YEHEZKIEL 13 - Allah Wene Fano Wene Hupla Inane

Nabi ineranhogo wene lalinafarek mene faget husumbi yagaisasikhe wene

¹ Tuhan nen an noba yaganeti logolik,

² ”Afuni wa'lagaikharek mene yi re, nabi Israel mene andoma inane nen lalogo hobuk hilinglasigin mene yagahisikhi lago iluk ineranen wene agarek mene andoma inoba wenagisan o. Iren An nane ikhi lagi mene andoma holuageluk yagaisano,” iluk yaganete.

³ Tuhan Lego Mondok welagarek mene a'nogo nen ikhi logolik, ”Nabi kembu mene andoma re alomat lakhowak! Iren menenei ebetaresigen he amurogo ekhe hogosik igik, inabikanggo wokhagaresigen he ineranhogo wene igik, ili'lagwi.

⁴ Israel mene yi sani, hit mene nabi andoma re we alomarogo hangge werek, it he mene olomene serigala o kota halik halokhogo hilingik kwe welagarek higit werek.

⁵ Iren inawi inebe welagaikharekwe leget pa'leget waganek mene langgukhigik laga mene omanogo kagalek welagi'lek, nen leget pak mene omanogo obali'mo pugunhogo wokhigi'legat hilingiri'lagwi. Andiba re linggene An Tuhan nen it inoba unggum fei wesimbik weim liabigin sambul andi re it Israel mene hambuget haluk logou re elo'lek asigin.

⁶ Inabi wokhagarek hak hikhi lago iluk agarek mene inom, yi'nogo ti'nogo asigin iluk agarek mene inom, andoma re ebe lek kwelek ineranhogo wene ili'lagwi. Iren ikhi logolik he An nen ikhe mene iluk agarek oba nen he An nen it lakfisa waga lagi re fuk. A'nogo hilingik kwelek oba nen he iren yi'nogo ti'nogo asigin iluk agarek mene omanogo inendawimo eberek mondok werek andoma re ninggi'nogo asu hak nogo?

^7-8 An Tuhan Lego Mondok welagirek mene a'nogo nen it inoba nane yagaisikhi lagi, ”Hinabikanggoba hikhi lagep mene andoma re eberogo mene re lego, nen yi'nogo hilinglasigin iluk ikhi lagep mene andoma re lalinafi lagep. Hiren ikhi logolik andoma mondogat he An nen yaganisikhe mene ikhi lagep, oba nen he An nen hit hinoba a'nogo ekhe yagahisikhi lagi lek oba nen! Andiba re hit he An naselei mene asugun.

⁹ Yago, hit nabi hinap yi sani, hiren hobuk yi'nogo hilinglasigin iluk ikhi lagep andoma re hinane nen felal haluk yagaisigik, nen hinabikanggoba haluk ikhi lagep mene andoma hinane nen hineranhogo wene lalinafik, ikhi lagepma re, An nen hit hinoba unggum wokhisagain o. Hit he An nagainafuri wene paluogeluk andogotarek oba andoma hinom wene sikhiphogo palhi logogun lek. Hit hinenu re afuni Israel mene inenu palek were'ma anggele'ma nen terogo lakfisagain. Nen hit he hinawi hinonggwarek hinanggweang oba omanogo sugulogo wesugun legat. Andiba re hiren An Tuhan Lego Mondok welagirek mene a'nogo hinelu asugun.

¹⁰ Hit nabi lalinafi lagep mene yoma sani! Hiren An nagainafuri inoba hinane nen lalinafi logolik, wene legengge fano liokhogo logogun iluk lalogo fisikhi lagep. Oba nen wene ebe a'nogo hilingik lek kwelegat! An nagainafuri nen he kweang tangge werago meneba leget pa'leget selang-belangengge wanha mene andi re, hit waga logolik timeng oba tamulugun o.

¹¹ Hit nabi lalinafi lagep mene yoma sani, hit hinaleget pa'leget waganek mene andoma re sogoi sielu nen inom, meiso sogenggen es mene nen inom weagesi wesumo re,

¹² mondogat talosigin, nen afuni inebe lombogen heinok wanhi logolik he leget pa'leget waganek mene andoma re ninggi'nogo nen timeng tamulha nogo? ikhi logogun o,” iluk ikhe yagaisano, isikhe.

¹³ Tuhan Lego Mondok welagarek mene a'nogo ane ikhi logolik, ”An na'mageba, leget pak waganek mene andi lilibukhogo feigiluk he An nen sogoi sielu inom, meiso sogenggen hokho mene inom, meiso es mene inom lakfei wesigin.

¹⁴ An na'mage nen he hiren timeng tamulhep mene andi meisalogo pelabigin iluk welagi, nen mondogat erak-kwerak isamo re ubule nek logogin. Leget pa'leget andi langgukhogo waga logolik sebelhinabi wesumo hit hinebe mondogat hinoasigin. Andiba re hiren An hineisena Tuhan welagirek mene a'nogo hinelu asugun.

¹⁵ Leget pak andi inom, nen hit timeng tamulhep mene andi inom he, An nen nanini mondok hokho mene a'nogo hit hinoba fugunem hogoin o. Andi nen hobugen An nen hit hinoba ikhi logolik leget pak waganek a'nogo inom, nen hiren timeng tamulhep mene a'nogo inom mondogat lek aga o, iluk yagahisagain,

¹⁶ andi re hit nabi lalinafi lagep mene yoma nen hineranhogo wene yi'nogo ti'nogo ekhe asigin lego, we liole'ma fano lombukhogo logogun iluk Yerusalem faget hinane ikhi lagep, oba nen he a'nogo asigin lek kwelegat ikhi lagebo!” iluk Tuhan Lego Mondok welagarek mene a'nogo nen ikhe.

Hemi nabiage ineranhogo wene lalinafarek mene inobaget husumbi yagaisasikhe wene

¹⁷ Tuhan nen ikhi logolik, ”Afuni wa'lagaikharek mene yi re, yogondak hat he afuni hat hunggulenu mene inanggelekwe andoma mene nen nit he nabiage hemi welago iluk hilingitarek mene andoma heilenggen woginabimbik he wenagisan o,

¹⁸ a'nogo hilingisimbik he An Tuhan Lego Mondok welagi mene a'nogo nen ikhi lagi mene yi it inoba yagaisano: ”Hit he alomat lakhouwogeluk welagebo! Hiren he afuni inebe mondogat yenggerugwi inom inaluendek inom inoba harane ikfisaluk inendawinggen wanuogeluk yanggwik inenggi bene kelfisigik, inunggulasu harasu igisogo inunggul kwe puget fisigik ugunem iren afuni amu mene inomame a'ma sebelinarek logouwageluk hilingiti lagep. Hiren he An nagainafuri andoma inebe ineluk were'ma inom, wa'lagunem inom, hit hinawe a'ma logouwageluk hilingiti lagep, nen hit hinalongen hilingiti lagep mene andiba re hit hinonggwarek hinenggi werek asugun iluk hilingiti lagep.

¹⁹ Hiren gandum ombo miren mene hakhogo inom nen roti kurik mene inom helouwogeluk, An nagainafuri inelokhoma nenu mondok weagerogo fikhi lagep. Afuni weak hilingitarek lek mene re hiren inoati logolik, weak hilingitarek mene unggum inoba fou mene omanogo re hiren ineluk fisikhi lagep. A'nogo hilingiti logolik hiren An nagainafuri lalinafi lagepma re iren hit hinoba eberogo anggili'lagwi andi o,” iluk ikhe yagaisano, isikhe.

²⁰ Tuhan Lego Mondok welagarek mene a'nogo nen nabi hemi andoma inoba ane ikhi logolik, ”Hiren An nagainafuri inebe ineluk werek mene faget inom, wa'lagaikharek mene faget inom hiren nit ninenggiba welago iluk inendawinggen homagaisogo senggan harane ikfuluk ikfisikhi lagep mene andoma re An nen nabithogo kwelakhisikhi lagi. Senggan andoma hit hinenggiba kwelabe'ma An nen telogo wanimbik, afuni hit hinomameba sebelinarek welagep mene andoma re fikhalogo fisagain.

²¹ Harasuba inunggulasu puksek mene andoma re An nen tilip talaphogo hugisambik, nagainafuri wene kwanirek aweneba lalinafu kwelek murok lagaikharek mene andoma re mondok-mondok faget it inoba nen korogo wogisagain. Andiba re hiren An Tuhan a'nogo hinelu asugun.

²² Ap fano hilingitarek mene omanogore An nen inendawimo ou asu mene ekhe hilinginafi lagi lek oba nen hiren lalinafi lagep oba inendawinggen lebeleget fisikhi lagep. Nen ap weak hiligiri'lagwi mene re inendawimo hokhorogo ekhe inom weak hilingiti logouwak nen it inagap telasugun hanogo iluk hilinginafi lagep.

²³ Yogondak he hinabikanggo wokhikhi lagep mene inom hineranhogo wene lalinafi lagep mene inom omanogo re arat wurep kobok ikhe andi. An nagainafuri re hiren weaget fisikhi lagep oba nen An nen inagap telogo fisagain. Andiba re hiren An hineisena Tuhan welagirek mene a'nogo hinelu asugun o,” ikhe.