YEHEZKIEL 22 - Allah Wene Fano Wene Hupla Inane

Yerusalem mene nen weak hilingiti lagaukwa wene

¹ Tuhan ane an noba yaganeti logolik, yi'nogo ikhe,

² ”Afuni wa'lagaikharek mene yi re, hat he o kota ap inoatu mondok welagaikharek aiba andi inawene pilingisogo ayo wurinabigiluk fikfouksek welagen a? Iren ina'meilo mene hilingiri'lagwi mene omanogo inugisano o,” ikhe.

^3-4 Tuhan Lego Mondok welagarek mene a'nogo nen wene yiginik mene yi Yerusalem mene yagaisoageluk mimingnafe, ”Hat he afuni hat mene omanogo inebe hokhorogo inoatik, nen haren kembu puguneten mene omanogo fogeratik, hilingiti logolik hebe emerogo fakhasiginmo re weak hokhorogo hilingitigin o. Andiba re An nen hat hebe yi afuni ti afuni nen inom, Afuni yi kwe ti kwe welagaikharek mene nen inom sebelogo pelakhafik, endo yakhafik, ikhi logouwageluk herakhobagasigi. Enggere hat hawene pilinghafu mene inom, nen hebe heluk werek mene inom he mondogat wurep kobok igiluk werek.

⁵ Haren hundik-handik wene melalek inom, yi'nogo ti'nogo hilingi'no iluk melalek werek mene inom, sagalhu mondok welagen andiba re afuni o kweangma yatkwe-yatkwe werek mene nen inom, horok-horokwe werek mene nen inom li'nothafi logogun.

⁶ Nen it afuni Israel mene inogogwi kaindek ferinarek welagaikharek mene inebe mondogaren he it inonggwarek inomameba nek tibet fak hikhi logolik, ap hokhorogo inoati lagaukwa.

⁷ Afuni haren mene werekwe oma nen ap misigen ogo ekhe ineisugwi inagaisawi legeisogo fisagarek mene ekhe werek lek. Hat hane nen ap pok mene lalinafi logolik, hemi sogwe mene inom, yenggerugwi suarek mene inom inangge omanogo ekhe inomat mangorogo helikhi lagen.

⁸ Obalik An fogetnafi logolik kabogetukwe omanogo inom emetfikhi logolik, linggene sabat sambul a'nogo fanotfikhi lagen legat.

⁹ Afuni haren mene oma it ekhe nen he ap amu mene nen inoasuageluk wene inane nen lalogo weagerinabi'lagwi. Nen ekhe re kembu anggo warogo fugu mene eino nouwogeluk inamolorogo hilingitu mene weregat. It fenakwe ekhe re helime tugum hesangge hilinginabuogeluk inamolorogo hilingitu mene weregat.

¹⁰ It ekhe nen he hemi inoba inendawinggen naluk agaisa kulherek mene inom nogogik, nen ekhere hemi inamep lagu kwelek hup inom nogogik,

¹¹ it fena nen he onggwarek eamalhe inom ogo, nen ap inagagwi mene inom ogo, agot agaisa ekhe mene inom ogo, inom sebetik agaregat.

¹² It fena ekhe re ap wasuageluk onggo palinafunem inoatu mene agik, muli inamep nunggu mene agik, nen afuni it inunggulenu mene inoba sebelogo fisikhi logolik welagik, hilingitu mene werek. It inebe mondogaren An inonggot agaikha. An Tuhan Lego Mondok welagirek mene a'nogo nane mondogat igi.

¹³ Oba nen he yogondak An nen ap hinatarek mene inom inoatarek mene inom andoma alperelinabigiluk welagi.

¹⁴ An nen hat unggum mondogat wokhesumo henggi hailo legengge liafik, homamerogo welagik, hilingisu hak anggegen? An Tuhan Lego Mondok welagirek mene a'nogo nen igi hilingi'mo re, Nane igi mene andem higithogoat hilingisigin.

¹⁵ An nen afuni hat hinom welagep mene o ekhema-ekhema hesangge pesangge hilingfisambik he, yi afuni ti afuni inunggulenu lombok welagaikharekwe omanogo lakfisagain, An nen hat weak hilingiti lagen mene andi mondogat pal fouwageluk hilingisogo hobagagin.

¹⁶ Hat he it ekhe inunggulenu amu mene nen li'not hafunem enek he, haren An Tuhan welagirek mene a'nogo furogo helu asigin o,” iluk ikhe yagaisan o.

Endu oba obabut paligin isikhe wene

¹⁷ Tuhan ane an noba ikhi logolik,

¹⁸ ”Afuni wa'lagaikharek mene yi re, it afuni Israel mene andi re An nobaget hilingisu re elo'lek agaikha. It andi re no logam weak iluk herakfisugu meneba mulelogo hilingik mene hangge inom, athe tembaga inom timah inom, besi inom, perak inom endu oba weragaisogo obabut palhaluk abu'nengge meneba tima eil sinduk mene welagarek andi hangge werek.

^19-20 Arigini'mo re yogondak, An Tuhan Lego Mondok welagirek mene a'nogo nen it inoba nane ikhi logolik it andi inebe re nologam hilingisu elo'lek andi hangge hilingik. Aben perak enggen inom, perunggu inom, besi inom, timah elokhe sinduk mene inom, nen elokhe kut mene inom endu nonggwale'ma aik halianggen hogo wera'lasuageluk kwelafarek hak, An nen it a'nogoat andogorogo woginarek o Yerusalem wesimbik, An nanini hokho mene a'nogoba logam enggen endumo nen obabut paluogeluk nonggwalharek hak, it a'nogoat nonggwalinafi logolik hali nonggorogo inobabut paligin.

²¹ Eberogo An nen it Yerusalem mene andogorogo fisambik An nanini a'nogo endu higit it inagap oba fisagaisogo kwelakfoumo re, it inebe mondogat alkan kurogo nagain.

²² Perak endumo nen obabut palharek a'nogo higit it Yerusalem mene inobabut paligin. Andiba re iren An Tuhan nanini a'nogo nit ninoba fikhe iluk inelu asugun o,” iluk yaganete.

Israel mene inogogwi kaindek inaweak faget isikhe wene

²³ Tuhan ane nekhengge an noba yi'nogo ikhe,

²⁴ ”Afuni wa'lagaikharek mene yi re, Afuni Israel mene inoba yagaisikhi logolik kweang iren mene re emetlaga o, iluk yagaisano. Ariginik mene andi faget An na'mage lagaikhemo unggum wogisikhi lagi andi.

²⁵ It inogogwi kaindek ferinarek welagaikharek inaben he mene singa nen paik senggelfuluk ane kouwaterek higit hilingiri'lagwi. Iren he afuni mondogat inoa'luk he it inangge inelokhoma agarek mene omanogo hogoukhogo helaluk wagaikharek andiba re, hemi sogwe hokhorogo sogwe mene nek agaikharesik werek andi.

²⁶ It imam Israel mene nen An nawene melalek omanogo sebelogo figik, nen yi mene ti mene An nobaget hilingitungge iluk enogo werek mene omanogo emerogo figik aga. Iren ti re fenago mene, nen ti re saliok wanu mene iluk mel peneri'lagwi lek. Iren afuni yanggulinafi logolik, yoma re saliok wanu mene, nen yoma re fenagongge mene, iluk Allah weneba melalek werek mene omanogo afuni yagaisili'lagwi legat. Iren linggene sabat sambul a'nogo sebelogo herakfuluk hilingiri'lagwi andiba re An a'nogo it ap inunggulenu Israel mene andi nen weagerogo nobagali'lagwi andi.

²⁷ It inogogwi kaindek pemerintah ba yabu hilingiri'lagwi inap andoma re mene olomene serigala nen paik hangge senfuluk tilip talap isikherek andi higit werek. Iren he inangge hokhorogo helogoin iluk ap wasugun mene nek hilingiri'lagwi.

²⁸ It nabi nen he weak andoma hinago logolik were'ma re, afuni nen o hobat ebene sinduk werek kwelek timeng tamulharek hak hilingiri'lagwi. Iren inabikanggo wokhagarek hak hikhi lago iluk agarek mene andoma re ineranhogo wene ili'lagwi. Iren ikhi logolik wene yi'nogo ti'nogo iluk ili'lagwi mene andoma re, Tuhan Lego Mondok welagarek mene a'nogo nen uageluk yaganisikhe mene ikhi lago, iluk ili'lagwi oba nen he andi re mondogat ineranhogo, An nen it ninom ninane mati lago lek oba nen.

²⁹ Afuni inenggi werek welagaikharek mene nen he ineranhogo wene yagaisikhi logolik afuni inangge telhigik helagarek. Iren ap inenggi lek mene omanogo inendawimo nen anggaluk enek weak peakhogo hilingfisigik, nen ap pok mene inangge ekhe inom manggorogoat telogo heligik, agarek.

³⁰ It ap Israel mene inanggele'ma nen ap leget pa'leget wanu higit mene inom, nen An nanini hanghogo leget pak waganek mene wolelenggen isagain iluk hilingitunem, o kweang andi ili waganogo leget pak mene meisalekwe omanogo mendek werek mene inom, ekhe werek hea iluk An nen herati lagiba nen nelokhoma ekhe ari'lago lek.

³¹ Andiba re yogondak An nanini a'nogo it inoba fikhi lagi, nen iren weak hilingiri'lagwi mene andi ambisangma re endu nen legetfisikherek higit An nen it inebe legetfisagain. An Tuhan Lego Mondok welagirek mene a'nogo nen nane mondogat igi,” ikhe.