YEHEZKIEL 21 - Allah Wene Fano Wene Hupla Inane

Tuhan enggarok faget isikhe wene

¹ Tuhan nen an noba yaganeti logolik yi'nogo ikhe:

² Afuni wa'lagaikharek mene yi, Yerusalem andi re homan fein o. O obalik wene kabogetarekwe andoma homan filik lan o. Israel anggweangma andoma ineluet fisilik lan o,

³ iluk An Tuhan nen nane yi'nogo ikhi lagi andi, ”An yi re, hit hinaselei mene welagi. An nenggarok lisogo wanimbik hit hinebe mondogat weak hilingiti lagep mene inom fano hilingiti lagep mene inom hinoasigiluk welagi.

⁴ An nenggarok oba afuni mondogat abel utara fikhit mene inom selatan fikhit mene inom yabugun.

⁵ A'nogo hilingisigin andiba afuni mondogaren he, An Tuhan nen nenggarok lisogo wilabi wesimbik andi re hobuk ekhe oak waganogo awinggaba kwelabigin lek iluk inelu asugun o,” ikhe.

⁶ Afuni wa'lagaikharek mene yi re, it afuni Israel mene inebe mondogat ineilhanem, hendawimo weak agik, hendawinggen warigik, ikhi logolik hakhogo, neneik yabatik, helagaik haneba ugu welagik, ikhi logoin o.

⁷ A'nogo hilingitunem iren heinok wokhafi logolik, nenahalok neneik yabatu welagen iluk yagahetu halok it inoba yagaisikhi logolik, wene hobuk hilinglasigin mene faget hilingiti lagi o, iluk ugunogo. Wene andi nen he it inendawinggen abolok igik, inenggi omame legagik, ineindep leigetik, inoba mondogat lebelek agik, ugun. A'nogo asigin mene andi re eberogo nen asigin mo re, hilinglasigin mene arat horogasi waga o. Iluk An Tuhan Lego Mondok welagirek mene a'nogo nen nane mondogat igi o,” ikhe.

⁸ Tuhan ane an noba yaganeti logolik,

⁹ Afuni wa'lagaikharek mene yi re, hobuk asigin mene faget husumbi yagaisikhi logoin o! A'nogo yagaisikhi logolik haren afuni andoma inoba yi'nogo ugunogo, An Tuhan nen wene yi'nogo ili'logo iluk yagaisikhi logoino, ”Karok misik ekhe werek, karok andi enggat merenghogo mago mene.

¹⁰ At andi nen ineiloak leget fisoageluk he enggat mondok merenghogo mago werek, Yabelanget hikhi logouwageluk he peik-peigengge mondok hilingik. An nagainafuri mene re wene melalek inom, yi'nogo hilingi'no ti'nogo hilingi'no iluk yagahisasigi mene omanogo inom sebelogo herakfuluk hilingitunem he, inagaiyek mene ekhe logogin lek.

¹¹ Karok andi ap watu mene hundik wanhi logouwageluk enggat magaisogo fik-foukhogo foumo logogin.

¹² Afuni wa'lagaikharek mene yi re, hat he le yakhigik, hane kwetik ikhi logoin! Karok andi re An nagainafuri ninom weim yabugun mene foukhogo werek. It Israel mene inogogwi kaindek ferinarek werek mene inom, it afuni inunggulenu mondogat inom he karok andiba talogo inoasumo wa'lasugun. Andi nen he hinendawimo weakhogo hinamik poueti logoni,

¹³ An nen nagainafuri inobabut palhi laginggere, iren inobabut hebelhu aple inabit halok he andoma mondogat it inoba asigin o, ikhe iluk yagaisano,” isikhe.

¹⁴ Halok he, afuni wa'lagaikharek mene yi re, haren hobuk asigin mene faget wene husumbi ikhi logoin. Karok a'nogo nen ap wasigiluk erori'lago iluk enegenggere henggi tabeti logoin. Karok andi re inailo mondok hokho mene hilingik.

¹⁵ Karok andi nen hilingik enggeba re An nunggulenu mene inailo asuageluk youk kwelakfikhemo re inailo legengge inambong serogo werek mene a'nogo lek hilingisogo figik, tunghogo warigik aga. An nen it inawi kota andi weaget fagain iluk karok andiba eilaburen kulunget hikherek hak hilingiti logolik ap wasigin iluk hilingik engge andi hinoasigin iluk nane walhogo figirik welagi.

¹⁶ Hat karok enggat fena-fena merenghogo magongge yi, haren henggi ebekwe inom harekwe inom lebegerisigik, nen ekhe hat hendawimo anggagain fikhit omanogo inom lebegerisigik, in o.

¹⁷ An ogo nenggi tabeti logoginat, An na'mage lagali'logo mene a'nogo ogore sebelasigin. Iluk An Tuhan nen nane mondogat igi o, ikhe.

Raja Babel mene enggarok faget isikhe wene

¹⁸ Tuhan ane an noba ikhi logolik yi'nogo ikhe,

^19-20 Afuni wa'lagaikharek mene yi re, haren kwelugun pire at raja Babel mene karok waluk wesigin kwe ilirengge hilingfein o. Kwe ebe pirenet he o ebe misik oba nen yagaisogo wulabe'ma re, kwe ekhe re o Raba kota it Amon mene inawi andi fikhit yago logogin, nen misik ekhe re o Yerusalem kota it afuni Yehuda mene nen inawi leget pa'leget haning leget waganek mene andi fikhit yago logogin. Nen kwe handogalma andem he e kagalek meneba ebekwe wurep halek logouwageluk enegengge menfeino.

²¹ Raja Babel mene andi re e kagalek meneba enegenggerogo palogo fogoin oba andem mendek logouwak. A'nogo logolik he aren ebekwe kikwe nen lagain iluk yaganesuageluk he anggembu omanogoba kino yagatik, togengge agam-fagam isigik, wam warogo kembu faget fugu mene omanogo senggelogo endawinggen oba obabut palhik, hilingiti logouwak.

²² A'nogo hilingitunem he, tok enggi ebekwe wesigin mene a'nogo re, Yerusalem fikhit hilingik logogin! A'nogo hilingik halok andi re, raja nen kota Yerusalem hugul kuageluk hilingik welagik, weim yabuogeluk hou salhik, tentara inangge pin talogo kwagarek mene omanogo fik-foukhogo hilingisogo fuluk o Yerusalem kwe ambe palek omanogo bene kelogo filik lagik, kweang habulogo pa'leget inom higithogo fei lagagik, i kalok halogo kwelafik, ugun.

²³ Afuni Yerusalem werek mene nen he, Babel mene inom wene watasi'mo re, it hobuk pin talogo inoasi kugun mene faget eberogo anggogoin lek. Oba nen he wene husumbi yiba nek he, iren nit ninaweak onggo hele watninabuogeluk hilingiri'lagwi anggogoin.

²⁴ An Tuhan lego mondok welagirek mene nen wene yi it inoba ikhi lagi, ”Hit hinaweak hokhorogo andoma weinam agama re, afuni mondogaren it weak hilingiri'lagwi iluk inelu agaikha o. Hiren kwanirogo hilingiti lagep mene andi re hinobabut hilingiti lagep meneba enek ari'lago. Yogondak he, An nen hit hinebe unggum wokhisigik, ap hinaselei mene inenggimo hinobagagik, igin oba arat horok asi waga,” ikhe.

²⁵ Nen raja Israel mene hoba re, An nane yagati lagi yi, ”Hat raja hanini mene mondok Tuhan ane sagalogo hilingiti lagen mene yi sa! Hat unggum wurep kobokhogo wokhesigin oba mondogat horok ari'lago andi.

²⁶ An Tuhan Lego Mondok welagirek mene a'nogo nane mondogat igi. Hat he mahkota ugu welagen mene andi korokhogo herakfuluk he hunggulasu puksek welagen mene andi nonggologo hebisigik hilingisin. Yogondak he o obabut mondogat agaumhogo hilinglaga. Yogondak he ap inenggi lek mene legeisogo fisaluk he, it inalonghogo logouwageluk hilingisogo fisan! Ap inalong werek mene andoma re it inonggwarek halogo fakhili'lagwiba andoma nen pelaginabin!

²⁷ Kota yi An nen hobuk mondogat wolelenggenhogo foumo re yi kwe ti kwe olun enek hilingik logogin. Oba nen he wene andi re ap An nen kota ari wolelenggen esuageluk wenagaisogo figi mene andi yogondak kwi wagu halok hilinglasigin. Ap andi enggiba o kota yi An nen enggiba fagain ikhe ino” isikhe.

Karok inom ap Amon mene inom faget isikhe wene

²⁸ Afuni wa'lagaikharek mene yi re, hobuk hilinglasigin mene faget husumbi yagaisan o! Haren afuni Amon mene nen ap Israel mene li'norinafi lagaukwa meneba re, An Tuhan Lego mondok welagirek mene nen nane yi'nogo ikhe iluk yagaisano, ”Karok misik ekheba palhinabigiluk mondok fik-foukhogo werek, karok ebe re ap pinggi wasuageluk enggat mondok miring merenghogo eilabut kulung hikherek hakhogo magongge werek.

²⁹ Hit hinabikanggoba hakhogo hogoin mene andi re eberogo mene re fuk, nen hobuk yi'nogo asigin iluk husumbi isigip mene andoma ogore hinane nen lalogo hineranhogo wene isigip. Hit he, hinanini mondok weak logolik Tuhan ane sagalogo hilingiti lagep hinap welagep, nen hit unggum wurep kobokhogo wokhisagain oba re mondogat horogasi waga. Karok andiba re hit hinalonggop paligin.

³⁰ Hit afuni Amon mene yi, hinenggarok he awingga elema kwelabini! Hit he, An nen obalik hit hinebe ta'lagik, elalagik isigip oba andoma nen hinawene ayo wurogo pilinghinabigin.

³¹ An na'mage endu amulok lagaikherek higit lagali'lago mene andi re hit hinunggulmo kweisalisagain. Hit hinebe re An nen ap inanini mondok weak logolik, ap legerinafarek mene faget mondok milil melalsek inap andoma inenggim hinobagagin.

³² Hit hinebe re endu nen mondogat nagain. Hinamep he hinonggwarek hinanggweang oba andoma kweisalogo pigin, nen ap misigen ogo ekhe hit faget hinoba eberek logogun lek. Iluk An Tuhan en nane mondogat igi,” ikhe iluk yagaisano yaganete.