YEHEZKIEL 18 - Allah Wene Fano Wene Hupla Inane

Afuni inebe lombok he inobabut hilingisugun onggo nek helogoin isikhe wene

¹ Tuhan ane an noba ikhi logolik,

² ”Nenahalok it Israel mene were'ma yoma nen wene yaleget waganogo agarek mene yi nek ugu mondok logogun nogo? Ap inaluendegen he anggur enggen arik weak mene ninggi logogun, oba nen he inagainafuri nen inaiklirati logogun.

³ An Allah neluk welagirek mene. Tuhan Lego Mondok welagirek mene nenuba hilingi'mo re, wene yaleget waganogo agarek mene andi re o Israel oba yoma ekhe ikhi logogun mondok lego.

⁴ Afuni inebe lombok inareagun andi re An mene werek, ap inalue mene inom yenggerugwi magendek mene inom andoma inareagun he An mene nek were'ma re. ap ekhe weak hilingitu halok he ap andi ebeat wa'laga logogin.

⁵ We walhogo re ap ekhe fano hilingitik, katokhogo hilingitik higithogo nek hilingitik ikherek mene ekhe werek.

⁶ Ap andi re Israel mene inanggembu fogeraterek lek, athe Israel mene nen tugwi kembu fogerati logolik obaget warogo nolharek mene omanogo ninggerek lek, nen tugi wagunem hemi inamep hagarek mene inom nogoikherek legat.

⁷ Aren he eranhogo wene igik, afuni inangge teligik, ikherek legat. Afuni inangge endawi lirengge fisogo logouwak hobuk onggo fagain iluk wogetu mene omanogo weak-weak ambotkwe wogisikherek. Afuni inamburu nele were'ma inamburu wogisigik, nen afuni inasu laberugu mene le'ma inasu wogisigik, ikherek.

⁸ Aren he angge afuni inoba hobuk nekhengge wogosugun nen iluk wogisikhi logolik he to'mongge ekhe inom wogisikherek lek, athe inanini meneba hilingitarek mene andoma abitsek logolik ap wene palhunem andoma re aren wene higithogo nek tegeterek.

⁹ Aren he An nane yi'nogo hilingi'no ti'nogo hilingi'no iluk isigi mene inom, An nawene melalek inom holfuluk tiphogo nek hilingiterek. Ap ariginik mene andi re higithogo nek hilingiterek mene hilingi'mo re at ebe eluk logogin o. Iluk An Tuhan Lego Mondok welagirek mene a'nogo nen nane mondogat igi.

¹⁰ Oba nen he walhogo re ap andi amlogo ekhe yogot wanherek mene welagik, ap watik, weak mene hokhorogo

¹¹ eisena nen ekhe hilingiterek lek mene hilingitik, ikherek. At amlogo andi nen wam tugwi kembu dewa fogeratunem obaget warogo nolhu mene andoma ninggerek. Ekhe aren ap amu mene inagagwi endawinggen naluk inom sebetaregat.

¹² Aren afuni inenggi lek mene eranhogo wene lalinafik, inangge teligik, ap at oba palegengge werek mene nen inendawinggen litungge iluk werek mene omanogo felelenghogo heligik, ikherek. Aren ap Tuhan inonggot mene nen tugwi kembu fogeratarek kwe omanogo laluk he kembu ina'meilo mene omanogo fogeraterek.

¹³ Aren angge ap amu mene inoba hobuk to'mongge inom wo'nesubagaigen iluk wogisikherek. Ap a'nogo hilingiterek mene andi re eluk logou hak nogo? Lego! Aren he mondok weak inabit mene andoma hilingitunem he at andi re wa'lasigin o. At ebe wa'lasigin andi re onggwarek aweak hilingiti laga mene omanogo onggo wa'lasigin.

¹⁴ Walhogo re ap ekhe weak hokhorogo hilingiterek mene andi re amlogo werek, amlogo andi re eisena nen hilingiterek mene omanogo eilenggen mondogat hikherek, oba nen eisena obabut waganogo hilingiterek lek.

¹⁵ Amlogo andi nen he ap Israel mene inanggembu omanogo fogeraterek lek, athe kembu dewa fogeratarek oba omanogo nen obaget warogo fagarek mene ninggerek legat, aren ap amu mene inagagwi ineil salinaferek legat,

¹⁶ athe afuni sebelogo fisigik, inangge teligik ikherek lek. Yi mene ti mene aren mene hobuk onggo wokhesigin iluk elama wanherek mene ogore weak-weakhogo nek obali'mo wogisikherek. Ap inamburu nelerogo werek mene nunggu mene wogisigik, ap inasu lek mene inasu labetu mene wogisigik, ikherek.

¹⁷ Aren inanini mene ekhe hilingiterek lek, athe angge elama faget afuni inoba wogisikhi logolik to'mongge inom wo'nesubagaigen iluk hilingiterek legat. Athe An nen wene melalek werek mene omanogo furogo hilingitik, An nen yi'nogo hilingi'no ti'nogo hilingi'no iluk ikhi lagi mene omanogo hologo hilingitik, ikherek. Abo andi nen hilingiterek mene andi re eisena aweak oba wa'lasigin lek, athe eluk logogin.

¹⁸ Hebekhogore eisena nen eranhogo wene igik, afuni inangge teligik, weak amu mene inomat hilingitik, hilingiterek mene andi re at onggwarek aweak hilingiterek mene andoma ambisangma at ebeat wa'lasigin.

¹⁹ Oba nen he afuni ekhe nen heinok wanhi logolik, nenahalok abo andi eisena aweak obare at oba wene ari'lago lek nogo? Ugu halok he, abo andire fano higithogo nek hilingiri'lagoba o. Aren An nawene melalek oba tiphogo hilingiti logolik higithogo hilingiri'lagoba eluk werego, iluk igi andi.

²⁰ Ap weak hilingiterek mene andi nek he at ebe wa'lasigin, at amlogo andi re at eisena aweak onggo wa'lasigin lek, hebekhogo re eisena ogo amlogo aweak onggo wa'lasigin legat. Ap fano hilingitarek mene andi inobabut fanorogo nek hilingitunem onggo ogo fano mene nek hikhi logogin. Nen inobabut weak mene andi re ina'mageba nek hilingitarek andi ambisangma re ou-pou mene nek hikhi logogun.

²¹ Ap ekhe weak hilingiterek mene nen weak ekhe inom hilingitu aple herakfuluk, An nawene melalek oba higithogo hilingitu mene erora'luk, fano hilingitik, eberogo mene hilingitik ugu halok at hobuk wa'lasigin lek.

²² At fano eberogo mene hilingite halok, at aweak mondogat sagalogo legetfisamo at ebe eluk logogin.

²³ Haren anggikhi logolik, An Tuhan Lego Mondok welagirek mene nen ap weak hilingitarek mene wa'lagu halok nagaiyek anggigirek anggegen? A'nogo anggigirek mondok lego! An nendawimo nagaiyek he at aweak andoma herakfuluk ebe elugat logoilep anggikhi lagi o.

²⁴ Oba nen he, ap fano meneba nen fano hilingiti lek engge weak hilingitu mene eroratik, ap kwanirogo hilingitarek mene nen ina'meilorogo hilingitarek mene omanogo hakhogo hilingitik, ikherek mene andi re eluk logogin anggegen? Lego! Aren obabut fanorogo hilingiti logogin mene aremnogo tem misik hogoluk ekhe ebet hagain lek. At andi re An noba tiphogo welagi'lek weak mene nek hilingiti logogin andiba re at ebe wa'lasigin.

²⁵ We it ekhe nen yi'nogo agarek logou hak, ”Tuhan nen hilingiterek mene andi re nonghonghogo hilingiterek iluk agarek. Oba nen he, ap Israel mene yi re hinesanggo fanorogo holini o! An nen hilingiti lagi mene andoma re nafekwe nonghonghogo hilingiti lagi anggikhi lagabe? Hirenek he hinafekwe nonghongsek welagep.

²⁶ Ap fano hilingitarek meneba nen fano mene hilingiti'lek logolik, weak hilingitu mene erora'luk hilingitu werek halok he at ebere eberogo nenat wa'lasigin, andi re at onggwaregen weak hilingiri'lago andiba wa'lasigin.

²⁷ Oba nen he, ap weak hilingitarek mene nen, weak mene hilingiti'lek logolik, fano hilingitu mene erora'luk hilingirik lagu halok, at ebe agap telek logogin.

²⁸ Aren yi weak ti weak hilingiti laga mene omanogo faget an weak hilingiti lagimo higi iluk futfikhesik, weak hilingiti laga mene omanogo herakfisikhemo, at hobuk wa'lasigin lek, meneba nen eluk mondok logogin.

²⁹ Hit ap Israel mene yi sani, hiren ikhi logolik Tuhan nen hilingiri'lago mene andi re nonghonghogo hilingiri'lago ikhi lagep, andi re An nen hilingiti lagi mene andoma re inendawinggen suk-sak u hak mene hilingiti lagi a? Israel mene yoma ri! Lego, hirenek he nonghongsek mene hilingiti lagebo,” ikhe.

³⁰ Tuhan Lego Mondok werek mene a'nogo ane ikhi logolik, ”Yago, hit afuni Israel mene yi sani! An nen he afuni inebe lombok inobabut hilingitarek lombok higithogo ayo wurinabigin o. Hinaweak hilingiti lagep mene mondogat herak fisaluk hinendawinggen hebelini o. Hinaweak fageti'legengge herakfuluk welagep oba hinebe weaget hinabinogo.

³¹ Hiren weak hilingiti lagep mene andoma mondogat palfeni o, palfuluk he hinendawinggen wenggelhu mene inom, menenei ebetu mene inom he ket mene asuak. Nenahalok hinaweak onggo hinebe wa'lasugun nogo?

³² An nen ap misik ekhe wa'lasigin andi nagaiyek welagi lek. Hit hineluk mondok-mondok logobagaigen he hinaweak weak mene andoma mondogat herakfisani o. Iluk An Tuhan Lego Mondok welagirek mene a'nogo nen nane mondogat igi o,” ikhe.