¹⁴ O Mesir abel selatan fikhit andoma re mondogat ap inareng tiring terenghogo hilingisogo fagain, nen kota Zoan utara fikhit werek mene andi re An nen endu fagain. O Tabe kota eroma andi re An nen unggum wogosigin,

¹⁵ nen at oba nen yi mene ti mene werek mene omanogo mondogat legetfisagain. An nanini a'nogo Pelesium kota Mesir en along palogo pa'leget waganek a'nogoba fagain,

¹⁶ nen kota andi enggin hokho mene hagain. Eberogo nenat An nen Mesir endu fagain. O kota Tebe leget pa'leget waganek mene andi mondogat wolelenggen isamo re, kota andi i fu nen hogoukhogo waluk lagain.

¹⁷ O kota Heliopolis mene ap souge andoma inom, Bupastis ap souge andoma inom he weim andiba nen mondogat inoati logolik, hemi re inenggi abisak helaluk wulibugun.

¹⁸ Andem oba An nen at Mesir omamerogo logolik melalinafunem lego werek mene a'nogo nen at omame logolik wonoget fakhikherek mene a'nogo inom waganogo nenggimo wanigin, o Tahpanhes andoma re mondogat mum asumo hemi andoma mene re inenggi abisak woginabugun.

¹⁹ A'nogo An nen Mesir unggum wogisamo, iren An Tuhan iluk inelu asugun o,” ikhe.

Mesir enu lego a'nogo mondogat lek aga isikhe wene

²⁰ Tanggal tujuh tugi misik mene andiba tahun nesanggo meneba re, nit hele warogo lakninobagasukwama logolik oba andem Tuhan ane an noba ikhi logolik,

²¹ ”Afuni wa'lagaikharek mene yi, An nen raja Mesir mene a'nogo enggi mondogat sombol figimo re, it ekhe nen at enggi higit figik, at he fano asuageluk homak figik, nen karok enggimo omamerogo senesuageluk ekhe wanhik, igin mondok lego.

²² An Tuhan Lego Mondok welagirek mene a'nogo nen nane ikhi lagi. An yi re raja Mesir aselei mene welagimo re, An nen enggi pirenet ekhe omame werek mene inom nen somborek mene a'nogo inomat sombologo lakfisagain o.

²³ Nen afuni Mesir mene re An nen o kweangma mondogat telfol isagain.

²⁴ A'nogo hilingisimbik An nen hobuk raja Babel mene enggi omamet fembik An nenggarok a'nogo at enggimo fagain. Oba nen raja Mesir mene enggi re An nen sombol foumo at aselei mene raja Babel andi elokhoma nen oak heinet warogo wa'lasigin.

²⁵ Eberogo nen, raja Mesir mene andi re An nen omame leget fagain, nen raja Babel mene re An nenat omamet fagain. An nen at oba nenggarok wogosigin sambul andi re aren omak legeisogo Mesir mene inom weim yabugun. Andiba re An Tuhan welagi mene a'nogo iren inelu asugun.

²⁶ An nen ap Mesir mene re yi awi ti awi andoma telfol isagain. Andiba re An Tuhan welagirek mene a'nogo iren inelu asugun,” iluk ikhe.