YEHEZKIEL 17 - Allah Wene Fano Wene Hupla Inane

E anggur inom sue rajawali inom oba lirogo isikhe wene

¹ Tuhan ane an noba ikhi logolik, ”Afuni wa'lagaikharek mene yi re, wene oba lirogo wene yi re it afuni Israel mene inoba tindelogo yagaisano,

^2-3 An Tuhan Lego Mondok welagirek mene a'nogo nen it yagaisagain iluk nendawimo anggikhi lagi mene re yi: Sue rajawali ekhe ebe mondok hokho mene re esi fano mondok hilingi'mo, ogolabi uanse'ma re omame hokho arue welaga. Sue andi tarogo o Libanon tom oba omanogo lagasik he, e laik unggum tekhogo waluk waga,

⁴ waluk wagasik o kota yi mene ti mene onggo wanhik hunitik anggilukhogo hilingitarek oba omanogo fei waga.

⁵ Andi nen ekhe Israel mene inanggweang oba andoma nen yagongge misik ekhe ombo ket lagaikherek mene liagaisogo waluk he yabu kweang muli fanoma enggen talelogo waganek oba i ogo firitok ikherek lek oba omanogo yakfei waga.

⁶ A'nogo yakfikhemo agaumhogo re e anggur agayo oak horogengge lagaikhesik ebe wurilogo wilife. A'nogo wulibi'mo re e a'nogo enggi re sue rajawali a'nogo fikhit pilingisogo hilingi'mo, omanggen he kweangma mondok ninghogo pelabek welaga. Anggur andi ebe re engga mondok hik agayo wilibik welaga.

⁷ Andi hilingik kwelek he sue rajawali ekhe amu mene ebe hokho arue esi wulim hilingi'mo re, ogolabi mondok wirilogo langsek mene welaga. A'nogo were'ma re e aggur a'nogo mene omanggen inom enggi inom he, sue rajawali a'nogo fikhit talik laga-laga. Andi re aren anggikhi logolik, yabumo i werek mene andem werek kwelegat oba nen he i hokhorogo wogosuak anggikhi logolik a'nogo hilingite.

⁸ A'nogo hilingiteba nen, e anggur andi ebe re kweang heiselek oba, i inom hokhorogo wiliferek oba wilibik were'ma re engga mulirogo wilifik, enggen hokhorogo itik, ikherek andi nen he e anggur ero fano mene welaga andi.

⁹ Andiba re An Tuhan Lego Mondok welagirek mene a'nogo nen heinok yi'nogo igi: Anggur andi ebe re fanorogo wilipluk sagarik lamo re higira? Sue rajawali attak mene a'nogo nen e andi omanggenet sanogetik, enggen taganhik, enggi sombolhik, hilingfuluk pugasuageluk herakfisa hak nogo? E andi omanggenet sanogesuogeluk he ap hokhorogo inom, athe inunggulenu misik ekhe inomame hokho mene inomen hilingisu lek hak.

¹⁰ Eberogo nen at ebe omanggen ninghogo yago werek, oba nen he at a'nogo wilifu mondok logolik sagarik lagu mondok logou hak nogo a? Sogoi timur fikhiren funha wesumo nen he pugasu lek hak nogo? Nen at ebe yakfuguba aremnogo nen pugasu lek hak nogo? Pugasu hak aro,” iluk ikhe.

Oba lirogo wene andi senggerogo pilingisasikhe wene

¹¹ Tuhan ane an noba ikhi logolik,

¹² ”Wene oak sagalharek inap andoma nen he henarogo wene andi fanorogo fut faga a, lega? Iluk heinok wogisan. It inoba yagaisikhi logolik, raja Babel mene re o Yerusalem arat kwi wagasik he raja Yehuda mene inom, ap o kota andiba yi kain ti kain omanogo inom, felelenghogo woginarek he o Babel laga ino.

¹³ A'nogo laga logolik he aren ap misik ekhe raja Yehuda eisok erokwe mene wenagaisogo fikhesik he ap andi inom wene watik, nen ap andi nen wene tiphogo hilingiti logogin iluk hombuk palogo uageluk yagatik, hilingite. Ap raja Babel mene andi nen he

¹⁴ kerajaan Yehuda mene andi nekhengge omame asinogo iluk inom he, wene warek mene andi eberogo tibet fouwageluk inom he, aren ap kaindek lego inap omanogo mondogat hele warinafe.

¹⁵ Oba nen he raja Yehuda mene wene oak sagalimbik ap yonggo o Mesir andoma nen no kuda inom ap tentara inom, hokhorogo wogosuageluk lakfisagain. At hobuk omame asigin a? At heise wilibuageluk herakfisogoin a? Ap wene wate mene a'nogo oak sagalhe halok unggum oba figi'lek elok wilibu hak nogo? Elo'lego!

¹⁶ An Allah neluk mondok welagirek mene, Tuhan Lego Mondok welagirek mene nenu igisogo ikhi lagi, enggere raja Yehuda mene re raja Babel mene nen takhta oba hutfikhi logolik, inom hombuk palhik, wene watik, isukwa mene a'nogo taganet fikhemo re at ebere o Babel andoma nen wa'lasigin.

¹⁷ Tentara Mesir mene inomame mondok hokho mene andoma nen ogore ap Babel inap afuni hokhorogo inoasuogeluk kweang habulogo sebelik lagagik, i kalok habulhik, hilingiri'lagwi mene andi nen pin kwi wagunem he at lebetha lek hak hilingik.

¹⁸ Andi re aren ane hombuk palhe mene inom, wene wate mene inom, taganhogo hilingitemo re at ebe heise polokhogo wulibigin lek.

¹⁹ An Allah neluk mondok welagirek mene, Tuhan Lego welagirek mene nenuba hilingi'mo re, raja Yehuda mene andi nen tiphogo nek hilingiti logogin iluk An nenuba hombuk palhesigen, aren raja Babel mene inom wene wata mene a'nogo taganet fikhemo re, An nen unggum oba fagain.

²⁰ An nen at hele wasigiluk he su ikan watarek asu andi hangge meneba elema kwalasuageluk webet fagain. At ebe An noba tiphogo hilingiterek lek andi nen he An nen o Babel waluk lambik andoma nen unggum wogosigin.

²¹ Tentara aren mene ap mondok fano inap omanogo re weim yafi logolik inoasumo wa'lasugun, nen it fena longgo imbik heise wulibi logoin mene re o unggut-unggut telfol ilogoin. Andiba re An nagainafuri nen he An Tuhan nane mondogat ikhe iluk inelu asugun,” ikhe.

Allah nen inendawimo eberek logogun mene faget wene warisasikhe mene

²² Tuhan Lego Mondok welagarek mene a'nogo nen ikhe mene re yi, ”E laik uan meneba nen unggum he An nen paligin o, a'nogo palimbik An nen e enggi asimit ket mene ekhe sombosigin. An nen e enggi andi waganogore tom uan mene ohena oba yinggili'mo wolonghogo liabek meneba andoma yasi lagagin.

²³ Tom mondok uan mene it Israel mene were'ma andoma An nen taunget fagain. Andoma nen asimit wilibimbik, enggen iti logogin, a'nogo hilingiti logolik he e laik mondok fano mene asigin. Andi nen yi rue ti rue ogolabi werek mene mondogat he e andiba inawi wusi kwikhi logogun, Nen e andi a'ma kunmo andoma kuluk logogun.

²⁴ Andiba re yi agayo ti agayo o kweangma welagarek mene mondogaren he An Tuhan a'nogo fut nobagagun. E uan mene re An nen musigin. Horok mene re An nen uanhogo lagauwageluk hilingisigin. E ket fano wiliferek mene re An nen puget fembik iringik mene hilingisogo fagain, nen e iringik meneba re asimit wulak figik, owil ik figik, igin. Iluk An Tuhan nen nane mondogat igi, nen An nane igi mene andi re tiphogo nek hilinglasigin o,” ikhe.