YEHEZKIEL 12 - Allah Wene Fano Wene Hupla Inane

Nabi Yehezkiel ebe huginabi lagaikharek mene ilirengge agaikhe wene

¹ Tuhan nen ekhe inom an noba yaganeti logolik yi'nogo ikhe,

² ”Afuni wa'lagaikharek mene yi re, hat hebere afuni unggulenu wene sagalhu mene inanggele'ma welagen. It andi re wene sagalhu mene faget inagaiyek logolik he, ineilenggen werek oba nen he kwelakhili'lagwi lek. Nen inesanggo werek oba nen he holi'lagwi legat andi.

^3-6 Andi faget he, afuni wa'lagaikharek mene yi sa, o linggene werek kwelek arem he ap hele warogo huginabi lagaikharek mene nen hilingitarek higit hasungge kwalugu mene misik ekheba kwalogo fakhan o. A'nogo kwalogo fakhambik he o oan hubagi'lek werek kwelek ap hele warogo huginabi lagaikharek mene hakhogo hebe weinam hogoat lan o. It afuni wene sagali'lagwi mene andoma ineilenggen kwelakharek werek kwelek he hat haiba andi hobat oba folelek ekhe folel fuluk, anggwe folelekwe andi nen hasungge kwalegengge andi waluk wulibino. Wulibi lambik he hasunggwe andi homoloba harogo re, o hubanggo nek lano. Laga logolik he heilenggen humunogo lamo re kwe hat lagain kwe andi re hagain lek. A'nogo hilingisigin mene andi re inunggulenu Israel mene inebe mondogaren ineilenggen heambik iren fut fogoin logouwak. Andiba re it inonggwaregen fut fakhikhi logolik it andi re afuni wene sagalhu mene welago iluk anggogoin a'naga o,” iluk yaganete.

⁷ A'nogo yaganetemo an nen Tuhan nen wene yaganete mene a'nogo higithogo hilingiti. Linggene andi sambul enek, o linggene werek kwelek, nasungge omanogo su kwalogo foukhogo figirik he, it ap o ekhema higilogo laluk logouwogeluk hilingitarek hakhogo hilingiti. O hubagu kwelek aremnogore, an nenggi nen nawi a'nogo folelek ekhe folel figirik, folelek a'nogo elekwe wilifi. Afuni mondogaren ineilenggen werek kwelek sungge yeligengge a'nogo nomoloba harogo waluk lagi.

⁸ Ohealekwe o weirogo re Tuhan nen an noba yaganeti logolik yi'nogo ikhe,

⁹ ”Afuni wa'lagaikharek mene yi re, unggulenu Israel mene wene sagalherek mene andi nen haren hilingisigin mene andoma faget he heinok wokhabugun a'naga.

¹⁰ Andi faget he An Tuhan Lego Mondok welagirek mene a'nogo nen it faget igin mene andoma yagaisano. An nen wene ikhi lagi mene andi re ap raja Yerusalem werek mene inom, afuni o kota andiba inebe mondogat werek mene andoma inom faget yagaisano.

¹¹ An nen hat hoba hilingiti mene andoma re hobuk it inoba hilinginabigin mene mondogat ilirengge re andoma. Andi re it inebe aben huginabi lamo hele warek mene asimbik logogun mene faget enggere it inoba yagaisano.

¹² O hubanggo mumsek werek kwelek it mene inoe raja andi asungge omoloba harogo helaluk wulibi lagain. Afuni nen at ebe wilibuageluk leget pa'leget waganek meneba folelek folel fogoin kwe wilibigin. At eilenggen humunogo higi'legengge kwe yi bene laga lagi iluk mel onggorengge lagain.

¹³ Oba nen he An nen nasu kwalhu asu a'nogo at ebe kwalasuageluk ambe hokhorogo wurilogo fagain. Andi nen An nen at ebe waluk o kota Babel lambik he, andoma nen o kota andi aren eilenggen endephogo ekhe higi'legengge wa'lasigin.

¹⁴ Afuni raja awi sili andiba werek mene inom, it komo wene yagatarek mene inom, raja ebe faget kagalek werek mene inom, andoma inebe mondogat he An nen ekhema-ekhema telfol isagain. It inebe re An nen muginarek lambik inoasi lagain.

¹⁵ It inebe An nen inunggulenu lombok welagaikharekwe inom o kweang it inonggot kwe inom andoma nalek falek hilingfisamo re, iren An Tuhan Allah a'nogo inelu asugun.

¹⁶ It mene andoma mene inebe endebengge nek telinabigin mene re, An nen tok ambisangma inom sumburu ouwagen inom, ou amben weak meneba nen inom, telogo fisagain, Andiba re, iren weak mondok hebak inafe mene hilingiri'lagwi mene andoma faget it afuni pok mene inanggele'ma andoma nen, nit weak hilingiti lago iluk futfakhambik, iren An nobaget Tuhan andi re eberogo aro, iluk fagesugun o,” ikhe.

Nabi oak leigetikhe wene

¹⁷ Tuhan ane an noba yaganeti logolik,

¹⁸ ”Afuni wa'lagaikharek mene yi re, hat sumburu ninggi logolik hailo nen hoak leigeti logoin, nen i ninggi logolik hailo nen leik-leigenggeti logoin.

¹⁹ An Tuhan Lego Mondok welagirek mene a'nogo nen, unggulenu andoma mondogat faget, afuni Yerusalem mene inanggweang oba werek andoma faget igi mene omanogo haren yagaisano. It inamburu ninggi logolik, inoak leigeti logouwak, inagai ninggi logolik inailo nen inoak abolok ikhi logouwak. It afuni mondogat andoma welagaikharek mene nen he hundik-handik wene melalek sagalhu mondok werek andiba re it inanggweang oba andoma pukhogo iringlasigin.

²⁰ O kota-kota yogondak afuni nen mondok hoporogo hilingik awi andoma mondogat wolelenggenhogo fogoin. Andiba re iren An Tuhan welagirek mene a'nogo inelu asugun o,” ikhe.

Oba lirogo agarek mene inamolo welagik, nen wene hilingisuageluk yagaisugu mene re inabit welagik agarek mene faget isikhe wene

²¹ Tuhan ane an noba yaganeti logolik,

²² ”Hat afuni wa'lagaikharek mene yi re, ’It afuni Israel mene wene henarogo agarek mene andi nenahalok inagaiyegen ugu mondok welagaikharek nogo? Inenggi ekhe korok ekhe korok ili'lagoba nen, hobuk asigin mene iluk agarek mene omanogo re ekhe tip ili'logo lek omari! iluk agarek.

²³ Andiba re, An Tuhan Lego Mondok welagirek mene a'nogo nen wene onggo ikhi lagi mene yi yagaisan o: Inane oba lirogo ili'lagwi andi re An nen leget fisamo re, Israel mene were'ma andoma nen inane andi mene ekhe ikhi logogun lek. Andi obali'mo re it inoba yi'nogoluk yagaisano, inenggi asigin oba andire arat asi waga, nen hobuk hilinglasigin iluk ili'lagwi mene andoma mondogat he tibigin enek.

²⁴ Israel meneba andoma inabi wokhagarek hak hagarek mene inom, yi'nogo ti'nogo asigin iluk ineranhogo wene agarek mene inom, ekhe logogin lek.

²⁵ An Tuhan Lego Mondok welagirek mene a'nogo nen hobuk unggulenu Israel meneba nane masigin, An nen mondogat igin mene andoma re higilogo fei lagi'legengge mondogat higirenek asigin. Yago hit afuni wene sagalhi lagep mene yi holini o! Hit hineluk logolik oba An nen hit hinendawinggen wenggelogo iluk yagahisasigi mene andoma higithogo hilingisigin. Iluk An Tuhan Lego Mondok welagirek mene a'nogo nane mondogat igi o,” ikhe.

²⁶ Nen At Tuhan nen an noba ikhi logolik,

²⁷ ”Hat afuni wa'lagaikharek mene yi re, ap Israel mene nen ikhi logolik, haren habiba hikhi lagen mene inom, hobuk asigin mene iluk ikhi lagen mene andoma inom faget he eil uanhogo logombigen hobuk andoma nek he hilinglasigin o ili'lagwi.

²⁸ Andi faget he it inoba yi'nogo yagaisano, An nen mondogat igi mene andoma sugi agi'lek tiphogo nek hilinglasigin o, iluk An Tuhan Lego Mondok welagirek mene a'nogo nane mondogat igi o,” ikhe.