YEHEZKIEL 24 - Allah Wene Fano Wene Hupla Inane

Iwak tangge mene ibetikhe meneba walhigik isikhe wene

¹ Nit hele warogo hu'ninabi lagaukwaba nen tanggal 10 tugi ogo 10 mene tahun he 9 meneba were'ma, Tuhan ane an noba yi'nogo yaganete,

² ”Afuni wa'lagaikharek mene yi re, tanggal yogondak yiba re raja Babel mene nen o Yerusalem pin talogo kwi lagaikhe sambul a'nogo hilingi'mo re haren lisu palogo fein o.

³ An Tuhan nen walhigik wene ekhe it An nagainafuri nane sagali'lagwi mene yi yagaisanogen iluk foukhogo fisogo welagi. Waruk isatungge elema i keralogo fuluk endu amboloba hutfeino.

⁴ A'nogo hilingfuluk he einongge mondok fano mene re andi elema kwelakfeino. Enggi eino eisok eino oak amunggok hokhorogo werek mene inom kwelakfeino.

⁵ Ekhe re domba eino sei werek mene inom nen ket oan mene inom kwelakfuluk he, e nolhu mene ogo ekhe inom wurogo nolfeinoat. A'nogo hilingfuluk he i hulugeti logolik suanggen-suanggen esuageluk he herakfembik were'ma nen, einongge inom oak inom omanogo yagaukhogo wusuago,” iluk ikhe.

⁶ Tuhan Lego Mondok welagarek mene a'nogo nen ikhi logolik, ”Kota ap inoa'ni nek hoporek awiba andi re alomat lakhoak! Kota andi re waruk ibetu mene sobalharek lek mene hangge hilingik. Einongge elonggoma werek mene andoma re kurik misiktek higik amu-amu lisogo wulakfei wagunem, palek misik iluk ogo ekhe elonggoma logogin lek.

⁷ O kota andiba ap hokhorogo inoati lagaukwaba nen, wa'lagu mene inamep omanogo helep wurik weak mene amboloba pikhi laga, kweangma pikhi laga le'ma re aben salu re elo'lek hilingik welaga.

⁸ Inamep andi An nen helep oba andem herakfikhi lagi andi re inamep andi kwelakhaluk unggulmo fouwageluk hilingiti lagi o,” ikhe.

⁹ Tuhan Lego Mondok welagarek mene a'nogo nen ikhi logolik he, ”Kota ap wa'ni nen hoporek aiba andi re alomat lakhoak! Endu feigiluk he An namu nenat endu eilem wasigin.

¹⁰ E ekhe inomat wurogo nolfeni o! Endu fisak feni! Einongge andoma hulukhogo isa'no! Nen i amusu re hugisano. Oak he endu nolino!

¹¹ Yogondak he waruk perunggu mene elema selek werek mene andi endu amboloba fembik herakfisamo aik halianggenhogo hilinglasuak. Ibesigin mene a'nogo mondogat nilik lagunem, waruk andi nekhengge ebe weneba melalek werek higithogo asigin.

¹² Oba nen he ip andoma endu nen namo lek asigin lek.

¹³ Yerusalem yei, haren mun weak ina'meilo mene hilingiti lagagin mene andomaba hat hebe emetfakhasigin o. Ma re An nen horogo hobagagin iluk walhikhi lagiba nen, hat mondogat emetlagaginmo a'luk he hilingisu re elo'lek aple ari'logo. Hat hebe oan horogo hilingfakhigi'lek werek kwelek enek he An nanini a'nogo hat hoba fagain huli asigin.

¹⁴ An Tuhan Lego Mondok welagirek mene a'nogo nen nane mondogat igi andi. An nen hilingisigin mene arat horogasi waga. An nen hat haweak hilingiti lagen mene andoma nonggoragik, athe haweak lek hilingisogo hobagagik, nendawi nen nendawi hundik hilinghafik, igin lek. Haren hilingiti lagagin higithogo unggum wokhesigin. Iluk An Tuhan Lego Mondok welagirek mene a'nogo nen nane arat igi,” ikhe.

Nabi agwe wa'lagaikhe mene faget isikhe wene

¹⁵ Tuhan ane an noba ikhi logolik,

¹⁶ ”Afuni wa'lagaikharek mene yi re, ferekhogoat haren hendawi hundik mene a'nogo An nen wanigin. Oba nen he haren le yi-ye iluk le agik, athe heilamusu puageluk herakfigik, hilingisu fuk.

¹⁷ Haren heilamusu lilogo pelafunem ekhe holinogo. Hat hebe pelagi logoligen heisok sepatu kwelabek legengge inom, hunggul topi ugu legengge inom he la fuk. Nen ekhe haren ogore helokhe salu fugat, hambe heang logolik roti na fugat,” iluk yaganete.

¹⁸ O hubet he an nen ap unggulenu andi mene ninom wene ane matugusik were'ma nen, hubanggore an nagwe wa'lagaikhe, andi nen ohealekwe re an wene melalogo yaganetikhe mene aremnogo higithogo hilingitigi.

¹⁹ A'nogo hilingitigimo re afuni nen heinok wo'niikhi logolik, ”Nineisena hat nenahalok a'nogo hilingiti lagen? Haren hilingiti lagen mene andiba re nit faget ninggi'nogo asuageluk hilingiti lagen nogo?” Iluk yaganeta.

²⁰ A'nogo yaganetama an nen ikhi logolik, ”Tuhan nen mimingnafi logolik,

²¹ wene yi'nogo hilingisuageluk yagaisano iluk yaganetemo, iren he Tuhan Awi wurik a'nogo faget foget fakhikhi lagep. Hiren he hineilenggen kwelakhikhi logolik o ebe wuri'mo omanogo laga lagep, oba nen Tuhan nen At aiba andi emerogo mondogat weaget fagain. Nen hit hineisok erokwe mene inebe yenggerek oan meneba nen o Yerusalem yoma werek mene re weim yafi logolik inoasugun o, iluk igi.

²² Ariginumo re hiren ogo hobuk An nen yogondak higi andi hakhogo hogoin aro. Hit hinelokhe huli'lip esugun lek, nen roti inambe heang logolik nenggarek mene nogoin legat.

²³ Hit hinunggul topi ugu legengge laga logogun lek, le yi-yi iluk asugun legat. Hit hinaweak oba nek hinendawinggen selekwe lakfigik, hirenat it ekhe nen ekhe mene inoba hinane yabul yagaisigik, hilingirik laga logogun.

²⁴ A'nogo hilingitunem he an Yehezkiel he hit hinobaget ilirengge asigin. Hit hobuk an nen hilingiti lagi ari hakhogo hilingiti logogun mene faget hilingiti lagi. Tuhan ane ikhi logolik, ningginik sambul wene andi tibugu halok he hiren hobuk At Tuhan Lego Mondok welagarek mene iluk hinelu asugun o,” iluk yagaisasigi.

²⁵ Tuhan ane an noba yaganeti logolik, ”Afuni wa'lagaikharek mene yi re, An nen he o An naiba omamerogo wurik mene faget hit hinamolo agik, hinagaiyegetik, hilingiti logolik ineilenggen kumut haluk inanggilukhogo o wuri'mo lagaikharek aiba andi inomat, it inanggele'ma nen wanigin. Andi nen ekhe it inagainafuri inom woginabiginat.

²⁶ Linggene wene andi An nen hilingisigin sambul andi re, ap misik ekhe ap legerinafunem linetlasugun mene andi nen, wesimbik wene andi hit hineluet hinabi wesigin,

²⁷ O andi sambul ogore hat hane igi'lek logogin mene a'nogo hane ugu mene kwe husigin. Andi nen haren ap andi hinom hinane masugun. A'nogo hilingisigin andi re haren it inobaget enegengge hilingisiginmo re, iren An Tuhan a'nogo inelu asugun o,” iluk yaganete.