YEHEZKIEL 3 - Allah Wene Fano Wene Hupla Inane

¹ Allah ane ikhi logolik, ”Afuni wa'lagaikharek mene yi re, buku huli'lipsek engge yi nano. Nambik he afuni Israel mene hinom hinane masubagaigen he lan o,” iluk yaganete.

² A'nogo yaganetemo an nambe anget figimo re Allah nen buku huli'lipsegengge a'nogo waganogo nambelema kwelakfikhemo ninggi.

³ A'nogo ninggimo nen Aren yaganeti logolik, ”Hat afuni wa'lagaikharek mene yi re! buku huli'lip segengge yi halamutmo kwalin o,” iluk yaganetemo ninggiri'mo nen he enduk he kin amusu enduk mit-mirengge andi hangge hilingik welaga.

⁴ Allah ane ikhi logolik, ”Afuni wa'lagaikharek mene yi re, hat hebe lambik he An nen yi'nogo hilingi'no ti'nogo hilingi'no iluk yagaheti mene andoma afuni Israel mene inoba yagaisa lan o.

^5-6 It inoba An nen lakhobagakhi lagi, unggulenu inane hunik mene were'ma lakhobagakhi lagi lek. Haren it inane fut fou elo'lek hilingi'mo re legat, nen arigini'mo lakhobagaumo nen he iren hat hane ugu mene re elok holu hago.

⁷ Oba nen unggulenu Israel mene andi re hat hane igin menere holugun mondok lek a'naga o. An nane ogo furogo holi'lagwi legaro, it he inungguloak helep hangge logolik nane sagalharek inap werego.

⁸ Yogondak he An nen harogo hungguloak haro mene hilingisogo hobagaumo re it higirat heil polok mene asigin.

⁹ Hat he An nen helep uk haroweak andi hakhogo inom, nen no intan wurik weak kengsek welagarek andi hakhogo inom hilingisogo hobagagin enggere, it wene sagalharek inap andi faget hailorinabu fugo,” iluk ikhe.

¹⁰ Hobuk ekhe inomat Allah ane ikhi logolik, ”Afuni wa'lagaikharek mene yi re, An nen yi wene ti wene hat hoba yagaheti lagi mene andoma fanorogo fut-fuluk wenggelhi logoin o.

¹¹ Hebe re it hat hunggulenu mene hele warogo huginabi lagaikhama werek mene andoma inambit lan o. Lambik he, An Tuhan Lego Mondok welagirek mene nen it faget ikhi lagi mene andoma iren holhi logogun hea, athe holu inabit logogun hea, andi hilingik kwelegat yagaisa lan o,” iluk yaganete.

¹² A'nogo yaganetemo nen Allah Areagun nen an legeisogo nobagaikhemo re, nambotkwe fikhiren ane kululuk eti logolik yi'nogo ugunem holhi, ”Tuhan pogoroba ombak-bak werek mene nek fogeratu mondok logouwak!” iluk ikhi laga.

¹³ A'nogo ugunem it ineluk werek mene omanogo inogolabi ekhe nen ekheba sen-sen aga logolik he abolok lambunetik, nen roda eisok omanogo pirim etu mene re o lugul eindep ane hangge ugunem holhi.

¹⁴ Tuhan omame a'nogo an noba nomamerogo kwelakfei wagama re, At Areagun nen an legeisogo wo'narek lagunem he nendawimo na'mage lagagik, nendawimo heiselhik, igi.

¹⁵ A'nogo nen arat lagarik he, o hele warogo lakfisa lagaukwama inawi wurogo welagaikharek oba o Tel-Abib i Kebar aigoba andoma kwilagarik linggene sabiren inukhogo welagi. A'nogo logolik an nen nesanggo holhik, neilenggen higik, igi mene omanogo faget ebethikhi logolik he noba fokhogo wamborek mondok welagi.

Tuhan nen Yehezkiel Israel mene faget ineyaga logouwageluk yagatikhe wene

¹⁶ Nenggi sabiren mondogat hilinglagaikhemo re, Tuhan ane an noba ikhi logolik,

¹⁷ ”Afuni wa'lagaikharek mene yi re, hat he An nen ap unggulenu Israel mene faget ineyaga logoinogeluk menhobagagi o. Ebeti logouwageluk An nen yagahesigin mene yi yagaisano.

¹⁸ An nen wene ap kwanirogo hilingiterek mene faget ekhe ikhi logolik he, at wa'lasigin iluk ugun, oba nen haren at andi obabut hebelhuba agap telasuageluk yagaten le'ma nen ap andi aweak inom wa'lasigin halok he, at andi hat weak elekwe wa'laga iluk hat hoba hikhibet heagain o.

¹⁹ Oba nen haren ap kwanirogo hilingiterek mene andiba a'nogo hilingisin iluk yagasigin, oba nen aren futfigi'lek weak hilingutu at logolik wa'lasigin halok, at ebe ap weak hilingitu mene at wa'lasigin, nen hat he hagap telasigin.

²⁰ Ap ekhe fano hilingiti logombigen hebekhogo weak hilingitu mene eroratunem, haren oan komot higi'le'ma An nen wene enggin mene oba foumo at ebe wa'lasigin. Nen at ebere onggwarek aweak ambisangma nen wa'lasigin, nen aren fano hilingiti logogin mene andoma An nen ebethagain lek. Oba nen he at ebe wa'lasigin mene andi faget enek he hat hoba hikhibet heagain.

²¹ Ap fano hilingiterek mene andi weak hilingisinogoluk haren eberetunem at andi haren komotu mene higithogo hilingiti logogin halok he, An nen unggum wogosigin lek andi nen he harogo hagap telasigin o,” iluk yaganete.

Yehezkiel hobuk ane a'ne igi'lik logogin, iluk isikhe wene isikhe wene

²² At Tuhan Omame werek mene a'nogo an noba hilingfugunem higimo nen he an noba ane ikhi logolik mel ikhe, ”Menla'luk i fanggongma andoma lan o, andoma nen weneane An ninom masugun,” iluk yaganete.

²³ Andi yaganetemo an a'nogo lagarik andoma nen neilenggen kwelakhugunemen he ombak-bak mondok lia-fiarogo At Tuhan ebe were'ma hilingiterek mene a'nogo hilingiti laga. An attak i Kebar ima nen higi mene aremnogo higithogoat hilingitunem higi. A'nogo hilingitunem higirik he an neindep awi yagaisogo fogerati,

²⁴ oba nen Allah Areagun an nendawimo peterogo kwikhesik nendawinggen hambuget nobagaikhesik he, Tuhan ane an noba mel ikhe, ”Sugulogo hambotkwe lambik he, hailoba kwe yagarogo kwimbik alokhogo logoino o.

²⁵ Afuni wa'lagaikharek mene yi re, hat hebe An nen heleba homakhobagaumo re wulibi lagik, afuni hinom ekhe sebetik igin mondok lego.

²⁶ An nen hat hamelinggen helanglang oba to'mot hobagaumo re haren ap unggulenu wene oak sagalherek mene ariba wene yi'nogo ti'nogo iluk ekhe yagaisagain mondok lek.

²⁷ Oba nen he An nen hobuk hat ninom nane masigiluk halok he, nekhengge hamelinggen serogo hilinghobagaumo haren afuni inoba An nen uageluk yagahetu mene omanogo yagaisikhi logogin. An Tuhan Lego Mondok welagirek mene a'nogo nen it faget nane ikhi lagi mene andoma yagaisikhi logogin. A'nogo ugunem it mene fena nen he holhi logogun oba nen fenakwe re holhi logogun lek. Andi re it eberogo inunggulenu wene sagalharek inap hilingi'mo a'nogo hilingiti logogun andi o,” iluk yaganete.