YEHEZKIEL 28 - Allah Wene Fano Wene Hupla Inane

Raja Tirus mene unggum wogetikhe wene

¹ Tuhan ane an noba yaganeti logolik:

² ”Afuni wa'lagaikharek mene yi re, raja Tirus mene oba re yi'nogo yagaom, An Tuhan Lego Mondok welagirek mene a'nogo nen raja Tirus meneba ikhi lagi mene andoma yagaom o, ”Hat he honggwaregen leget fakhikhi logolik an nebe re dewa kembu i laut enggen tulem andoma hurek welagirek mene anggikhi lagen. Fano haren an nebe dewa welagi iluk anggikhi lagen oba nen he hat hebe ap we mene welagen a'nogo ebethano.

³ Haren anggikhi logolik, an he mondok nalongsek logolik hibilik hebelek nagun welagi, nen Daniel he sebelek hangge iluk anggikhi logolik he, yi wene ti wene andoma hat helokhoma hinago mene ekhe werek lek anggikhi lagen.

⁴ Haren hendawinggen wenggelek meneba ebeti lagen mene andi re hangge emas inom perak inom andogotu mene faget hilingiti lagen.

⁵ Eberogo hat he hangge onggo helugu mene faget hebelek logolik yogondak he henggi werek agen, nen henggi werek agen andiba re hat honggwarek legeisogo fakhikhi lagen,” iluk ikhe yaga'no.

^6-7 Tuhan Lego Mondok welagarek mene a'nogo ane ikhi logolik, ”Hat Tirus yi, hat he honggwarek hebe faget anggikhi logolik he Allah higit hilingik welagi anggikhi lagen, An nen ap pok tentara mene inobabut mondogat weak mene hat hoasi wesuageluk lakfisa wesigin. Iren he yi mene ti mene hat hendawinggen hebelek oba henggi werek agagin mene omanogo wolelenggen tagalogo hobagagun.

⁸ Hat hebe re pinggi hoasimbik waganogo re i laut a'ma salhabugun.

⁹ Nen, inenggi andiba higit asi wagu halok he, haren ikhi logolik an he Allah welagi iluk igin ara? It hat hoatu mene inelokhoma nen he hat hebe re afuni we mene asigin werego.

¹⁰ Hat he ap pok mene Allah inonggot mene nen hoasumo re afuni nen inabit hafu mene hangge wa'lasigin. Iluk An Tuhan Lego Mondok welagirek mene a'nogo nen nane mondogat igi o,” ikhe.

Raja Tirus faget le wuni isikhe wene

¹¹ Tuhan ane ekhe an noba ikhi logolik yi'nogo ikhe,

¹² ”Afuni wa'lagaikharek mene yi re, raja Tirus mene faget le aga logoin o. An Tuhan Lego Mondok welagirek mene a'nogo nen at faget ikhi logolik, ”Hat he afuni mondok fanorogo welagaikharek mene faget ilirengge agagin o, attak hat hebe re mondogat hebelek logolik mondok pigin pugunsek mene welagagin!

¹³ Hat hebe re o Eden, Allah eabu yagoma welagagin. Hasu re, alilingge elokhe yinik hunik mene, helep permata onggo hokho mene: Helep delima inom, intan, topas inom, helep pirus helep yakut, ratna, cempaka inom, helep nilam, zamrud inom, helep alkali eil mene inom, meneba porogo wurik mene welagagin. Hangge halilingge emas mene ogo hokhorogo welaga. Hangge yi mene ti mene andoma re hat hobaget hebe walhafigi sambul andi elalhigi mene.

¹⁴ Hat andoma walhogo hobagagirik he, malaikat mondok hamelmel mene hat kagalharek logouwageluk An nen andoma fesigi. Hat he An Allah nandom mondok horek mene ungguloba logolik hebe helep permata eil tibelenggetu mene anggelekwe andoma laga lagagin.

¹⁵ Hat hebe elalhafigi huli nen weak hilingitu mene eroratigin huli andoma re hebe hobabut he weak legengge mondok fano welagagin.

¹⁶ Haren onggo hokhorogo heligik saburigik hilingiti logolik haniniba sebelogo fisugunem andiba weak hokhorogo hilingiti lagagin. Hat hebe An nandom mondok horek mene a'nogoba nen mugusogo wulakhafigi. Nen malaikat hat kagalharek werek mene nen he hat hebe helep permata eil tibelenggetu mene anggele'ma omanogo nen helokhe palogo amu fikhit hobagaikhe.

¹⁷ Hebeba mondok fano andiba re honggwarek legeisogo fakhikhi lagen, nen henu lego andiba re haren hilingiti lagen mene andoma kembu-kembu aple hilingiti lagen. Andi faget he An nen, hat hebe kweangma hulambet hobagagin, nen it raja-raja amu mene omanogo inelu asuageluk he An nen hilingisiginat,” iluk ikhe yagaom.

¹⁸ Tuhan ane ikhi logolik, ”Tirus yi re, haren he wene faget andogoti lagen kwe obalik omanogo weak mene hilingitik, onggo wanhik hunitik hilingiti logolik labelhigik hilingiti lagenma re emetfakhegen o. Andiba re An nen hat endu nolhabumo, alkan kurogo namore kweang inom higit asigin. Afuni mondogaren hat kwelakhiugunem we endu alkan enek hilingi'mo kumut hiikhi logogun.

¹⁹ Hat he mondok-mondok legasigin. Afuni inunggulenu mondogat it hat inelu mene nen he hat hoba asigin mene andi faget it inoba ogo asinogo iluk inailo nen inoak leigesugun,” ikhe ino.

Sidon unggum wogisagain mene faget isikhe wene

²⁰ Tuhan ane an noba ikhi logolik,

²¹ Afuni wa'lagaikharek mene yi, kota Sidon andi homan fein o.

²² It afuni o andi werek mene inoba yagaisikhi logolik An Tuhan Lego Mondok welagirek mene a'nogo nen wene yi'nogo ikhe iluk yagaisano, ”Sidon yi, An yi re haselei mene o. An nen hat hoba hilingisigin mene andi faget afuni nen An fogetnabugun. An nen afuni haren mene andoma unggum wogisagain sambul he, iren An Tuhan horek mondok welagirek mene a'nogo inelu asugun.

²³ An nen ou amben weak mene lakfei wesumo re ebekhe kwe andoma mep mondok pialiluk laga logouwageluk herakfisagain. Hat he it haselei mene nen kwelugun higit-higiren hoasi waga logolik afuni haren mene andoma werek mene mondogat inoasugun. Andiba re haren An Tuhan welagirek mene a'nogo helu asigin o,” iluk ikhe.

Israel hobuk fanorinabigin iluk isikhe wene

²⁴ Tuhan ane ikhi logolik, ”O kweang Israel meneba era'lukwe werek mene andoma nen Israel mene inalabsiri watfisikhi lagaukwa mene andoma re, yogondak inendawimo ekhe alogen hakhogo fenggegerisigik ouet fisigik ikhi logogun mondok lego. Andiba re iren An Tuhan Lego Mondok welagirek mene a'nogo futnobagagun o,” iluk ikhe.

²⁵ Tuhan Lego Mondok welagarek mene a'nogo nen ikhi logolik yi'nogo ikhe, ”An nen afuni Israel mene andogerinabigin sambul andi re, o kweang yatkwe-yatkwe An nen telfol isasigi kwe omanogo nen andogorogo fisa wesigin. Andi nen yi afuni ti afuni inunggulenu lambukhogo nen An horek mondok welagirek mene a'nogo inelu asugun. Unggulenu Israel mene re ambotkwe sugulogo wesimbik onggwarek anggweang oba logogin. Kweang An nen namimingengge Yakub wogetigiba omanogo logogun.

²⁶ It inebe andoma fano lombukhogo logolik inawi wurigik, anggur yabu heligik, ikhi logogun. An nen he it inunggulenu inera'lukwe welagaikharek mene nen wenagisikhi lagaukwa mene andoma unggum wogisamo re it Israel mene re fano liokhogo mondok logogun. Andiba re An Tuhan Allah it ineisena a'nogo inelu asugun o,” ikhe.