YEHEZKIEL 20 - Allah Wene Fano Wene Hupla Inane

Allah endawimo anggikherek mene inom afuni inaniniba hilingitarek mene inom faget isikhe wene

¹ Tanggal sepuluh tugi fuabengge meneba re nit hele warogo hu'ninabi wagaukwama logolik tahun sabit meneba agaikhemo were'ma, ap Israel mene inogogwi kaindek ferinarek mene fena an nambit wagaukwasik he, Allah endawimo anggikherek mene kinosuageluk miming nabi wagaukwa. Wagaukwama it inebe mondogat an nelokhoma hurek werek kwelek,

² Tuhan ane an noba yaganetunem nesanggo holhi,

³ Afuni wa'lagaikharek mene yi re, hane afuni inogogwi ferinarek welagaikharek mene oma inoba ikhi logolik he, An Tuhan Lego Mondok welagirek mene nane yi'nogo ikhe iluk yagaisan o, ”Hit he hinailo lek pegengge An nen hit hinoba yi'nogo ti'nogo yagahisoageluk yaganeti lagep ari ambi! An Allah neluk mondok welagi mene nenuba hilingi'mo re, hiren yi'nogo ti'nogo yaganisoageluk kino yaganetu aplere nabitsek welagi! An Tuhan Lego Mondok welagirek mene nen nane mondogat igi andi, ikhe iluk yagaisano,” ikhe.

⁴ Afuni wa'lagaikharek mene yi re, it inawene ayo wurogo pilinginabinogen he mondogat fikfouksek welagen a? A'nogo welagen halok he yogondagat hilingisin o. Haren it inoba inombawi lagen yi weak ti weak elo'lek mene hokhorogo hilingiti lagukwa mene omanogo faget eberisano.

⁵ An nen yagaheti lagi mene yi re it inoba yagaisan. An nen Israel mene wenaginafigisik, it faget hombuk palogo legeisogo fisasigi. O Mesir en he An nebe it inoba weinam agagisik nane it inoba yagaisikhi logolik, ”Hit hineisena Tuhan Allah re An aro,” iluk yagaisasigi.

⁶ O andi sambul he An nen hit wokhinarek lambik kweang hit wokhisagain oba andoma obaburugwi mondok heiselek kwe yi mene ti mene hokho pokhorogo were'ma andoma, nen o kweangma yoma nen he we kweang andi nek he mondok ibi ebema andoma hinobagai lagain o, iluk hombuk palogo yagaisasigi.

⁷ An nen it inandugwi kembu elalhigik werek mene mondogat hebak nafe mene omanogoba nen inagaiyekhogo hilingiri'lagwi mene omanogo hugisoageluk yagaisasigi, nen ekhe re An nebe it ineisena Tuhan Allah welagimo re, iren kembu Mesir mene fogerati logolik inebe emetfakhaga hanogo, iluk yagaisasigi.

⁸ Oba nen he iren An nane sagalhi logolik, An nane holu aple inabit anggikhi lagaukwa. Iren he tugwi kembu it inebe emetfisikherek mene ilirenggethigik werek mene omanogo hugisare inabit logolik Mesir mene inandugwi kembu omanogoba fogerasuogeluk ogo kamo ikhi lagaukwa legat. It inebe andoma welagaukwaba andem he An nen nanini it inoba fagain iluk mondogat fouget fesigi.

⁹ Oba nen he iren afuni unggulenu it were'ma andoma mene nen An nenu weagerogo feinogo iluk An nen a'nogo hilingitigi lek. Andi re it inunggulenu andoma ineilhanem An nen nane menfikhi logolik, An nen unggulenu Israel mene andi re o Mesir en woginarek wulibi lagain o, iluk nane menfesigi.

¹⁰ A'nogo isigisik An nen it woginarek o Mesir en wulibi wagagisik o lei ilingage pirimsekwe woginapluk wagagi.

¹¹ Andoma nen An nen nawene melalek wogisigik, nen afuni wene melalek hologo hilingitarek mene re ineluk mondok werek enggere, wene yi'nogo hilingi'no ti'nogo hilingi'no iluk yagaisasigi mene omanogo hologo nek hilingiti logouwageluk hilingitigi.

¹² An nen it linggene sabat andi re An inom it inom wene wat-wat agagu mene enegenggerogo were'ma legeisogo figik, nen An Tuhan nen it andi An nobaget iluk enogo fakhigik isigi mene a'nogo eberisikhi logouwageluk yagaisigik, isigi.

¹³ Oba nen he o leimo ilinga pirimse'ma andoma nen ogore iren An nane sagalha. Iren An nawene melalek omanogo sagal figik, yi'nogo hilingi'no ti'nogo hilingi'no iluk An nen yagaisasigi mene omanogo hologo nek hilingitu mene re ineluk mondok logogun iluk yagaisasigi mene a'nogo sebelogo figik aga. Nen ekhere iren he inenggi Sabat mene a'nogo mondok emerogo faga. Andiba re o leimo ilingage pirimse'ma andoma nen he na'mage it inoba figirik inebe legetfisagain iluk wenggelogo fesigi.

¹⁴ Oba nen he An nen nonggwarek nenu nalong palogo re, it ap inunggulenu lombogen An nen ap Israel mene o Mesir en woginarek wulibi wagunem neasukwa mene omanogo nen sebelogo nobagainogo iluk a'nogo hilingitigi lek.

¹⁵ Andi nen o lei ilingage nek hilingik kwe andoma laga logolik, unggulenu Israel mene inoba na'mage fikhi logolik he, it ari re kweang mondok heiselek oba, yi mene ti mene inom mondok hokhorogo werek oba, nen o kweangma nen he o andoma nek he kweang mondok ibi ebere'ma it inobaget fouget figiba andoma re woginarek kwigin lego isigi.

¹⁶ An nen na'mage it inoba fesigi mene andi re iren An nawene melalek omanogo furogo hilingiti'legengge hilingitik, yi'nogo ti'nogo hilingi'no iluk yagaisugu mene omanogo sagalogo figik, linggene sabat mene a'nogo emerogo figik, hilingiti lagaikha andiba. It he inanggembu fogerasuogeluk enek he inagaiyek mondok welagaukwa.

¹⁷ Oba nen hobugen he An nen it inoba nendawirifigisik, An nen it inebe o leimo ilingage pirimse'ma andoma nen inoatigi lek.

¹⁸ Hebekhogo re, ap souge it inanggele'ma welagaukwa mene andoma inoba An nen yi'nogo komorinafigi, ”Hit wene melalek hinambu hinomba lagen melalhukwa mene andoma murok laga logou fugo. It inobabut waganogo hilingiti logolik, tugwi kembu fogerasugun oba hit hinonggwaregen hinebe emerogo fakha fugo iluk komorinafigi.

¹⁹ Hit hineisena Tuhan Allah re An aro, An nawene melalek inom yi'nogo hilingi'no ti'nogo hilingi'no iluk melalek werek mene omanogo inom hologo nek hilingiti logoino.

²⁰ An hit hineisena Tuhan Allah welagirek mene a'nogo nen hit hinoba ebethisigik, nen An hit ninom wene wat-wat agagu mene a'nogo enegenggerogo welagik, hilingik logouwageluk he linggene sabat mene andi legeisogo fikhi logoino, iluk komorinafigi.

²¹ Oba nen he it alagendek mene andi nen ogo nane sagalhi logolik wene melalek taganhogo hilingitik, wene yi'nogo hilingi'no ti'nogo hilingi'no iluk yagaisasigi mene andi hologo hilingisugun halok he ineluk mondok logogun isigi mene a'nogo tiphogo hilingiti'legengge welagik, hilingiti lagaukwa. Nen iren he linggene sabat mene a'nogo inom emerogo fikhi lagaukwa. Andiba re o leimo ilingage pirimse'ma andoma nen An nen it inebe mondogat inoasigin iluk An nanini a'nogo fik foukhogo hilingfesigi.

²² Oba nen it inunggulenu ekhe mene ekhe mene mondogaren An nen unggulenu Israel mene o Mesir en woginarek wulibi wagunem neasukwama re, Nenu weagerogo feinogoluk hilingitigi lek.

²³ Ilingage nek pirimse'ma leimo andoma nen An nen hombuk palhi logolik, it andi re it inunggulenu amu mene werekwe andoma telfol isogoin iluk hombuk palhigi.

²⁴ Andi re iren nawene melalek a'nogo tiphogo hilingiti'legengge, wene yi'nogo ti'nogo iluk melalek werek mene a'nogo taganhogo hilingitik, linggene sabat mene a'nogo emerogo figik hilingiti logolik, kembu it inombawi nen fogerati lagaukwa mene omanogo fogeratik, ikhi lagaukwa andiba hilingitigi.

²⁵ Andi hilingitu nen he An nen wene melalek weak mene inom, yi'nogo ti'nogo hilingi'no iluk melalek mene omanogo ineluget inaferek lek mene inom, wogisasigi.

²⁶ Iren yi mene ti mene fuluk nolhungge meneba nen inom, it inonggwarek inagainafuri manggusa mene warogo nolinafarek meneba nen inom, emerogo fakhikhi logouwageluk obokhogo lakfisasigi. A'nogo hilingitigi andi re iren An nebe Tuhan welagirek mene a'nogo furogo inelu asuageluk unggum wogisasigi andi.

²⁷ Enggere, afuni wa'lagaikharek mene yi, haren it ap Israel mene inoba re An Tuhan Lego Mondok welagirek mene nen it inoba yagaisikhi lagi mene yi yagaisano: Ekhe walhigik he, it inambu inombalak andi nen ninggi'nogo hilingiti logolik ogore An weagerogo nobagagik, An noba inendawinggen tibet figi'legengge welagik, ikhi lagaukwa.

²⁸ An nen it woginarek kweang mondogat wene warisasigiba omanogo wagagi. Mo re, iren punu-punu uan mene inom, e hokho mene wilibikwe inom hilik laga logolik omanogo fogerati logolik, obaget warogo erokwe andoma nolhi lagaukwa. Iren An nanini kwelaknafi lagaukwa andi re i anggur agai inom, kembu endawimo agaiyek hoageluk warogo noletungge inom, omanogo nolhi lagaukwa andiba na'mage lagasigi.

²⁹ An nen it inoba heinok wogisikhi logolik, ”Punu-punu uan mene ebene andoma nena mene weregen oba lagakhi lagep?” isigi. Andiba re aremnogoba nen obalik andoma enu re, ”Obalik Legoma,” ikhi lagaukwa.

³⁰ Enggere An Tuhan Allah Nebe Lego Mondok welagirek mene nen afuni Israel mene inoba nane igi mene yi yagaisano, ”Nenahalok weak elokhe ariginik mene andi it hinambu hinombalagen hilingiti lagaukwa higit mene andoma hilingiti lagep nogo? Iren hilingiti lagaukwa higit he hiren ogo kembu hinebe emethinobagali'logo mene andoma murok laga lagep andi.

³¹ Andi nek he fuk oba nen he, yogondak huli nen enggere yi mene ti mene inom hinagainafuri omanogo inom kembu ina'meilo mene omanogo obaget warogo fuluk noleti lagep. A'nogo hilingiti logoligen he hinambong sisengge An noba yi'nogo ti'nogo yaganisoageluk kino yaganesi waga lagep ari a? An nonggwarek nebe Allah neluk mondok welagi mene, Tuhan Lego Mondok welagirek mene nenuba hilingi'mo re, hiren yi'nogo ti'nogo yagahisoageluk An noba kino yaganesi wesugun fano iluk he yagahisa lek hago.

³² Hit he, it ap o kweang amukwe mene inom, inunggulenu andoma mene inomen e inom, helep inom fogeratarek mene omanogo inobabut wanhigipsik higithogo hilingiti lagep. Oba nen he, hit hinendawimo anggikhi lagep mene andoma re higit asigin lego,” iluk ikhe yagaisano.

Allah nen unggum wogisigik, inaweak sagalogo legetfisigik isikhe wene

^33-34 An Allah neluk welagi mene Tuhan Lego Mondok welagirek mene nenuba hilingi'mo re, hit hinendawinggen wenggelogo iluk An na'mage lagali'lago mene yagahisak, hit he An nen nobabut haferogo nane omameba yagahisugu were'ma re, An nomame welagirek mene a'nogo hiren ogo hogoin aro. Hit An nen ekhema-ekhema telfol hisagain kwe omanogo nen andogorogo wokhinabimbik hinobagai wesigin o.

³⁵ A'nogo hinobagai wesimbik hit An nen wokhinarek, ”O lei yi afuni ti afuni inunggulenu,” agarek oba andi wokhinarek lagain. A'nogo lambik he andoma nen hit ninom ninelokhe kwelabek logolik hinawene pilingisogo ayo wuthinabigin,

³⁶ andi re, An nen it hinombawi hinombalak inoba o Sinai leimo ilingage nek hilingi'mo andoma nen hilingfisasigi hakhogo hilingisigin. Iluk, An Tuhan Lego Mondok welagirek mene a'nogo nen nane mondogat igi.

³⁷ An nen wene wathisasigi mene a'nogo hiren hologo nek hilingisuageluk An nen nomamerogo melalhinabigin.

³⁸ Ap ina'mage lagaikherek mene inom wene sagalharek mene inom he An nen hit hinanggele'ma andoma nen lisogo wulakfisagain. It An nen woginarek inanggweang it inebe yogondak werek oba andoma nen wulibi lambik, it nekhengge Israel mene inanggweang oba andoma sugulogo loageluk yagaisagain lek. Andiba re An nebe Tuhan welagirek mene a'nogo hiren hinelu asugun o, ikhe.

³⁹ Tuhan Lego Mondok welagarek mene a'nogo nen ikhi logolik, ”Hit afuni Israel mene yi sani, Yogondak he, we hiren hilingisugun. Hiren hinandugwi kembu andoma fogerati logolik weak hilingiti logogun andi re hirenat! Oba nen he hinelurogo, andi mondogat hilingfuluk he hit hobuk An nane furogo hologo hilingiti logogun. Nen, hiren hinandugwi kembu omanogo faget fugu mene waluk wogosi waga logolik, An nenu fano horek welagi mene a'nogo weagerogo fikhi logogun mondok lek.

⁴⁰ Andi re, o kweang Israel en meneba An nandom unggul horek meneba andoma nen, hit hinunggulenu Israel mene mondogaren An nobaget fogetnabugun. Andoma nen he, An nen nagaiyek hit hinoba figik, hiren An nobaget fuluk wo'netu mene omanogo nendawimo fanoba wanhik, nobaget fugu mene inom, mondogat fanongge enogo fuluk wo'netu mene inom wanhik, ikhi logogin.

⁴¹ Hit o kweang hesangge pesangge lakhinobagagimo welagep oba andoma nen hobuk An nen wokhinarek wilibimbik, andogorogo hinobagaumo, hiren An nobaget warogo nolneti logogun mene andoma wanhi logogin. Andiba re yi afuni ti afuni inunggulenu mondogaren he An yi Allah Mondok horek mene o,” iluk inelu asugun.

⁴² An nen ambi hit wokhinarek kweang Israel en mene, An nen it hinombawilak inoba wene warogo wogisasigi anggweangma andi hinobagai wesumo re, hiren An Tuhan a'nogo hinelu asugun.

⁴³ Andoma nen hiren weak hebak inafe mene hilingitunem hinebe emetfakhasigip mene a'nogo ebet hogoin. Andi nen yi weak ti weak hilingiti lagagip mene andoma ebet haluk he hebak hinafe asugun.

⁴⁴ An nen ambi An nonggwarek nenu nalong palogo iluk hit a'nogo hilinghinobagagin halok, nen hit hinobabut hilingiti lagagip mene inom, hit hineluk weak meneba logolik hilingiti lagagip omanogo inom, ambisangma higithogo iluk hilinghinobagagin lek. Andiba re hit afuni Israel mene nen he, An Tuhan a'nogo hinelu asugun. Iluk An Tuhan Lego mondok welagirek mene a'nogo nen nane mondogat igi o, ikhe.

Endu o abel selatan fikhit nagain mene faget isikhe wene

⁴⁵ Tuhan ane ekhe an noba ikhi logolik yi'nogo ikhe,

⁴⁶ ”Afuni wa'lagaikharek mene yi re, o abel selatan fikhit a'lima yethan. Yethambik he kweang selatan fikhit andi wenagetik, wene hobuk oba hilinglasigin mene yagatik, ino.

⁴⁷ Haren o ogoi andiba yagati logolik, An Tuhan Lego Mondok welagirek mene a'nogo nen hat hoba yi'nogo yagahete ino, ’Holin! An nen o ogoi andiba endu foumo re, e hokhorogo kweang haren mene andiba werek mene andoma e puk mene ogo eluk mene ogo lei mondogat nagain. Lei a'nogo lagain mene andi re amulok yelang melang nilik lagunem he nagulu mondok elo'lek logogin. Lei nilik lagain mene andi re abel selatan fikhit andoma nen yelang melang utara fikhit nilik lagunem he, endu andi aik he afuni mondogaren hogoin enek.

⁴⁸ It mondogaren futfikhi logolik endu andi re An Tuhan nen fakfikhemo re, ap ekhe nen iluk ogo ekhe nagulugun mondok elo'lego, ikhe ino,” iluk yaganete.

⁴⁹ A'nogo ikheba nen an Yehezkiel en nendawinggen enggin nafe mene yagati logolik, ”Tuhan Neisena, Lego mondok welagen mene, an nen wene andi mene yagaisoageluk mimingnafun o! An nen henarogo weneba nek yagaisugunem iren futfigi'lek logolik afuni mondogaren inane mul-mul noba hokhorogo fili'lagwi o,” iluk yagati.