YEHEZKIEL 23 - Allah Wene Fano Wene Hupla InaneOe agot emberegen weak hilingitukwa wene 1 Tuhan ane an noba yaganeti logolik yi'nogo ikhe, 2 ”Afuni wa'lagaikharek mene yi re, helime inebe pire oe agot inom werek. 3 It inebe tugum oba re o Mesir welagaukwa. Andoma nen, tugum nailorogo ap agap inonggot engge welagaukwangge a'nogore obokhogo herakfuluk he hesangge yanani hilingitu mene hilinglagaikha. 4 Helime andem manggusa mene enu re Ohola, andi Samaria faget ilirenggerogo. Agot he enu Oholiba, at andi re Yerusalem faget ilirenggerogo. It inebe pirenet he An nen woginafirik inebe lombok inagainafuri helime mene inom alage mene inom taginafa. 5 Ohola a'nogo An nagwe waganek kwelek oba nen hokhorogo hesangge yanani hilingitu mene agasik Asyur mene endawinggen hundik hilinginafi logolik inobaget hilingiti laga. 6 It andoma re inasu eil he tentara inasu eil higit mene elokhe mep mene nek laberek welagaukwa inap, inebe ogore yabu legoma werek inap, it inebe mondogat he ap sikhe fisogo mene wam kuda amboloba lagaikharek inap, inelokhe mondok fano inap welagaukwa. 7 At he Ohola a'nogo it ap kaindek-kaindek andoma inom babi hilingiti lagaukwa. At oba aik age lagakhi lagaikhe mene a'nogo re iren tugwi kembu fogerati lagaukwa mene omanogoba ebe emetfakhikhi lagaikhe. 8 Aren hundik-handik hambenan hilingirik nikhi logolik, o Mesir at ebe ap agap onggot were'ma nen attak-attak ap agap elu agaikheba omanogo nen hilingiti lagaikhe hak hilingiti laga. At ebe yenggerek oba nenat ap inom nogoikhemo re hambenan mene hilingisogo faga. 9 A'nogo hilingiti laga andi nen he An nen at andi re it endawi hundik inafi laga inap ap Asyur mene andoma inoba wogisasigi. 10 Iren at a'nogo inomameba ninghogo alfulukwa kogouk hilingisogo fagasik, karok oba warogo fagasik he eagwi re telogo helaga. He andi ambisangma hikhe mene andi faget he it hemi ekhe o yi awi ti awi andoma nen he tindelhu mondok welagaikharek. 11 At Oholiba agot a'nogo re, oe hilingiti laga mene eilenggen hikhi lagasik oba nen, at endawinggen nunggu mene faget omamerek logolik oe Ohola nen hilingiti laga mene we endep hak oba nen aren enek he babi mondok hokhorogo hilingirik laga-laga. 12 At Oholiba nen ogo re ap Asyur mene andoma inoba amolo mondok agama re, ap kuda amboloba lagaluk lagaikharek meneba nen alage ebendek mene andoma inoba inom, ap inunggulenu inap inom, it ineabu legoma hilingitarek inap inom, it tentara inasu eil mep mene nek laberek inap andoma inoba inom, endawinggen ningge. 13 An nen hugunem en he, Oholiba andi re obabut mondok weak logolik oe nen hilingiti laga higithogoat hilingitunem higi. 14-15 Weak ekhe inom ekhe inom hilingirik lagunem he Oholiba obabut mondok weak aga. At he ilirengge o hobat oba amusu eil mep meneba ilirenggerek mene omanogo faget endawinggen liti laga. Ilirengge andoma re ap Babel mene sikhe pisogo inap inogogwi inalinggin elokhe fano mene inom inunggul topi fano mene inom pukhogo inalik waganek mene andoma faget endawinggen wanhi laga. 16 At Oholiba nen he ilirengge waganek mene andoma eilenggen hikheresik oba agesabu lagagunem he ap inayonggo fuluk o Babel ap sikhe fisogo inap inogogwi kaindek andoma inambit lakfisikhi laga. 17 A'nogo lakfugunem he it omanogo we'luk at inom seberogo nogokhi lagaikha. Nogokhi logolik iren at oba weak peakhogo hilingitunem aren it omanogo hebak aferogo kwelagisikhi laga. 18 A'nogo hilingiti la'luk he aren weinam weinamat pailak hilingiti logolik, ebe afuni hokhorogo inelokhoma omanogo nen ineilenggen neoageluk hilingiti laga. A'nogo hilingitunem An nen at oe a'nogoba hebak naferogo kwelakhikhi lagagi hak. At oba ogo kwelakhugu aple hebak nafe aga laga. 19 Ekhe sambul ekhe sambul at babi hilingitu mondok welaga, at he ebe tugum logolik o Mesir en hesangge hilingiti laga mene omanogo inom he agaumsek lek, mondogat higitsek welaga. 20 Athe ap agesabu hokhorogo lagaikherek mene inom, nen it ap wam kuda ai mene nen amol-mol hokhorek welagarek higit it ap inamol-mol etu welagaikharek mene inom hup nogo ugu aple faget agaiyek mondok welaga. 21 (Hat Oholiba yi sa, hat he hebe tugum oba re ap Mesir mene nen hebene inambe top-top hilingitunem hambenan hilingiti lagagin mene andoma hilingiti logolik hebe weagerogo fakhikhi lagagin omanogo higit hilingiti lagen o,) iluk ikhe. Oholiba nen hilingiterek mene andi re Allah nen ayo wurogo pilingisigin isikhe wene 22 Tuhan Lego Mondok welagarek mene a'nogo nen yi'nogo ikhe, ”Oholiba yi sa, hat hendawi hundik hilinginafi lagen mene omanogo hinom he homame mondogat ilimit kwiarogo hilinglagen hea, oba nen he iren hat hoba ina'mage figik, hukhogo kwelakhafik, uageluk An nen it inendawimo ina'mage kwelabigiluk welagi. 23 An nen hat hendawi hundik hilinginafi lagen mene inebe mondogat o Babel mene inom, Pekod mene inom, Soa mene inom, Koa mene inom, Asyur mene inom, ap Kaldea mene inom, andoma andogorogo woginarek hambit fisa wesigin. An nen hat hoba ap souge fano mene ineabu legoma werek mene, inunggulenu inap, yabu ebere'ma hilingiri'lagwi mene inap, ap sikhe fisogo inap inogogwi wam kuda amboloba hu'la'luk lagaikharek inap andoma fisa wesigin. 24 It utara fikhiren tentara hokhorogo kereta weim yafi logolik oba lagaluk lagaikharek mene inom, kereta sumburu nunggu mene waluk lagarek mene inom, oba wesimbik hat hoasi kwi wesugun. It he tok peigenggeba inebe ma'murek logolik topi baja mene sebelogo hat hukhogo kwelakhabi wesugun. It inawene melalek werek meneba iren hat hawene pilinghabuageluk An nen herakfisagain. 25 An na'mage hat hoba were'manggere, it inanini nen hat weaget hobagauwageluk obogisagain. Hambisang inom, hesanggo inom he, iren palugun, heagwi re inelugengge senfisambik endumo kwelaginabugun. 26 Hat hebe hasu noggologo hilinghobagambik halilingge omanogo telogoin. 27 A'nogo hilingisugun andi nen An nen hat hebe hoba aigage lagauwageluk hilinghobagagunem hilingiti lagen mene inom, hambenan hilingirik nikhi lagen mene inom, babi o Mesir en engge hilingiti logolik welagen mene inom, palfagain. Haren he kembu o koma mene iluk ogo athe Mesir mene iluk ogo oba ekhe ebesigin lek,” iluk ikhe. 28 Tuhan Lego Mondok welagarek mene a'nogo ane ikhi logolik, ”An nen hat hebe waganogo ap hebak hafe mene haren habit mene omanogo inenggiba hobagagin. 29 Andi re iren hat oba inabit hafunem a'luk he haren likhak warogo hilingiti lagen mene andoma ambisangma enggen ugu re iren telikhi logogun. Nen hat hebe re halfulukwa kogouk logouwageluk herakhobagaumo logolik hambenan hilingiterek mene iluk hobagaumo afuni nen sele'ma nenat kumuthafi logogun. Andi re haren hoba aigage lagagunem hoba amol-mol en, 30 hilingiti lagen andiba hat hebeba weak mene andi hoba asi wesigin. Hat he yi afuni ti afuni inunggulenu faget hambenan hilingitu mene agagindik haren it inanggembuba hebe emerogo fakhikhi lagen andi. 31 Hat he hoe nen hilingiti laga mugusogo hilingiti lagen andiba re An nen hat hoe unggum wogetigi mene andem higithogo harogo wokhesigin aro,” ikhe. 32 Tuhan Lego Mondok welagarek mene a'nogo nen mel ikhe, ”Hoe agai hinago andi re haren nano, iwak andi ebe hokho mene re o'lu uan meneba hinagongge. Elema hinagongge andi re, luplaphogo hembelhafu mene inom, afuni hokhorogo nen inabit hafu mene inom hinagongge werek. 33-34 Hoe Samaria agaiwak andi elema re, hailo mene inom alperelhafu mene inom hinagongge werek. Haren iwak elema hinagongge andi mondogat namo re hat hebe lugulugwi palhik, ou hokho mene wanhik igin. Andi nen iwak halokhogo erak perak igin mene andomaba re hat hamik senggel fogathogo hilingfakhagain. Iluk An Tuhan Lego Mondok welagirek mene a'nogo nen nane mondogat igi,” ikhe. 35 Tuhan Lego Mondok welagarek mene a'nogo ane ikhi logolik, ”Haren An noba mondogat honggot agendik hambot wo'netigin mene andem faget onggore hat hendawimo ninggerek mene inom, hambenan hilingitu mene inom hikhi logogin andi o,” iluk ikhe. Allah nen unggum oe agot emberegat wogisasikhe wene 36 Tuhan ane an noba ikhi logolik, ”Afuni wa'lagaikharek mene yi re, Ohola inom Oholiba inom inawene ayo wusigin mene faget fouget fegendik welagen a? Iren weak ina'meilo mene hilingita mene omanogo faget wenagisan o. 37 Iren babi hilingitik, ap inoatik hilingita, iren mondogat kembu inom babi lagik, An nagainafuri iren taginafa mene inoatik, aga. A'nogo inoatasik he omalik omanogo it mene inanggembu faget fisaga. 38 Andi nek hilingita fuk. Ekhe re iren An nawi wurik inom inenggi sabat sambul An nen wenagaisogo fesigi mene a'nogo inom, emerogo fagaat. 39 Linggene iren An nagainafuri inoa'luk inanggembu faget warogo wogetu sambul a'nogore it inebe pire oe agot emberek andem An nawi wuri'mo we'luk emesi waga lagaukwa! 40 Iren he ap o kweang yatkwe werek mene inoba yonggo lakfisugunem he ap omanogo nen yonggo fugu mene a'nogo mugusogo waga lagaukwa. Ap pok mene omanogo wagunem inelokhoma woginabuogeluk he it oe agot emberek aremnogo nen he kume warogo ineil alili fanorogo wokfigik, inalilingge liafik ikhi lagaukwa. 41 A'nogo hilingfuluk he it nogogarek engge obalik mondok fanoma omanogo amboloba hurek welagaukwa. Inelokhe fikhit e talek meneba re nunggungge inobaget isagaisogo hoporogo hilingfuluk welagaikha, a'nogo were'ma andoma re no dupa amben fanongge inom zaitun amusu inom, An nen it wogisasigi mene omanogo welaga. 42 Enda'ma nen holhugunem ap inane anggunggare inagaiyegen hilingitu mene holhi lagaukwa. Ap andoma re o lei ilingage pirimsekwe omanogo nen yonggo fisagama wagaukwa inap. Ap andoma nen he senggan oe inom agot inom aremnogo inenggiba ikfisigik, mahkota fano mene it inungguloba puget fisigik, hilingita. 43 A'nogo hilingitama An nen wenggel hikhi logolik he, ”Ap andoma nen he hemi hambenan mene, babi hilingitu werek kwelek enek mondogat halongo aga mene andem inom hilingitu mene faget inendawimo inamolo werek hea?” anggasigi. 44 He Ohola inom Oholiba inom hemi hambenan mene inobabut mondok weak aga mene andem inambit he ekhe sambul ekhe mene wagik, ekhe sambul ekhe mene wagik hilingiti lagaukwa. 45 Oba nen he ap higithogo welagaikharek mene nen oe agot emberek andem it inom babi hilingitik, ap inoatik ikhi lagaukwaba, iren ibi-eberogo weak hilingiti lagaukwama re it inebe ayo wurogo pilinginabugun o,” iluk ikhe. 46 Tuhan Lego Mondok welagarek mene a'nogo ane ikhi logolik, ”Ap esa logalogo laga logolik hemi hambenan hilingitarek mene pire andem inangge teligik, it inoba enggin-fenggin hilingfisigik, ili'lagwi mene andoma wolinabin o. 47 Wolinapluk he huk helep oba inoatik, karok oba tekhogo inoatik uak. It ineagwi re pinggi inoatik, inawi wurik endu fatik, uak. 48 O kweangma mondogat andoma inobabut mondok weak hilingirik lagaikharek mene andoma An nen mondogat legetfisagain. An nen hilingisigin mene andi re it hemi abirengge faget inelurogo hilingisiginmo re, it hobuk hemi oe agot andem en hilingiti lagaikha andem hak babi ekhe hilingiti logoinogo iluk hilingisigin. 49 Yogo, hit Ohola inom Oholiba inom yi sani, An nen unggum wokhisagain andi re hiren babi hilingitik, kembu fogeratik, ikhi lagagip andiba o. Andi nen he hiren An Tuhan Lego Mondok welagirek mene a'nogo hinelu asugun o,” iluk ikhe. |
LAI 2013
Indonesian Bible Society