YEHEZKIEL 14 - Allah Wene Fano Wene Hupla Inane

Allah nen ap tugwi kembu fogeratarek mene unggum wogisagain isikhe wene

¹ Ap it inunggulenu Israel mene inogogwi kaindek ferinarek welagaikharek mene fenakwe an nambit wagaikhasik Tuhan endawimo anggikherek mene faget heinok wo'nabi wagaikha.

² Wagaikhama Tuhan nen an yaganeti logolik,

³ ”Afuni wa'lagaikharek mene yi re, ap wagaikha inap arem he inendawinggen tugwi kembuba nek himbiret fuluk werek oba re it inebe weak mene elema kwi lagaikha inabo. Ariginik inap oba nen iren An heinok wo'nabugun iluk wagaikha andi a?

⁴ Andi faget he haren it inoba An Tuhan Lego Mondok welagirek mene a'nogo nen yi'nogo ikhe iluk yagaisan o, ’Afuni Israel mene inebe lombogen inendawinggen tugwi kembuba tibet fagasik it inebe weak mene elonggoma kwi lagaikhasigen, ap nabi misik ekhe nen komo wene yaganisoageluk ambit wagunem he, An nonggwarek namu nenat it tugwi kembu andoma faget onggo u higit obaat yagaisikhi logogin o!

⁵ Tugwi kembu andoma mondogat oba re An nagainafuri inebe mondogat omanogo ninom eil uanhogo hilingninobagaga, oba nen he An nen onggo igin mene andiba re An nagainafuri andoma nekhengge sugulogo nambit wesugun logouwak,’ iluk ikhe o.

⁶ Nen ekhe re An Tuhan Lego Mondok welagirek mene a'nogo nen ap Israel mene inoba ikhi lagi mene andoma yagaisano, ’Hit hinaweak hilingiti lagep mene andomaba nen hinobabut hebelini o, nen hinandugwi kembu mondok ina'meilo mene andoma mondogat herakfisani,’ iluk yagaisano, ikhe.

⁷ Ap Israel mene inebe lombok hea athe ap pok unggulenu Israel mene inanggelekwe werek mene hea, nen An obokhogo nobagaluk tugwi kembuba inendawinggen tibet fulugen ap nabi misigen wene komo wene yaganisoageluk kinori'lagwi mene andoma re An namu nen onggo yagasigin.

⁸ An nen at ninom selei higit asimbik, it amu mene andoma inobaget ilirengge re at andi asigin. An nen at ebe afuni inanggele'ma nen litmirogo wulakfisamo re, it An nagainafuri nen he An nebe Tuhan welagi mene a'nogo furogo inelu asugun o.

⁹ Ap nabi mene ekhe ineranhogo wene yagasumo aren onggo higithogo yagaisagain lek mene andi re An nenat neranhogo yagatimo. An Tuhan Lego Mondok welagirek mene a'nogo nen ap andi it Israel mene inanggele'ma nen litmirogo wulakfisagain o.

¹⁰ Andi re at nabi andi ogo it komo wene at oba kinosugun mene andi ogo, unggum he higithogo nek helogoin.

¹¹ A'nogo hilingisugun andi re ap Israel mene nen An oboget nealuk wulibi lagik, weak meneba emetfakhigik, hilingisinogoluk hilingisigin. A'nogo hilingisumo re it An nagainafuri mene asugun o,” iluk An Tuhan Lego Mondok welagirek mene a'nogo nane mondogat igi o, ikhe.

Nuh, Daniel, Ayub inom faget isikhe wene

¹² Tuhan ane an yaganeti logolik, ”Afuni wa'lagaikharek mene yi re,

¹³ o kweang misik ekheba nen weak hilingiti logolik, An noba eberek legengge werek halok, An nen o kweang andiba unggum mondogat wogisagain. Iren nunggungge fouksek mene omanogo An nen wolelenggen isigik, sumburu ouwak lakfei wesumo, afuni inebe inom, inanggo omanogo inom, mondogat inoatik igin.

¹⁴ It ekhe Nuh inom, Daniel inom, Ayub inom, omanogo o andoma inanggele'ma logoilepma nen ogore, it inebe henagan andem en fano hilingiti lagoilepma re, we it inonggwaregat ineluk faget inili helelebo. Iluk An Tuhan Lego Mondok welagirek mene a'nogo nen nane mondogat igi.

¹⁵ Ekhere An nen mene aik anini weak mene o kweang andiba lakfei wesumo senggelinafi logogin fano, Andiba re o kweang andoma bene mondogat namelmel mene hilingisogo foumo afuni kwe andi kwe lagik wagik ikhi logogun mondok lek.

¹⁶ Nen at Nuh inom, Daniel inom, Ayub inom andoma logoilepma meneba nen ogore, An Allah neluk mondok welagirek mene, Tuhan Lego Mondok welagirek mene nenuba hilingi'mo re, iren ap misik iluk ogo ekhe agap telilep legat, it inonggwarek inagainafuri meneba nen ogore inagap telinabu lek hak. We o kweang andiba re lei enek pirimhogo taik ugu kwelek, it inonggwarek inamu nek inagap telasu hago.

¹⁷ Ekhere An nen o kweang yiba weim lakfei wesimbik An nen yagati logolik, afuni inom, wam inom, mondogat leget fisan, iluk yagasigin halok legabesu hagaro.

¹⁸ Nen it ap inebe henagan andem andoma logoilepma nen ogore iren ap misik iluk ogo ekhe inagap telogo fiselep legat, An Allah neluk welagirek mene, Tuhan Lego Mondok welagirek mene nenuba hilingi'more, it inagainafuri meneba nen ogore nen ap amu mene iluk inagap telu lek hagat. We it inamuat inagap tel a'lebo.

¹⁹ Ekhe re An nen ou amben weak mene o andiba lakfei wesigin halok, An na'mage lagaikherek mene andi afuni inom wam inom andoma leget fisa hak.

²⁰ Nen it Nuh inom Daniel inom Ayub inom, aremnogo andoma logoilepma oba nen ogore iren ap misik iluk ogo ekhe inagap telilep legat, An Allah neluk mondok welagirek mene, Tuhan Lego Mondok welagirek mene nenuba hilingi'more, it inagainafuriba nen ogo nen ap amu mene iluk ogo inagap telumo re elo'lek. We it inamu nek iren fano hilingisugun oba inagap telasigin o,” ikhe.

²¹ Tuhan Lego Mondok welagarek mene a'nogo nen ikhi logolik, ”An nen unggum ero enggaminogo mene enggin mondok hokho mene o Yerusalem oba pelak foumo re, afuni inom, yi wam ti wam andoma inom, legetfisan o. Unggum andi re weim inom, sumburu ouwak inom, ou amben weak mene inom, olomene aik anini mene inom inoba lakfei wesigin.

²² Nen it ekhe polokhogo wulibi lambik inagainafuri inagap telinabugun oba nen ogore, iren hat hambit weri'lagwi mene andoma heilenggen fut fisano. It inanini mondok weak mene andoma fut fisambik he An nen it Yerusalem mene inoba unggum wogisagain mene andi faget harogo helu asigin.

²³ Andi nen ekhe An nen hilingiti lagi mene andoma re ero weregen hilingiti lagi iluk helu asiginat. Iluk An Tuhan Lego Mondok welagirek mene a'nogo nen nane mondogat igi o,” iluk ikhe.