YEHEZKIEL 27 - Allah Wene Fano Wene Hupla Inane

Tirus faget le wuni isukwa mene

^1-3 Tuhan Lego Mondok welagarek mene a'nogo nen ane an noba ikhi logolik yi'nogo ikhe, ”Afuni wa'lagaikharek mene yi re, Wuni salinafi logolik agarek mene yi, o Tirus i aikmo logolik afuni i aik fenakwe fikhit mene inom onggo lakfigik wakfigik ugu mene andoma inobaget wuni yi'nogo wulabino. Hat Tirus honggwaregen foget fakhikhi logolik an nebere mondok fano pugun pagansek welagi ikhi lagen!

⁴ Haren he i laut agum andi re hawi wurik hangge hilingik welagen. Nen hebe re kapal mondok fano pugunsek mene hangge wurik welagen.

⁵ Hawi hobat he e ara tom Hermon agayo andomaba wurik welagen. Hat hangge kapal e tulem ninghogo liabe'ma pok su porogo sogoi en waluk lagarek mene andi re e laik tom Libanon meneba wurik welagen.

⁶ Hangge i agum wathilik lagu mene re e hokho mene o Basan oba nen puguneta meneba wathilik laga lagen. Hawi hulu re e laik oba talek welagen E andoma ero re o Siprus i alonggenma andi mene, halilingge re wam gaja andimuk onggo hokho meneba hilingik welagen.

⁷ Su sogoi en waluk lagu mene faget porek mene inom, hat hebe enegengge hilingik mene inom he su linen o Mesir en eil amu-amu meneba selebensek engge hilingik. Pok su hat hawi sabu salek mene andoma re eil mondok sakhorek meneba salogo wurik, Su kain o Siprus nen eil polu palek meneba wurik.

⁸ Hat hangge e sabelek oba i agum wathilik lagu mene andoma re o Sidon inom, Arwad inom andoma mene. Hagoromi hat heabu hilingitu mene andoma re i laut oba lagaikharek mene mondok hibilik hebelek inap.

⁹ Ap e meneba wutarek inelu logolik kapal oba yabu hilingitarek mene andoma re, o Gebal mene inap ekhe mene-ekhe mene halhu inelu mene nek welagaukwa. O kweang amu-amukwe andoma nen he yi mene ti mene onggo palhik, hunitik, uogeluk kapal-kapal engge andoma o andi kwi wagarek.

¹⁰ Ap sikhe fisogo inap o Persia mene inom Lidia mene inom Libia mene inom he, tentara haren meneba kwi wagaikha. Iren he inandok kwe palengge inom inunggul topi baja inom omanogo re hat haiba leget pa'leget waganek mene omanogoba kolhigik faga. Iren hat haselei mene omanogo inomame leget fisouwogeluk lebethafik, henu hokhot hobagagik, aga.

¹¹ Ap sikhe fisogo inap o Arwad mene re haleget pa'leget ebene omanogo kagalek logolik werek, nen ap lagaluk kagalek werek oba omanogo re ap o Gamad inaben kagalek logolik werek. Iren inandok peiyenggere hat haleget pa'leget oba omanogo erarogo kolhigik fagama werek. Irenat hat helokhe fano pugunsek logouwageluk halogo hobagali'lagwi.

¹² Haren hasungge sik-pikhogo henggi werek welagen mene omanogo re o Spanyol onggo huniti lagagin, onggo palogo haren helikhi lagagin engge andoma re posie inom, perak inom, timah sing mene inom, kut mene inom, helikhi lagagin.

¹³ Haren Yunani fikhit hunisi lagik, o Tubal inom Mesekh inom oba hunisi lagik, ugunem iren onggo palogo iluk he miminginafu mene inom, yingge-tingge no perunggu meneba elalek mene inom wokhetunem helikhi lagagin.

¹⁴ Haren hangge yi mene ti mene omanogoba re, hanggo kuda kereta ebe hilingik mene inom, kuda amboloba lagaluk lagaikharek mene inom, no bagal o Bet-Togarma nen mene andoma inom oak waganogo wokheti lagaikha.

¹⁵ Afuni o Rodus mene inangge ogo hat hoba onggo wanhi lagaukwa, nen afuni i esanggokwe welagaikharek mene nen ogore hat hangge onggo huniti logolik he, iren wam gaja andimuk inom e sing mene inom oba huniti lagaukwa.

¹⁶ It Siria inap onggo wanhu inaben ogore hat hangge yi mene ti mene andoma inom, haren henggi ambisangma nen helugungge hokhorogo andoma inom onggo palhi lagaukwa. Iren he onggo no permata helep zamrud mene inom kain eil mephogo polu warek mene inom, kain inenggi nen selebensek mene inom, linen eil sakhorek mene inom, helep permata eil kut mene inom, helep elokhe mep mene delima inom, oba onggo palhi lagaukwa.

¹⁷ It Yehuda mene inom Israel mene inomen hat hangge inom agaum etep mene re gandum inom, kin amusu inom, zaitun amusu inom, amben-amben engge inom oba helikhi lagagin.

^18-19 Afuni o Damsyik welagaikharek mene nen hat hangge huniti logolik ambisangma wokheti lagaikha mene re, anggur o Helbon mene inom, domba esi o Sahar mene inom, posie endumo weragaisogo al sagalek mene inom, ambenengge mene inom oba huniti lagagin.

²⁰ Afuni o Dendan werek mene nen, hat hangge onggo palhi logolik, kain wam kuda amboloba talfuluk afuni inebe hu'lagaikharek meneba onggo wanhi lagaukwa.

^21-22 Ap Arab mene inom, it o Kedar kweang oba inomame werek mene inomen hat hangge huniti logolik, domba eak ai mene inom, kambing inom oba onggo fikhi lagaukwa. Hat hangge onggo hunisi waga logolik, it ap Syeba mene inom, Raema mene inomen permata inom emas inom, amben-amben engge inom, mondok fano mene waluk wagunem helikhi lagagin.

²³ Kota Haran inom, Kane inom, Eden inom, ap yikwe tikwe onggo paluogeluk hilingirik nikharek inap o Syeba inap inom, kota Asyur inap inom, Kilmad inap inom, inebe mondogaren he hat hoba hunusi waga lagaukwa.

²⁴ Iren hat hoba su onggo hokho mene inom, kain eil polu warek mene inom, kain inenggi nen ugu mene inom, ohulukwe talhungge eil amu-amurogo ugu mene inom, hele ekhe mene ekhe mene mondok haro agale mene inom, hat hoba onggo pali waga lagaukwa.

²⁵ Hangge yi mene ti mene onggo palhu mene omanogo re haren kapal yi mene ti mene onggo pali lagarek mene hokho pokhorogo omanogoba kwelafi logolik uluk-uluk waluk waga lagaukwa. Hat hebe re kapal sungge ele sophogo kwelakfuluk, kapal i agum oba ambolebene lagarek andi higit hilingik welagen.

²⁶ It ap i agum wathilik lagaikharek mene nen wokharek i laut agum heale'ma hobagai lagunem, hat hebe sogoi timur fikhit mene anini nen opnakhabigin.

²⁷ Hangge mondogat onggo faget waluk lagain mene andoma inom hagainafuri laut oba nikharek inap omanogo inagoromi inom, ap e meneba wutu inelu inap omanogo inom, ap onggo paluogeluk yikwe tikwe lagaikharek inap omanogo inom, ap sikhe fisogo inap kapal andiba werek mene andoma inebe lombok inom, linggene hat hebe i agumo ubuk igin sambul andi re it mondogat andoma ogo i agumo ubuk ugunat.

²⁸ It ap i laut ebene nikharek inap omanogo re inailo nen inane kwesugun, nen inane kwesugun mene anggunggare i aikwe werek mene nen holugun.

²⁹ Andi nen kapal omanogo herakfuluk, hagainafuri laut ebene nikharek mene andoma kweang ambuema wulibugun.

³⁰ Wilibimbik iren hat hobaget le asugun, iren inendawimo sinurogo logolik ineil amusu lilhigik pelafi logogun. Iren fong warogo iluk enegenggerogo fesi inunggul oba yugulogo kweanggwe limbilhi logogun.

³¹ Hat hobaget he it inelha paligik, nen kain karung su meneba laberogo pelagi fuluk fong wati logogun. Iren ineil amusu lilogo lalogo pelafi logolik, hat hoba hilinglasigin mene faget le aga logogun.

³² Andi nen iren wuni ap warek salhi logolik agarek awuni ikhi logolik, yi'nogo ugun, ”Tirus yogondak hat he i laut oba nen hane mondogat lek agama re sa hinom ilirengget habu hak?

³³ Ekhe sambul hat i agum ambolebene lagagik pigik lagunem, haren sungge hokhorogo kwalfuluk, it inunggulenu ekhe mene ekhe mene inangge inelagaik mene omanogo inenggi werekhogo hilingfisigik, nen raja-raja o kweangma mondogat omanogo ogore haren inenggi werek hilingfisigik isigin.

³⁴ Yogondak yi hat he mondogat ubukhogo pegen, laut a'ma ma'lima wolelenggenhogo lek agen. Hagainafuri inom hangge mondogat kwelabek engge omanogo honggwarek hebe hinom seberogo laut ele'ma nen longgo egen andi o,” ikhi logogun.

³⁵ Ap mondogat i alonggen kwe werek mene nen he hat hoba ari'logo mene andoma haluk he inoak leigesugun. Raja-raja iren mene omanogo ogore inailo hokho mene asugun, it inelokhe inali'lip en hilingitarek mene weinam asigin.

³⁶ Hat he henggi mondok-mondok faget longgo imbik hareng legasigin. Yi afuni ti afuni inunggulenu lombok o kweangma mondogat hat hinom onggo palhik hunitik ikhi lagep mene omanogo nen he. hat hoba a'nogo asigin halok inailo nen inoak leigeti logogun, ikhe.