YEHEZKIEL 2 - Allah Wene Fano Wene Hupla Inane

Allah nen Yehezkiel nabi logouwageluk ayonggo fesikhe wene

¹ A'nogo hilingi'mo neilenggen higirik, an nebe talorogo kweangma nelokhe sogoum hulambeti. A'nogo hulamberek logolik were'ma nen he, ane ekhe an noba ikhi logolik mel yaganete, ”Afuni wa'lagaikharek mene yi re, hat he An nemberek wene ane ugun enggere menlame o,” iluk yaganete.

² A'nogo yaganetemo nesanggo holhu kwelek aremnogoat, Allah Areagun nendawimo peterogo kwikhesik he, nebe nomamet nobagaikhe. Andi nen ane ekhe inomat an noba mel yaganetunem nesanggo holhiat:

³ ”Afuni wa'lagaikharek mene yi re, An nen hat hayonggo fembik, afuni Israel mene inobabut An nawe a'ma logou inabiren inombalagen hera'nobagaluk weak hilingiti lagaukwa andi hak, iren ogo a'nogo weak hilingitu mondok werek mene andi inoba lakhobagagin o.

⁴ It inungguloak helep hangge logolik, An legeisogo nobagali'lagwi lek. An nen hat hebe it inoba lakhobagakhi lagi yi re, An Tuhan Lego Mondok welagirek mene a'nogo nen wene it yagaisoagaluk yagahesigin mene yi, yagaisa lanogen inoba lakhobagagin o.

⁵ Iren holugun inamolo halok ogo inabit halok ogore ebe esin he nabi it inanggele'ma werek iluk inelu asugun andi esin o.

⁶ Oba nen he hat afuni wa'lagaikharek mene yi sa, It inobabut an nawe a'ma logou inabit andi nen he, it inebe inom, inane ugunem inom, hailo asu fugo. Hat hebe it andi inobabut he, pimen kwagisugunem aik weak andi hangge inom, panggi alok hokho andi hangge inom, ililim aik palinaferek mene andi hangge inom, inanggele'ma logogin andi nen he, hailo asu fugo.

⁷ An nen wene it inobaget yi'nogo ti'nogo iluk mondogat yagaheti lagi mene andoma iren holugun hea, lek hea, hilingik kwelegat yagaisa lano o. Nen it inobabut he wene sagalharek inap welagaikharek a'nogo helurogo.

⁸ Hat afuni wa'lagaikharek mene yi. An nen hat hoba yagaheti lagi mene andoma fanorogo holin. Hat he it hinom wene sagalhu mene hilinglasu fuk. Hambele anget fuluk he An nen wokhesigin mene ari nan,” iluk ugunem holhi.

⁹ A'nogo yaganetemo neilenggen yethasigi re, enggimo suesingga yinggilik mene fisogo logolik noba pisarogo lakfei wagunem higi.

¹⁰ Noba pisarogo lakfei wagasik, funggulhunem kwelakhigi re, abel fena-fena wene ebe re, le asugun mene inom, Eige, nabire, iluk ikhi logogun mene inom, heinet wati logolik inane kweti logogun mene inom, palek were'ma higi.